គ្រួសារកញ្ញា សាសា ថាមិនទាន់ទទួលបានយុត្តិធម៌ពេញលេញពីតុលាការ
2016.02.16
អតីតពិធីការិនីទូរទស្សន៍ កញ្ញា ឯក សុជាតា ហៅ សាសា ថ្លែងប្រាប់អ្នកសារព័ត៌មានក្រោយចេញពីឆ្លើយបំភ្លឺនៅសាលាដំបូងរាជធានីភ្នំពេញ កាលពីថ្ងៃទី១៧ ខែកក្កដា ឆ្នាំ២០១៥។
គ្រួសាររបស់អតីតពិធីការិនីទូរទស្សន៍ស៊ី.ធី.អិន (CTN) កញ្ញា ឯក សុជាតា ហៅ សាសា ដែលជាជនរងគ្រោះក្នុងអំពើហិង្សាលើរាងកាយ ថាមិនទាន់ទទួលបានយុត្តិធម៌ពេញលេញទេ បន្ទាប់ពីតុលាការក្រុងភ្នំពេញ សម្រេចឲ្យជនដៃដល់ លោក សុខ ប៊ុន អនុវត្តទោសក្នុងពន្ធនាគារ ១០ខែ ដែលមានន័យថា នៅសល់ពេលតែ ៣ខែទៀតប៉ុណ្ណោះ ទណ្ឌិតរូបនេះនឹងរួចខ្លួន។ មន្ត្រីសង្គមស៊ីវិលរិះគន់ថា ប្រព័ន្ធតុលាការសព្វថ្ងៃនេះ នៅតែអនុវត្តស្តង់ដារពីរក្នុងច្បាប់តែមួយ។
គ្រួសាររបស់កញ្ញា សាសា និយាយថា នឹងមិនប្តឹងជំទាស់សាលក្រមរបស់សាលាដំបូងរាជធានីភ្នំពេញ ទៅសាលាឧទ្ធរណ៍នោះទេ បើទោះបីជាពួកគេអះអាងថា សាលក្រមនេះនៅមិនទាន់ផ្តល់យុត្តិធម៌ពេញលេញក្ដី។
កាលពីថ្ងៃទី១៥ ខែកុម្ភៈ តុលាការក្រុងភ្នំពេញ បានផ្ដន្ទាទោសឲ្យលោក សុខ ប៊ុន អតីតជាឧកញ៉ា និងជាប្រធានក្រុមអ្នកវាយតម្លៃអចលនទ្រព្យនៅកម្ពុជា ជាប់ពន្ធនាគារ ៣ឆ្នាំ ប៉ុន្តែតម្រូវឲ្យអនុវត្តទោសក្នុងពន្ធនាគារ ១០ខែ រាប់ពីថ្ងៃចាប់ខ្លួន និងពិន័យជាប្រាក់ចំនួន ៦លានរៀល ពីបទហិង្សាដោយចេតនាមានស្ថានទម្ងន់ទោស បន្ទាប់ពីលោកបានប្រើហិង្សាវាយតប់ទាត់ធាក់លើកញ្ញា សាសា ឲ្យរងរបួសធ្ងន់ មានទាំងស្លាកស្នាមជាំភ្នែកផង កាលពីដើមខែកក្កដា ឆ្នាំ២០១៥។
លោកឧកញ៉ា អ៊ុត ធី ឪពុកបង្កើតរបស់កញ្ញា សាសា មានប្រសាសន៍ថា លោកមិនពេញចិត្តចំពោះសាលក្រមនេះទេ ប៉ុន្តែបើទោះបីជាលោកបន្តប្ដឹងជំទាស់ក្ដី ក៏តុលាការនៅតែរកវិធីសាស្ត្រអោយលោក សុខ ប៊ុន រួចខ្លួនពីទោសទណ្ឌដដែល៖ «បើយើងទៅប្រឆាំងយ៉ាងម៉េច ក៏ត្រូវតែវាអោយរួចទៅហើយ។ កន្លងមកមានជាប់នៅក្នុងពន្ធនាគារអី ឃើញតែនៅក្រៅរហូត ដោយតែងតែធ្វើសំបុត្រថា ព្យាបាលជំងឺអីអ៊ីចឹង។ ខ្ញុំរវល់ការងារច្រើនដែរ ហើយបើនៅតែប្ដឹងចុះឡើងទៅ គិតថា វាអត់បានប្រយោជន៍អី ព្រោះវាអាម៉ាស់មុខប៉ុណ្ណឹងហើយ វាធ្វើអីធ្វើទៅ»។
ឪពុករបស់កញ្ញា សាសា ក៏បដិសេធថា លោកមិនបានទទួលយកលុយមួយកាក់មួយសេនពីលោក សុខ ប៊ុន ទេ ប៉ុន្តែលោកក៏មិនច្បាស់ដែរថា តើកញ្ញា សាសា ទទួលបានប្រាក់សំណងក្រៅផ្លូវការចំនួនប៉ុន្មានពីលោក សុខ ប៊ុន ដើម្បីព្យាបាលមុខរបួសនោះ?
