នាយករដ្ឋមន្ត្រីបញ្ជាឲ្យអាជ្ញាធររកវិធីទប់ស្កាត់មិនឲ្យស្រូវងាប់

ប្រធានគណៈកម្មាធិការជាតិគ្រប់គ្រងគ្រោះមហន្តរាយបានថ្លែងនៅព្រឹកថ្ងៃទី១៥ ខែសីហា ឆ្នាំ២០១២ ថា សុំកសិករកុំបាក់ទឹកចិត្តក្នុងការដាំស្រូវ ខណៈអាកាសធាតុកំពុងរាំងស្ងួតតាមបណ្ដាខេត្តមួយចំនួន។ ទន្ទឹមនោះ លោក ហ៊ុន សែន បានជំរុញឲ្យអាជ្ញាធរ និងក្រសួងពាក់ព័ន្ធធ្វើយ៉ាងណាជួយឲ្យបាន មិនឲ្យដំណាំស្រូវងាប់ក្នុងតំបន់ដែលមានប្រភពទឹកនោះទេ។

ដោយ អ៊ុក សាវបូរី
2012-08-16

ob.mp3

ក្នុងពិធីចែកសញ្ញាបត្រដល់និស្សិតបញ្ចប់ការសិក្សារបស់សាកលវិទ្យាល័យ បៀលប្រាយ នៅមជ្ឈមណ្ឌលកោះពេជ្រ កាលពីថ្ងៃ១៥ ខែសីហា នាយករដ្ឋមន្ត្រី ហ៊ុន សែន បានថ្លែងថា ក្នុងដំណាក់កាលរាំងស្ងួតនេះ កសិករកុំអស់សង្ឃឹមក្នុងការដាំដំណាំស្រូវ។

លោកថា រដូវវស្សាឆ្នាំនេះលើពិភពលោកមានការប្រែប្រួលអាកាសធាតុជាខ្លាំង។ នៅប្រទេសមួយចំនួន ដូចជានៅហ្វីលីពីន ទឹកជំនន់កណ្ដាលទីក្រុងម៉ានីល។ នៅប្រទេសចិនគឺ ៦០ឆ្នាំមកហើយ មិនមានទឹកលិចទេ។ ប៉ុន្តែឆ្នាំនេះទឹកបានលិចកណ្ដាលទីក្រុងប៉េកាំង។ ទន្ទឹមនឹងគ្រោះមហន្តរាយរាំងស្ងួត និងជំនន់ ក៏មានខ្យល់ព្យុះបំផ្លាញអាកាសយានដ្ឋាននៅរដ្ឋតិចសាស របស់ប្រទេសអាមេរិកដែរ។

លោក ហ៊ុន សែន៖ «ឯយើងមានតំបន់មួយចំនួនទឹកច្រើនតំបន់មួយចំនួនខ្វះទឹក។ ក្រសួងធនធានទឹក និងឧតុនិយម និងមន្ទីរធនធានទឹក កំពុងប្រឹងប្រែងអន្តរាគមន៍ជាមួយនឹងផ្នែកកសិកម្មទៅលើតំបន់ដែលមានប្រភពទឹក។ ខ្ញុំអំពាវនាវឲ្យអាជ្ញាធរគ្រប់លំដាប់ថ្នាក់ចូលរួមក្នុងសកម្មភាព ដើម្បីនឹងបូមបាចនៅតំបន់ដែលមានប្រភពទឹក ត្រូវបញ្ចុះម៉ាស៊ីន អន្តរាគមន៍មិនត្រូវឲ្យស្រូវ ឬសំណាបនេះស្លាប់ ងាប់ ដោយនៅទីកន្លែងដែលមានប្រភពទឹកហើយយើងមិនបានបូមបាចបានថែមនោះទេ»។

កាលពីថ្ងៃទី១៤ ខែសីហា មន្ត្រីគណៈកម្មាធិការជាតិគ្រប់គ្រងគ្រោះមហន្តរាយ លោក កែវ វី ឲ្យដឹងថា របាយការណ៍បណ្ដោះអាសន្នពីតាមបណ្ដាខេត្តចាប់ពីថ្ងៃទី១២ ដល់ទី១៤ ខែសីហា ឆ្នាំ២០១២ ថា មានដំណាំស្រូវវស្សាក្នុងខេត្តចំនួន ៨ បានប៉ះពាល់ក្រៀមខ្វះទឹក ដោយសារអាកាសធាតុរាំងស្ងួតនៅកម្ពុជា ពីចុងខែកក្កដា ដល់ខែសីហា។

