គ្រូ​ពេទ្យ​ស្ម័គ្រ​ចិត្ត​ជួយ​ព្យាបាល​និង​វះកាត់​កុមារ​មាត់​ឆែប

អង្គការ អូប៉េរេសិន ស្មាយ (Operation smile) បាន​នាំ​គ្រូ​ពេទ្យ​ស្ម័គ្រ​ចិត្ត​មក​ពី​ប្រទេស​សិង្ហបុរី ដើម្បី​វះកាត់​កុមារ​មាត់​ឆែប ក្នុង​មន្ទីរ​ពេទ្យ​កំពង់ធំ ដោយ​ឥត​គិត​ថ្លៃ​ចាប់​ពី​ថ្ងៃ​ទី​៥ ដល់ ទី​៩ ខែ​មិថុនា។ ប្រជាពលរដ្ឋ​មួយ​ចំនួន​បាន​សំដែង​ការ​រីករាយ​ចំពោះ​ក្រុម​ពេទ្យ​ស្ម័គ្រ​ចិត្ត​មក​ជួយ​វះកាត់​កុមារ​មាន​មាត់​ឆែប។
ដោយ សេង សេរីរ័ត្ន
2012-06-06
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
កុមារ​មាត់​ឆែប ៣០៥
កុមារ​ដែល​រង់​ចាំ​វះកាត់​មាត់​ឆែប​នៅ​ក្នុង​មន្ទីរ​ពេទ្យ​ខេត្ត​កំពង់ធំ កាល​ពី​ថ្ងៃ​ទី​៦ ខែ​មិថុនា ឆ្នាំ​២០១២។
RFA/Seng Sereyroth

ក្រុម​គ្រូ​ពេទ្យ​ស្ម័គ្រ​ចិត្ត​ចំនួន ១០​នាក់ មក​ពី​ប្រទេស​សិង្ហបុរី មក​ជួយ​វះកាត់ និង​ព្យាបាល​កុមារ​ដែល​មាន​មាត់​ឆែប​នៅ​ក្នុង​មន្ទីរ​ពេទ្យ​ខេត្ត​កំពង់ធំ រយៈពេល ៥​ថ្ងៃ។

លោក សន សៀងហេង មក​ពី​ទីក្រុង​ភ្នំពេញ កំពុង​អង្គុយ​រង់​ចាំ​ការ​វះកាត់​មាត់​ឆែប​របស់​លោក បាន​ប្រាប់​អោយ​ដឹង​ថា លោក​បាន​វះកាត់ ៣​ដង រួច​មក​ហើយ នេះ​ជា​លើក​ទី​៤ ដែល​ក្រុម​គ្រូ​ពេទ្យ​របស់​អង្គការ អូប៉េរេសិន ស្មាយ បាន​ណាត់​អោយ​មក​ធ្វើ​ការ​វះកាត់​មួយ​ម្តង​ទៀត។ លោក​សង្ឃឹម​ថា ការ​វះកាត់​លើក​នេះ​នឹង​អាច​ធ្វើ​អោយ​មាត់​របស់​លោក ល្អ​ស្អាត ដូច​ជា​មនុស្ស​ធម្មតា​ដែរ។ កាល​មុន ដែល​លោក​មិន​ទាន់​បាន​វះកាត់ លោក​មាន​ការ​ខ្មាស​អៀន​មិន​ហ៊ាន​ជួប​អ្នក​ដទៃ​នោះ​ទេ ដោយ​សារ​តែ​លោក​និយាយ​មិន​សូវ​ច្បាស់។ លោក​បន្ត​ទៀត​ថា ឥឡូវ​នេះ​លោក​មាន​ការ​សប្បាយ​រីករាយ​យ៉ាង​ខ្លាំង ដែល​មាត់​របស់​លោក​មាន​សភាព​ដូច​គេ ដូច​ឯង។