តុលាការបានឃុំខ្លួនលោក សុខ ប៊ុន នៅពន្ធនាគារព្រៃស កាលពីថ្ងៃទី១៨ ខែកក្កដា ឆ្នាំ២០១៥ កន្លងទៅ ហើយនៅសល់តែប្រមាណ ៣ខែទៀតប៉ុណ្ណោះ លោកនឹងត្រូវដោះលែងពីពន្ធនាគារវិញ។ រីឯកញ្ញា សាសា ដែលជាជនរងគ្រោះបានអះអាងថា ពុំបានដឹង និងពុំបានចាប់អារម្មណ៍ចំពោះការប្រកាសសាលក្រមនេះនោះទេ ហើយក៏ចង់បំភ្លេចរឿងនេះចោលតែម្ដង។ កញ្ញា សាសា ក៏បដិសេធដែរថា ការដែលធ្វើមិនដឹងមិនឮនេះ គឺមិនមែនដោយសារតែទទួលលុយសន្ធឹកសន្ធាប់ពីលោក សុខ ប៊ុន ដូចការចុះផ្សាយរបស់សារព័ត៌មានក្នុងស្រុកកន្លងមកឡើយ៖ «ច្បាប់ចែងយ៉ាងម៉េច ខ្ញុំក៏មិនអាចប្រកែកថា វាមិនកើតដែរ ព្រោះហេតុអី ខ្ញុំមិនដឹងថា ច្បាប់យ៉ាងម៉េចតម្រូវអោយជាប់យ៉ាង គឺខ្ញុំអត់ដឹង ហើយណាមួយខ្ញុំក៏មិនយកខួរក្បាលទៅគិត ព្រោះអីឥឡូវខ្ញុំមិនសូវស្រូលខ្លួនក្នុងការគិត»។
ដោយឡែកមេធាវីការពារក្ដីឲ្យកញ្ញា សាសា គឺលោក ពុធ ធាវី ប្រាប់វិទ្យុអាស៊ីសេរី ថា កូនក្ដីរបស់លោក បានទទួលយកសេចក្ដីសម្រេចរបស់សាលាដំបូងនេះហើយ ដោយយល់ថា ការដាក់ទោសទណ្ឌនេះ គឺសមល្មមអាចទទួលយកបាន។
ប្រភពព័ត៌មានដែលអាចជឿទុកចិត្តបាន និងស្និតជាមួយកញ្ញា សាសា ឲ្យដឹងថា លោក សុខ ប៊ុន បានផ្ដល់ប្រាក់សំណងផ្លូវចិត្ត និងព្យាបាលជំងឺចំនួន ១០ម៉ឺនដុល្លារ ទៅកញ្ញា សាសា ដើម្បីបញ្ចប់រឿងតទៅទៀត។ បើទោះបីជា កញ្ញា សាសា ព្យាយាមបដិសេធក្ដី ប៉ុន្តែប្រភពដ៏ទុកចិត្តមួយនេះបញ្ជាក់ថា បើសិនជាមិនទទួលបានប្រាក់សំណងទេនោះ តើកញ្ញា សាសា អាចទទួលយកសាលក្រមផ្ដន្ទាទោសធុនស្រាលបែបនេះ ហើយសម្ងំស្ងៀមគ្មានប្រតិកម្មដូចពេលនេះទេ។
កន្លងមក កញ្ញា សាសា ធ្លាប់និយាយថា នឹងមិនរាថយក្នុងការទាមទាររកយុត្តិធម៌ឡើយ និងថា បើទទួលបានសំណងចំនួន ២លានដុល្លារ នឹងជួយបរិច្ចាគដល់មន្ទីរពេទ្យគន្ធបុប្ផា ព្រមទាំងកាកបាទក្រហមកម្ពុជា ទៀតផង។
វិទ្យុអាស៊ីសេរី មិនអាចទាក់ទងសុំការបញ្ជាក់បន្ថែមពីមេធាវីការពារក្ដីឲ្យលោក សុខ ប៊ុន គឺលោក យិន សុភី បានទេ នៅថ្ងៃទី១៦ ខែកុម្ភៈ។
