ប៉ូលិសស្រុកគូលែន ខេត្តព្រះវិហារ បានចាប់ខ្លួនអ្នកកាសែត "ឆន្ទៈកូនខ្មែរ" ម្នាក់ និងបុគ្គលិករបស់អង្គការអភិរក្សជលផល ការពារបរិស្ថាន និងសត្វព្រៃម្នាក់ទៀត នៅព្រឹកថ្ងៃពុធ ទី១១ ខែឧសភា។ កាលពីថ្ងៃទី១០ ខែឧសភា កន្លងទៅ ប៉ូលិសស្រុកគូលែន បានឃាត់ខ្លួនអ្នកកាសែត ៧នាក់ទៅសាកសួរពីបទតាមទារលុយពីពលរដ្ឋបររទេះគោដឹកឈើ ព្រមទាំងចាប់ខ្លួនអ្នកកាសែត "កម្ពុជាមែន" ម្នាក់ទៅតាមដីការបស់ព្រះរាជអាជ្ញាអមសាលាដំបូងខេត្តកំពង់ឆ្នាំង ម្ដងមកហើយ។
អ្នកគ្រប់គ្រងសារព័ត៌មាន "ឆន្ទៈកូនខ្មែរ" អំពាវនាវឱ្យអាជ្ញាធរខេត្តព្រះវិហារ ជួយអន្តរាគមន៍ដោះលែងអ្នកយកព័ត៌មានរបស់គេម្នាក់ ព្រមទាំងបុគ្គលិកអង្គការអភិរក្សជលផល បរិស្ថាន និងសត្វព្រៃម្នាក់ទៀត ដែលសមត្ថកិច្ចកំពុងចាប់ឃាត់ខ្លួននៅឯអធិការដ្ឋាននគរបាលស្រុកគូលែន។
ការអំពាវនាវបានធ្វើឡើងបន្ទាប់ពីអ្នកយកព័ត៌មានឱ្យកាសែត "ឆន្ទៈកូនខ្មែរ" ម្នាក់ ឈ្មោះ គង់ គីម និងបុគ្គលិកអង្គការអភិរក្សជលផល បរិស្ថាន និងសត្វព្រៃម្នាក់ ឈ្មោះ កែវ អ៊ីម ត្រូវមនុស្សរបស់ក្រុមហ៊ុនដីសម្បទានសេដ្ឋកិច្ចកូម៉ូលី ចាប់ខ្លួនប្រគល់ទៅឱ្យប៉ូលិសចាត់ការបន្តមក។
ចាងហ្វាងការផ្សាយនៃសារព័ត៌មាន "ឆន្ទៈកូនខ្មែរ" គឺលោក កន ដារ៉ាហ៊ុល។ លោកមានប្រសាសន៍កាលពីព្រឹកថ្ងៃពុធ ទី១១ ខែឧសភា ថា បុគ្គលិករបស់លោកម្នាក់ និងបុគ្គលិកអង្គការអភិរក្សជលផល បរិស្ថាន និងសត្វព្រៃម្នាក់នោះ បានចូលទៅតំបន់ព្រៃសហគមន៍ឃុំគូលែន ខាងជើង ដើម្បីពិនិត្យមើលការកាប់បំផ្លាញព្រៃឈើរបស់ក្រុមហ៊ុនដីសម្បទានសេដ្ឋកិច្ច ឈ្មោះ កូម៉ូលី ទៅតាមពាក្យបណ្ដឹងរបស់ប្រជាពលរដ្ឋ។ ពេលទៅដល់ទីនោះ អ្នកយកព័ត៌មានរបស់លោក ព្រមទាំងបុគ្គលិកអង្គការអភិរក្សជលផលជាច្រើននាក់ បានឃើញរថយន្តធំៗ របស់ក្រុមហ៊ុន កូម៉ូលី កាប់និងដឹកជញ្ជូនឈើហ៊ុបធំៗយកចេញពីព្រៃ។ ក្រុមរបស់លោកក៏ជិះតាមឡានដឹកឈើនោះ ដើម្បីរកកន្លែងដែលក្រុមហ៊ុនស្ដុកឈើ៖ «ពេលចូលមកដល់កន្លែងក្រុមហ៊ុន កូម៉ូលី ក៏មកថតពីខាងក្រៅក្រុមហ៊ុន ហើយក៏ពួកក្រុមហ៊ុនព័ទ្ធចាប់ ២នាក់ហ្នឹង ដកកាមេរ៉ា ដកទូរស័ព្ទអីអស់»។
