លោក ឈាង វុន បញ្ជាក់ជំហរជាថ្មីអំពីការបង្ក្រាបបដិវត្តន៍ពណ៌នៅកម្ពុជា
2017.05.23
មន្ត្រីរដ្ឋាភិបាល រដ្ឋសភា និងប្រមុខកងទ័ព សុទ្ធតែចាប់អារម្មណ៍រឿងបដិវត្តន៍ពណ៌ ហើយបានប្ដេជ្ញាថានឹងបង្ក្រាប បើសិនជាចលនានេះកើតមានឡើងនៅកម្ពុជា។ តំណាងរាស្ត្រគណបក្សប្រជាជនកម្ពុជា នៅថ្ងៃទី២៣ ឧសភា នេះ បញ្ជាក់ជំហរជាថ្មីអំពីការបង្ក្រាបបដិវត្តន៍ពណ៌នេះ។ ប៉ុន្តែអ្នកវិភាគលើកឡើងថា កម្ពុជា គ្មានសកម្មភាពបដិវត្តន៍ពណ៌នេះទេ ហើយជំរុញឲ្យរដ្ឋាភិបាលកំណត់ឲ្យច្បាស់អំពីរូបភាពបដិវត្តន៍ពណ៌នេះ ជាជាងគ្រាន់តែការចោទប្រកាន់ ឬលាបពណ៌ទៅលើក្រុមណាមួយ។
សមាជិកគណៈកម្មាធិការអចិន្ត្រៃយ៍រដ្ឋសភា និងជាប្រធានគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាននៃរដ្ឋសភា លោក ឈាង វុន ថ្លែងថា លោកព្រួយបារម្ភអំពីយន្តការបដិវត្តន៍ពណ៌នៅកម្ពុជា៖ «បើសិនជាទប់ស្កាត់ដោយវិធីណាក៏ដោយ តើតម្លៃវាប៉ុណ្ណា? គេយកតម្លៃខាតបង់តែពីរទេមកថ្លឹងថ្លែងគ្នា។ បើឲ្យបដិវត្តន៍ពណ៌ផ្ទុះឡើងខាតធមជាង គេបង្ក្រាប។ និយាយគ្នាឲ្យច្បាស់ បង្ក្រាប! បង្ក្រាបហ្នឹង តាមខ្ញុំដឹង មិនមែនសម្លាប់មនុស្សទេ គឺបង្ក្រាបបដិវត្តន៍មិនឲ្យកើតឡើងបាន។ ខ្ញុំអត់និយាយភាសាដូចបង បាញ់ ទេ។ បង ទៀ បាញ់ គាត់ថា វាយបាក់ធ្មេញ។ ខ្ញុំអត់ប្រើទេ»។
ប្រសាសន៍របស់លោក ឈាង វុន គឺថ្លែងក្នុងពិធីធ្វើបទបង្ហាញដល់មន្ត្រីអគ្គលេខាធិការដ្ឋានរដ្ឋសភា អំពីយន្តការ ១២ នៃបដិវត្តន៍ពណ៌ និងវិនាសកម្មនៃសង្គ្រាម នៅវិមានរដ្ឋសភានៅព្រឹកថ្ងៃទី២៣ ឧសភា។ លោកក៏បានលើកឡើងអំពីព្រឹត្តិការណ៍កើតឡើងតាំងពីឆ្នាំ១៩៧០ រហូតមកដល់ពេលកាប់សម្លាប់ក្នុងរបបខ្មែរក្រហម ថាដោយសារបដិវត្តន៍ពណ៌។