អ្នកគ្រប់គ្រងបច្ចេកទេសការិយាល័យស៊ើបអង្កេតនៃអង្គការលីកាដូ (LICADHO) លោក អំ សំអាត មានប្រសាសន៍ថា ប្រព័ន្ធតុលាការកម្ពុជាបច្ចុប្បន្ន មិនទាន់ផ្ដល់ភាពស្មើគ្នាចំពោះមុខច្បាប់នៅឡើយទេរវាងប្រជាពលរដ្ឋក្រីក្រសាមញ្ញ និងអ្នកមានលុយ មានអំណាច និងមានតួនាទីក្នុងជួររដ្ឋាភិបាល។ លោកលើកឧទាហរណ៍ជាក់ស្ដែងថា ដូចជាករណី លោក សុខ ប៊ុន អាងមានលុយវាយកញ្ញា សាសា ករណីអតីតប្រធានតុលាការក្រុងភ្នំពេញ លោក អាំង មាលតី ប្រព្រឹត្តអំពើពុករលួយពេលកាន់អំណាច និងករណីអភិបាលក្រុងបាវិត លោក ឈូក បណ្ឌិត ប្រើអំណាចបាញ់កម្មករ នៅខេត្តស្វាយរៀង ជាដើម គឺពួកគេត្រូវបានតុលាការផ្ដន្ទាទោស និងចោទប្រកាន់ក្នុងបទល្មើសមួយដែលស្រាល ដោយអនុវត្តទោសតិចតូចប៉ុណ្ណោះ គឺទោសភាគច្រើនដាក់ព្យួរ ដែលមានន័យថា ជនល្មើសមិនស្ថិតក្នុងពន្ធនាគារ។ ប៉ុន្តែបើបទល្មើសដូចគ្នានេះ បើពលរដ្ឋក្រីក្រសាមញ្ញជាអ្នកប្រព្រឹត្តវិញ គឺត្រូវបានតុលាការចោទប្រកាន់ និងផ្ដន្ទាទោសដាក់ពន្ធនាគារអតិបរមាតែម្ដង។
លោក អំ សំអាត៖ «និយាយពីរឿងយុត្តិធម៌ វាអត់មានគ្រប់គ្រាន់ ហើយវាក៏មិនស្មើភាពគ្នាដែរចំពោះមុខច្បាប់ ហើយករណីនេះ បើខុសពីលោក សុខ ប៊ុន ហើយជាប្រជាពលរដ្ឋសាមញ្ញដែលជាអ្នកប្រព្រឹត្តវិញ ដូច្នេះខ្ញុំគិតថា បើកាត់ទោសបីឆ្នាំ គឺនៅក្នុងពន្ធនាគារ ៣ឆ្នាំហើយ គ្មានការព្យួរទេ»។
លោក អំ សំអាត បន្តថា ប្រសិនបើតុលាការនៅតែបន្តធ្វើដូច្នេះ វានឹងនៅតែបន្តរងការរិះគន់ពីមជ្ឈដ្ឋានជាតិ និងអន្តរជាតិ អំពីការវិនិច្ឆ័យក្នុងការស្វែងរកយុត្តិធម៌សម្រាប់ជនរងគ្រោះ និងធ្វើឲ្យប្រជាពលរដ្ឋបាត់បង់ជំនឿចិត្ត។ លោកថា ប្រព័ន្ធយុត្តិធម៌គឺមានតួនាទីសំខាន់ណាស់សម្រាប់កសាងទំនុកចិត្តពីមហាជន និងលើកស្ទួយនីតិរដ្ឋ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