គ.ជ.បអះអាងថាគេហទំព័របញ្ជីឈ្មោះបោះឆ្នោតត្រូវគេលួចចូលប៉ុន្តែដំណើរការវិញហើយ
2017.01.05
៥-មករា-២០១៧៖ គេហទំព័រស្វែងរកទិន្នន័យអ្នកបោះឆ្នោតក្នុងបញ្ជីបោះឆ្នោតដំបូង។ Screenshot
Screenshot
មន្ត្រីនាំពាក្យនៃគណៈកម្មាធិការជាតិរៀបចំការបោះឆ្នោត (គ.ជ.ប) ឲ្យដឹងថា គេហទំព័ររបស់ខ្លួនត្រូវបានគេលួចចូល (Hacked)។ ការបញ្ចេញអំពីការលួចជ្រៀតចូលនេះ គឺពីរថ្ងៃបន្ទាប់ពី គ.ជ.ប ប្រកាសបញ្ជីបោះឆ្នោតថ្មីដំបូង ហើយបញ្ជីឈ្មោះលើគេហទំព័ររបស់ខ្លួនដំណើរការរអាក់រអួល។
មន្ត្រីនាំពាក្យនៃគណៈកម្មាធិការជាតិរៀបចំការបោះឆ្នោត (គ.ជ.ប) លោក ហង្ស ពុទ្ធា ថ្លែងនៅព្រឹកថ្ងៃទី៥ មករា ថា បញ្ហាគាំងគេហទំព័របញ្ជីឈ្មោះរបស់ គ.ជ.ប ព្រោះត្រូវគេលួចជ្រៀតចូលរំខាន៖ «យើងមានឧបសគ្គពីរយ៉ាង។ ឧបសគ្គទីមួយ គឺល្បឿនហ្នឹងវាយឺតពេក។ ដល់ពេលយឺតពេក គ.ជ.ប ចេញលុយបន្ថែមសហការជាមួយក្រុមហ៊ុន ដើម្បីបន្ថែមល្បឿន។ ល្បឿនដើរហើយ ក៏ប៉ុន្តែយើងឃើញមានសញ្ញានៃការចូលហែក (hacked)។ បានន័យថា មានហែកឃើរ (hacker)។ អ៊ីចឹង ហែកឃើរនេះឯង គ្រាន់តែបើកភ្លាម គឺជិត ១លាននាក់តែម្ដង។ អ៊ីចឹងធ្វើឲ្យវានៅតែគាំង។ ប៉ុន្តែឥឡូវយើងបានដោះស្រាយរួចហើយ។ យើងបានសហការជាមួយក្រុមហ៊ុន ដូចជាវិធីបិទ ហើយបើកមកវិញ អាហ្នឹងវាពាក់ព័ន្ធនឹងបច្ចេកទេសទៀត ប៉ុន្តែមកដល់ម៉ោងនេះ វាបានដំណើរការស្រួលបួលវិញហើយ»។
ទោះបីជាមានការលួចហែកជ្រៀតចូលរំខានយ៉ាងនេះក៏ដោយ ក៏លោក ហង្ស ពុទ្ធា ថ្លែងថា គួរទុកចិត្តបាន មិនប៉ះពាល់បញ្ជីឈ្មោះទេ ព្រោះមិនប៉ះពាល់ឯកសារដើមទេ៖ «យើងទុកចិត្តបាន ព្រោះឯកសារដើមយើងទុកនៅមួយដុំ។ អ៊ីចឹងការ ហែក (Hack) ហ្នឹង គឺហែក ខាងក្រៅទេ។ គ្រាន់តែហែករំខានអ្នកពិនិត្យទេ។ ចំណែកឯឯកសារដើម យើងមានការប្រុងប្រយ័ត្នច្រើនណាស់ ហើយអ្នកជំនាញការជប៉ុន ក៏កំពុងអង្គុយជាមួយយើង ដើម្បីធ្វើការការពារ ហើយនិងដោះស្រាយបាន ហើយពីម្សិលមកដល់ថ្ងៃនេះ គឺយើងដោះស្រាយបានអស់ហើយ។ អ៊ីចឹងខ្ញុំគិតថា យើងនឹងតាមដានទាំងអស់គ្នាទៀត ប៉ុន្តែសុំឲ្យខាងព័ត៌មានហ្នឹងជួយផ្សព្វផ្សាយធ្វើម៉េចឲ្យមានការចូលរួមពិនិត្យបញ្ជីឈ្មោះឲ្យបានច្រើន»។
លោកបន្តថា ការលួចចូលនេះ គឺពីក្រៅប្រទេស ហើយនៅពេលនេះ គ.ជ.ប កំពុងសហការជាមួយសមត្ថកិច្ច ដើម្បីរកប្រភពពួកលួចហែកចូលរំខាននោះ។
នៅថ្ងៃទី៣ មករា ជាថ្ងៃដែល គ.ជ.ប ចាប់ផ្ដើមប្រកាសបញ្ជីឈ្មោះអ្នកបោះឆ្នោតថ្មីលើកដំបូង សម្រាប់ឲ្យពលរដ្ឋពិនិត្យផ្ទៀងផ្ទាត់ឈ្មោះរបស់ខ្លួននៅតាមឃុំ-សង្កាត់ចំនួន ១.៦៣៣។ ទន្ទឹមគ្នានឹងការបិទផ្សាយបញ្ជីឈ្មោះនេះ គ.ជ.ប ក៏ដាក់បញ្ជីឈ្មោះឲ្យពលរដ្ឋពិនិត្យលើគេហទំព័រដែរ ប៉ុន្តែបញ្ជីឈ្មោះនោះមិនបានដំណើរការទេ។
