សមាជិកក្រុមប្រឹក្សាឃ្លាំមើលកម្ពុជាអះអាងថាអាជ្ញាធរកំពុងតាមរកចាប់ខ្លួន
2015.08.24
សមាជិកក្រុមប្រឹក្សាឃ្លាំមើលកម្ពុជា លោក អៀ ចាន់ណា ថ្លែងប្រាប់វិទ្យុអាស៊ីសេរី តាមទូរស័ព្ទកាលពីយប់ថ្ងៃទី២៣ សីហា ពីប្រទេសន័រវេសន៍ (Norway) ថា អាជ្ញាធរកម្ពុជា កំពុងតាមរកចាប់ខ្លួនលោកពីបទចោទថា លោកបានញុះញង់ប្រជាពលរដ្ឋខ្មែរជុំវិញបញ្ហាផែនទីកម្ពុជា-វៀតណាម ដែលរដ្ឋាភិបាលកំពុងប្រើប្រាស់សម្រាប់បោះបង្គោលខណ្ឌសីមាជាមួយប្រទេសវៀតណាម បច្ចុប្បន្ន។
លោក អៀ ចាន់ណា ថ្លែងថា «ការបញ្ជាហ្នឹងយើងដឹងទាំងអស់គ្នា គឺ ហ៊ុន សែន គាត់ជាអ្នកបញ្ជា ហើយមន្ត្រីរដ្ឋាភិបាលជាអ្នករំឭកហើយរំឭកទៀតទៅដល់ស្ថាប័ន ឥឡូវហ្នឹងគឺទាំងប៉ូលិស ទាំងទាហានគឺបានប្រជុំគ្នា គឺប៉ូលិសនៅតាមខេត្តនានាហ្នឹងគាត់ចាប់ផ្ដើមហៅគ្នាមកប្រជុំផ្សព្វផ្សាយនូវគោលការណ៍របស់ លោក ហ៊ុន សែន ដែលបានដាក់បញ្ជាថា អ្នកណាក៏ដោយដែលនៅតែបន្តនិយាយពីបញ្ហាផែនទីហ្នឹង គឺត្រូវតែទទួលខុសត្រូវចំពោះមុខច្បាប់ ដោយគេចោទថាយើងនិយាយញុះញង់ប្រជាពលរដ្ឋថាផែនទីហ្នឹងក្លែងក្លាយ ហើយឃើញនៅកន្លែងណាលើទឹកដីរបស់ពួកគេ ចង់ថាទឹកដីរបស់ប៉ូលិសដែលឈរជើងនៅប៉ុស្តិ៍ណាក៏ដោយ នៅតំបន់ណាក៏ដោយ គឺឃើញត្រូវចាប់ខ្លួនភ្លាមដោយចោទខ្ញុំពីបញ្ហាការញុះញង់ប្រជាពលរដ្ឋអំពីរឿងផែនទីរបស់រដ្ឋាភិបាលហ្នឹង»។
លោក អៀ ចាន់ណា គូសបញ្ជាក់ថា លោកបានចុះទៅពិនិត្យដោយផ្ទាល់នៅតាមបណ្ដាខេត្តជាប់ព្រំដែនវៀតណាម ជាមួយតំណាងរាស្ត្របក្សប្រឆាំង ជាពិសេសបានឃើញ និងជួបសាកសួរផ្ទាល់ពីសំណាក់ពលរដ្ឋខ្មែរនៅតាមព្រំដែន ដែលត្អូញត្អែរអំពីការបាត់បង់ដីស្រែចម្ការ និងការរំលោភបំពានរបស់វៀតណាម មកក្នុងទឹកដីខ្មែរ៖ «រដ្ឋាភិបាលកម្ពុជា ប៉ុនប៉ងចាប់ខ្លួនខ្ញុំកាលពីឆ្នាំ២០០៥ ម្ដង ពេលនោះខ្ញុំក្នុងនាមក្រុមប្រឹក្សាឃ្លាំមើលកម្ពុជា