មន្ត្រី​បក្ស​សង្គ្រោះ​ជាតិ​ស្វែង​យល់​ពី​ការ​លំបាក​របស់​ពលរដ្ឋ​ខេត្ត​ពោធិ៍សាត់

ក្នុង​បំណង​ទាក់​ទាញ​ការ​គាំទ្រ​របស់​ប្រជាពលរដ្ឋ​ចំពោះ​គណបក្ស​សង្គ្រោះ​ជាតិ ដែល​ជា​គណបក្ស​បង្រួប​បង្រួម​រវាង​គណបក្ស សម រង្ស៊ី និង​គណបក្ស សិទ្ធិ​មនុស្ស មន្ត្រី​ជាន់​ខ្ពស់​នៃ​គណបក្ស​ទាំង​ពីរ បាន​ចុះ​មក​ជួប​ប្រជាពលរដ្ឋ​ជា​លើក​ដំបូង​ក្នុង​ខេត្ត​ពោធិ៍សាត់ ជាមួយ​ក្ដី​សង្ឃឹម​ថា​នឹង​ទទួល​បាន​អាសនៈ​ក្នុង​រដ្ឋសភា សម្រាប់​ការ​បោះ​ឆ្នោត​សកល​នា​ខែ​កក្កដា ឆ្នាំ​២០១៣ ខាង​មុខ។
ដោយ មណ្ឌល កែវ
2012-11-27
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
អេង ឆៃអ៊ាង សមាជិក​ព្រឹទ្ធសភា​មក​ពី​គណបក្ស សម រង្ស៊ី ៣០៥
លោក អេង ឆៃអ៊ាង សមាជិក​ព្រឹទ្ធសភា​មក​ពី​គណបក្ស សម រង្ស៊ី ជួប​ជាមួយ​ប្រជាពលរដ្ឋ​នៅ​ស្រុក​កណ្ដៀង ខេត្ត​ពោធិ៍សាត់ កាល​ពី​ថ្ងៃ​ទី២៦ ខែ​វិច្ឆិកា ឆ្នាំ​២០១២។
RFA/Mondul Keo

មន្ត្រី​ជាន់​ខ្ពស់​នៃ​គណបក្ស សម រង្ស៊ី និង​គណបក្ស សិទ្ធិ​មនុស្ស បាន​ចុះ​មក​ខេត្ត​ពោធិ៍សាត់ រយៈពេល ២ថ្ងៃ ដើម្បី​ស្វែង​យល់​ពី​ការ​លំបាក និង​សំណូម​ពរ​របស់​ប្រជាពលរដ្ឋ​ក្នុង​ខេត្ត​នេះ។

លោក អេង ឆៃអ៊ាង ជា​សមាជិក​ព្រឹទ្ធសភា​មក​ពី​គណបក្ស សម រង្ស៊ី លោក​មាន​ប្រសាសន៍​ឲ្យ​ដឹង​នៅ​ព្រឹក​ថ្ងៃ​ទី២៦ វិច្ឆិកា ពី​គោល​បំណង​នៃ​ការ​ចុះ​មក​ជួប​ប្រជាពលរដ្ឋ​នៅ​ខេត្ត​ពោធិ៍សាត់ នេះ​ថា ដើម្បី​ឲ្យ​ដឹង​ពី​បំណង​ប្រាថ្នា​របស់​ប្រជាពលរដ្ឋ។ សមាជិក​ព្រឹទ្ធសភា​រូប​នេះ​បន្ត​ថា ជំនួប​នេះ​ក៏​ដើម្បី​ប្រាប់​ឲ្យ​សមាជិក​គណបក្ស​ទាំង​ពីរ គឺ​គណបក្ស សម រង្ស៊ី និង​គណបក្ស សិទ្ធិ​មនុស្ស ក្នុង​ខេត្ត​នេះ​ដឹង​បន្ថែម​អំពី​ការ​បង្រួប​បង្រួម​រវាង​គណបក្ស​ទាំង​ពីរ ក្នុង​គោល​ដៅ​ប្រកួត​ប្រជែង​ជាមួយ​គណបក្ស​កាន់​អំណាច ក្នុង​ការ​បោះ​ឆ្នោត​សកល​នា​ឆ្នាំ​២០១៣ ខាង​មុខ​នេះ។