លោក សន សៀងហេង៖ «មិន​បាន​ដូច​គេ​ទាំង​ស្រុង ប៉ុន្តែ​មើល​ទៅ​ផ្តល់​អោយ​យើង​មាន​មុខ​មាត់​ស្អាត​ដូច​ជា​មនុស្ស​ធម្មតា​វិញ ហើយ​ក៏​ជា​សេចក្តី​សង្ឃឹម​មួយ ដែល​ក្មេង​មាត់​ឆែប ដែល​គិត​ថា​អនាគត​បាត់​បង់​អស់ ដោយ​មុខ​មាត់​ អាក្រក់​អញ្ចឹង»

អ្នកស្រី ចាប លាង ជា​ម្តាយ​កូន​មាន​មាត់​ឆែប មក​ពី​ខេត្ត​កំពត អោយ​ដឹង​ថា កាល​ពី​អ្នក​ស្រី​មាន​ផ្ទៃពោះ អ្នក​ស្រី​មិន​បាន​ចាប់​អារម្មណ៍​ទេ ថា​វា​មាន​បញ្ហា​កើត​ឡើង​ចំពោះ​កូន​ទី​៥ របស់​គាត់ នៅ​ពេល​ដែល​កូន​កើត​មក​បែរ​ជា​មាន​មាត់​ឆែប​ទៅ​វិញ។ អ្នក​ស្រី​ថា ធ្វើ​អោយ​អ្នក​ស្រី​មាន​ការ​អាណិត​អាសូរ​កូន ហើយ​ក៏​ស្វែង​រក​គ្រូ​ពេទ្យ ដើម្បី​ព្យាបាល​កូន​អោយ​សុខភាព​ល្អ​ដូច​ជា​មនុស្ស​ដទៃ​ទៀត​ដែរ។

អ្នកស្រី ចាប លាង៖ «ខ្ញុំ​សប្បាយ​ចិត្ត​ណាស់ បាន​កូន​ដេរ​មាត់​បាន ល្អ​ស្អាត។ ចាស! ខ្ញុំ​មិន​នឹក​ស្មាន​ថា មាត់​ល្អ​អញ្ចឹង​សោះ  អ្នក​ស្រុក អ្នក​ភូមិ និង​អ្នក​នៅ​ជិត​ផ្ទះ​គ្មាន​អ្នក​ណា​មាន មាន​តែ​កូន​ខ្ញុំ​មួយ គេ​មក​មើល​ផ្អើល​ផ្លួក​ទឹក ផ្លួក​ដី»

លោក​វេជ្ជបណ្ឌិត លឹមស៊ុន ប៊ុនហុង អនុប្រធាន​មន្ទីរ​ពេទ្យ​ខេត្ត​កំពង់ធំ មាន​ប្រសាសន៍​ថា ក្រុម​គ្រូ​ពេទ្យ​ស្ម័គ្រ​ចិត្ត​មក​ពី​ប្រទេស​សិង្ហបុរី បាន​មក​ជួយ​ប្រជាពលរដ្ឋ​ខ្មែរ​នៅ​ខេត្ត​កំពង់ធំ និង​ខេត្ត​មួយ​ចំនួន​ទៀត ក្នុង​ប្រទេស​កម្ពុជា គឺ​គោលដៅ​សំខាន់​វះកាត់​ទៅ​លើ​កុមារ ដែល​មាន​មាត់​ឆែប វះកាត់​ក្រអូម​មាត់ និង​ស្លាក​ស្នាម​នៅ​មុខ​របស់​កុមារ។ លោក​បន្ត​ទៀត​ថា នៅ​ក្នុង​រយៈពេល ៥​ថ្ងៃ​នេះ គឺ​ក្រុម​គ្រូ​ពេទ្យ​ទាំង​អស់​នឹង​ធ្វើ​ការ​វះកាត់​មាត់​ឆែប​អោយ​ប្រជាពលរដ្ឋ​ខ្មែរ​ចំនួន ៦០​នាក់។