ផងដែរ បានធ្វើការតវ៉ាខ្លាំងមែនទែនចំពោះសន្ធិសញ្ញាបំពេញបន្ថែមដែលគណបក្សប្រជាជនកម្ពុជា ដឹកនាំរដ្ឋាភិបាលប៉ុនប៉ងធ្វើវាឲ្យបានសម្រេច ហើយទីបំផុតបានសម្រេចទៅ ពួកខ្ញុំទាំងអស់គ្នាប្រឆាំង ចឹងគេប៉ុនប៉ងចាប់ខ្លួនខ្ញុំអីអ៊ីចឹងទៅ បានខ្ញុំរត់ភៀសខ្លួន ក៏អង្គការសហប្រជាជាតិ ជួយជ្រោមជ្រែងរហូតបានមករស់នៅលើទឹកដីន័រវេសន៍។ ឥឡូវ ១០ឆ្នាំក្រោយមកឆ្នាំ២០១៥ គឺផ្ទុះរឿងព្រំដែនទៀត ខ្ញុំបានចូលរួមជាមួយតំណាងរាស្ត្រនៃគណបក្សសង្គ្រោះជាតិ ហ្នឹង មាន លោក រៀល ខេមរិន្ទ្រ លោក អ៊ុំ សំអាន ទាំងអស់ហ្នឹងចុះទៅមើលព្រំដែននៅគ្រប់កន្លែងទាំងអស់ ទាំងពីខេត្តកណ្ដាល ខេត្តស្វាយរៀង ខេត្តត្បូងឃ្មុំ ខេត្តរតនគិរី អីទាំងអស់ហ្នឹង ឃើញថាឃើញពិតប្រាកដអំពីការរំលោភដីខ្មែរពីសំណាក់ប្រទេសយួន ទឹកភ្នែកហូររបស់ប្រជាពលរដ្ឋខ្មែរ ដូច្នេះហើយយើងក៏ធ្វើការតស៊ូប្រឆាំងនឹងចំពោះការរំលោភឈ្លានពានទាំងអស់ហ្នឹង»។
ទាក់ទងនឹងការតវ៉ារឿងព្រំដែននេះ សមាជិកក្រុមប្រឹក្សាឃ្លាំមើលកម្ពុជា លោក អៀ ចាន់ណា ឲ្យដឹងថា លោកនឹងបន្តការងាររបស់លោកជាមួយ លោក ស៊ាន ប៉េងសែ ប្រធានគណៈកម្មាធិការព្រំដែនកម្ពុជា ប្រទេសបារាំង និងក្នុងពិភពលោក និងសមាជិកផ្សេងៗទៀតដែលមានមូលដ្ឋាននៅប្រទេសបារាំង។
ពាក់ព័ន្ធនឹងដំណឹងថាមានការតាមរកចាប់ខ្លួនសមាជិកសភាពីគណបក្សសង្គ្រោះជាតិ លោក រៀល ខេមរិន្ទ្រ វិញ លោកក៏បានបញ្ជាក់តាមទូរស័ព្ទពីរដ្ឋវ៉ាស៊ីនតោន (Washington) ថា លោកមិនបានដឹងអំពីបញ្ហានេះទេ ពីព្រោះលោកបានចាកចេញពីកម្ពុជា មកជួបជាមួយសហគមន៍ខ្មែរនៅសហរដ្ឋអាមេរិក តាំងពីចុងខែកក្កដា មកម៉េ្លះ៖ «មុននឹងពេលដែលខ្ញុំមក ខ្ញុំអត់បានទទួលព័ត៌មានអីទេ ហើយខ្ញុំមកបេសកកម្មដោយមានការអញ្ជើញពីបងប្អូនខ្មែរនៅសហរដ្ឋអាមេរិក ដែលគាំទ្រខ្ញុំ ហើយមកហ្នឹងខ្ញុំបានបង្ហោះហ្វេសប៊ុកប្រាប់បងប្អូននៅក្នុងស្រុកខ្មែរចំនួនពីរបីថ្ងៃមុន ថាខ្ញុំនឹងទៅបំពេញបេសកកម្មនៅសហរដ្ឋអាមេរិក ដោយខ្ញុំបានបង្ហោះជាមួយនឹងលិខិតអញ្ជើញជាផ្លូវការរបស់បងប្អូនខ្មែរនៅសហរដ្ឋអាមេរិក ដែលបានអញ្ជើញផងដែរ។ អ៊ីចឹងខ្ញុំមិនបានទទួលព័ត៌មានថាអ្នកណារកចាប់រកចងអីទេ។ ខ្ញុំនៅរហូតដល់ពេលដែលខ្ញុំចង់ទៅវិញ ឬមានការងារសភាគេប្រជុំ ឬមានការងារសំខាន់ដែលត្រូវត្រឡប់ទៅវិញ ព្រោះឥឡូវក៏អត់មានបញ្ហាអីសំខាន់ដែរ ព្រោះសភាវ៉ាកង ខ្ញុំនឹងត្រឡប់ទៅវិញនៅពេលណាការងារនៅស្រុកខ្មែរតម្រូវការឲ្យខ្ញុំទៅ ជាពិសេសក្នុងថ្នាក់ដឹកនាំគណបក្ស»។
តំណាងរាស្ត្រគណបក្សសង្គ្រោះជាតិ ២រូប រួមមាន លោក រៀល ខេមរិន្ទ្រ និងលោក អ៊ុំ សំអាន សុទ្ធតែបដិសេធរៀងៗខ្លួនថា ការចាកចេញមកសហរដ្ឋអាមេរិក នេះ មិនមែនជាការភៀសខ្លួនផ្នែកនយោបាយនោះឡើយ។
កាលពីថ្ងៃទី២១ ខែសីហា លោក ហ៊ុន សែន បានចេញបទបញ្ជាឲ្យស្ថាប័នមានសមត្ថកិច្ចថ្នាក់ជាតិ និងថ្នាក់ក្រោមជាតិ ចាត់វិធានការផ្លូវច្បាប់ភ្លាមៗចំពោះក្រុម ឬបុគ្គលណាដែលនិយាយបំភ្លៃថា រដ្ឋាភិបាលប្រើប្រាស់ផែនទីក្លែងក្លាយក្នុងការងារបោះបង្គោលព្រំដែន។ ការដាក់បញ្ជានេះ គឺស្របពេលដែល លោក ហ៊ុន សែន បានផ្ញើសារទៅឲ្យ លោក សម រង្ស៊ី ព្រមានមិនឲ្យ លោក សម រង្ស៊ី និងមន្ត្រីបក្សប្រឆាំង យកបញ្ហាព្រំដែនកម្ពុជា-វៀតណាម ធ្វើជាល្បែងនយោបាយតទៅទៀត។
ការដាក់បញ្ជារបស់ លោក ហ៊ុន សែន នេះ ធ្វើឡើងមួយថ្ងៃបន្ទាប់ពីរដ្ឋាភិបាលបានផ្ទៀងផ្ទាត់ផែនទីរបស់ខ្លួនជាមួយផែនទីចំនួន ១៨ផ្ទាំង ដែលរដ្ឋាភិបាលបានខ្ចីពីអង្គការសហប្រជាជាតិ។ រដ្ឋាភិបាលអះអាងថា ផែនទីខ្លួន គឺដូចទៅនឹងផែនទីរបស់អង្គការសហប្រជាជាតិ ដែរ។ យ៉ាងណាក៏ដោយ បក្សប្រឆាំងអះអាងថា ពួកគេនៅតែត្រូវការពេលវេលាដើម្បីសិក្សាបន្ថែមទៀត៕