លោក ហង្ស ពុទ្ធា កាលពីដំបូងថ្លែងថា ការគាំងអាចមកពីអ្នកចូលមើលច្រើនក្នុងពេលតែមួយ។
អ្នកជំនាញខាងបច្ចេកវិទ្យាមួយរូបដែលសុំមិនចេញឈ្មោះ សន្និដ្ឋានថា បញ្ហាគាំងគេហទំព័របញ្ជីឈ្មោះបោះឆ្នោត គ.ជ.ប នេះ អាចបណ្ដាលមកពីការទិញកញ្ចប់ទិន្នន័យតិច ឬថោកពេក។ ម្យ៉ាងទៀត ការគាំងបែបនេះអាចជាការវាយប្រហាររបស់ក្រុមអ្នកលួចជ្រៀតចូល ឬហែកឃើរ (Hackers) ដើម្បីរំខានមែន។ អ្នកជំនាញរូបនេះរិះគន់ថា គ.ជ.ប គួរមានវិធានការប្រុងប្រយ័ត្នជាមុន ព្រោះធ្លាប់មានបញ្ហានេះម្ដងហើយ។
មន្ត្រីតស៊ូមតិនៃអង្គការខុមហ្វ្រែល (COMFREL) លោក សួន យុធ្យា មានប្រសាសន៍ថា បញ្ហានេះជាបទពិសោធន៍មួយដែល គ.ជ.ប គួរដាក់ឲ្យពួកហែកឃើរដែលមានក្រមសីលធម៌ (Hackers) សាកល្បងសិន មុននឹងចេញប្រើជាផ្លូវការ៖ «ឲ្យធ្វើការសាកល្បងហើយ ឲ្យពួកហែកឃើរដែលគេហៅថាពួកហែកឃើរជំនាញហ្នឹង បើអង់គ្លេសគេហៅថា អេហ្ស៊ីខល ហែកឃើរ (Ethical hackers) ហ្នឹង ដើម្បីឲ្យគាត់វាយតម្លៃថា ប្រព័ន្ធហ្នឹងវាស្រួលហែក (hack) ឬក៏ពិបាកហែក? អ៊ីចឹង គ.ជ.ប អត់បានធ្វើអាហ្នឹងទេ។ អ៊ីចឹងជាបទពិសោធន៍មួយដែរសម្រាប់ គ.ជ.ប បើធ្វើប្រព័ន្ធលើកក្រោយ ត្រូវអញ្ជើញពួកហែកឃើរពួកប្រូហ្វេសហ្សេណល (Professional) ធ្វើការហែក ហើយវាយតម្លៃជាមុនសិនថា តើយើងត្រូវកែកន្លែងណាទៀត ដើម្បីរក្សាទិន្នន័យអ្នកចុះឈ្មោះបោះឆ្នោត។ អ៊ីចឹងសង្គមស៊ីវិលរបស់យើងមានសមត្ថភាពតិចតួច យើងអត់អាចវាយតម្លៃបានទៅលើប្រព័ន្ធចុះឈ្មោះតាមកុំព្យូទ័ររបស់ គ.ជ.ប ទេ តែយើងធ្លាប់បានជម្រាប គ.ជ.ប ថា គួរតែមានជួលពួកហែកឃើរជាប្រូហ្វេសហ្សេណល ឲ្យគេមកសាកល្បង និងវាយតម្លៃប្រព័ន្ធនេះជាមុនសិន»។
ទោះជាមានបញ្ហាគាំងរយៈពេលប៉ុន្មានថ្ងៃមកហើយក្ដី ក៏គេហទំព័របញ្ជីឈ្មោះរបស់ គ.ជ.ប នៅថ្ងៃទី៥ មករា បានដំណើរការល្អវិញហើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ
អត្ថបទពេញនិយម
នយោបាយ
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- មន្ត្រីរដ្ឋាភិបាលអះអាងថា ការជីកព្រែកហ្វូណនជាសិទ្ធិអធិបតេយ្យរបស់កម្ពុជា គ្មានការចាំបាច់បំភ្លឺគ្រប់រឿងដល់វៀតណាមទេ
- លោក ហ៊ុន ម៉ាណែត ថ្លែងការពារគម្រោងព្រែកជីកហ្វូណនតេជោ ក្រោយពេលវៀតណាមរិះគន់
- តើកម្ពុជាអាចជម្នះសាងសង់ព្រែកជីកហ្វូណនតេជោបានដែរឬទេ?
- លោក ហ៊ុន សែន បដិសេធការចោទរបស់វៀតណាម ដែលថា ព្រែកជីកហ្វូណនសម្រាប់សម្រួលវត្តមានយោធាចិន