នាយករដ្ឋមន្ត្រីនិយាយពីបញ្ហាទំនិញឡើងថ្លៃ, មន្ត្រីបក្សប្រឆាំងថា រដ្ឋាភិបាលត្រូវតែដោះស្រាយ

ដោយ សាន សុវិទ្យ

2008-06-12

ពាក់ព័ន្ធនឹងបញ្ហាទំនិញឡើងថ្លៃ ដែលបច្ចុប្បន្ននេះកំពុងតែធ្វើឲ្យប៉ះពាល់យ៉ាងខ្លាំងទៅលើជីវភាពរស់នៅរបស់ប្រជាពលរដ្ឋស្រទាប់ក្រោម ហើយដែលគណបក្សប្រឆាំងនានា បានលើកយកមកបន្ទោសរដ្ឋាភិបាលរបស់លោកថា ពុំស្ទុះស្ទារស្វែងរកដំណោះស្រាយនោះ លោកនាយករដ្ឋមន្រ្តី បានមានប្រសាសន៍ថា បញ្ហានេះវាមានកត្តាច្រើនយ៉ាង ហើយក៏ជារឿងដែលកើតឡើងលើសាកលលោកទាំងមូល ។

នៅក្នុងសុន្ទរកថារបស់លោកនៅខេត្តកំពង់ធំ កាលពីថ្ងៃពុធម្សិលមិញ លោក ហ៊ុន សែន បានពន្យល់ថា បញ្ហាគ្រប់បែបយ៉ាង វាប្រទាក់ប្រទាញគ្នា មិនមែនកើតឡើងដោយឯកឯងដូចអ្នកនយោបាយខ្មែរខ្លះ គិតស្មាននោះឡើយ ៖ «ឱ ! អស់លោកហើយ ! អ្នកសេដ្ឋកិច្ចបែបនេះ គឺមិនដឹងថាមកដឹកនាំ កុំថាដឹកនាំប្រទេសមួយ ដឹកនាំតែគ្រួសារមួយ ដឹកនាំតែបក្សមួយ ដឹកនាំវាមិនកើតផងៗ បើអ្នកឯងគិតតែមួយជ្រុងមិនគិតជ្រុងដទៃទៀត ។ ខ្ញុំព្រះករុណាខ្ញុំ សូមផ្ដល់អនុសាសន៍ឲ្យអស់លោកទាំងឡាយ អស់លោកត្រូវគិត គេហៅថា ចំណងទាក់ទងរបស់វា ... អ្វីៗទាំងអស់តែងមានទំនាក់ទំនងគ្នា អ្នកឯងនិយាយតែពីអង្ករមួយម៉ាត់ ស្រូវមួយម៉ាត់ អ្នកឯងអត់និយាយពីប្រេងទេ» ។

ចំពោះការអះអាងរបស់លោកនាយករដ្ឋមន្ត្រី ហ៊ុន សែន ដែលថា បញ្ហាទំនិញឡើងថ្លៃជាបញ្ហាពិភពលោកនេះ លោកស្រី មូរ សុខហួរ អគ្គលេខាធិការរងគណបក្សសមរង្ស៊ី មានប្រសាសន៍ថា នេះជាកាតព្វកិច្ចរបស់រដ្ឋាភិបាលនៃប្រទេសនីមួយៗ ត្រូវតែដោះស្រាយជូនប្រជាពលរដ្ឋរបស់ខ្លួន មិនមែនចាំតែបន្ទោសថា ជារឿងពិភពលោកតែម្យ៉ាងនោះទេ ។

លោកស្រី មូរ សុខហួរ ថ្លែងដូច្នេះថា ៖ «បញ្ហាទំនិញឡើងថ្លៃនេះ មិនមែនរឿងសកលលោកទាំងមូលនេះទេ គឺរឿងនៅប្រទេសនីមួយៗ រដ្ឋាភិបាលនៃប្រទេសណា ត្រូវតែដោះនូវបញ្ហាទំនិញឡើងថ្លៃ ដែលនៅប្រទេសកម្ពុជា ឡើងរហូតដល់ ២-៣ដង តាមមុខទំនិញ ។ ជីវិតរបស់អ្នកក្រ ជីវិតរបស់មន្រ្តីរាជការតូចតាច ជាពិសេសជីវិតរបស់កម្មករ កសិកររបស់យើង លោកអត់អាចរស់នៅ ដោយអត់មានដំណោះស្រាយពីរដ្ឋាភិបាលទេ វាគឺជាបញ្ហាដែលត្រូវតែដោះ ដោយរដ្ឋាភិបាលទាំងមូល ហើយថ្នាក់ដឹកនាំនៃរដ្ឋាភិបាលនោះ ត្រូវតែយល់អំពីសេដ្ឋកិច្ច ។ អ្នកដឹកនាំដែលយល់អំពីសេដ្ឋកិច្ច គឺអត់ទ័លច្រកទេ ពីព្រោះគេអាចព្យាករណ៍មុនហើយថា តើទំនិញឡើងថ្លៃហ្នឹង នឹងមានកើតឡើងក្នុងរយៈពេលណា ត្រូវដោះរបៀបណា មិនមែននិយាយឲ្យរួចខ្លួន ថានេះជាបញ្ហាសកលលោកទេ» ៕

បោះពុម្ព អ៊ីម៉េល