លោក អេង ឆៃអ៊ាង៖ «ខ្ញុំ​មាន​ជំនឿ​ថា ប្រជាពលរដ្ឋ​ក្នុង​ខេត្ត​ពោធិ៍សាត់ លោក​ចង់​ឲ្យ​មាន​ការ​ផ្លាស់​ប្ដូរ ព្រោះ​លោក​រង​គ្រោះ​ច្រើន​ណាស់ ដូច​ជា​រឿង​ដីធ្លី​ដែល​រដ្ឋាភិបាល​បាន​ផ្ដល់​ឲ្យ​ក្រុមហ៊ុន​ភាពីម៉ិច ធ្វើ​ឲ្យ​ប៉ះពាល់​ដី​ស្រែ​ចម្ការ​របស់​គាត់ បាត់​បង់​ព្រៃ​ឈើ ការ​បូម​ខ្សាច់​នៅ​តាម​ដង​ស្ទឹង​ពោធិ៍សាត់ ធ្វើ​ឲ្យ​បាក់​ដី​ប៉ះពាល់​ដី​ស្រែ​ពួក​គាត់។ ប្រជាពលរដ្ឋ​លោក​មិន​និយាយ​ទេ តែ​ខ្ញុំ​មាន​ជំនឿ​ថា​លោក​នឹង​ធ្វើ​ការ​ផ្លាស់​ប្ដូរ​ក្នុង​ការ​បោះ​ឆ្នោត​ពេល​ខាង​មុខ»

ប្រធាន​គណបក្ស សិទ្ធិ​មនុស្ស ប្រចាំ​ខេត្ត​ពោធិ៍សាត់ លោក ជា លី មាន​ប្រសាសន៍​ថា ការ​ចុះ​ជួប​ប្រជាពលរដ្ឋ​ទាំង ២ថ្ងៃ បាន​បញ្ជាក់​ថា ប្រជាពលរដ្ឋ​ក្នុង​ខេត្ត​នេះ​នៅ​តែ​មាន​ក្ដី​កង្វល់​អំពី​បញ្ហា​ដីធ្លី​ដែល​រង​ផល​ប៉ះពាល់​ជាមួយ​ក្រុមហ៊ុន​ភាពីម៉ិច ដដែល បើ​ទោះ​បី​ជា​ក្រុម​យុវ​និស្សិត​បាន​ចុះ​មក​ជួយ​វាស់​វែង​ជូន​ប្រជាពលរដ្ឋ​បាន​ខ្លះ​ហើយ តែ​នៅ​មាន​ប្រជាពលរដ្ឋ​មួយ​ចំនួន​ទៀត​នៅ​តែ​រង​ផល​ប៉ះពាល់​ដដែល ពុំ​ទាន់​មាន​ការ​ដោះស្រាយ​នៅ​ឡើយ។ ទន្ទឹម​គ្នា​នេះ ប្រជាពលរដ្ឋ​ចង់​ឲ្យ​អ្នក​តំណាង​របស់​គាត់​ជួយ​អន្តរាគមន៍​ឲ្យ​ក្រុមហ៊ុន​ភាពីម៉ិច បើក​ប្រាក់​ខែ​ឲ្យ​ពួក​គាត់​ឲ្យ​បាន​ទៀង​ទាត់​ផង៖ «ខ្ញុំ​ពិនិត្យ​ឃើញ​ប្រជាពលរដ្ឋ ៤​កន្លែង ដែល​គាត់​អញ្ជើញ​ទៅ​ជួប​នោះ មាន​ចិត្ត​រីករាយ​អបអរ​សាទរ និង​ស្ថិត​ក្នុង​ក្ដី​សង្ឃឹម​ក្រោយ​ពី​បាន​ស្ដាប់​ការ​ផ្សព្វផ្សាយ​ពី​គោលការណ៍​របស់​គណបក្ស​សង្គ្រោះ​ជាតិ។ ម្យ៉ាង​ទៀត សមាជិក​ព្រឹទ្ធសភា និង​សមាជិក​រដ្ឋសភា​នៃ​គណបក្ស​ទាំង​២ បាន​សន្យា​ថា​នឹង​ស្វែង​រក​ដំណោះស្រាយ​ពី​បញ្ហា​ប្រាក់​ខែ​ដែល​ក្រុមហ៊ុន​ជំពាក់​នោះ​ជូន​ពួក​គាត់»