លោកបានលើកឡើងអំពីភាពរងទុក្ខ និងមហន្តរាយពីសង្គ្រាមនៅប្រទេសក្នុងតំបន់មជ្ឈិមបូព៌ា ហើយបានហៅព្រឹត្តិការណ៍ទម្លាក់សម្ដេចព្រះនរោត្ដម សីហនុ ដោយលោក លន់ នល់ ដែលជាទូទៅគេហៅថា ការធ្វើរដ្ឋប្រហារនោះ ថាជាបដិវត្តន៍ពណ៌វិញ៖ «គេឲ្យលើកជាភាសាបរទេស។ យើងសួរថា តើអ្នកលើកបដាគាត់ចេះភាសាអង់គ្លេសសរសេរបដាហ្នឹងទេ? អត់ទេ។ ចេះភាសាបារាំងទេ? អត់ទេ។ ប៉ុន្តែរឿងអីបានគេធ្វើ? បើបញ្ហាចេញទៅដល់ខាងក្រៅ គេយកចិត្តទុកដាក់។ អ្នកនយោបាយនៅខាងក្រៅ គេយកចិត្តទុកដាក់ ហើយការពារគេ។ យើងឃើញមានហើយស្រុកខ្មែរ លើកភាសាបរទេស "No Way" អី សុទ្ធតែជាភាសាបរទេសហើយ។ កាលខ្ញុំធ្វើច្បាប់អង្គការ គេដឹងថា ខ្ញុំធ្វើច្បាប់ទប់ស្កាត់បដិវត្តន៍ពណ៌អីហ្នឹង គេលើករង្វង់មូលមួយ ហើយខ្វែង ដូចឃើញក្នុងរូបថត។ យើងឃើញសរសេរនៅលើដំបូលផ្ទះប្រជាពលរដ្ឋពេលដែលពួកតំណាងមកស្រុកខ្មែរ មុនកប៉ាល់ហោះចុះ គេសរសេរសារលើដំបូលផ្ទះហ្នឹង។ គេពូកែរៀបចំ ហើយយើងអត់ចាប់ភ្លឹក យើងអត់ដឹងទេ»។
ទាក់ទងនឹងការលើកឡើងរបស់លោក ឈាង វុន តំណាងសហគមន៍ដីធ្លីនៅភូមិថ្មគោល ហៅថា អេស.អូ.អេស (SOS) អ្នកស្រី ច្រាយ នីម ថ្លែងថា ពាក្យដែលអ្នកស្រីសរសេរ គឺទាក់ទងនឹងបញ្ហាដីធ្លី មិនមែនបដិវត្តន៍ពណ៌ទេ៖ «រឿងបដិវត្តន៍ពណ៌ស្អី ដែលលោក ឈាង វុន និយាយ ខ្ញុំអត់ដឹងឮអត់ស្គាល់។ ប៉ុន្តែមិនដឹងថា គាត់យកលេសយកពាក្យហ្នឹងមកនិយាយទាក់ទងនឹងបដិវត្តន៍ពណ៌ គឺខ្ញុំអត់ដឹងអីផង។ ប៉ុន្តែអ្វីដែលខ្ញុំសរសេរតស៊ូមតិហ្នឹង គឺរឿងដីធ្លីរបស់ពួកខ្ញុំ។ រឿងដែលគាត់និយាយ គឺគួរឲ្យអស់សំណើច»។
ពាក្យបដិវត្តន៍ពណ៌ និងពាក្យដូរដែលឮកាលពីឆ្នាំ២០១៣ បច្ចុប្បន្ននេះជាពាក្យរសើបមួយសម្រាប់មន្ត្រីរដ្ឋាភិបាល ហើយតែងលើកយកដាស់តឿនពលរដ្ឋរាល់សន្ទរកថា។ រដ្ឋមន្ត្រីក្រសួងការពារជាតិ លោក ទៀ បាញ់ ធ្លាប់ប្រាប់យោធាឲ្យទប់ស្កាត់បដិវត្តន៍ពណ៌នៅកម្ពុជា ហើយព្រមានដល់អ្នកតវ៉ាលទ្ធផលបោះឆ្នោតខាងមុខ ដោយវាយឲ្យបែកធ្មេញ។ លោក ឈាង វុន គាំទ្រចំពោះប្រសាសន៍របស់រដ្ឋមន្ត្រីក្រសួងការពារជាតិ គឺលោក ទៀ បាញ់៖ «ខ្ញុំយល់គាត់ គាត់និយាយមក បើខ្ញុំជាទ័ពក៏ខ្ញុំនិយាយអ៊ីចឹងដែរ»។
