ក្រុមប្រឹក្សា​ឃ្លាំមើល​កម្ពុជា​ថ្កោលទោស​រដ្ឋាភិបាល​ដែល​បង្ខំ​បោះ​បង្គោល​ព្រំដែន​កម្ពុជា-​វៀតណាម

ដោយ អាស៊ីសេរី
2017-11-14
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
បង្គោល​ព្រំដែន​កម្ពុជា-វៀតណាម លេខ​១៨៩ ស្ថិត​ក្នុង​ភូមិ​ទួលស្ដី ឃុំ​ទួលស្ដី ស្រុក​ចន្ទ្រា ខេត្ត​ស្វាយរៀង។ រូបថត​ថ្ងៃ​ទី​១៧ ខែ​មិថុនា ឆ្នាំ​២០១៥។ RFA
បង្គោល​ព្រំដែន​កម្ពុជា-វៀតណាម លេខ​១៨៩ ស្ថិត​ក្នុង​ភូមិ​ទួលស្ដី ឃុំ​ទួលស្ដី ស្រុក​ចន្ទ្រា ខេត្ត​ស្វាយរៀង។ រូបថត​ថ្ងៃ​ទី​១៧ ខែ​មិថុនា ឆ្នាំ​២០១៥។ RFA
Photo: RFA

ក្រុមប្រឹក្សា​ឃ្លាំមើល​កម្ពុជា ថ្កោលទោស​រដ្ឋាភិបាល លោក ហ៊ុន សែន ដែល​បង្ខំ​បោះ​បង្គោល​ព្រំដែន​កម្ពុជា-​វៀតណាម នៅ​ក្នុង​កាលៈទេសៈ​ប្រទេស​កម្ពុជា គ្មាន​ឯកភាព​ជាតិ និង​កំពុង​មាន​វិបត្តិ​នយោបាយ​ធ្ងន់ធ្ងរ។ អង្គការ​ដដែល​បាន​បង្ហាញ​ទៀត​ថា សកម្មភាព​បែប​នេះ ជា​ការ​អនុវត្ត​ផ្ទុយ​ពី​ច្បាប់​ជាតិ និង​អន្តរជាតិ។

ក្រុមប្រឹក្សា​ឃ្លាំមើល​កម្ពុជា ចាត់​ទុក​សកម្មភាព​របស់​លោក​នាយករដ្ឋមន្ត្រី ហ៊ុន សែន ដែល​បាន​បង្ខំ​បោះ​បង្គោល​ព្រំដែន​កម្ពុជា-​វៀតណាម ថា បាន​អនុវត្ត​ផ្ទុយ​ពី​ឆន្ទៈ​ប្រជាពលរដ្ឋ​ខ្មែរ និង​ផ្ទុយ​ពី​កិច្ច​ព្រមព្រៀង​ទីក្រុង​ប៉ារីស ឆ្នាំ​១៩៩១។

​ប្រធាន​ក្រុមប្រឹក្សា​ឃ្លាំមើល​កម្ពុជា លោក ម៉ែន ណាត បញ្ជាក់​ក្នុង​សេចក្ដី​ថ្លែងការណ៍​របស់​ខ្លួន​នៅ​ថ្ងៃ​ទី​១៣ ខែ​វិច្ឆិកា បាន​ចាត់​ទុក​ការ​ប្ដេជ្ញា​របស់​នាយករដ្ឋមន្ត្រី ហ៊ុន សែន និង​នាយករដ្ឋមន្ត្រី​វៀតណាម ង្វៀន ស៊ុងហ៊្វុក (Nguyen Xuan Phuc) ថា​នឹង​បញ្ចប់​ការ​បោះ​បង្គោល​ព្រំដែន​ឲ្យ​រួចរាល់​នៅ​ឆ្នាំ​២០១៨ ខាង​មុខ​នោះ គឺ​ជា​ការ​នាំ​ឲ្យ​កម្ពុជា ខាត​បង់​យ៉ាង​ធ្ងន់ធ្ងរ។