លោក រ៉ាហ៊ុល បញ្ជាក់ថា មនុស្សរបស់ក្រុមហ៊ុន កូម៉ូលី បានចាប់ខ្លួនអ្នកយកព័ត៌មានរបស់លោកទុកជាច្រើនម៉ោង តាំងពីម៉ោងជាង ៥ល្ងាចថ្ងៃទី១០ ខែឧសភា រហូតដល់ម៉ោងជាង ៨យប់ ទើបប្រគល់ទៅឱ្យប៉ូលិសនៃអធិការដ្ឋានស្រុកគូលែន។
ទោះជាយ៉ាងណាវិទ្យុអាស៊ីសេរី មិនអាចទាក់ទងអធិការនគរបាលស្រុកគូលែន លោក ឡាញ់លី សៀវឡេង ដើម្បីសុំការពន្យល់ជុំវិញការចាប់ខ្លួនអ្នកកាសែតផ្ទួនៗ នៅតំបន់នោះបានថា យ៉ាងណានៅឡើយ។
កាលពីថ្ងៃទី១០ ខែឧសភា កន្លងទៅ អធិការដ្ឋាននគរបាលស្រុកគូលែន បានឃាត់ខ្លួនអ្នកកាសែត ៧នាក់ទៅសាកសួរពីបទគំរាមទារប្រាក់ពីពលរដ្ឋតាមរទេះដឹកឈើ ហើយម្នាក់ក្នុងចំណោមនោះត្រូវចាប់ខ្លួនបញ្ជូនទៅឱ្យតុលាការខេត្តកំពង់ឆ្នាំង។
ប្រធានក្លឹបអ្នកកាសែតកម្ពុជា លោក ប៉ែន បូណា ប្រតិកម្មចំពោះការចាប់ខ្លួនអ្នកកាសែតម្នាក់ និងគលិកអង្គការអភិរក្សម្នាក់ ដោយសារតែការតាមថតសកម្មភាពកាប់ឈើនោះ។ លោកថា ក្រុមហ៊ុនដីសម្បទានសេដ្ឋកិច្ចឯកជន១ មិនមានសិទ្ធិចាប់ខ្លួនអ្នកកាសែតដែលកំពុងបំពេញការងារការពារព្រៃឈើទេ៖ «អ្នកកាសែតគាត់គ្រាន់តែបានថត ហើយក្រុមឯកជនមួយមកចាប់ឃាត់ខ្លួនអ្នកកាសែត យើងមិនអាចទទួលយកបានទេ»។
អ្នកសម្របសម្រួលសមាគមការពារសិទ្ធិមនុស្សអាដហុក ខេត្តព្រះវិហារ លោក ឡោ ចាន់ ក៏ព្រួយបារម្ភចំពោះករណីគំរាមកំហែងទៅលើអ្នកកាសែតដែលតាមថតរូបភាពបទល្មើសព្រៃឈើកាន់តែច្រើនឡើងៗនោះដែរ។
ក្លឹបអ្នកកាសែតកម្ពុជា ឱ្យដឹងថា ចាប់តាំងពីខែឧសភា ឆ្នាំ២០១៥ រហូតដល់ខែឧសភា ឆ្នាំ២០១៦ នេះ ការគំរាមកំហែង និងចាប់ខ្លួនអ្នកកាសែតបានកើនឡើងគួរឱ្យព្រួយបារម្ភ។ របាយការណ៍បង្ហាញថា ក្នុងរយៈពេល ១ឆ្នាំ គឺមានការចាប់ខ្លួនអ្នកកាសែត ១៩ករណី ការប្ដឹងអ្នកកាសែត ៤ករណី និងការគំរាមកំហែងទៅលើអ្នកកាសែតចំនួន ២០ករណី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។