គ.ជ.ប៖ ពលរដ្ឋអាចផ្ទៀងផ្ទាត់ឈ្មោះបោះឆ្នោតនៅតាមឃុំ-សង្កាត់ឬតាមអនឡាញ
2017.01.03
ពលរដ្ឋទៅពិនិត្យឈ្មោះបោះឆ្នោតក្នុងបញ្ជីឈ្មោះបោះឆ្នោតថ្មីនាមណ្ឌលស្ទឹងមានជ័យ រាជធានីភ្នំពេញ នៅថ្ងៃទី៣ ខែមករា ឆ្នាំ២០១៧។ RFA/Sorn Chanratha
RFA/Sorn Chanratha
គណៈកម្មាធិការជាតិរៀបចំការបោះឆ្នោត (គ.ជ.ប) បានបិទផ្សាយបញ្ជីឈ្មោះបោះឆ្នោតថ្មីជាលើកដំបូង នៅថ្ងៃទី៣ មករា។ ការបិទផ្សាយបញ្ជីដំបូងដែល គ.ជ.ប ធ្វើរួចកាលពីខែវិច្ឆិកា ឆ្នាំ២០១៦ គឺដើម្បីឲ្យពលរដ្ឋទៅពិនិត្យផ្ទៀងផ្ទាត់ឈ្មោះរបស់ខ្លួនឡើងវិញ។
បញ្ជីឈ្មោះបោះឆ្នោតថ្មី ត្រូវបាន គ.ជ.ប បិទផ្សាយនៅតាមឃុំ-សង្កាត់ចំនួន ១.៦៣៣ សម្រាប់ឲ្យពលរដ្ឋពិនិត្យផ្ទៀងផ្ទាត់ចាប់ពីព្រឹកថ្ងៃទី៣ មករា។ ក៏ប៉ុន្តែការបិទផ្សាយនៅថ្ងៃដំបូងនេះ មានពលរដ្ឋចំនួនតិចតួចនៅឡើយដែលបានដឹង និងទៅពិនិត្យឈ្មោះរបស់ខ្លួននៅក្នុងបញ្ជីថ្មីនេះ។
អ្នកលក់កាសែតដែលនៅទល់មុខវត្តស្ទឹងមានជ័យ ខណ្ឌមានជ័យ គឺលោកស្រី កៅ បុប្ផា និងប្ដីរបស់លោកស្រី មិនបានដឹងពីការបិទផ្សាយនេះទេ រហូតទាល់តែអ្នកកាសែតសួរ៖ «ចុះឈ្មោះចុះរួចអស់ហើយ តែនៅតែពេលផ្ទៀងផ្ទាត់ទេ។ ពេលផ្ទៀងផ្ទាត់អត់ទាន់ដឹងព័ត៌មានទេ គឺទើបតែខាងសារព័ត៌មានចុះមកបានដឹង។ ឥឡូវដឹងហើយ ទៅហើយ ព្រោះសាលាសង្កាត់នៅជិតដែរហ្នឹង។ ពេលទំនេរ កូនពីរៀនអីហ្នឹង ឆ្លៀតទៅមួយភ្លែត ព្រោះអត់មានអ្នកនៅចាំ។ ពេលកូនទំនេរពីការងាររៀនសូត្រ នៅចាំកន្លែង បានអាចទៅបានមួយភ្លែត។ តែអត់បោះបង់ចោលទេ»។
ពលរដ្ឋខ្លះដែលរស់នៅជិតសាលាឃុំ-សង្កាត់ បានដឹងអំពីការបិទផ្សាយបញ្ជីនេះ ហើយពួកគាត់ឆ្លៀតទៅពិនិត្យឲ្យហើយ។
រីឯអ្នករត់រ៉ឺម៉កកង់បីម្នាក់មកពីឃុំព្រះនិព្វាន ស្រុកគងពិសី ខេត្តកំពង់ស្ពឺ គឺលោក ស៊ុម ឈាង ថ្លែងនៅព្រឹកថ្ងៃទី៣ មករា ថា លោកមិនទាន់បានទៅពិនិត្យឈ្មោះក្នុងបញ្ជីថ្មីនៅឡើយទេ ព្រោះលោកជាប់រវល់រកលុយទ្រទ្រង់សេដ្ឋកិច្ចគ្រួសារសិន៖ «ខ្ញុំអត់ទាន់បានទៅពិនិត្យឈ្មោះហ្នឹង នៅ! តែខ្ញុំទៅមកៗដែរ ៤ថ្ងៃ ៥ថ្ងៃ ៣ថ្ងៃមកវិញ។ ថ្ងៃច័ន្ទ ថ្ងៃអាទិត្យ បីបួនថ្ងៃហ្នឹង ទៅផ្ទះទៀតហើយ»។
ការបិទផ្សាយបញ្ជីឈ្មោះថ្មីនេះ គឺដើម្បីឲ្យពលរដ្ឋដែលបានចុះឈ្មោះហើយ ពិនិត្យឈ្មោះរបស់ខ្លួនឲ្យបានត្រឹមត្រូវ មុននឹងឈានទៅបោះឆ្នោតជ្រើសរើសក្រុមប្រឹក្សាឃុំ-សង្កាត់ នៅថ្ងៃទី៤ ខែមិថុនា ឆ្នាំ២០១៧។
សេចក្ដីប្រកាសព័ត៌មានរបស់ គ.ជ.ប នៅថ្ងៃទី៣ មករា បង្ហាញថា ចំនួនឈ្មោះនៅក្នុងបញ្ជីដំបូងដែលបិទផ្សាយនេះ មានជាង ៧លាន ៨សែននាក់ (៧.៨៦៤.៤២៩នាក់) ក្នុងចំណោមពលរដ្ឋគ្រប់អាយុចុះឈ្មោះបោះឆ្នោតសរុបជាង ៩លាន ៦សែននាក់ (៩.៦៦៤.២១៦នាក់)។