​ការ​ប្ដេជ្ញា​នេះ ធ្វើ​ឡើង​នៅ​ក្នុង​ជំនួប​មេដឹកនាំ​ទាំង​ពីរ​ក្នុង​អំឡុងពេល​ប្រជុំ​កំពូល អេប៉ិច (APEC) កាល​ពី​ថ្ងៃ​ទី​១១ ខែ​វិច្ឆិកា ឆ្នាំ​២០១៧ នៅ​ខេត្ត​ដាណាង ប្រទេស​វៀតណាម។

​លោក ម៉ែន ណាត ថ្លែង​ថា លោក​មិន​ឯកភាព​ចំពោះ​ការ​បង្ខំ​បោះ​បង្គោល​ព្រំដែន រវាង​មេដឹកនាំ​កម្ពុជា និង​វៀតណាម ក្នុង​ពេល​ប្រទេស​កម្ពុជា មិន​ទាន់​មាន​ឯកភាព​ជាតិ​នេះ​ទេ៖ «បើ​យើង​បង្ខំ​បោះ​បង្គោល​ព្រំដែន​ទាំង​តក់ក្រហល់​បែប​នេះ មាន​ន័យ​ថា យើង​កំពុង​បម្រើ​តាម​ការ​ចង់​បាន​របស់​វៀតណាម។ បញ្ហា​នេះ យើង​ត្រូវតែ​រង់ចាំ​ឲ្យ​កម្ពុជា មាន​ឯកភាព​ផ្ទៃក្នុង​ជាតិ​ជា​មុន​សិន គឺ​គ្រប់​ភាគី​នយោបាយ មិន​ថា​អ្នក​ជំនាញការ​ព្រំដែន និង​ក្រុម​អង្គការ​សង្គម​ស៊ីវិល​ទេ ត្រូវ​តែ​មាន​ឱកាស​ជួប​ជជែក​គ្នា​ដើម្បី​រក​ដំណោះស្រាយ​ត្រឹមត្រូវ​រវាង​បញ្ហា​ព្រំដែន​នេះ ពីព្រោះ​រឿង​នេះ​ធ្ងន់ធ្ងរ​ណាស់ និង​ជា​ហានិភ័យ​ធ្ងន់ធ្ងរ​ណាស់​សម្រាប់​ជាតិ​យើង។ ឥឡូវ​នេះ​យើង​ឃើញ​ស្រាប់​ហើយ ប្រទេស​ទាំង​ពីរ​បាន​បង្ខំ​បោះ​បង្គោល​ព្រំដែន​ថ្មីៗ ហ្នឹង​នៅ​ខេត្ត​ព្រៃវែង បង្គោល​ធំ និង​នៅ​ខេត្ត​ក្រចេះ បង្គោល​ធំ​ហ្នឹង​គឺ​បាន​បោះ​រួច​ហើយៗ នៅ​បោះ​បង្គោល​រណប​មួយ​ចំនួន​ទៀត​ហ្នឹង គឺ​វា​មិន​ជា​ល្អ​ទេ»

​អាស៊ីសេរី មិន​ទាន់​អាច​ទាក់ទង​លោក វ៉ា គឹមហុង ប្រធាន​គណៈកម្មាធិការ​ព្រំដែន​កម្ពុជា និង​លោក​បណ្ឌិត សុខ ទូច ប្រធាន​វិទ្យាស្ថាន​ទំនាក់ទំនង​អន្តរជាតិ​កម្ពុជា នៃ​រាជបណ្ឌិត្យសភា​កម្ពុជា ដើម្បី​បំភ្លឺ​ជុំវិញ​ការ​ចេញ​សេចក្តី​ថ្លែងការណ៍​របស់​ក្រុមប្រឹក្សា​ឃ្លាំមើល​កម្ពុជា តាម​ទូរស័ព្ទ​បាន​ទេ នៅ​ល្ងាច​ថ្ងៃ​ចន្ទ ទី​១៣ ខែ​វិច្ឆិកា។