លោក កែវ វី អនុប្រធានព័ត៌មាននៃគណៈកម្មាធិការជាតិគ្រប់គ្រងគ្រោះមហន្តរាយបន្តថា ទិន្នន័យរាំងស្ងួតនេះបានប៉ះពាល់ទាំងស្រូវពង្រោះ សន្ទូង និងសំណាប។ លោកឲ្យដឹងទៀតថា ដំណាំស្រូវវស្សាក្នុងខេត្តទាំង ៨ ក្នុងនោះមាន ៤៦ស្រុក កំពុងខ្វះទឹក ចំនួន ៦.៨៨៩ហិកតារ ហើយសន្ទូងពង្រោះមាន ៨២.៦២៦ហិកតារ។ ក្នុងនោះបានខូច គឺមានសំណាប ៧៥៩ហិកតារ ស្រូវពង្រោះ ៤.០១០ហិកតារ។ ស្រូវក្រៀមខ្វះទឹក និងងាប់បណ្តើរៗនោះមាននៅខេត្តកំពង់ស្ពឺ បាត់ដំបង បន្ទាយមានជ័យ ឧត្តរមានជ័យ ព្រៃវែង តាកែវ ស្វាយរៀង និងខេត្តកណ្ដាល។

លោក ហ៊ុន សែន នាយករដ្ឋមន្ត្រីកម្ពុជា បានបន្ថែមថា តាមការព្យាកររដូវវស្សាឆ្នាំ២០១២ នេះ អាចអូសបន្លាយដល់ដើមខែធ្នូ។ លោកថា ក្នុងពិភពលោកក៏មានព្យុះបី ដែលអាចមានឥទ្ធិពលមកលើកម្ពុជា តែបែរជាមិនមានទៅវិញ។ ប៉ុន្តែនៅមានសល់ព្យុះប្រហែលជាង ២០ព្យុះទៀត ដែលនឹងមានឥទ្ធិពលមកលើកម្ពុជា ហើយនឹងធ្វើឲ្យទឹកទន្លេនឹងចាប់ផ្តើមហក់ឡើង។ លោកបន្ថែមថា ទោះបីសំណាបចាស់ខែ តែក៏អាចដាំបង្កបង្កើនផលបាន ព្រោះពេលវេលាធ្វើស្រែនៅសល់ច្រើនខែទៀត។

អ្នកស្រី នាង ពៅ រស់នៅឃុំតាភេម ស្រុកត្រាំកក់ ខេត្តតាកែវ ត្អូញថា គាត់សាប ២ដង សំណាបងាប់បន្តបន្ទាប់។ ឥឡូវគាត់សាបជាថ្មីមេឃមិនភ្លៀង គាត់កំពុងបូមទឹកដាក់សំណាប។ អ្នកស្រីថា ទឹកស្រះក៏កំពុងតែខ្វះដែរ ព្រោះរាំងស្ងួតពេក មនុស្ស និងសត្វ រួមទាំងដំណាំ ត្រូវការប្រើប្រាស់តែទឹកស្រះក្នុងភូមិនេះ៖ «ងាប់ទាំងអស់ គ្រប់គ្នាសំណាប អត់មានទឹកបូមទេ ទឹកក៏អត់មានបូមទេ បូមញឹកពេក។ វាអត់ទឹកហើយមេឃក៏អត់ភ្លៀង រាំងស្វិតគ្រប់ថ្នាលទាំងអស់ហ្នឹង បើសិនជាកន្លះខែទៀតអត់ភ្លៀង សំណាបនឹងងាប់ហើយ ព្រោះអត់ទឹកបូមដាក់ផង អត់ភ្លៀង រាំងដីសស្គុះអស់ហើយ ស្ងួត»។

លោក ហ៊ុន សែន បានផ្ដល់អនុសាសន៍ថា មន្ត្រីទាំងអស់មិនត្រូវបណ្ដោយឲ្យសំណាប ឬសន្ទូងងាប់នៅកន្លែងដែលមានប្រភពទឹកទេ ព្រោះជាវិធានការដែលក្រសួងធនធានទឹក ក្រសួងកសិកម្ម និងអាជ្ញាធរមូលដ្ឋានត្រូវតែអនុវត្ត។ ប៉ុន្តែបើតំបន់ដែលអត់ទឹក គឺគ្មានជម្រើសជួយសង្គ្រោះបានឡើយ គឺរង់ចាំតែមេឃធ្លាក់ទឹកភ្លៀងប៉ុណ្ណោះ។ លោកថា នៅតំបន់គ្មានប្រភពទឹក គួរផ្ទេរទៅជាតំបន់ដាំដុះដូចជា ដំឡូង អំពៅ សណ្តែក ពោត ជាដើម អាស្រ័យទៅតាមសភាពជាក់ស្ដែងនៃតំបន់ដែលអាចដាំដុះបាន៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។