សកម្មជនបក្សប្រឆាំងនៅបាត់ដំបងចោទមន្ត្រីយោធាថាគំរាមសម្លាប់ទាក់ទិនរឿងនយោបាយ
2015.07.28
សកម្មជនគណបក្សសង្គ្រោះជាតិ ឃុំចែងមានជ័យ ស្រុកបាណន់ ខេត្តបាត់ដំបង លោក រ៉ុម សារ៉ន ផ្ដល់បទសម្ភាសន៍ដល់វិទ្យុអាស៊ីសេរី នាទីស្នាក់ការអង្គការលីកាដូ (Licadho) នៅថ្ងៃទី២៨ ខែកក្កដា ឆ្នាំ២០១៥។
សកម្មជនគណបក្សសង្គ្រោះជាតិ ម្នាក់ នៅបាណន់ ខេត្តបាត់ដំបង នៅព្រឹកថ្ងៃទី២៨ កក្កដា បានប្ដឹងអតីតមេបញ្ជាការរងយោធា ១រូប ក្នុងខេត្តបាត់ដំបង ពីបទគំរាមសម្លាប់ ទៅអង្គការលីកាដូ (Licadho) ឲ្យជួយអន្តរាគមន៍ផ្លូវច្បាប់លើមន្ត្រីរូបនោះ។
សកម្មជនបក្សប្រឆាំងរូបនោះ កំពុងព្រួយបារម្ភអំពីសុវត្ថិភាពផ្ទាល់ខ្លួន បន្ទាប់ពីត្រូវមន្ត្រីយោធារូបនោះវាយដំបង្ករបួសស្នាម និងគំរាមកំហែងលើរូបគាត់ជាបន្តបន្ទាប់ ដោយសាររឿងទំនាស់គណបក្សនយោបាយ ប៉ុន្តែមន្ត្រីយោធាដែលរងការចោទប្រកាន់នោះ បដិសេធថាជារឿងមិនពិតឡើយ។
សកម្មជនគណបក្សប្រឆាំងនៅស្រុកបាណន់ អំពាវនាវសុំឲ្យអង្គការសង្គមស៊ីវិលផ្នែកសិទ្ធិមនុស្ស និងអាជ្ញាធរពាក់ព័ន្ធ ជួយរកយុត្តិធម៌ និងចាត់វិធានការផ្លូវច្បាប់លើអតីតមេបញ្ជាការរងអនុសេនាធំស៊ើបការ នៃកងពលតូចលេខ៥២ រូបនោះជាបន្ទាន់ ដើម្បីកុំឲ្យមានការគំរាមកំហែងលើរូបគាត់នៅពេលខាងមុខទៀត។
សកម្មជនគណបក្សសង្គ្រោះជាតិ ឃុំចែងមានជ័យ ស្រុកបាណន់ ខេត្តបាត់ដំបង គឺលោក រ៉ុម សារ៉ន អង្គុយថ្លែងក្នុងទឹកមុខស្រពោននៅទីស្នាក់ការអង្គការលីកាដូ ខេត្តបាត់ដំបង នៅថ្ងៃទី២៨ កក្កដា ថា អតីតមេបញ្ជាការរងអនុសេនាធំស៊ើបការនៃកងពលតូចលេខ៥២ ប្រចាំខេត្តបាត់ដំបង ឈ្មោះ ផុន សុភ័ណ្ឌ តែបច្ចុប្បន្នពុំដឹងស្ថិតក្នុងអង្គភាពណាច្បាស់លាស់នោះទេ កាលពីថ្ងៃទី២៦ កក្កដា កន្លងទៅ បានវាយចាប់បោករូបលោកទៅនឹងដី បណ្ដាលឲ្យរងរបួសជាំភ្នែកខាងឆ្វេង។ លោកអះអាងថា កាលណោះអតីតមេបញ្ជាការរងរូបនោះ មានទំនាស់ពាក្យសម្ដីជាមួយលោក ពាក់ព័ន្ធនឹងរឿងនយោបាយ ដោយជជែកគ្នាជាមួយលោកថា លោក សម រង្ស៊ី ទៅក្រៅប្រទេសគេចយករួចខ្លួន ហើយក៏ផ្ទុះកំហឹងគំរាមកំហែង និងវាយដំលើរូបលោកតែម្ដង៖ «គាត់ជេរខ្ញុំថា ពួកអាក្បត់ពួកអារមិលគុណ និងអាចោរម្ដាយនៅក្នុងហាងកាហ្វេ ហើយវាយខ្ញុំបោកនឹងដីយកតែម្ដង កុំតែមានគេមកជួយខ្ញុំ មិនដឹងទៅយ៉ាងណាទេ»។
