លោក ហ៊ុន សែន ខកបំណងចំពោះដំណើរទស្សនកិច្ចរបស់អ្នកស្រី មីស៊្ហែល អូបាម៉ា
2015.03.25
លោកនាយករដ្ឋមន្ត្រី ហ៊ុន សែន នៅថ្ងៃពុធ ទី២៥ មីនា សម្ដែងការខកចិត្តចំពោះទីភ្នាក់ងារផ្ដល់ជំនួយសហរដ្ឋអាមេរិក ដែលមិនបានផ្ដល់អាហារូបករណ៍ដល់សិស្សស្រីចំនួន ១០នាក់ ដែលស្ត្រីទី១ សហរដ្ឋអាមេរិក អ្នកស្រី មីស៊្ហែល អូបាម៉ា (Michelle Obama) បានជ្រើសរើសឱ្យបានបន្តការសិក្សាទៅថ្នាក់ឧត្ដមសិក្សាកាលពីសប្ដាហ៍មុន។
ឆ្លើយតបនឹងអត្ថាធិប្បាយរបស់លោក ហ៊ុន សែន នេះ មន្ត្រីស្ថានទូតសហរដ្ឋអាមេរិក បញ្ជាក់ថា កម្មវិធីរបស់អ្នកស្រី មីស៊្ហែល អូបាម៉ា មិនមែនជាកម្មវិធីផ្ដល់អាហារូបករណ៍ទេ ប៉ុន្តែក្នុងរយៈពេលពីរឆ្នាំកន្លងមកនេះ សហរដ្ឋអាមេរិក បានជួយវិស័យអប់រំកម្ពុជា អស់ទឹកប្រាក់ប្រមាណ ៤០លានដុល្លារ។
លោកនាយករដ្ឋមន្ត្រី ហ៊ុន សែន ថ្លែងផ្ដាំផ្ញើទៅស្ត្រីទី១ គឺអ្នកស្រី មីស៊្ហែល អូបាម៉ា ថា ភរិយារបស់លោកបានផ្ដល់អាហារូបករណ៍ដល់កូនសិស្សក្រីក្រទាំង ១០នាក់ នៅខែត្រសៀមរាប ដែលអ្នកស្រីបានជ្រើសរើសមកជួបពិភាក្សានោះហើយ។
លោក ហ៊ុន សែន ថ្លែងនៅថ្ងៃទី២៥ មីនា ថា លោកគាំទ្រចំពោះការមកធ្វើទស្សនកិច្ចរបស់អ្នកស្រី មីស៊្ហែល អូបាម៉ា កាលពីថ្ងៃទី២១ ខែមីនា នៅសាលាវិទ្យាល័យ ហ៊ុន សែន ប្រាសាទ បាគង ក្នុងគម្រោងផ្ដល់ឱកាសអោយក្មេងស្រីបានសិក្សានេះ។ តែលោកខកបំណងនៅពេលអ្នកស្រីមិនបានជួយផ្ដល់អាហារូបករណ៍ដល់សិស្សក្រីក្រទាំង ១០នាក់ ដែលត្រូវបានជ្រើសរើសឲ្យមកជួបអ្នកស្រីនោះ៖ «សូមផ្ដាំលោកជំទាវ មីស៊្ហែល អូបាម៉ា ផង ជំទាវ ប៊ុន រ៉ានី ហ៊ុន សែន ដោះស្រាយហើយ អ៊ីចឹងគាត់បានមកត្រឹមរើសមនុស្សហើយដល់បោះមកក្រសួងអប់រំ ដដែល អ៊ីចឹងមានន័យស្អី? អត់ទេ យុទ្ធនាការគាត់ល្អ តែខ្ញុំសូមផ្ដល់មតិ សុំឲ្យអាមេរិក ជួយចប់ចុងចប់ដើម កុំលេងបំផើមចោល ហើយខ្ញុំសុំជួយ ១វគ្គនេះ ហើយបើគាត់រើស ៣០០នាក់ អីខ្ញុំមានលុយឯណា ហើយខ្ញុំសុំឲ្យស្ថានទូតអាមេរិក និង USAID មើលពីចំណុចហ្នឹងផង ហើយជំទាវ មីស៊្ហែល អូបាម៉ា គាត់មិនដឹងផង? លេងអាធុនហ្នឹងមិនស្រួលទេ»។
អ្នកនាំពាក្យស្ថានទូតសហរដ្ឋអាមេរិក ប្រចាំនៅទីក្រុងភ្នំពេញ លោក ជេ រ៉ាមែន (Jay Raman) បានឆ្លើយតបតាមសារអេឡិចត្រូនិក មកវិទ្យុអាស៊ីសេរី នៅថ្ងៃទី២៥ មីនា ថា គម្រោងផ្ដល់ឱកាសឲ្យក្មេងស្រីបានសិក្សា និងការមកទស្សនកិច្ចរបស់អ្នកស្រី មីស៊្ហែល អូបាម៉ា នេះ មិនមែនជាកម្មវិធីផ្ដល់អាហារូបករណ៍នោះទេ។
