អ្នកបោះឆ្នោតមួយចំនួនហ៊ានបង្ហាញជំហរក្នុងការជ្រើសរើសបក្សនយោបាយ
2013.07.13
បន្ទាប់ពីបានស្វែងយល់ពីគោលនយោបាយគណបក្សដែលបានចូលរួមឃោសនា អ្នកបោះឆ្នោតមួយចំនួនហ៊ានបង្ហាញពីជំហររបស់ពួកគេក្នុងការជ្រើសរើសគណបក្សនយោបាយ ដែលពួកគេនឹងជ្រើសរើសអោយដឹកនាំប្រទេសនៅក្នុងអាណត្តិថ្មី។
អ្នកបោះឆ្នោតមួយចំនួនបានសម្រេចជ្រើសរើសគណបក្សមួយដែលខ្លួននឹងបោះឆ្នោតអោយ ស្របពេលដែលពលរដ្ឋមួយចំនួនទៀតនៅកំពុងពិចារណាពីគណបក្សដែលខ្លួននឹងបោះឆ្នោតអោយនៅឡើយ។ ពលរដ្ឋនៅក្នុងរាជធានីភ្នំពេញ និងតាមបណ្ដាខេត្តមួយចំនួន បានឆ្លើយថា ពួកគេបានសម្លឹងឃើញគណបក្សធំៗ២ ថាជាគណបក្សដែលពួកគេអាចនឹងបោះឆ្នោតអោយនោះ គឺគណបក្សប្រជាជនកម្ពុជា និងគណបក្សសង្គ្រោះជាតិ។
យ៉ាងណា សម្រាប់ប្រជាពលរដ្ឋនៅភ្នំពេញភាគច្រើននៃអ្នកដែលបានជួបសម្ភាស បានអះអាងថា ពួកគេត្រៀមជាស្រេចថានឹងបោះឆ្នោតអោយគណបក្សសង្គ្រោះជាតិ ដែលគេស្គាល់ថាជាបក្សប្រឆាំងដ៏ធំមួយកើតចេញពីការបង្រួបបង្រួមរវាងគណបក្ស សម រង្ស៊ី និងគណបក្ស សិទ្ធិមនុស្ស។
អ្នកបោះឆ្នោតទាំងនោះបានសម្អាងហេតុផលថា ពួកគេចង់អោយមានការផ្លាស់ប្ដូរអ្នកដឹកនាំ។ ហើយអ្នកដឹកនាំថ្មីដែលពួកគេចង់បាន គឺអ្នកដែលប្រកាន់គោលការណ៍ជួយពលរដ្ឋក្រីក្រ បង្កើនប្រាក់បៀវត្សរ៍ ការធានាបង្កើតការងារកាត់បន្ថយចំណាកស្រុក។ ជាពិសេស គឺគោលនយោបាយគ្រប់គ្រងជនអន្តោប្រវេសន៍ និងការពារទឹកដីពីការរំលោភយកពីបរទេសជាដើម។
ក្រៅពីអ្នកដែលហ៊ានផ្ដល់បទសម្ភាសន៍ ក៏មានអ្នកបោះឆ្នោតជាមន្ត្រីរាជការមួយចំនួនទៀត បានប្រាប់ថា ពួកគេបានសម្រេចផ្លាស់ប្ដូរការគាំទ្រ ដោយងាកមកគាំទ្រគណបក្សសង្គ្រោះជាតិ ដែរ។ ពួកគេបានលើកហេតុផលថា ធុញទ្រាន់នឹងការប្រព្រឹត្តអំពើពុករលួយ ការនិយមបក្ខពួក ម្យ៉ាងក៏ពេញចិត្តនឹងគោលនយោបាយបង្កើនប្រាក់បៀវត្សរ៍របស់គណបក្សនេះ។
មិនខុសប្លែកពីការអះអាងនេះទេ នៅក្នុងដំណើរការឃោសនាបោះឆ្នោតនេះ នៅក្នុងការហែក្បួនឃោសនាជាប្រចាំជារៀងរាល់ថ្ងៃរបស់គណបក្សសង្គ្រោះជាតិ តែងមានអ្នកចូលរួមដែលគណបក្សនេះអះអាងថា ពុំមែនជាការរៀបចំទុកជាមុនបានចូលរួម ហើយចេះតែកើនឡើងជាបន្តបន្ទាប់។ ពួកអ្នកគាំទ្រទាំងនោះបានបង្ហាញទឹកចិត្តគាំទ្រដោយស្មោះចំពោះគណបក្សនេះ ក្នុងនាមជាអ្នកបោះឆ្នោត ដើម្បីការផ្លាស់ប្ដូរ។
