ស្របគ្នានេះ គ.ជ.ប. បានស្នើទៅគ្រប់គណបក្សនយោបាយឲ្យត្រៀមលក្ខណៈ និងត្រូវធ្វើសកម្មភាពឲ្យស្របតាមច្បាប់បោះឆ្នោតឲ្យបានទាំងអស់គ្នា ដើម្បីឲ្យដំណើរការបោះឆ្នោតមានលក្ខណៈសេរីត្រឹមត្រូវ និងយុត្តិធ៌ម។
គ.ជ.ប. ប្រកាសឲ្យគណបក្សនយោបាយចូលរួមប្រកួតប្រជែងការបោះឆ្នោតជ្រើសរើសសមាជិកក្រុមប្រឹក្សាឃុំ-សង្កាត់ សំរាប់អាណត្តទី៣ ឲ្យត្រៀមលក្ខណៈដើម្បីបើកយុទ្ធនាការឃោសនារកសំឡេងឆ្នោត ដែលនឹងចូលមកដល់នៅខែឧសភា ឆ្នាំ២០១២។
លោក ទេព នីថា ជាអគ្គលេខាធិការ គ.ជ.ប.។ លោកមានប្រសាសន៍ថា យុទ្ធនាការឃោសនាបោះឆ្នោតសមាជិកក្រុមប្រឹក្សាឃុំ-សង្កាត់ អាណត្តិទី៣ មានរយៈពេល ១៥ថ្ងៃ គឺចាប់ពីថ្ងៃសុក្រ ទី១៨ ខែឧសភា ដល់ថ្ងៃសុក្រ ទី១ ខែមិថុនា ឆ្នាំ២០១២។
លោក ទេព នីថា៖ «គ.ជ.ប. តាមច្បាប់ គឺយើងចាប់ផ្ដើមគ្រប់គ្រងការឃោសនាបោះឆ្នោតនៅក្នុងដំណាក់កាលនៃការឃោសនាបោះឆ្នោត។ សំរាប់ការឃោសនាបោះឆ្នោតឃុំសង្កាត់នេះ នឹងចាប់ផ្តើមពីថ្ងៃទី១៨ ខែឧសភា ដល់ថ្ងៃទី១ ខែមិថុនា ឆ្នាំ២០១២»។
យុទ្ធនាការនេះ គ.ជ.ប. ទាមទារឲ្យគ្រប់គណបក្សនយោបាយទាំងអស់ទទួលខុសត្រូវខ្ពស់ ដោយមិនត្រូវធ្វើសកម្មភាពប្រាសចាកច្បាប់បោះឆ្នោតឃុំ-សង្កាត់នោះទេ។
ទាក់ទងបញ្ហានេះ លោក កឹម សុខា ប្រធានគណបក្សសិទ្ធិមនុស្ស មានប្រសាសន៍ថា បក្សខ្លួននឹងបើកយុទ្ធនាការទ្រង់ទ្រាយធំទូទាំងប្រទេស ពិសេសនៅថ្នាក់មូលដ្ឋាន ដោយលើកពីផែនការអភិវឌ្ឍន៍ឃុំសង្កាត់ ជូនប្រជាពលរដ្ឋពិចារណាមុននឹងឈានដល់បោះឆ្នោតគាំទ្រគណបក្សដែលខ្លួនចិត្តនោះ។
លោក កឹម សុខា ឲ្យដឹងដូច្នេះ «យើងបានត្រៀមឯកសារសំរាប់ឃោសនាមានជាខិត្តប័ណ្ណ ហើយត្រៀមឧបករណ៍សំរាប់ឃោសនាដូចជាមីក្រូ និងឧបករណ៍ផ្សេងៗទៀត»។
ទោះបក្សសិទ្ធិមនុស្សមិនបានដាក់បេក្ខជនឈរឈ្មោះបោះឆ្នោតឲ្យបានគ្រប់ ១.៦៣៣ឃុំ-សង្កាត់ទូទាំងប្រទេសក្តី ក៏ប៉ុន្តែលោក កឹម សុខា បានបញ្ជាក់ថា គណបក្សនេះបានដាក់បេក្ខជនបានជាង ១.០៧០ឃុំ-សង្កាត់ទូទាំងប្រទេស។
ចំណែកគណបក្ស សម រង្ស៊ី វិញ ក៏បានឲ្យដឹងពីផែនការបើកយុទ្ធនាការឃោសនាបោះឆ្នោតឃុំ-សង្កាត់នេះរួចហើយដែរ។
លោក គួយ ប៊ុនរឿន អគ្គលេខាធិការរង និងជាអ្នកតំណាងរាស្ត្រគណបក្ស សម រង្ស៊ី។ លោកថា យុទ្ធនាការនេះបក្សលោកនឹងធ្វើឡើងតាមរយៈខិត្តប័ណ្ណ ឬចុះបើកវេទិកាផ្សព្វផ្សាយផែនការអភិវិឌ្ឍន៍ឃុំ-សង្កាត់ នៅតាមមូលដ្ឋាននីមួយៗ។