ឆ្លើយតបនឹងការចោទប្រកាន់នេះ អតីតមេបញ្ជាការរងអនុសេនាធំស៊ើបការនៃកងពលតូចលេខ៥២ គឺលោក ផុន សុភ័ណ ហៅ ឡន មានប្រសាសន៍បដិសេធចំពោះការចោទប្រកាន់ ដែលថាលោកទៅវាយដំសកម្មជនគណបក្សប្រឆាំងនោះ។ ទោះយ៉ាងនេះក្ដី លោកទទួលស្គាល់ថា ពិតជាបានជជែកខ្វែងគំនិតគ្នាពាក់ព័ន្ធបញ្ហារបស់អ្នកនយោបាយខ្លះមែន ប៉ុន្តែធ្វើឡើងទៅតាមការយល់ឃើញក្នុងបណ្ដាញសង្គមហ្វេសប៊ុក (Facebook) ទេ៖ «គាត់ថាយួន យកដីអស់ហើយនៅខេត្តព្រៃវែង និងស្វាយរៀង នោះ ហើយខ្ញុំក៏ពន្យល់ថា គេមិនឲ្យឈ្លោះគ្នាទេយើងប្រទេសជិតខាងនឹងគ្នានោះ គេកំពុងតែផ្ញើផែនទីពីប្រទេសបារាំង និងពីអាមេរិក មកហើយ មិនបាច់ព្រួយទេ។ បើគេយកដីយកតាំងឆ្នាំ១៩៧៩ បាត់ទៅហើយ ពីព្រោះកាលណោះយើងរស់ដោយសារយួន និងគណបក្សប្រជាជន ជួយយើងទេ»។
ទោះយ៉ាងនេះក្ដី សកម្មជនគណបក្សប្រឆាំងនៅតែអះអាងថា មន្ត្រីយោធារូបនោះបន្ទាប់ពីប្រើអំពើហិង្សាលើរូបលោកហើយ ក្រោយមកទៀតបានជេរប្រមាថគំរាមកំហែងរកសម្លាប់លោក និងធ្វើឲ្យភ័យខ្លាចអំពីសុវត្ថិភាពផ្ទាល់ខ្លួន។
ទាក់ទងបញ្ហានេះដែរ មន្ត្រីស៊ើបអង្កេតនៃអង្គការលីកាដូ (Licadho) ខេត្តបាត់ដំបង លោក ហេង សាយហុង មានប្រសាសន៍ថា ការចោទប្រកាន់ជុំវិញទំនាស់ប្រើអំពើហិង្សាគ្នារវាងសកម្មជនគណបក្សសង្គ្រោះជាតិ និងមន្ត្រីយោធានោះ ថាជាការគំរាមកំហែងបិទសិទ្ធិសេរីភាពក្នុងការបញ្ចេញមតិផ្នែកនយោបាយរបស់ប្រជាពលរដ្ឋ៖ «បញ្ហានេះអ្នកប្រព្រឹត្តិ ត្រូវទទួលទោសតាមផ្លូវច្បាប់ធ្ងន់ធ្ងរជាងប្រជាពលរដ្ឋធម្មតា ពីព្រោះថា គាត់ជាមន្ត្រីយោធាម្នាក់ដែលមានអំណាច គំរាមកំហែងអ្នកទន់ខ្សោយ»។
លោកបន្តថា បន្ទាប់ពីទទួលពាក្យបណ្ដឹងរបស់សកម្មជនគណបក្សសង្គ្រោះជាតិ នេះហើយ នឹងចុះស្រាវជ្រាវជុំវិញករណីនេះ ដើម្បីបញ្ជូនសំណុំរឿងដាក់ទៅតុលាការខេត្តបាត់ដំបង ដំណើរការតាមផ្លូវច្បាប់បន្តទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
អត្ថបទពេញនិយម
នយោបាយ
- លោក ហ៊ុន សែន បដិសេធការចោទរបស់វៀតណាម ដែលថា ព្រែកជីកហ្វូណនសម្រាប់សម្រួលវត្តមានយោធាចិន
- លោក ហ៊ុន ម៉ាណែត ថ្លែងការពារគម្រោងព្រែកជីកហ្វូណនតេជោ ក្រោយពេលវៀតណាមរិះគន់
- មន្ត្រីរដ្ឋាភិបាលអះអាងថា ការជីកព្រែកហ្វូណនជាសិទ្ធិអធិបតេយ្យរបស់កម្ពុជា គ្មានការចាំបាច់បំភ្លឺគ្រប់រឿងដល់វៀតណាមទេ
- លោក ហ៊ុន សែន ស្នើជួបមេដឹកនាំរដ្ឋប្រហារយោធាភូមាភ្លាមៗក្រោយឡើងតំណែងជាប្រធានព្រឹទ្ធសភា
- ពលរដ្ឋខ្មែរនៅក្រៅប្រទេសចង់ឃើញលោក ហ៊ុន ម៉ាណែត បង្រួបបង្រួមជាតិឡើងវិញក្នុងឱកាសចូលឆ្នាំខ្មែរ