ការស្នើឡើងនេះបានធ្វើឡើងដោយលោក សុន ឆ័យ ដែលជាសមាជិករដ្ឋសភានិងជាប្រធានគណៈកម្មការទី៥ ទទួលបន្ទុកខាងកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាននៃរដ្ឋសភា ក្នុងគ្រាដែលព្រះបរមនាថ នរោត្តម សីហមុនី គ្រោងនឹងយាងធ្វើទស្សនកិច្ចនៅក្នុងប្រទេសវៀតណាម ពីថ្ងៃទី២៤ ដល់ថ្ងៃទី២៦ ខែមិថុនា នេះ ហើយព្រះអង្គនឹងថ្វាយកម្រងផ្កាដល់ផ្នូរមេដឹកនាំកុម្មុយនីស្តវៀតណាមហូ ជីមិញ ផងដែរ ។
គួរជម្រាបថា ព្រះសង្ឃ ទឹម សាខន ដែលជាចៅអធិការវត្តភ្នំដិនខាងត្បូង ក្នុងខេត្តតាកែវ ត្រូវបានអាជ្ញាធរចាប់បញ្ជូនខ្លួនទៅប្រទេសវៀតណាម ដោយត្រូវបានចោទថា ធ្វើឲ្យខូចសម្ព័ន្ធភាពរវាងកម្ពុជានិងវៀតណាម ហើយត្រូវបានដាក់ពន្ធនាគារតាំងពីខែមិថុនា ឆ្នាំ២០០៧ នៅឯខេត្តមាត់ជ្រូក កម្ពុជាក្រោម ។
លោក សុន ឆ័យ បានស្នើសុំឲ្យព្រះបរមនាថ នរោត្តម សីហមុនី សុំដល់ថ្នាក់ដឹកនាំវៀតណាម រួមទាំង ប្រធានរដ្ឋ លោក ង្វៀន មិញត្រៀត ជួយផ្ដល់សិទ្ធិរស់នៅសមរម្យសម្រាប់ប្រជាពលរដ្ឋខ្មែរក្រោម ដែលសព្វថ្ងៃ ត្រូវបានគេរាយការណ៍មកថា កំពុងទទួលរងទុក្ខបុកម្នេញពីអាជ្ញាធរវៀតណាម ៕