មន្ត្រីជាន់ខ្ពស់បក្សប្រឆាំងប្រកាសផ្លូវការនៅថ្ងៃទី៣១ ឧសភា ថា ប្រធានស្ដីទីគណបក្សសង្គ្រោះជាតិ លោក កឹម សុខា នៅក្នុងទីស្នាក់ការកណ្ដាលបក្ស សង្កាត់ចាក់អង្រែលើ និងមានសុខភាពល្អធម្មតា។
ថ្លែងក្នុងសន្និសីទកាសែតនៅចំពោះអ្នកគាំទ្រខ្លួន មន្ត្រីជាន់ខ្ពស់គណបក្សសង្គ្រោះជាតិ លោក អេង ឆៃអ៊ាង បញ្ជាក់ថា លោក កឹម សុខា បានស្នាក់នៅក្នុងទីស្នាក់ការកណ្ដាលបក្សចាក់អង្រែលើ តាំងពីថ្ងៃទី២៦ ឧសភា មក។
បន្ថែមពីនេះ លោក អេង ឆៃអ៊ាង ក៏អំពាវនាវដល់អ្នកគាំទ្រឲ្យតាមដានឃ្លាំមើលព្រឹត្តិការណ៍នេះ ហើយចំពោះញត្តិស្នាមមេដៃវិញ គណបក្សនៅបន្តទទួលជាធម្មតា។
ទោះជាយ៉ាងណាក៏ដោយ លោកមិនទាន់ដឹងថា លោក កឹម សុខា នឹងត្រូវគេចាប់ខ្លួនពេលណា ហើយស្ថានការណ៍នឹងប្រែប្រួលយ៉ាងណានោះទេ ខណៈដែលការចរចានយោបាយនៅមិនទាន់អាចធ្វើនៅឡើយ ដោយសារគណបក្សប្រជាជនកម្ពុជាថា នៅជាប់រវល់។
ក្រោយពីសមាជិកសភា ៦៨រូបមកពីគណបក្សប្រជាជនកម្ពុជាលើកដៃរួមគ្នាបោះឆ្នោតអនុញ្ញាតឲ្យសមត្ថកិច្ចបន្តចំណាត់ការ លើករណីលោក កឹម សុខា កាលពីថ្ងៃទី៣០ ខែឧសភា គណបក្សសង្គ្រោះជាតិក៏បានថ្កោលទោសចំពោះការអនុម័តនោះ និងអះអាងថា រដ្ឋសភាគ្មានសិទ្ធិ និងអំណាចផ្លូវច្បាប់ក្នុងការអនុម័តដោយមតិភាគច្រើនដាច់ខាត ឬ ៥០ភាគរយបូក១ ដើម្បីអនុញ្ញាតឲ្យតុលាការបន្តនីតិវិធីចោទប្រកាន់ចាប់ខ្លួន ឃាត់ខ្លួន ឬឃុំខ្លួនតំណាងរាស្ត្រណាម្នាក់ឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។