អនុប្រធាន​គណៈកម្មាធិការ​ព្រំដែន​កម្ពុជា អ្នកស្រី កុយ ពិសី  បាន​​បញ្ជាក់​ប្រាប់​កាសែត​ក្នុង​ស្រុក​កាល​ពី​សប្ដាហ៍​មុន​ថា កម្ពុជា-​វៀតណាម បាន​បោះ​បង្គោល​ព្រំដែន​ធំ នៅ​ខេត្ត​ព្រៃវែង ជាមួយ​ខេត្ត​ដុងថាប់ និង​ខេត្ត​ក្រចេះ ជាមួយ​ខេត្ត​ប៉ិញភឿក រួចរាល់ ១០០​ភាគរយ​ហើយ ហើយ​ភាគី​ទាំង​ពីរ​ត្រូវ​បន្ត​បោះ​បង្គោល​ព្រំដែន​បន្ថែម​មួយ​ចំនួន​ទៀត​ឲ្យ​ចប់​នៅ​ដំណាច់​ឆ្នាំ​២០១៧។

​ប្រធាន​ក្រុមប្រឹក្សា​ឃ្លាំមើល​កម្ពុជា បាន​អំពាវនាវ​ដល់​រដ្ឋាភិបាល លោក ហ៊ុន សែន ឲ្យ​បញ្ឈប់​ការ​បោះ​បង្គោល​ព្រំដែន​រវាង​កម្ពុជា-​វៀតណាម ជា​បន្ទាប់​ដោយ​រង់ចាំ​រហូត​ដល់​កម្ពុជា មាន​ឯកភាព​ជាតិ និង​មាន​ប្រក្រតី​ភាព​នយោបាយ​ជា​មុន​សិន។

​អ្នកឃ្លាំមើល​ព្រំដែន លោក ម៉ែន ណាត សង្កត់​ធ្ងន់​ថា ការ​បោះ​បង្គោល​ព្រំដែន​ដែល​នាំ​ឲ្យ​មាន​មន្ទិលសង្ស័យ និង​មិន​ប្រក្រតី​កន្លង​មក រដ្ឋាភិបាល រដ្ឋ​សភា ត្រូវ​តែ​ពិនិត្យ និង​សើរើ​ឡើង​វិញ ដើម្បី​ធានា​នូវ​ដែន​អធិបតេយ្យ និង​បូរណភាព​ទឹក​ដី​របស់​កម្ពុជា ដែល​មាន​កំណត់​ក្នុង​រដ្ឋធម្មនុញ្ញ និង​កិច្ច​ព្រមព្រៀង​ទីក្រុង​ប៉ារីស ឆ្នាំ​១៩៩១ ដែល​ជា​ឆ្អឹង​ខ្នង​ដ៏​រឹងមាំ​ក្នុង​ការ​បញ្ចៀស​ការ​រំលោភ​ឈ្លានពាន​ពី​វៀតណាម។

​លោក ម៉ែន ណាត៖  «បើសិនជា​រដ្ឋាភិបាល​នៅ​តែ​ធ្វើ​អ៊ីចឹង នៅ​ថ្ងៃ​អនាគត​ពេល​យើង​មាន​រដ្ឋាភិបាល​ថ្មី គឺ​យើង​នឹង​ត្រូវ​តែ​ទាមទារ​សើរើ​ឡើង​វិញ​នូវ​ឯកសារ​ព្រំដែន​ទាំង​អស់។ ក្នុង​នោះ​រឿង​សន្ធិសញ្ញា​បំពេញ​បន្ថែម​ឆ្នាំ​២០០៥ ហ្នឹង ក៏​វា​មិន​ត្រឹមត្រូវ​តាម​កិច្ចព្រមព្រៀង​ទីក្រុង​ប៉ារីស និង​មិន​ត្រឹមត្រូវ​តាម​ខ្លឹមសារ​មាត្រា​២ និង​មាត្រា​៥៥ នៃ​រដ្ឋធម្មនុញ្ញ​ដែរ។ ដូច្នេះ​រដ្ឋាភិបាល ត្រូវ​តែ​ពិចារណា​ឡើង​វិញ​ទៅ​លើ​រឿង​បោះ​បង្គោល​ព្រំដែន​នេះ ព្រោះ​វា​គ្រោះថ្នាក់​ខ្លាំង​ណាស់​សម្រាប់​ជាតិ​យើង គឺ​មិន​ត្រឹមតែ​សម្រាប់​កូនចៅ លោក ហ៊ុន សែន ឬ​កូនចៅ លោក ស ខេង នោះ​ទេ គឺ​រងគ្រោះ​ទាំង​កូនចៅ​បក្ស​ប្រឆាំង និង​បក្ស​កាន់​អំណាច និង​បក្ស​ផ្សេង គឺ​នឹង​ទទួលរង​នូវ​ផល​ប៉ះពាល់​ដូច​គ្នា​នៅ​ថ្ងៃ​អនាគត។ ដូច្នេះ​យើង​ត្រូវ​ខិតខំ​នាំ​គ្នា​ថែរក្សា​បញ្ហា​ជាតិ»

