លោក សម រង្ស៊ី ត្រូវ​តុលាការ​ភ្នំពេញ​ផ្ដន្ទាទោស​រឿង​បរិហារកេរ្តិ៍​តាម​ហ្វេសប៊ុក​មួយ​ករណី​ទៀត

ដោយ ខែ សុណង
2016-11-08
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
ប្រធាន​គណបក្ស​សង្គ្រោះ​ជាតិ លោក សម រង្ស៊ី ផ្ដល់​បទសម្ភាសន៍​ដល់​អាស៊ីសេរី នា​ការិយាល័យ​នៅ​រដ្ឋធានី​វ៉ាស៊ីនតោន សហរដ្ឋអាមេរិក កាល​ពី​ថ្ងៃ​ទី​៧ ខែ​តុលា ឆ្នាំ​២០១៦។
ប្រធាន​គណបក្ស​សង្គ្រោះ​ជាតិ លោក សម រង្ស៊ី ផ្ដល់​បទសម្ភាសន៍​ដល់​អាស៊ីសេរី នា​ការិយាល័យ​នៅ​រដ្ឋធានី​វ៉ាស៊ីនតោន សហរដ្ឋអាមេរិក កាល​ពី​ថ្ងៃ​ទី​៧ ខែ​តុលា ឆ្នាំ​២០១៦។
Photo: RFA

ចៅក្រម​ជំនុំ​ជម្រះ​សាលា​ដំបូង​រាជធានី​ភ្នំពេញ នៅ​ថ្ងៃ​ទី​៨ ខែ​វិច្ឆិកា បាន​ប្រកាស​សាលក្រម​សម្រេច​ផាក​ពិន័យ​លោក សម រង្ស៊ី ប្រធាន​គណបក្ស​ប្រឆាំង លើ​ករណី​បរិហារ​កេរ្តិ៍​លោក​នាយក​រដ្ឋមន្ត្រី ហ៊ុន សែន ជា​សាធារណៈ​លើ​ហ្វេសប៊ុក (Facebook)។ ការ​ប្ដឹង​ផ្ដល់​លោក សម រង្ស៊ី បាន​ធ្វើ​ឡើង​ក្រោយ​ពី​លោក​បាន​បង្ហោះ​នៅ​លើ​ទំព័រ​ហ្វេសប៊ុក ដែល​ថា​មន្ត្រី​បក្ស​កាន់​អំណាច​នៃ​គណបក្ស​ប្រជាជន​កម្ពុជា ជា​អ្នក​នៅ​ពី​ក្រោយ​ការ​ជំរុញ​ឲ្យ​មនុស្ស​ចូលរួម​ចុច​ចូល​ចិត្ត ឬ​ចុច Like លើ​ទំព័រ​ហ្វេសប៊ុក​របស់​លោក ហ៊ុន សែន។

លោក សម រង្ស៊ី ប្រតិកម្ម​ចំពោះ​ចំណាត់​ការ​សាលា​ដំបូង​រាជធានី​ភ្នំពេញ ដែល​បាន​ចាត់​ការ​សំណុំ​រឿង​មន្ត្រី​គណបក្ស​ប្រជាជន​កម្ពុជា ប្ដឹង​លោក​លើ​ការ​ចោទ​ប្រកាន់​លោក ហ៊ុន សែន ថា​ទិញ​ការ​ចុច​ចូល​ចិត្ត ឬ Like facebook ក្លែងក្លាយ ថា​ជា​រឿង​ឥត​ប្រយោជន៍។

លោក សម រង្ស៊ី ប្រធាន​គណបក្ស​សង្គ្រោះ​ជាតិ ថ្លែង​ពី​ប្រទេស​បារាំង នៅ​ថ្ងៃ​ទី​៨ វិច្ឆិកា ថា លោក​មាន​ចម្ងល់ និង​អស់​សំណើច​ដែល​ថា តុលាការ​បែរ​ជា​សម្រេច​ឲ្យ​លោក​បង់​ប្រាក់​ពិន័យ​ចូល​រដ្ឋ គួរ​ណា​តែ​ឲ្យ​លោក​បង់​ពិន័យ​ទៅ​លោក ហ៊ុន សែន ផ្ទាល់។ លោក​ថា នេះ​ជា​រឿង​បោក​បញ្ឆោត​ប្រជាពលរដ្ឋ​ដែល​លោក​ហ៊ាន​និយាយ​ការ​ពិត ដូច្នេះ​លោក​នឹង​មិន​ទទួល​ស្គាល់​សាលក្រម​បែប​នេះ​ទេ។

