គ្រោង​ចាប់​ផ្សឹក​ព្រះសង្ឃ​ដោយសារ​ធ្លាយ​ព័ត៌មាន​ជីក​កំណប់

ព្រះសង្ឃ​នៅ​ឯ​វត្ត​ដាច់​ស្រយាល​មួយ​អង្គ ត្រូវ​បាន​លោក​គ្រូ​ចៅ​អធិការ​វត្ត និង​មេ​ឃុំ ព្រម​ទាំង​សមាជិក​គណៈកម្មការ​វត្ត​មួយ​ចំនួន រៀប​គម្រោង​ចាប់​ផ្សឹក និង​បណ្ដេញ​លោក​ចេញ​ពី​អារាម ដោយ​ចោទ​ប្រ​កាន់​ថា ព្រះសង្ឃ​អង្គ​នេះ​បាន​ធ្វើ​ឲ្យ​បែក​ធ្លាយ​ការសម្ងាត់​ស្ដីពី​ការ​ជីក​បាន​កំណប់​ក្នុង​ឫស​សីមា​វត្ត​បូរាណ​មួយ។
ដោយ មណ្ឌល កែវ
2012-11-27
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
ព្រះសង្ឃ ៣០៥
២៧-វិច្ឆិកា-២០១២៖ ព្រះតេជព្រះគុណ អ៊ុំ យ៉ាង ព្រះសង្ឃ​ដែល​រង​ការ​បង្ខំ​ឲ្យ​សឹក​ពី​មេ​ឃុំ និង​គណៈកម្មការ​អាចារ្យ​វត្ត​​បឹងខ្នារ ស្ថិត​ក្នុង​ឃុំ​ខ្នារឆ្មារ ស្រុក​សាមគ្គីមានជ័យ ខេត្ត​កំពង់ឆ្នាំង។
RFA/Mondulkeo

ព្រះសង្ឃ​នៅ​វត្ត​បឹងខ្នារ ស្ថិត​ក្នុង​ឃុំ​ខ្នារឆ្មា ស្រុក​សាមគ្គីមានជ័យ កំពុង​ព្រួយ​បារម្ភ​ពី​ការ​ចាប់​ផ្សឹក​ដោយ​បង្ខំ​ពី​សំណាក់​លោកគ្រូ​ចៅ​អធិការ គណៈកម្មការ​អាចារ្យ និង​លោក​មេឃុំ ដោយសារ​ព្រះអង្គ​ធ្វើ​ឲ្យ​បែក​ធ្លាយ​ការសម្ងាត់​ស្ដីពី​ការ​ជីក​បាន​កំណប់​ក្នុង​ឫស​សីមា​វិហារ​វត្ត​បូរាណ​មួយ​នៅ​ទី​នោះ។

ព្រះសង្ឃ​នាម អ៊ុំ យ៉ង់ បាន​ឲ្យ​ដឹង​នៅ​ព្រឹក​ថ្ងៃ​ទី​២៧ វិច្ឆិកា ពី​មូលហេតុ​ដែល​ព្រះអង្គ​ដាច់​ចិត្ត​ទម្លាយ​រឿង​នេះ​ឲ្យ​ដឹង​ជា​សាធារណៈ​នោះ គឺ​មក​ពី​ព្រះអង្គ​បារម្ភ​ក្រែង​មាន​ការ​បាត់បង់​ទ្រព្យ​សម្បត្តិ​រួម ដោយ​មហិច្ឆតា​មនុស្ស​មួយ​ក្រុម​ដែល​មាន​ចិត្ត​មិន​ស្មោះ និង​ព្រះពុទ្ធ​សាសនា។

ព្រះសង្ឃ អ៊ុំ យ៉ង់៖ «ក្រោយ​មក​គេ​លក់​អស់​មួយ​ចំនួន​ហើយ អាត្មា​អត់​ដឹង​ទេ អាត្មា​ដឹង​តែ​តាម​លោក​ចៅ​អធិការ​វត្ត តែ​អាត្មា​ក៏​បាន​ស៊ីញ៉េ​ដឹង​ឮ​ដែរ។ មិន​មែន​តែ​អាត្មា​ម្នាក់​នោះ​ទេ គឺ​មាន​ចាស់​ព្រឹទ្ធាចារ្យ​មួយ​ចំនួន​ទៀត​ដឹង​ឮ​ដែរ តែ​គេ​បាន​ប្រាប់​ថា កុំ​ឲ្យ​ផ្សព្វផ្សាយ​បំផ្លើស​ការ​ពិត។ តាម​ពិត​អាត្មា​មិន​បាន​បំផ្លើស​ការ​ពិត​ទេ...»