លោក​វេជ្ជបណ្ឌិត លឹមស៊ុន ប៊ុនហុង៖ «ព្រោះ​វា​មាន​ប្រយោជន៍ កុមារ​ឆែប​មាត់ គឺ​គាត់​ពិការ​ភាព​មួយ ធ្វើ​អោយ​គាត់​គេច​ពី​សាលា គេច​ពី​សង្គម ព្រោះ​គាត់​ខ្មាស​អៀន ហើយ​ខូច​អារម្មណ៍ ហើយ​និយាយ​ឥត​សូវ​ច្បាស់ ស្តាប់​មិន​សូវ​បាន នៅ​ពេល​ដែល​គាត់​ឆែប​មាត់ ប៉ុន្តែ​ការ​កែ​អោយ​មាត់​គាត់​ល្អ​វិញ​មាន​ន័យ​ថា ការ​ព្យាបាល​ទៅ​លើ​សោភ័ណភាព​គាត់ ទៅ​លើ​ផ្លូវ​ចិត្ត រួម​ទាំង​ស្តាប់​លឺ​មក​វិញ»

នាយក​ទូទៅ អង្គការ អូប៉េរេសិន ស្មាយ លោក ម៉ុក ថាវី មាន​ប្រសាសន៍​ថា ក្រុម​គ្រូ​ពេទ្យ​ស្ម័គ្រ​ចិត្ត​របស់​លោក បាន​ជួយ​ប្រទេស​កម្ពុជា ទៅ​លើ​កុមារ​ឆែប​មាត់​នេះ ២៩​លើក​ហើយ ទូទាំង​ប្រទេស​កម្ពុជា។ លោក​ថា គ្រូ​ពេទ្យ​ដែល​មក​ចូល​រួម​វះកាត់ នៅ​ក្នុង​ខេត្ត​កំពង់ធំ នេះ មាន​ចំនួន ២៧​នាក់ ដែល​មក​ពី​ប្រទេស​សិង្ហបុរី ចំនួន ១០​នាក់ និង​គ្រូ​ពេទ្យ​ខ្មែរ​ចំនួន ១៧​នាក់ ព្រម​ទាំង​គ្រូ​ពេទ្យ​នៅ​ក្នុង​មន្ទីរ​ពេទ្យ​ខេត្ត​កំពង់ធំ ទៀត​ផង។ លោក​បន្ត​ទៀត​ថា អង្គការ អូប៉េរេសិន ស្មាយ បាន​ជួយ​ប្រជាពលរដ្ឋ​ខ្មែរ​ចំនួន​ប្រមាណ​ជាង ២​ពាន់​នាក់​មក​ហើយ លោក​សង្ឃឹម​ថា កុមារ​ទាំង​អស់​ដែល​បាន​ជួយ​ពី​ក្រុម​ពេទ្យ​ស្ម័គ្រ នឹង​មាន​ការ​ចូល​រួម​ជាមួយ​នឹង​សង្គម និង​លែង​មាន​ការ​ខ្មាស​អៀន​ត​ទៅ​ទៀត៕

កំណត់​ចំណាំ៖ ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ ដើម្បី​រក្សា​សេចក្ដី​​ថ្លៃថ្នូរ យើង​​ខ្ញុំ​នឹង​ផ្សាយ​តែ​មតិ​ណា​ដែល​មិន​​ជេរ​​ប្រមាថ​​ដល់​​អ្នក​​ដទៃ​តែ​ ប៉ុណ្ណោះ។

មតិ (1)
  • បោះពុម្ព
  • ចែករំលែក
  • អ៊ីម៉ែល

អ្នក​អាន​អនាមិក

In the name of khmer people ,I'm so very happy and say thank you to the doctor operation smile ,you are living at other country ,but you have a good heart and come to help my poor people ,it's the good example for our khmer people ,every day we are not living alone ,we are living in the society together ,so we have to look at the people arround us and help each other as we can.Loving and helping each others bring peace to ourself and the society too.

Jun 06, 2012 10:32 AM