លោក សម រង្ស៊ី ថ្លែង​ថា«គាត់​មែន​ទែន​ត្រូវ​បង់​ជំងឺ​ចិត្ត​ជូន​ប្រជារាស្ត្រ​ខ្មែរ ពីព្រោះ​ពួក​គាត់​អ្នក​ភូតភរ​ប្រជារាស្ត្រ​ខ្មែរ​ទៅ​ទិញ Like ក្លែងក្លាយ ហើយ​ក្រុមហ៊ុន​អាមេរិកាំង និង​ក្រុមហ៊ុន​ហ្វេសប៊ុក គេ​អាច​បញ្ជាក់​ថា​ទំព័រ​ហ្វេសប៊ុក​លោក ហ៊ុន សែន នេះ គឺ​ពោរពេញ​ទៅ​ដោយ Like ក្លែងក្លាយ។ ដូច្នេះ​បើ​ចង់​ដឹង​ការ​ពិត ទៅ​តតាំង​នឹង​ក្រុមហ៊ុន​ហ្វេសប៊ុក ក្រុមហ៊ុន​នៅ​សហរដ្ឋ​អាមេរិក គេ​ដឹង​ទាំងអស់​ដែល​យើង​ទិញ​ហ្វេសប៊ុក​ក្លែងក្លាយ យើង​បើក​គណនេយ្យ​ក្លែងក្លាយ​ដើម្បី​ផ្ដល់ Like ក្លែងក្លាយ​ឲ្យ​ទៅ​លោក ហ៊ុន សែន ដើម្បី​ឲ្យ​គាត់​អួតអាង​ពី​ប្រជាប្រិយភាព​ក្លែងក្លាយ ដែល​លោក ហ៊ុន សែន គាត់​ដូចជា​កំសាក​ម្ដង​ទៀត គាត់​ឲ្យ​មនុស្ស​កំប៉ិកកំប៉ុក​ចេញ​មក​ប្ដឹង​ខ្ញុំ»

ប្រតិកម្ម​នេះ ធ្វើ​ឡើង​ក្រោយ​ពេល​ចៅក្រម​ជំនុំ​ជម្រះ​សាលា​ដំបូង​រាជធានី​ភ្នំពេញ លោក អ៊ឹម វណ្ណៈ សម្រេច​ផាក​ពិន័យ​លោក សម រង្ស៊ី ក្នុង​ករណី​បរិហារ​កេរ្តិ៍​លោក​នាយក​រដ្ឋមន្ត្រី ហ៊ុន សែន ជា​សាធារណៈ​លើ​ហ្វេសប៊ុក កាល​ពី​ខែ​មីនា ដោយ​តុលាការ​ប្រកាស​សាលក្រម​នៅ​ថ្ងៃ​ទី​៨ វិច្ឆិកា បង្គាប់​ឲ្យ​លោក សម រង្ស៊ី បង់​ថវិកា​ចូល​រដ្ឋ​ចំនួន ១០​លាន​រៀល និង​សង​ជំងឺ​ចិត្ត​លោក​នាយក​រដ្ឋមន្ត្រី ហ៊ុន សែន ចំនួន ១៥​លាន​រៀល។

អ្នក​នាំ​ពាក្យ និង​ជា​ប្រធាន​លេខាធិការដ្ឋាន​រដ្ឋបាល​សាលា​ដំបូង​រាជធានី​ភ្នំពេញ លោក អ៊ី រិន ឲ្យ​អាស៊ីសេរី ដឹង​នៅ​ថ្ងៃ​ទី​៨ វិច្ឆិកា ថា ការ​សម្រេច​ផ្ដន្ទាទោស​នេះ យោង​តាម​មាត្រា​ច្បាប់​៣០៥ នៃ​ក្រម​ព្រហ្មទណ្ឌ។

កាល​ពី​ថ្ងៃ​ទី​៩ ខែ​មីនា ឆ្នាំ​២០១៦ លោក សម រង្ស៊ី បាន​សរសេរ​នៅ​លើ​ទំព័រ​ហ្វេសប៊ុក​របស់​លោក​ថា ថ្ងៃ​នេះ​មាន​ធ្លាយ​ព័ត៌មាន​មួយ​តាម​រយៈ​កាសែត​ភ្នំពេញ​ប៉ុស្តិ៍ ពី​មតិ​ចូល​ចិត្ត ឬ Like ក្លែងក្លាយ​លើ​ទំព័រ​ហ្វេសប៊ុក​របស់​លោក ហ៊ុន សែន។ លោក​ថា ចំនួន​ចូល​ចិត្ត (Like) មួយ​ចំនួន​ធំ​លើ​ទំព័រ​ហ្វេសប៊ុក​លោក ហ៊ុន សែន គឺ​បាន​មក​ពី​ការ​ទិញ ឬ​ជួល​មនុស្ស​ក្រីក្រ​ដែល​អត់​ការងារ​ធ្វើ ឲ្យ​បង្កើត​គណនេយ្យ​ក្លែងក្លាយ ដើម្បី​ផ្ដល់​មតិ​ចូល​ចិត្ត (Like) ឲ្យ​លោក ហ៊ុន សែន។ លោក សម រង្ស៊ី សរសេរ​បន្ត​ថា អ្នក​ដែល​គេ​ជួល​ឲ្យ​ធ្វើ​បែប​នេះ​ច្រើន​ជាង​គេ គឺ​នៅ​ប្រទេស​ឥណ្ឌា (India) និង​ហ្វីលីពីន (Philippines)