មន្ត្រី​ជាន់​ខ្ពស់​នៃ​គណបក្ស សម រង្ស៊ី និង​គណបក្ស សិទ្ធិ​មនុស្ស ដែល​បាន​ចុះ​មក​ខេត្ត​ពោធិ៍សាត់ រយៈពេល ២​ថ្ងៃ​នេះ មាន​លោក អេង ឆៃអ៊ាង ជា​សមាជិក​ព្រឹទ្ធសភា​មក​ពី​គណបក្ស សម រង្ស៊ី និង​លោក អ៊ូ ច័ន្ទរ័ត្ន អនុប្រធាន​គណៈកម្មាធិការ​នាយក​គណបក្ស សិទ្ធិ​មនុស្ស និង​ជា​សមាជិក​អចិន្ត្រៃយ៍​គណបក្ស​សង្គ្រោះ​ជាតិ។

ប្រធាន​ក្រុម​ប្រឹក្សា​ក្រុង​ពោធិ៍សាត់ នៃ​គណបក្ស សម រង្ស៊ី គឺ​លោក រ៉ែម សាមឿន បាន​ឲ្យ​ដឹង​ថា ប្រជាពលរដ្ឋ​មាន​ការ​ចាប់​អារម្មណ៍​ចំពោះ​ការ​បង្រួប​បង្រួម​រវាង​គណបក្ស​ទាំង​២។ លោក​ថា មាន​ប្រជាពលរដ្ឋ​ជាច្រើន​បាន​មក​បញ្ចេញ​មតិ និង​ស្ដាប់​ការ​បកស្រាយ​ពី​ទុក្ខ​កង្វល់​របស់​ពួក​គាត់​ពី​សំណាក់​តំណាង​មក​ពី​គណបក្ស​ប្រឆាំង​ទាំង​២ ដែល​បាន​បង្រួប​បង្រួម​គ្នា​នេះ៖ «ដោយ​សារ​ការ​បង្រួប​បង្រួម​គ្នា​នេះ យើង​សង្ឃឹម​ថា​នៅ​ខេត្ត​ពោធិ៍សាត់ យើង​នឹង​ដណ្ដើម​បាន​កៅអី។ ទី១ យើង​ឃើញ​ថា មាន​ការ​ខុស​ពី​កាល​បោះ​ឆ្នោត​ឃុំ-សង្កាត់ ឥឡូវ​ក្នុង​ការ​ជួប​ជុំ​នេះ​យើង​ឃើញ​ថា​មាន​ការ​គាំទ្រ​ច្រើន​ជាង​ពី​មុន ដោយ​មាន​ទាំង​សមាជិក​គណបក្ស​ហ៊្វុនស៊ិនប៉ិច និង​នរោត្តម រណឫទ្ធិ ចូល​រួម​ស្ដាប់​ផង​ដែរ»

យ៉ាង​នេះ​ក្ដី ក្រុម​មន្ត្រី​សង្គម​ស៊ីវិល​នានា​ប្រចាំ​ខេត្ត​ពោធិ៍សាត់ យល់​ប្រហាក់​ប្រហែល​គ្នា​ថា ក្ដី​សង្ឃឹម​ហាក់​នៅ​ឆ្ងាយ​នៅ​ឡើយ​សម្រាប់​គណបក្ស​សង្គ្រោះ​ជាតិ នេះ បើ​យោង​ទៅ​លើ​ចំនួន​សំឡេង​នៃ​ការ​បោះ​ឆ្នោត​ជ្រើស​រើស​ក្រុម​ប្រឹក្សា​ឃុំ-សង្កាត់​កាល​ពី​ខែ​កក្កដា កន្លង​ទៅ​នៅ​ក្នុង​ខេត្ត​នេះ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (0)
  • បោះពុម្ព
  • ចែករំលែក
  • អ៊ីម៉ែល