លោកនាយករដ្ឋមន្ត្រី ហ៊ុន សែន ព្រមានជនណាដែលចង់កម្ទេចត្រកូលហ៊ុន
2017.06.21
លោកនាយករដ្ឋមន្ត្រី ហ៊ុន សែន (រូបកណ្ដាល) ថ្លែងក្នុងវេទិការំឭកខួបអនុស្សាវរីយ៍ពីទីតាំងដែលលោក និងបក្ខពួក ចាកចេញទៅប្រទេសវៀតណាម កាលពីឆ្នាំ១៩៧៧ នាឃុំទន្លូង ស្រុកមេមត់ ខេត្តត្បូងឃ្មុំ។ រូបថតថ្ងៃទី២១ ខែមិថុនា ឆ្នាំ២០១៧។
RFA/Saut Sokprathna
លោកនាយករដ្ឋមន្ត្រី ហ៊ុន សែន បានលើកឡើងថា សង្គ្រាមនឹងអាចកើតឡើង ដោយសារតែអណ្ដាត ឬការសរសេរ ដរាបណាការប្រើប្រាស់អណ្ដាត និងការសរសេរនោះនៅតែប្រមាថមើលងាយអ្នកដទៃ បើទោះបីជាភាគីនោះគ្មានអាវុធក៏ដោយ។ លោកថែមទាំងប្រាប់កងទ័ពឲ្យត្រៀមបម្រុងជានិច្ច ដើម្បីបង្ក្រាបរាល់ចលនាផ្ដួលរំលំ ឬសកម្មភាពដែលបំផ្លាញសន្តិភាពប្រទេសជាតិ។
ការថ្លែងដូចនេះ នៅក្នុងវេទិការំឭកខួបអនុស្សាវរីយ៍ពីទីតាំងដែលលោកនាយករដ្ឋមន្ត្រី និងបក្ខពួករបស់លោក បានចាកចេញទៅប្រទេសវៀតណាម កាលពីឆ្នាំ១៩៧៧ ដើម្បីឈានទៅផ្ដួលរំលំរបបប្រល័យពូជសាសន៍ ប៉ុល ពត នៅព្រឹកថ្ងៃទី២១ មិថុនា ក្នុងឃុំទន្លូង ស្រុកមេមត់ ខេត្តត្បូងឃ្មុំ។
លោកនាយករដ្ឋមន្ត្រី ហ៊ុន សែន បានរំឭកពីអនុស្សាវរីយ៍ដ៏ជូរចត់របស់ខ្លួន និងកម្មាភិបាលដ៏ស្មោះត្រង់ ៤នាក់ផ្សេងទៀត ចំពោះដំណើរឆ្ពោះទៅផ្ដួលរំលំរបបប្រសាសន៍ពូជសាសន៍ ប៉ុល ពត ដែលមានស្លាកស្នាម និងប្រភពចេញពីឃុំទន្លូង ស្រុកមេមត់។
ពេលខ្លះ លោកមានប្រសាសន៍ទាំងអួលដើមកនៅពេលរំឭកពីប្រវត្តិតស៊ូទាំងនោះ ក្នុងកិច្ចការរំដោះប្រទេសជាតិ ហើយពេលខ្លះ លោកអស់សំណើច នៅពេលបានជជែកលេងជាមួយអ្នកភូមិកោះថ្ម ដែលបានផ្តល់សេចក្តីស្រឡាញ់ ការរាប់អានជាមួយលោក និងក្រុមគ្រួសារ។ ប៉ុន្តែពេលខ្លះទៀត លោកនាយករដ្ឋមន្ត្រីនិយាយដោយទឹកមុខមាំ ហាក់មានកំហឹងខ្លាំងចំពោះក្រុមណាមួយដែលប៉ុនប៉ងចង់កម្ទេចត្រកូល ហ៊ុន និងដែលលោកអះអាងថា ចង់បំផ្លាញសន្តិភាព។
លោក ហ៊ុន សែន បញ្ជាក់ថា ត្រកូល ហ៊ុន មិនមែនជាត្រកូលសម្រាប់ជនណាវ៉ៃលេងទេ ហើយជននោះត្រូវរង់ចាំទទួលនូវអ្វីដែលត្រូវទទួល ប្រសិនបើពួកគេនៅតែព្រហើនទៀត៖ «ត្រកូល ហ៊ុន មិនមែនសម្រាប់អ្នកឯងវ៉ៃលេងទេ។ ឥឡូវត្រកូល ហ៊ុន កូនប្រុសទាំងបីចេញមកដើម្បីឲ្យប្រជាពលរដ្ឋបានឃើញ»។
ក្រោយពេលថ្លែងចប់ លោកនាយរដ្ឋមន្ត្រី និងមន្ត្រីរាជរដ្ឋាភិបាល ព្រមទាំងគណៈប្រតិភូផ្សេងទៀត បានធ្វើដំណើរទៅចំណុចស្លាកស្នាមអនុស្សាវរីយ៍មួយចំនួនទៀតនៅក្បែរព្រំដែនកម្ពុជា-វៀតណាម ដែលលោក ហ៊ុន សែន ថាជាទីកន្លែងដ៏ជូរចត់ ខណៈពេលដែលលោក និងបក្ខពួក ៤នាក់ទៀត បានធ្វើដំណើរចេញពីប្រទេសកម្ពុជា ទៅកាន់ប្រទេសវៀតណាម កាលពីថ្ងៃទី២០ និងថ្ងៃទី២១ ខែមិថុនា ឆ្នាំ១៩៧៧ ក្នុងដំណើរមួយដែលលោកអះអាងថា ឆ្ពោះទៅផ្ដួលរំលំរបបខ្មែរក្រហមនៅថ្ងៃទី៧ ខែមករា ឆ្នាំ១៩៧៩។
