កម្ពុជា-វៀតណាមរៀបចំបង្កើតក្រុមការងារចម្រុះស៊ើបអង្កេតករណីហិង្សានៅព្រំដែន
2015.07.03
មន្ត្រីសង្គមស៊ីវិល និងបក្សប្រឆាំង ស្នើឲ្យក្រសួងការបរទេសកម្ពុជា និងវៀតណាម ដែលកំពុងរៀបចំបង្កើតក្រុមការងារចម្រុះស៊ើបអង្កេតករណីផ្ទុះអំពើហិង្សានៅតំបន់ព្រំដែន ២០៣ ក្នុងស្រុកកំពង់រោទិ៍ ខេត្តស្វាយរៀង នោះ គួរដាក់បញ្ចូលសមាសភាព ឬស្ថាប័នទី៣ ដែលឯករាជ្យ និងអព្យាក្រឹត។
ការបង្កើតក្រុមការងារចម្រុះស៊ើបអង្កេតករណីផ្ទុះអំពើហិង្សានៅតំបន់ព្រំដែនខេត្តស្វាយរៀង កាលពីចុងខែមិថុនា នោះ គឺជាការឆ្លើយតបដោយឯកភាពតាមសំណើតាមរយៈកំណត់ទូតរបស់ក្រសួងការបរទេសនៃសាធារណរដ្ឋសង្គមនិយមវៀតណាម កាលពីថ្ងៃទី៣០ ខែមិថុនា។
អ្នកនាំពាក្យក្រសួងការបរទេសកម្ពុជា លោក ជុំ សន្ទរី បានឲ្យដឹងនៅថ្ងៃទី៣ ខែកក្កដា ថា ក្រុមការងារចម្រុះនេះកំពុងរៀបចំដំណើរការនៅឡើយ ដោយមានក្រុមការងារមកពីប្រទេសទាំងពីរ ប៉ុន្តែគេមិនទាន់ដឹងទេថា ក្រុមការងារទាំងពីរក្រុមនោះមានសមាសភាពផ្ទៃក្នុងមកពីខាងណាខ្លះនៅឡើយ៖ «ក្រុមការងារចម្រុះហ្នឹងគឺមានភារកិច្ចបន្តពិនិត្យបំភ្លឺអំពីឧប្បត្តិហេតុ ដែលបានកើតឡើងនៅស្រុកកំពង់រោទិ៍ ខេត្តស្វាយរៀង កាលពីថ្ងៃទី២៨ ខែមិថុនា កន្លងទៅ»។
ទាក់ទងនឹងការបង្កើតក្រុមការងារចម្រុះនេះ អ្នកតំណាងរាស្ត្រមកពីបក្សប្រឆាំងមានទស្សនៈស្រដៀងគ្នាថា ដើម្បីឲ្យជឿទុកចិត្តបាន ឯករាជ្យ និងឲ្យភាគីជម្លោះទាំងពីរទទួលបានយុត្តិធម៌នោះ ទាល់តែក្រុមការងារនោះដាក់បញ្ចូលសមាសភាពទី៣ ដែលឯករាជ្យ និងមិនស្ថិតក្នុងរដ្ឋាភិបាលទាំងពីរចូលរួមផង។
មន្ត្រីជាន់ខ្ពស់នៃអង្គការលីកាដូ លោក អំ សំអាត មិនសូវមានជំនឿលើក្រុមការនេះឡើយបើតាមបទពិសោធន៍កន្លងមក កម្ពុជាបានបង្កើតគណៈកម្មការចម្រុះដោះស្រាយករណីហិង្សានៅផ្លូវវ៉េងស្រេង ជាដើម ទីបញ្ចប់លទ្ធផលដាក់បន្ទុកទៅក្រុមកម្មករអ្នកតវ៉ា និងចោទបក្សប្រឆាំងនៅពីក្រោយ៖ «សុំឲ្យក្រុមការងារចម្រុះរវាងកម្ពុជា-វៀតណាម ស៊ើបអង្កេត ហើយនឹងផ្ដល់យុត្តិធម៌ដល់ជនរងគ្រោះ»។
លោកបន្តថា ប្រសិនបើក្រុមការងារចម្រុះដែលកំពុងរៀបចំបង្កើតឡើងនេះមានដាក់បញ្ចូលសមាសភាពពីគណបក្សដែលមានអាសនៈក្នុងរដ្ឋសភា មន្ត្រីអង្គការសង្គមស៊ីវិលឯករាជ្យនោះនឹងធ្វើឲ្យមានតម្លាភាពក្នុងដំណើរការស៊ើបអង្កេត និងអាចរកយុត្តិធម៌ពិតប្រាកដឲ្យគូជម្លោះក្នុងរឿងព្រំដែននេះបាន។
ទោះយ៉ាងណា លោក ជុំ សន្ទរី នៅថ្ងៃទី៣ ខែកក្កដា មិនទាន់អាចបញ្ជាក់បានទេថា ក្រុមការងារនេះនឹងចេញជារូបរាង ហើយចាប់ផ្ដើមចុះធ្វើការរបស់ខ្លួននៅពេលណានោះឲ្យប្រាកដនោះទេ។ ប៉ុន្តែបើតាមលិខិតឆ្លើយតបជាផ្លូវការរបស់ក្រសួងការបរទេសកម្ពុជា ទៅក្រសួងការបរទេសវៀតណាម កាលពីថ្ងៃទី២ ខែកក្កដា បង្ហាញថា កម្ពុជានឹងជូនព័ត៌មានទៅភាគីវៀតណាម អំពីសមាសភាពរបស់ខ្លួននៃក្រុមការងារចម្រុះក្នុងឱកាសដ៏ឆាប់ខាងមុខនេះ។ ចំណែកកាលបរិច្ឆេទ និងទីកន្លែងនៃកិច្ចប្រជុំនឹងជូនដំណឹងតាមផ្លូវការទូត។
ទាក់ទងបញ្ហាព្រំដែននេះដែរ ក្រុមអ្នកតំណាងរាស្ត្រមកពីគណបក្សសង្គ្រោះជាតិ ជាង ១០រូប នៅថ្ងៃទី៣ ខែកក្កដា បានផ្ញើលិខិតជាផ្លូវការទៅលោកនាយករដ្ឋមន្ត្រី ហ៊ុន សែន តាមរយៈប្រធានរដ្ឋសភា ដោយស្នើឲ្យលើកយកបញ្ហាវៀតណាម រំលោភបូរណភាពទឹកដីកម្ពុជា ប្ដឹងទៅតុលាការអន្តរជាតិ (ICJ) ប៉ុន្តែសំណើនេះ មិនទាន់មានការឆ្លើយតបយ៉ាងណានៅឡើយទេរហូតមកដល់ពេលនេះ៕