លោក គួយ ប៊ុនរឿន៖ «យើងនឹងចុះដល់មូលដ្ឋានតាមភូមិ ក្នុងនោះយើងក៏មានការរៀបចំធ្វើជាមីទីង និងមានការផ្ដល់ជាគោលនយោបាយគណបក្សសំរាប់បេក្ខជនថ្ងៃអនាគតសំរាប់បេក្ខជនមេឃុំ ចៅសង្កាត់គណបក្ស សម រង្ស៊ី ក្នុងការជួយការពារ និងការអភិវឌ្ឍនៅក្នុងមូលដ្ឋានសំរាប់ធ្វើការអភិវឌ្ឍន៍»។
គណបក្ស សម រង្ស៊ី បានដាក់បេក្ខជនឈរឈ្មោះបោះឆ្នោតឃុំ-សង្កាត់បានជាង ១.៦០០ឃុំ-សង្កាត់ទូទាំងប្រទេស ក្នុងចំណោមឃុំ-សង្កាត់សរុប ១.៦៣៣ឃុំ-សង្កាត់។
ពាក់ព័ន្ធនឹងកិច្ចការនេះដែរ ប្រធាននាយកដ្ឋានបូកសរុបនៃខុទ្ទកាល័យគណៈកម្មការកណ្ដាលគណបក្សប្រជាជនកម្ពុជា លោក អ៊ុក គឹមហ៊ាន បានឲ្យដឹងថា យុទ្ធនាការឃោសនាបោះឆ្នោតឃុំ-សង្កាត់អាណត្តិទី៣ បក្សប្រជាជនបានផ្ដល់សិទ្ធិជូនបេក្ខជនតាមឃុំ-សង្កាត់នីមួយៗផ្សព្វផ្សាយ ពីផែនការអភិវឌ្ឍន៍មូលដ្ឋានរបស់ខ្លួន។
លោកថា គណបក្សនេះបានដាក់បេក្ខជនឈរឈ្មោះបោះឆ្នោតបានគ្រប់ទូទាំង ១.៦៣៣ឃុំសង្កាត់នៅទូទាំងប្រទេស ក្នុងនោះមានស្ត្រីចន្លោះពី ២៥ ទៅ ៣០ភាគរយ។
លោក អ៊ុក គឹមហ៊ាន ឲ្យដឹងដូច្នេះ៖ «បេក្ខជននៅតាមឃុំសង្កាត់គេជាអ្នកធ្វើការឃោសនា ព្រោះថា ឃុំ-សង្កាត់នីមួយៗគេមានគំរោងផែនការអភិវឌ្ឍន៍របស់គេ។ ដូច្នេះការឃោសនាហ្នឹង គឺផ្អែកទៅលើគំរោងផែនការអភិវឌ្ឍន៍ទាំងអស់។ វាអាស្រ័យទៅលើបេក្ខជនឃុំសង្កាត់ជាអ្នកឃោសនាផ្ទាល់ រីឯនៅថ្នាក់កណ្ដាល គឺគ្រាន់តែបញ្ជូនឯកសារជូនទេ»។
គ.ជ.ប. បានឲ្យដឹងថា កាលបរិច្ឆេទនៃការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៣ នឹងចាប់ផ្ដើមនៅថ្ងៃអាទិត្យ ទី៣ ខែមិថុនា ឆ្នាំ២០១២។ ការបោះឆ្នោតនេះមានគណបក្សចំនួន ១០ បានឈរឈ្មោះ និងដាក់បេក្ខជនចូលរួមប្រកួតប្រជែង។
បញ្ជីបោះឆ្នោតផ្លូវការឆ្នាំ២០១១ ដែល គ.ជ.ប. បានផ្តល់សុពលភាពសំរាប់បំរើឲ្យការបោះឆ្នោតឃុំសង្កាត់អាណត្តិទី៣ មានអ្នកបោះឆ្នោតសរុបជាង ៩,២លាននាក់ និងមានការិយាល័យបោះឆ្នោតចំនួន ១៨.១០៧ការិយាល័យ និងមានសមាជិកក្រុមប្រឹក្សាឃុំសង្កាត់សរុបចំនួន ១១.៤៥៩៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។