កម្ពុជា-​ឡាវ​ពន្លឿន​ការ​ដោះស្រាយ​បញ្ហា​ព្រំដែន​សេសសល់​ក្រោយ​ឡាវ​ដក​ទាហាន​ចេញ​ដី​ខ្មែរ

ដោយ យាង សុជាមេត្តា
2017-09-01
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
លោក​នាយករដ្ឋមន្ត្រី​ ហ៊ុន សែន (ឆ្វេង) និង​នាយករដ្ឋមន្ត្រី​ប្រទេស​ឡាវ លោក ថងលួង ស៊ីស៊ូលីត (Thongloun Sisoulith) (ស្ដាំ) ក្នុង​ជំនួប​ផ្លូវការ នា​វិមាន​សន្តិភាព រាជធានី​ភ្នំពេញ នៅ​ថ្ងៃទី២៧ ខែ​មិថុនា ឆ្នាំ​២០១៦។ Photo AFP
លោក​នាយករដ្ឋមន្ត្រី​ ហ៊ុន សែន (ឆ្វេង) និង​នាយករដ្ឋមន្ត្រី​ប្រទេស​ឡាវ លោក ថងលួង ស៊ីស៊ូលីត (Thongloun Sisoulith) (ស្ដាំ) ក្នុង​ជំនួប​ផ្លូវការ នា​វិមាន​សន្តិភាព រាជធានី​ភ្នំពេញ នៅ​ថ្ងៃទី២៧ ខែ​មិថុនា ឆ្នាំ​២០១៦។ Photo AFP
Photo AFP

រដ្ឋាភិបាល​កម្ពុជា និង​ឡាវ កំពុង​ពន្លឿន​ការ​ដោះស្រាយ​បញ្ហា​ព្រំដែន​ដើម្បី​ឈាន​ទៅ​ដល់​ការ​បោះ​បង្គោល​ព្រំដែន​សេសសល់​ឲ្យ​រួច​រាល់​ក្រោយ​ពី​ប្រទេស​ឡាវ បាន​ដក​ទាហាន​ចេញ​ពី​ដី​ខ្មែរ។ ទោះ​ជា​យ៉ាង​ណា ការ​ពិភាក្សា​ស្វែង​រក​ដំណោះស្រាយ​ព្រំដែន​រវាង​ប្រមុខ​រដ្ឋាភិបាល​ទាំង​ពីរ​នេះ ក៏​ស្រប​ពេល​មាន​សេចក្ដី​រាយការណ៍​ថា ប្រទេស​ទាំង​២ កំពុង​បង្កើន​កម្លាំង​ទ័ព​រៀងៗ​ខ្លួន​នៅ​តាម​ព្រំដែន។

ក្នុង​រយៈពេល​តែ ៣​សប្តាហ៍​ប៉ុណ្ណោះ ប្រមុខ​រដ្ឋាភិបាល​កម្ពុជា លោក ហ៊ុន សែន និង​នាយករដ្ឋមន្ត្រី​ឡាវ លោក  ថងលួង ស៊ីស៊ូលីត (Thongloun Sisoulith) ជួប​ពិភាក្សា​ទល់​មុខ​គ្នា​ដល់​ទៅ ២​ដង​ដើម្បី​ដោះស្រាយ​បញ្ហា​ព្រំដែន​ត្រង់​ចំណុច​សេសសល់​រហូត​ធ្វើ​ឲ្យ​ខាង​ភាគី​កម្ពុជា សំញែង​កម្លាំង​យោធា​មួយ​ប្រាវ​កាល​ពី​ពេល​ថ្មីៗ​នេះ។