ការ​បញ្ចេញ​ព័ត៌មាន​ស្ដីពី​ការ​ជីក​បាន​កំណប់​នេះ​ត្រូវ​បាន​លោកគ្រូ​ចៅ​អធិការ​គណៈកម្មការ​អាចារ្យ និង​លោក​មេ​ឃុំ មិន​ពេញ​ចិត្ត និង​មាន​គម្រោង​ផ្សឹក​ព្រះសង្ឃ​អង្គ​នេះ។ នៅ​ថ្ងៃ​ទី​១៥ ខែ​វិច្ឆិកា ឆ្នាំ​២០១២ គណៈកម្មការ​វត្ត​បាន​ដើរ​អោយ​ប្រជាពលរដ្ឋ​ក្នុង​ភូមិ​ផ្ដិត​មេដៃ​ដើម្បី​ផ្សឹក​លោក អ៊ុំ យ៉ង់ ហើយ​នៅ​ព្រឹក​ថ្ងៃ​ទី​២៧ គណៈកម្មការ​អាចារ្យ និង​លោក​មេ​ឃុំ​បាន​ធ្វើ​ការ​ប្រជុំ​ក្នុង​វត្ត​ស្តី​អំពី​ការ​ផ្សឹក​នេះ។

យ៉ាង​នេះ​ក្ដី ពុទ្ធបរិស័ទ​ចំណុះ​ជើង​វត្ត​ជា​ច្រើន​នាក់ បាន​ប្រឆាំង​ចំពោះ​បញ្ហា​នេះ។

បុរស​អ្នក​ភូមិ​ឈ្មោះ សោម សារ៉ាន់ បាន​ឲ្យ​ដឹង​ថា លោក​មិន​យល់​ស្រប​ចំពោះ​ការ​ផ្សឹក​ព្រះសង្ឃ អ៊ុំ យ៉ង់ ទេ ព្រោះ​សង្ឃ​អង្គ​នេះ​មាន​ព្រះទ័យ​ល្អ​ជួយ​យកអាសា​ពុទ្ធ​បរិស័ទ​គ្រប់​គ្នា៖ «គោលដៅ​ហ្នឹង គឺ​គេ​ចង់​ផ្សឹក​លោក​តែម្ដង តែ​លោក​អង្គ​នេះ​មាន​ព្រះទ័យ​ល្អ​ណាស់ ធ្លាប់​បាន​ជួយ​សង្គ្រោះ​មនុស្ស​ច្រើន​ណាស់ ព្រោះ​លោក​ជា​គ្រូ​ថ្នាំ​បូរាណ។ ប្រជាពលរដ្ឋ​នៅ​ទី​នេះ​ស្រឡាញ់​លោក​ច្រើន»

យ៉ាង​ណា​នេះ​ក្ដី អនុ​ប្រធាន​មន្ទីរ​ធម្មការ និង​កិច្ចការ​សាសនា​ខេត្ត​កំពង់ឆ្នាំង គឺ​លោក វ៉ាន់ សុធី បាន​ឲ្យ​ដឹង​នៅ​រសៀល​ថ្ងៃ​ទី​២៧ វិច្ឆិកា ថា ព្រះសង្ឃ អ៊ុំ យ៉ង់ នឹង​មិន​ត្រូវ​បាន​ផ្សឹក​ឡើយ បើ​គ្រាន់​តែ​ព្រះអង្គ​ផ្សព្វផ្សាយ​ព័ត៌មាន​ស្ដីពី​ការ​ជីក​បាន​កំណប់​ក្នុង​ឫស​សីមា​វត្ត​បូរាណ​នោះ៖ «ខ្ញុំ​ចាត់​ឲ្យ​ក្រុម​ការងារ​ចុះ​ទៅ ២​នាក់​ហើយ ដើម្បី​ស្រាវជ្រាវ​បញ្ហា​នេះ។ ប៉ុន្តែ​ជា​រួម គឺ​ទាំង​ខាង​ធម្មការ​ខេត្ត ទាំង​ព្រះអង្គ​មេគណ​វត្ត បាន​ពិភាក្សា​គ្នា​រួច​ហើយ យើង​គ្មាន​គោលការណ៍​ណា​ដែល​ទៅ​ផ្សឹក​លោក​ដោយ​គ្រាន់​តែ​លោក​ផ្ដល់​ព័ត៌មាន​ដល់​អ្នក​កាសែត​នោះ​ទេ សូម្បី​តែ​គិត​ក៏​គ្មាន​ដែរ»