ក្រោយ​ពី​ការ​សរសេរ​លាតត្រដាង​ពី​មូលហេតុ​ដែល​ធ្វើ​ឲ្យ​ចំនួន​អ្នក​ចុច​ចូល​ចិត្ត (Like) នៅ​លើ​ទំព័រ​ហ្វេសប៊ុក​របស់​លោក ហ៊ុន សែន កើន​ចំនួន​ច្រើន​នោះ មួយ​ថ្ងៃ​ក្រោយ​មក សមាជិក​គណៈកម្មាធិការ​កណ្ដាល​គណបក្ស​ប្រជាជន​កម្ពុជា លោក សោម សឿន ក៏​បាន​ចេញ​មុខ​ប្ដឹង​ប្រឆាំង​លោក សម រង្ស៊ី វិញ។

ក្នុង​ពាក្យ​បណ្ដឹង​ផ្ញើ​ទៅ​កាន់​តុលាការ​នៅ​ថ្ងៃ​ទី​១០ មីនា លោក សោម សឿន លើក​ឡើង​ថា លោក សម រង្ស៊ី បាន​បង្ហោះ​អត្ថបទ​ដែល​មាន​ខ្លឹមសារ​មួលបង្កាច់​ខុស​ពី​ការ​ពិត ដែល​ថា​លោក សោម សឿន បាន​ណែនាំ​ដល់​មន្ត្រី​របស់​ខ្លួន អ្នក​គាំទ្រ និង​បណ្ដាញ រួម​ទាំង​មន្ត្រី​រាជការ​ស៊ីវិល ប៉ូលិស ទាហាន ដើម្បី​បង្កើត​គណនេយ្យ​ហ្វេសប៊ុក​ក្លែងក្លាយ ក្នុង​គោល​បំណង​ផ្តល់​ការ​ចូល​ចិត្ត (Like) សិប្បនិម្មិត​ដល់​ទំព័រ​ហ្វេសប៊ុក​លោក ហ៊ុន សែន។ លោក​ចាត់​ទុក​ការ​បង្ហោះ​របស់​លោក សម រង្ស៊ី នេះ ថា​បាន​ធ្វើ​ឲ្យ​ប៉ះពាល់​ដល់​កិត្តិយស​ថ្នាក់​ដឹក​នាំ​ជាតិ និង​រូប​លោក​ធ្ងន់ធ្ងរ។ លោក សោម សឿន ទាមទារ​តុលាការ​ឲ្យ​ផ្ដន្ទាទោស​លោក សម រង្ស៊ី តាម​ច្បាប់ និង​ទាមទារ​សំណង​ជំងឺ​ចិត្ត​ពី​លោក សម រង្ស៊ី ចំនួន ២០​លាន​រៀល ដែល​ស្មើ​ប្រមាណ ៥​ពាន់​ដុល្លារ​អាមេរិក៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
  • បោះពុម្ព
  • ចែករំលែក
  • អ៊ីម៉ែល

រស្មីបណ្ណាល័យ ច័ន្ទឆាយា

ពី New York, NY

ទៀតហើយ គឹតទៅលើសពីជំនាន់ ពុល ពត ទៀត និយាយអីមិនបាន រដ្ឋារកស៊ីបានខាងប្តឹង អាងតែតុលាការ ជាស្ពានសម្រាប់ឆ្លងតែគណបក្សប្រជាជន ឲ្យតែនឹកឃើញ មិនពេញចិត្ត ប្តឹង ខ្លួនជាអ្នកខុស ដល់គេនិយាយឲ្យដឹងខ្លួន បែទៅជា ស្អីគេ (បរិហារកេរ្តិ៍​) ពាក្យនេះ CPPរកស៊ីបានណាស់ នេះគឺជាមុសរបបរបស់ពួក CPP ហើយ បើមិននិយាយល្អពីក្រុមខ្លួន ចាប់ឡើងតុលាការ ហើយ គុកតែម្តង តែរាល់អំពើរថោកដែលបក្សខ្លួនបានធ្វើ នឹង កំពុងធ្វើ មិនដែលទទួលឡើយ ហើយមិនដែលធ្វើល្អម្តងណាសោះ គួរតែធ្វើល្អខ្លះទៅ គ្រេងបានសន្លឹកឆ្នោតមកវិញខ្លះ គួរឲ្យអាណឹត គណបក្សប្រជាជន ណាស់ ព្រោះតែមានមន្រ្តីអែបអប ច្រើន និយាយសរសើទាំងមិនដឹង ១០ ក៏ចេះតែនិយាយ សមជាមួយ ហ៊ុន សែន ស៊ីជោផង អស់អីក៏អស់ទៅ ឲ្យតែបានសរសើរទាំងងរងើន ចេះធ្វើភ្លើ ហើយអួតថាល្អ មានទាំងដំណែងឲ្យទៀតផង នេះគឺផ្លើសុទ្ធតែម្តង

Nov 08, 2016 08:00 PM

គេហទំព័រ​ទាំងមូល