លោកបញ្ជាក់ថា គម្រោងផ្ដល់ឱកាសអោយក្មេងស្រីបានសិក្សា គឺជាកិច្ចខិតខំប្រឹងប្រែងរបស់រដ្ឋាភិបាលអាមេរិក ដែលដឹកនាំដោយទីភ្នាក់ងារ ភីស ខរ (Peace Corps) និងទីភ្នាក់ងារសហរដ្ឋអាមេរិក ដើម្បីអភិវឌ្ឍន៍អន្តរជាតិ ដើម្បីធ្វើការជាមួយដៃគូនៅជុំវិញពិភពលោកក្នុងការជម្នះឧបសគ្គដែលរារាំងក្មេងស្រីក្នុងការការពារ និងទទួលបានការអប់រំ។ ដូច្នេះពួកគេអាចជួយក្រុមគ្រួសាររបស់ពួកគេរួមចំណែកដល់សហគមន៍របស់ពួកគេ និងការកំណត់ជោគវាសនារបស់គេដោយផ្ទាល់។ ចាប់តាំងពីឆ្នាំ២០០៣ មក រដ្ឋាភិបាលសហរដ្ឋអាមេរិក បានវិនិយោគថវិកាជាង ៤០លានដុល្លារសហរដ្ឋអាមេរិក ដើម្បីលើកកម្ពស់គុណភាពអប់រំនៅកម្ពុជា។
អ្នកឃ្លាំមើលផ្នែកអភិវឌ្ឍន៍សង្គម លោកបណ្ឌិត កែម ឡី បានចាត់ទុកការសម្ដែងការខកចិត្តរបស់លោក ហ៊ុន សែន នេះ ជាកាយវិការសម្ដែងពីភាពទន់ខ្សោយរបស់រដ្ឋាភិបាលខ្លួនឯងទៅវិញទេ ផ្ទុយទៅវិញ លោកបញ្ជាក់ថា ការមកទស្សនកិច្ចរបស់ស្ត្រីទី១របស់សហរដ្ឋអាមេរិកនេះ ជាកាលើកមុខមាត់របស់កម្ពុជា ទៅវិញទេ ដែលធ្វើឲ្យប្រទេសជាម្ចាស់ជំនួយនឹងចាប់អារម្មណ៍ដល់កម្ពុជា៖ «គាត់សំដែងការខកចិត្តមានន័យថា ម៉េច? មានន័យថា ប្រទេសយើងពឹងផ្អែកលើគេជួយទាំងស្រុង អាហ្នឹងមិនត្រឹមត្រូវទេ ព្រោះកាយវិការគេដែលគេមកហ្នឹង គឺផ្ដល់កិត្តិយសដល់ប្រទេសយើង និងជួយយកចិត្តលើក្មេងស្រី ទាំងអស់នេះសុទ្ធតែរដ្ឋយើងអាចធ្វើបានខ្លួនឯងហ្នឹង។ ខ្ញុំផ្ដល់ឧទាហរណ៍សាលា បឋមសិក្សាយើង ៣០% គ្មានបង្គន់អនាម័យ ដែលធ្វើឲ្យសិស្សបោះបង់ការសិក្សា»។
រដ្ឋមន្ត្រីក្រសួងអប់រំយុវជននិងកីឡា ឱ្យដឹងថា ប្រទេសកម្ពុជា បច្ចុប្បន្ននៅក្នុងថ្នាក់បឋមសិក្សា គឺមានក្មេងស្រីចូលរៀន ៥០% ស្មើគ្នាជាមួយក្មេងប្រុស ក៏ប៉ុន្តែនៅពេលបន្តដល់ថ្នាក់មហាវិទ្យាល័យ គឺចំនួនស្ត្រីបានថយចុះមកត្រឹម ៤២% ហើយនៅឯថ្នាក់អនុបណ្ឌិត ឬក៏បណ្ឌិតមានស្ត្រីតែ ៥% ប៉ុណ្ណោះនៅបន្តការសិក្សា។
ដំណើរទស្សនកិច្ចរយៈពេល ៣ថ្ងៃរបស់អ្នកស្រី មីស៊្ហែល អូបាម៉ា នៅកម្ពុជា កន្លងមកនេះ ធ្វើឱ្យស្ត្រីទី១ នៃសហរដ្ឋអាមេរិក បានចាប់អារម្មណ៍ពីក្មេងស្រី និងប្រជាពលរដ្ឋនៅកម្ពុជា ហើយក៏ជាផ្នែកមួយនៃគោលនយោបាយរបស់សហរដ្ឋអាមេរិក ដើម្បីជំរុញក្មេងស្រីនៅទូទាំងពិភពលោកឱ្យបានចូលរៀនខ្ពង់ខ្ពស់គ្រប់គ្នា៕