ដូចគ្នានេះដែរ អគ្គមេបញ្ជាការកងយោធពលខេមរភូមិន្ទ លោក ប៉ុល សារឿន ថ្លែងក្នុងពេលត្រួតពលនៅកងពលតូច "ង-៧០" កាលពីថ្ងៃទី២២ ឧសភា ថា កងយោធពលខេមរភូមិន្ទត្រូវការពារសណ្ដាប់ធ្នាប់សាធារណៈសម្រាប់ការបោះឆ្នោតក្រុមប្រឹក្សាឃុំ-សង្កាត់នៅថ្ងៃទី៤ ខែមិថុនា ហើយប្រឆាំងរាល់បដិវត្តន៍ពណ៌ដែលអាចកើតឡើង។
អ្នកសិក្សាសង្គម បណ្ឌិត មាស នី ថ្លែងថា ពាក្យដូរនៅឆ្នាំ២០១៣ មិនដល់កម្រិតបដិវត្តន៍ពណ៌ទេ គឺគ្រាន់តែជាការទាមទារការសម្រុះសម្រួលនយោបាយប៉ុណ្ណោះ។ ប៉ុន្តែការបារម្ភរបស់រដ្ឋាភិបាលចំពោះចំនួនមនុស្សប្រមូលផ្ដុំនៅពេលនោះ ត្រឹមត្រូវដែរ៖ «ការរៀបចំមនុស្សឲ្យមកដើរតាមផ្លូវរហូតដល់មានរាប់សែនរាប់លាននាក់នោះ វាជាសញ្ញាមួយដែលបង្ហាញថា ប្រជាប្រិយភាពរបស់រដ្ឋាភិបាលបានធ្លាក់ចុះ រួមផ្សំនឹងការបាត់បង់កៅអី ២២ផង។ អ៊ីចឹងការបារម្ភរបស់រដ្ឋាភិបាល គឺជារឿងត្រឹមត្រូវហើយ។ ក៏ប៉ុន្តែសម្រាប់យើង មិនទាន់ឃើញថា ការតវ៉ានៅពេលនោះឈានទៅដល់ការធ្វើបដិវត្តន៍ពណ៌ទេ។ កាលនិយាយអំពីបដិវត្តន៍ពណ៌ វាទាល់តែការតវ៉ានោះ វាឈានទៅដល់ការទាមទារឲ្យរដ្ឋាភិបាលចុះចេញពីតំណែង ឬក៏ចូលទៅវាយកម្ទេចអាគាររដ្ឋាភិបាលធំៗ ដូចជាយើងឃើញនៅប្រទេសតំបន់បូព៌ា»។
ចលនាដែលត្រូវបានចាត់ទុកថាជាបដិវត្តន៍ពណ៌ លោក ឈាង វុន ក៏បានភ្ជាប់ទៅនឹងសកម្មភាពរបស់គណបក្សប្រឆាំង អង្គការមិនមែនរដ្ឋាភិបាល សហជីពកម្មករ និងប្រព័ន្ធផ្សព្វផ្សាយខ្លះ ថាជាយន្តការបដិវត្តន៍ពណ៌ ក្នុងនោះលោកក៏ចោទអង្គការមូលនិធិធំៗរបស់សហរដ្ឋអាមេរិក ថាមានតួនាទីយ៉ាងសំខាន់នៅក្នុងយន្តការបដិវត្តន៍ពណ៌ដែរ តាមរយៈការបណ្ដុះបណ្ដាល៕