អ្នកបោះឆ្នោតខ្លះដូចជាលោក ផង់ សាវ៉ុន មកពីខេត្តស្វាយរៀង ថ្លែងថា លោកជួបការលំបាក ព្រោះមណ្ឌលចុះឈ្មោះរបស់លោកនៅឆ្ងាយ។
មន្ត្រីនាំពាក្យ គ.ជ.ប លោក ហង្ស ពុទ្ធា ថ្លែងថា ក្រៅពីការពិនិត្យឈ្មោះនៅលើបញ្ជីជាក្រដាសដែលបានបិទនៅតាមសាលាឃុំ-សង្កាត់ ពលរដ្ឋក៏អាចពិនិត្យឈ្មោះរបស់ខ្លួនតាមរយៈទូរស័ព្ទស្មាតហ្វូន (Smart Phone) បានដែរ ដោយចូលទៅក្នុងគេហទំព័ររបស់ គ.ជ.ប ដែលមានអាសយដ្ឋានថា www.voterlist.org.kh។ ប៉ុន្តែលោកថា គេហទំព័រនេះមិនដំណើរការល្អទេ នៅថ្ងៃទី៣ មករា ដោយសារតែមានអ្នកចូលមើលច្រើន៖ «យើងអាចមើលនៅលើស្មាតហ្វូនបាន។ ទីមួយ បើសិនជាយើងចង់ដឹងព័ត៌មាន ចុច ១២៨៥។ បើចង់មើលបញ្ជីតែម្ដង ទាល់តែចូលវែបសាយ គ.ជ.ប ប្រើស្មាតហ្វូនក៏បានដែរ។ ឥឡូវខ្ញុំគ្រាន់តែចង់ជម្រាបមួយថា កំពុងតែមានបញ្ហាមួយ គឺថាអ្នកចូលមើលច្រើន។ ឥឡូវមានបញ្ហារអាក់រអួលខាងផ្នែកវែបសាយល្បឿនវាតិច។ ឥឡូវ គ.ជ.ប សម្រេចថែមលុយ ដើម្បីឲ្យវាដំណើរការឡើងវិញ។ អ៊ីចឹងវាអាចរអាក់រអួលថ្ងៃហ្នឹង ប៉ុន្តែស្អែក ឬខានស្អែក បែបវាដើរធម្មតាឡើងវិញហើយ»។
បញ្ជីឈ្មោះអ្នកបោះឆ្នោតដែលបិទផ្សាយនៅពេលនេះ យើងសង្កេតឃើញមានសន្លឹកបញ្ជីខ្លះត្រូវបានគេគូសខ្វែងលុបចោល ដោយមន្ត្រីឃុំ-សង្កាត់ប្រាប់ថា ជាឈ្មោះស្ទួន។ នៅពេលនេះ គ.ជ.ប បានលុបឈ្មោះចំនួន ២.៧៣៧នាក់រួចហើយ ហើយនឹងលុបឈ្មោះចំនួន ៨.៣៤៦នាក់បន្ថែមទៀត ដោយសារទិន្នន័យនេះសល់ពីការចុះឈ្មោះសាកល្បង និងការផ្ទេរការិយាល័យក្នុងឃុំ-សង្កាត់។
គ.ជ.ប ពន្យល់ថា នៅពេលណាពលរដ្ឋពិនិត្យទៅឃើញមានបញ្ហា ហើយចង់ប្ដឹងតវ៉ា ឬប្ដឹងជំទាស់អ្វីមួយ ត្រូវធ្វើទៅក្រុមប្រឹក្សាឃុំ-សង្កាត់ក្នុងរយៈពេល ១០ថ្ងៃ បន្ទាប់ពីថ្ងៃបិទផ្សាយបញ្ជីនេះ គឺចាប់ពីថ្ងៃទី៤ រហូតដល់ថ្ងៃទី១៤ មករា ដែលជាកាលបរិច្ឆេទចុងក្រោយ។ ក្នុងករណីអ្នកប្ដឹងតវ៉ា ឬប្ដឹងជំទាស់ មិនពេញចិត្តទៅនឹងសេចក្ដីសម្រេចរបស់ក្រុមប្រឹក្សាឃុំ-សង្កាត់ ពួកគាត់អាចប្ដឹងទៅ គ.ជ.ប និងក្រុមប្រឹក្សាធម្មនុញ្ញតាមច្បាប់កំណត់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ
អត្ថបទពេញនិយម
នយោបាយ
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- មន្ត្រីរដ្ឋាភិបាលអះអាងថា ការជីកព្រែកហ្វូណនជាសិទ្ធិអធិបតេយ្យរបស់កម្ពុជា គ្មានការចាំបាច់បំភ្លឺគ្រប់រឿងដល់វៀតណាមទេ
- លោក ហ៊ុន ម៉ាណែត ថ្លែងការពារគម្រោងព្រែកជីកហ្វូណនតេជោ ក្រោយពេលវៀតណាមរិះគន់
- តើកម្ពុជាអាចជម្នះសាងសង់ព្រែកជីកហ្វូណនតេជោបានដែរឬទេ?
- លោក ហ៊ុន សែន បដិសេធការចោទរបស់វៀតណាម ដែលថា ព្រែកជីកហ្វូណនសម្រាប់សម្រួលវត្តមានយោធាចិន