ប្រភព​ពី​ពុទ្ធ​បរិស័ទ​បាន​ឲ្យ​ដឹង​ថា ក្រោយ​ពី​រក​ឃើញ​វត្ថុ​បូរាណ​នោះ​មក គណៈកម្មការ​អាចារ្យ ចៅអធិការ មេ​ឃុំ បាន​សម្រេច​អោយ​មនុស្ស​តែ ៥-​៦​នាក់​ប៉ុណ្ណោះ ជីក​យក​វត្ថុ​បូរាណ​ចេញ​ពី​អន្លង់​សីមា ហើយ​ធ្វើ​ឡើង​នៅ​ពេល​យប់។ ពេល​ប្រមូល​បាន​វត្ថុ​បូរាណ​ទាំង​នោះ​មក​ហើយ គណៈកម្មការ​អាចារ្យ ចៅ​អធិការ និង​មេ​ឃុំ​ប្រហែល ២០​នាក់ ដែល​ក្នុង​នោះ​មាន​ព្រះតេជព្រះគុណ អ៊ុំ យ៉ង ដែរ បាន​ពិនិត្យ​វត្ថុ​ទាំង​នោះ រួច​បាន​ដាក់​កិច្ច​សន្យា​ថា បើ​អ្នក​ណា​ធ្វើ​ការ​ផ្សព្វផ្សាយ​ចេញ​ទៅ​ខាង​ក្រៅ ត្រូវ​ទទួល​ខុស​ត្រូវ​ចំពោះ​មុខ​ច្បាប់។

បន្ទាប់​មក​គេ​ក៏​សម្រេច​ឲ្យ​លោក​ចៅ​អធិការ​វត្ត​នាម នួន ស៊ីណាត់ យក​វត្ថុ​បូរាណ​ដែល​មាន​តម្លៃ​ទៅ​លក់។ តែ​ដោយ​ការ​លក់​បាន​ប្រាក់​តិចតួច​ពេក (៤.៧២០.០០០​រៀល) ធ្វើ​អោយ​មាន​ការ​សង្ស័យ ហើយ​ក៏​មាន​ការ​ផ្ដល់​ព័ត៌មាន​ឲ្យ​ចុះ​ផ្សាយ​ក្នុង​ទំព័រ​កាសែត ទើប​កើត​ជា​រឿង​ចង់​ផ្សឹក​ព្រះតេជព្រះគុណ អ៊ុំ យ៉ង់ យ៉ាង​ដូច្នេះ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (3)
  • បោះពុម្ព
  • ចែករំលែក
  • អ៊ីម៉ែល

អ្នក​អាន​អនាមិក

សង្ឃក៏ចោរ​ អាចារ្យក៏ចោរ​ មេឃុំក៏ចោរ គណះកម្មការវត្តក៏ចោរ ថ្នាក់ដឹកនាំក៏ចោរ តើព្រះពុទ្ធសាសនារីកចំរើនម៉េចរួច។

Dec 05, 2012 03:53 AM

សុំមិនបញ្ចេញឈ្មោះ

ពី បាត់ដំបង

គួរតែរករឿង អ្នកយកវត្ថុបូរាណ្យទៅលក់ មិនមែនរករឿងអ្នករាយការណ៏នុះទេ ហ្នឹង ហើយសុភាសិទខ្មែរបានពោលថា ( ស្វាលួច ស៊ីបាយ លៀបមាត់ពពែរ សូមជួយពិនិត្យផង

Dec 02, 2012 08:01 AM

អ្នក​អាន​អនាមិក

ពី សៀមរាប

អ្វីគ្រប់យ៉ាងកើតឡើងព្រោះលាភសក្ការៈគ្រោបសង្កត់។ប៉ុន្តែទោះជាយ៉ាងណាក្តីបើគ្រាន់តែរឿងប៉ុណ្ណឹង វាមិនទាន់ដល់ទោសដែលត្រូវចាប់ផ្សឹកនោះទេ។ បើមិនជឿ សូមមេត្តាពិនិត្យសិក្សាក្នុងច្បាប់វិន័យព្រះពុទ្ធសាសនាទៀតចុះ។

Nov 28, 2012 09:18 AM