ទោះបីជាលោកនាយករដ្ឋមន្ត្រីបញ្ជាក់ថា ត្រកូល ហ៊ុន មិនបានយកប្រទេសកម្ពុជា ជាប្រទេសផ្តាច់មុខក៏ដោយ ប៉ុន្តែរបាយការណ៍មួយរបស់អង្គការឃ្លាំមើលពិភពលោក គ្លបល វីនេស (Global Witness) ដែលចេញផ្សាយកាលពីថ្ងៃទី៧ ខែកក្កដា ឆ្នាំ២០១៦ មុនថ្ងៃឃាតកបាញ់ប្រហារលើអ្នកវិភាគសង្គម លោកបណ្ឌិត កែម ឡី បីថ្ងៃ បានលាតត្រដាងថា អធិរាជត្រកូល «ហ៊ុន» កំពុងក្ដោបក្ដាប់សេដ្ឋកិច្ចធំៗរបស់កម្ពុជា តាមរយៈក្រុមហ៊ុន និងភាគហ៊ុនដោយសម្ងាត់ជាច្រើន ដែលមានទំហំទឹកប្រាក់រាប់រយលានដុល្លារសហរដ្ឋអាមេរិក។
អ្នកជំនាញខាងអភិបាលកិច្ច និងវិទ្យាសាស្ត្រនយោបាយ លោកបណ្ឌិត ចាន់ វិបុល មិនអាចបរិយាយជុំវិញការលើកឡើងរបស់ប្រមុខដឹកនាំបានទេ ព្រោះលោកនាយករដ្ឋមន្ត្រីអាចមានហេតុផលរបស់គាត់។ យ៉ាងនេះក្តី លោក ចាន់ វិបុល មើលឃើញថា ប្រទេសកម្ពុជា បានជ្រើសរើសរបបនយោបាយបែបលទ្ធិប្រជាធិបតេយ្យ សេរីពហុបក្ស ហើយអ្នកមានឱកាសអាចដឹកនាំសង្គមជាតិបន្តបាន គឺអាស្រ័យលើលទ្ធផលនៃការបោះឆ្នោត។
លោកបន្តថា លទ្ធផលនៃការបោះឆ្នោតដែលជំរុញឲ្យមានសេចក្តីសុខជូនដល់ប្រទេសជាតិ ពោលគឺមិនមានការបៀតបៀនដល់គ្រួសារណាមួយ ឬបុគ្គលណាមួយ គឺមានកត្តាបីសំខាន់ ដូចជាក្រមសីលធម៌របស់គណបក្សនយោបាយ ឬអ្នកនយោបាយ។ ទីពីរ គឺឯករាជភាពរបស់គណៈកម្មាធិការជាតិរៀបចំការបោះឆ្នោត និងទី៣ ការយល់ដឹងជុំវិញសេចក្តីសម្រេចរបស់ប្រជាពលរដ្ឋ៖ «ជាក់ស្តែង គឺយើងចង់ឃើញការដឹកនាំមួយដែលយល់ដឹងពីប្រជាធិបតេយ្យ ការដឹកនាំមួយដែលឲ្យតម្លៃការបោះឆ្នោត ការដឹកនាំមួយដែលមិនប្រព្រឹត្តអំពើហិង្សាគ្រប់ភាគីទាំងអស់»។
អ្នកជំនាញដដែលមើលមិនឃើញអំពីសញ្ញាណាមួយដែលនាំឲ្យក្រុមមួយកម្ទេចក្រុមមួយ ហើយក៏គ្មានហេតុផលណាដែលនាំឲ្យកើតសង្គ្រាមដែរ ត្បិតកម្ពុជា ធ្លាប់បានឆ្លងកាត់សង្គ្រាម និងបានបញ្ចប់រួចទៅហើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
អត្ថបទពេញនិយម
នយោបាយ
- លោក ហ៊ុន សែន បដិសេធការចោទរបស់វៀតណាម ដែលថា ព្រែកជីកហ្វូណនសម្រាប់សម្រួលវត្តមានយោធាចិន
- លោក ហ៊ុន ម៉ាណែត ថ្លែងការពារគម្រោងព្រែកជីកហ្វូណនតេជោ ក្រោយពេលវៀតណាមរិះគន់
- មន្ត្រីរដ្ឋាភិបាលអះអាងថា ការជីកព្រែកហ្វូណនជាសិទ្ធិអធិបតេយ្យរបស់កម្ពុជា គ្មានការចាំបាច់បំភ្លឺគ្រប់រឿងដល់វៀតណាមទេ
- លោក ហ៊ុន សែន ស្នើជួបមេដឹកនាំរដ្ឋប្រហារយោធាភូមាភ្លាមៗក្រោយឡើងតំណែងជាប្រធានព្រឹទ្ធសភា
- ពលរដ្ឋខ្មែរនៅក្រៅប្រទេសចង់ឃើញលោក ហ៊ុន ម៉ាណែត បង្រួបបង្រួមជាតិឡើងវិញក្នុងឱកាសចូលឆ្នាំខ្មែរ