នៅ​ក្នុង​ជំនួប​នៅ​លើ​ទឹកដី​ខ្មែរ​ពេល​នេះ ប្រមុខ​រដ្ឋាភិបាល​ទាំង​ពីរ​ប្តេជ្ញា​ពន្លឿន​ការ​ដោះស្រាយ​បញ្ហា​ដែល​នៅ​សេសសល់​ទាំង​អស់ ដោយ​ក្នុង​នោះ​បាន​ឯកភាព​​គ្នា​នូវ​ចំណុច​មួយ​ចំនួន រួម​មាន បង្កើត​ឲ្យ​មាន​ជំនួប​រវាង​រដ្ឋមន្ត្រី​ការបរទេស​ទាំង​ពីរ​នៅ​រាជធានី​ភ្នំពេញ ក្នុង​ពេល​ខាង​មុខ ដើម្បី​ពិភាក្សា​ស្វះស្វែង​រក​ការ​ស្រុះស្រួល និង​យោគយល់​គ្នា ឯកភាព​គ្នា​ឲ្យ​មន្ត្រី​ព្រំដែន​ប្រទេស​ទាំង​២ ចុះ​ទៅ​ដោះស្រាយ​នៅ​នឹង​កន្លែង​ដែល​មាន​ការ​ខ្វែង​គំនិត​គ្នា ព្រម​ទាំង​យល់​ស្រប​គ្នា​ស្នើ​ទៅ​កាន់​រដ្ឋាភិបាល​បារាំង ដើម្បី​ស្នើ​សុំ​ប្រទេស​អតីត​អាណានិគម​មួយ​នេះ ជួយ​ផ្ទេរ​ផែន​ដែល​បន្សល់​ទុក​ពី​ខ្នាត ១ លើ ១០០​ពាន់ ទៅ​ជា​ខ្នាត ១ លើ ៥០​ពាន់​វិញ។

ថ្លែង​នៅ​ក្នុង​សន្និសីទ​សារព័ត៌មាន​ក្រោយ​ជំនួប​ពិភាក្សា លោក​នាយករដ្ឋមន្ត្រី ហ៊ុន សែន បញ្ជាក់​ថា ការ​ជួប​ជជែក​ដោះស្រាយ​ពេល​នេះ មិន​មែន​ជា​ការ​ដោះស្រាយ​ដោយ​ចំណុច​នោះ​ទេ តែ​វា​ការ​ដោះស្រាយ​ជា​កញ្ចប់​តែម្ដង។ លោក​ថា ដើម្បី​សម្រេច​ការ​បោះ​បង្គោល​ព្រំដែន​សេសសល់ ប្រទេស​ទាំង​ពីរ​ចាំបាច់​ត្រូវ​ការ​ប្រទេស​បារាំង ដើម្បី​ផ្ទេរ​ផែនទី​ជា​មុន​សិន។ លោក​ថា ប្រទេស​បារាំង ត្រូវ​មាន​ការ​ទទួល​ខុសត្រូវ​ជួយ​កម្ពុជា និង​ឡាវ ក្នុង​បញ្ហា​នេះ៖ «មូលដ្ឋាន​ដែល​បារាំង ផ្ដល់​អោយ​គឺ​ផែនទី​ខ្នាត ១ លើ ១០០​ពាន់ ប៉ុន្តែ​ការ​ធ្វើ​ព្រំដែន​មិន​អាច​ប្រើប្រាស់​ខ្នាត ១ លើ ១០០​ពាន់​បាន​ទេ ត្រូវ​ប្រើ​ខ្នាត ១ លើ ៥០​ពាន់ អ៊ីចឹង​សង្ឃឹម​ថា នៅ​ពេល​ប្រជុំ​រដ្ឋមន្ត្រី​ការបរទេស​នៃ​ប្រទេស​ទាំង​ពីរ រដ្ឋមន្ត្រី​ការបរទេស​ទាំង​ពីរ​នឹង​ពិនិត្យ ពិភាក្សា​លើ​លិខិត​នេះ​ផង​ដែរ»