​ទាក់ទិន​បញ្ហា​នេះ លោក​នាយករដ្ឋមន្ត្រី ហ៊ុន សែន និង​នាយករដ្ឋមន្ត្រី​វៀតណាម លោក ង្វៀន ស៊ុងហ៊្វុក នៅ​ក្នុង​ជំនួប​អំឡុង​ពេល​កិច្ចប្រជុំ​កំពូល អេប៉ិច កាល​ពី​ថ្ងៃ​ទី​១១ ខែ​វិច្ឆិកា នា​ខេត្ត​ដាណាង ប្រទេស​វៀតណាម បាន​សន្យា​រួមគ្នា​ថា នឹង​បញ្ចប់​ការ​បោះ​បង្គោល​ព្រំដែន​ឲ្យ​រួចរាល់​នៅ​ឆ្នាំ​២០១៨ និង​កសាង​ព្រំដែន​រួម​គ្នា​មួយ​ប្រកប​ដោយ​សន្តិភាព និង​ស្ថិរភាព។

​ក្នុង​ជំនួប​ដដែល​នោះ នាយករដ្ឋមន្ត្រី​វៀតណាម សន្យា​ថា នឹង​បង្កើន​កិច្ច​សហប្រតិបត្តិការ​នៃ​ប្រទេស​ទាំង​ពីរ​ឲ្យ​កាន់​តែ​រឹងមាំ​ខ្លាំង​ឡើង​ក្នុង​វិស័យ​ពាណិជ្ជកម្ម​ទេសចរណ៍។ ទំនាក់ទំនង​ការទូត និង​ជំរុញ​ឲ្យ​មានការ​ផ្លាស់ប្ដូរ​ដំណើរ​ទស្សនកិច្ច​ពី​គ្រប់​វិស័យ ព្រមទាំង​រឹតចំណង​មិត្តភាព​រវាង​ប្រជាពលរដ្ឋ​កម្ពុជា និង​វៀតណាម ឲ្យ​កាន់តែ​ប្រសើរ​ឡើង​ទ្វេ​ថែម​ទៀត៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (2)
  • បោះពុម្ព
  • ចែករំលែក
  • អ៊ីម៉ែល

អ្នក​អាន​អនាមិក

វៀតណាម មិនអាក្រក់ ទេ បើមិនអោយក៏មិនយកដែរទុកទៅ ដីខ្មែរ . ប៉ុន្តែមកពី មេដឹកនាំ ហ៊ុន សែន ចេះតែអោយ​គេយក !​
ដូច្នេះ កុំបន្ទោស​គេ ត្រូវបន្ទោសមេដឹកនាំខ្មែរ ដែលចេះតែសែនអោយគេ !​

Nov 14, 2017 03:02 AM

Sovan

សង្ឃឹមថានៅពេលមានការរំលាយណាមួយ ឬធ្វើទុក្ខពីបក្សកាន់អំណាច ដែលធ្វើខុសនឹងរដ្ឋធម្មនុញ្ញ។ ខ្ញុំសូមអំពាវនាវឲ្យបក្សក្នុងរដ្ឋសភាក្រៅបក្សកាន់អំណាចប្រកាស មិនទទួលស្គាល់ភាពស្របច្បាប់របស់រដ្ឋាភិបាល។ ការប្រកាសនេះ វានឹងជួយឲ្យយើងមិនទទួលស្គាល់បង្គោលព្រំដែន ឬការចាត់ចែងណាមួយ។ នៅពេលយើងឈ្លោះគ្នា យើងមិនត្រូវធ្វើការសំរេចចិត្តឬទទួលស្គាល់ការសំរេចចិត្តណាមួយឡើយ។

Nov 14, 2017 12:02 AM

គេហទំព័រ​ទាំងមូល