«សំឡេងឃោសនាក្នុងរាជធានីភ្នំពេញ»
ពិតមែនថាមានការយកចិត្តទុកដាក់ចំពោះគោលនយោបាយគណបក្ស ក៏មានយុវជនមួយចំនួនបានលើកឡើងថា ពួកគេគាំទ្រគណបក្សសង្គ្រោះជាតិ ទៅតាមការប្រាប់តៗគ្នាពីគុណសម្បត្តិនៃប្រធានគណបក្សនេះ គឺលោក សម រង្ស៊ី។
យ៉ាងណាក៏ដោយ អ្នកបោះឆ្នោតក៏នៅតែផ្ដល់តម្លៃដល់គណបក្សប្រជាជនកម្ពុជា ដែលមានបទពិសោធន៍ដឹកនាំរដ្ឋាភិបាល ៤អាណត្តិមកហើយ។ ពួកគេបានចាត់ទុកសមិទ្ធផលដែលរីកដុះដាលក្នុងពេលបច្ចុប្បន្ន ថាជាទង្វើត្រឹមត្រូវរបស់រដ្ឋាភិបាល។
ពលរដ្ឋម្នាក់ក្នុងចំណោមអ្នកគាំទ្រគណបក្សប្រជាជនកម្ពុជា លោកបានអោយដឹងថា គណបក្សប្រជាជនបានធានាសុខសន្តិភាព ដែលជាមូលដ្ឋាននៃការអភិវឌ្ឍ។
ការលើកឡើងរបស់អ្នកគាំទ្រគណបក្សប្រជាជនកម្ពុជា គឺស្ថិតក្នុងចំណោមគោលនយោបាយចម្បងៗដែលគណបក្សនេះផ្សព្វផ្សាយនៅក្នុងពេលឃោសនារកសំឡេងឆ្នោត។
«សំឡេងឃោសនា»
គោលនយោបាយរបស់គណបក្សប្រជាជនកម្ពុជា ទំនងអាចទាក់ទាញការគាំទ្រពីសំណាក់ពលរដ្ឋនៅតាមបណ្ដាខេត្ត។ ភាគច្រើននៃពលរដ្ឋមួយចំនួនដែលវិទ្យុអាស៊ីសេរី បានជួបសម្ភាសនៅក្នុងខេត្តមួយចំនួន មានខេត្តសៀមរាប មណ្ឌលគិរី ស្វាយរៀង និងកំពង់ឆ្នាំង បានលើកឡើងថា ពួកគេនឹងទៅបោះឆ្នោតអោយគណបក្សប្រជាជនកម្ពុជា។
ក្រៅពីនេះក៏មានពលរដ្ឋជាច្រើននាក់ទៀតកំពុងស្ថិតក្នុងការពិចារណាពីគណបក្សនយោបាយ ដែលពួកគេនឹងបោះឆ្នោតអោយ។ ក្នុងនោះ អ្នកខ្លះអះអាងថា ការគូសលើសន្លឹកឆ្នោតតែមួយគំនូស គឺងាយណាស់ ប៉ុន្តែបើសម្រេចចិត្តខុសវាអាចនឹងធ្វើអោយប៉ះពាល់ដល់វាសនាប្រទេសជាតិទាំងមូល។ យ៉ាងណា ក្នុងចំណោមអ្នកទាំងនោះក៏បង្ហាញថា ពួកគេបានកំណត់គោលដៅថានឹងជ្រើសរើសគណបក្សមួយក្នុងចំណោមគណបក្សប្រជាជនកម្ពុជា និងគណបក្សសង្គ្រោះជាតិ។
នៅក្នុងការបោះឆ្នោតជាតិអាណត្តិទី៤ កាលពីឆ្នាំ២០០៤ គណបក្សប្រឆាំងដែលកាលណោះជាគណបក្ស សម រង្ស៊ី បានទទួលការគាំទ្រច្រើនតែក្នុងរាជធានីភ្នំពេញ ចំណែកនៅតាមបណ្ដាខេត្ត គឺគណបក្សប្រជាជនកម្ពុជា ទទួលបានអាសនៈច្រើនលើសលប់។
ទំនោរនៃអ្នកគាំទ្រចំពោះគណបក្សនយោបាយរបស់ពលរដ្ឋដែលជាម្ចាស់ឆ្នោត ត្រូវអង្គការមិនមែនរដ្ឋាភិបាលឃ្លាំមើលការបោះឆ្នោតសង្កេតឃើញថា មានការប្រែប្រួលខុសប្លែកពីការបោះឆ្នោតពីលើកមុន។ លើសពីនេះ ពួកគេចាប់ផ្ដើមហ៊ានបង្ហាញការគាំទ្រជាសាធារណៈដោយពុំសូវមានការភ័យខ្លាច៕