ជំនួប​ពិភាក្សា​រវាង​លោក ហ៊ុន សែន និង​លោក ថងលួង ស៊ីស៊ូលីត នៅ​លើ​ទឹក​ដី​កម្ពុជា នៅ​ពេល​នេះ ធ្វើ​ឡើង​ហាក់​ក្នុង​សភាព​ស្ងប់ស្ងាត់​ជាង​ពេល​ដែល​លោក ហ៊ុន សែន ទៅ​ចរចា​នៅ​ប្រទេស​ឡាវ កាល​ពី​ថ្ងៃ​ទី​១២ ខែ​សីហា ដោយ​មួយ​ថ្ងៃ​មុន​លោក ហ៊ុន សែន ទៅ​កាន់​ប្រទេស​ឡាវ​នោះ លោក​បាន​ដាក់​ឱសានវាទ​ឲ្យ​ឡាវ ដកទ័ព​ចេញ​ពី​ដី​ខ្មែរ​ឲ្យ​អស់​ក្នុង​រយៈពេល ១​សប្ដាហ៍​នៅ​តំបន់​អូរ​តាង៉ាវ និង​អូរអាឡៃ ក្នុង​ស្រុក​សៀមប៉ាង ខេត្ត​ស្ទឹងត្រែង។ ក្នុង​ពេល​ជាមួយ​គ្នា កម្ពុជា​ក៏​បាន​បញ្ជូន​កងទ័ព​ទៅ​កាន់​តំបន់​ព្រំដែន​ដែល​ទាហាន​ឡាវ កំពុង​ឈរ​ជើង​នោះ​ដែរ។

​មួយ​ថ្ងៃ​មុន​ជំនួប​ពិភាក្សា​រវាង​ប្រមុខ​រដ្ឋាភិបាល​ទាំង​ពីរ​នេះ មាន​សេចក្ដី​រាយការណ៍​ពី​ព្រំដែន​មក​ថា ឡាវ បាន​បញ្ជូន​ទ័ព​មក​ដាក់​នៅ​ក្បែរ​តំបន់​ព្រំដែន ប៉ុន្តែ​មន្ត្រី​យោធា​កម្ពុជា នៅ​តាម​ព្រំដែន អះអាង​ថា មិន​ធ្វើ​ឲ្យ​ប៉ះពាល់​ដល់​អធិបតេយ្យភាព​កម្ពុជា នោះ​ឡើយ។

ទោះជា​យ៉ាង​ណា ទាំង​លោក ហ៊ុន សែន ទាំង​លោក ថងលួង ស៊ីស៊ូលីត សុទ្ធតែ​សម្ដែង​នូវ​ការ​ពេញ​ចិត្ត​ចំពោះ​លទ្ធផល​នៃ​ជំនួប​ពិភាក្សា​នេះ ហើយ​ថា ការ​ដោះស្រាយ​ព្រំដែន​នេះ ឈរ​លើ​មូលដ្ឋាន​មិត្តភាព ស្មើភាព ដោយ​មិន​ឲ្យ​ខាង​ណា​ខាត ខាង​ណា​ចំណេញ​នោះ​ទេ។

​ប្រទេស​កម្ពុជា មាន​ព្រំដែន​ជាប់​នឹង​ប្រទេស​ឡាវ ប្រវែង ៥៤០​គីឡូម៉ែត្រ ដែល​ត្រូវ​បោះ​បង្គោល​ព្រំដែន​សរុប​ចំនួន ១៤៥​បង្គោល។ បច្ចុប្បន្ន​ប្រទេស​ទាំង​ពីរ​បោះ​បង្គោល​បាន​ចំនួន ១២១​បង្គោល​រួច​ហើយ៕ ​

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
  • បោះពុម្ព
  • ចែករំលែក
  • អ៊ីម៉ែល

anonymus

This is another crocodile's politic strategy planned to covet people's confidence before 2018 general election to come. Cambodia and Laos are both under army and politic control of north vietnam. So, why they could fight each-other without nort vietnamese order. Impossible!
Cambodian people are smart enough to understand this strategy.

Sep 01, 2017 08:06 AM

គេហទំព័រ​ទាំងមូល