ប្រធានក្រុមប្រឹក្សាសង្កាត់ស្ទឹងត្រែងរងការចោទថាគេចវេះមិនដោះស្រាយបណ្ដឹង
2017.01.16
មន្ត្រីគណបក្សសង្គ្រោះជាតិ ខែត្រស្ទឹងត្រែង ចោទប្រធានក្រុមប្រឹក្សាសង្កាត់ស្ទឹងត្រែង ថាមានចេតនាគេចវេះមិនដោះស្រាយពាក្យបណ្ដឹងរបស់ពលរដ្ឋ និងគណបក្សនយោបាយ ទាក់ទិនភាពមិនប្រក្រតីចុះឈ្មោះបោះឆ្នោត និងមានជនបរទេសមានឈ្មោះក្នុងបញ្ជីបោះឆ្នោត។ ពួកគេចាត់ទុកបញ្ហានេះ ថាផ្ទុយពីគោលការណ៍ណែនាំរបស់គណៈកម្មាធិការជាតិរៀបចំការបោះឆ្នោត (គ.ជ.ប) ដែលមានការឯកភាពពីក្រសួងមហាផ្ទៃ។
អ្នកឃ្លាំមើលការចុះឈ្មោះបោះឆ្នោតមកពីគណបក្សសង្គ្រោះជាតិ និងមន្ត្រីអង្គការខុមហ្វ្រែល (COMFREL) សម្ដែងការខកចិត្ត ក្រោយពីប្រធានក្រុមប្រឹក្សាសង្កាត់ និងជាចៅសង្កាត់ស្ទឹងត្រែង លោក ជា វណ្ណ បានបិទទ្វារការិយាល័យពិនិត្យបញ្ជីឈ្មោះបោះឆ្នោតនៅសាលាសង្កាត់ស្ទឹងត្រែង កាលពីថ្ងៃទី១៤ មករា។
មន្ត្រីគណបក្សសង្គ្រោះជាតិ ចាត់ទុកបញ្ហានេះថាជាការមិនទទួលខុសត្រូវក្នុងការដោះស្រាយពាក្យបណ្ដឹងរបស់ពលរដ្ឋ និងគណបក្សនយោបាយ។
អនុប្រធានប្រតិបត្តិគណបក្សសង្គ្រោះជាតិ និងជាសមាជិកក្រុមប្រឹក្សាខែត្រស្ទឹងត្រែង លោក សាត ស៊ិន កត់សម្គាល់ថា សាលាសង្កាត់ស្ទឹងត្រែង បានបិទទ្វារនៅព្រឹកថ្ងៃទី១៤ មករា រហូតដល់ម៉ោង ២រសៀល ក្រោយពីលោកសុំការអន្តរាគមន៍ទៅមន្ត្រី គ.ជ.ប ទើបចៅសង្កាត់ស្ទឹងត្រែង ឆ្លៀតមកបើកទ្វារទទួលពាក្យបណ្ដឹងមួយភ្លែត។
លោកបារម្ភថា ពលរដ្ឋមានបញ្ហាឈ្មោះក្នុងបញ្ជីបោះឆ្នោត ចង់តវ៉ា ឬប្ដឹង ត្រូវខកបំណង ប្រសិនបើការិយាល័យចុះឈ្មោះបោះឆ្នោតបិទទ្វារ។ លោកថា មន្ត្រីគណបក្សសង្គ្រោះជាតិ បានប្ដឹងជនបរទេសចំនួន ១៦នាក់ជាជនជាតិវៀតណាម មានឈ្មោះក្នុងបញ្ជីបោះឆ្នោត។ លោកសង្ស័យថា ជនបរទេសទាំងនោះ គឺមួយចំនួនបម្រើការងារជានគរបាលនៃស្នងការដ្ឋាននគរបាលខែត្រស្ទឹងត្រែង៖ «ចុះប្រសិនបើពលរដ្ឋគាត់ខុសឈ្មោះ ខុសថ្ងៃខែឆ្នាំកំណើត គាត់ត្រូវការប្ដឹងតវ៉ាកែតម្រូវមានគ្នាច្រើន។ ចុះប្រសិនបើសាលាសង្កាត់បិទទ្វារចឹង មិនជួបបញ្ហាពេលបោះឆ្នោត»។
ឆ្លើយតបការចោទប្រកាន់នេះ ប្រធានក្រុមប្រឹក្សាសង្កាត់ និងជាចៅសង្កាត់ស្ទឹងត្រែង លោក ជា វណ្ណ ទទួលស្គាល់ថា សាលាសង្កាត់ស្ទឹងត្រែង ពិតជាបិទទ្វារ ប៉ុន្តែក៏មានអ្នកប្រចាំការចេញចូលកន្លែងធ្វើការញឹកញាប់ដែរ។ លោកថា មូលហេតុដែលលោកបិទទ្វារ ដោយសារជាប់រវល់។ តែយ៉ាងណា លោកបានទទួលពាក្យបណ្ដឹងមួយចំនួន និងបានដោះស្រាយដែរ៖ «ខ្ញុំបិទទ្វារ និងមានអ្នកប្រចាំការដែរ ហើយខ្ញុំចេញចូលៗដោយសារតែខ្ញុំរវល់ការងារ»។
គ.ជ.ប បានបិទផ្សាយបញ្ជីបោះឆ្នោតដំបូងដើម្បីឲ្យពលរដ្ឋ និងគណបក្សនយោបាយប្ដឹងតវ៉ា ឬប្ដឹងទាស់ និងតម្រូវឲ្យក្រុមប្រឹក្សាឃុំ-សង្កាត់មានកាតព្វកិច្ចទទួលពាក្យបណ្ដឹង និងដោះស្រាយកែតម្រូវឲ្យបានទាន់ពេលចាប់ពីថ្ងៃទី៣ ដល់ថ្ងៃទី១៤ ខែមករា ឆ្នាំ២០១៧។
លេខាធិការរងនៃលេខាធិការដ្ឋានរៀបចំការបោះឆ្នោតខែត្រស្ទឹងត្រែង លោក ហុង កុង កត់សម្គាល់ថា រយៈពេល ១០ថ្ងៃនៃការបិទបញ្ជីឈ្មោះបោះឆ្នោត ពលរដ្ឋបានប្ដឹងតវ៉ា ៣ករណី ក្នុងនោះ ២ករណី ពលរដ្ឋនៅស្រុកសៀមប៉ាង មានបញ្ហាខុសភេទ និងគ្មានទីលំនៅពិតប្រាកដ ហើយមួយករណីទៀត មន្ត្រីគណបក្សសង្គ្រោះជាតិ បានប្ដឹងជនបរទេសមានឈ្មោះចុះបញ្ជីបោះឆ្នោត។ លោកពន្យល់ថា ការដោះស្រាយពាក្យបណ្ដឹង ជាភារកិច្ចរបស់ក្រុមប្រឹក្សាឃុំ-សង្កាត់ តែបើក្រុមប្រឹក្សាឃុំ-សង្កាត់ដោះស្រាយមិនចេញទេ ពលរដ្ឋអាចប្ដឹងទៅ គ.ជ.ប ហើយបើ គ.ជ.ប មិនអាចដោះស្រាយបានទេ ត្រូវប្ដឹងមកក្រុមប្រឹក្សាធម្មនុញ្ញ៖ «ឧបមាថាបើយើងប្ដឹងនៅក្រុមប្រឹក្សាឃុំ-សង្កាត់ យើងមានរយៈពេលបីថ្ងៃ។ ដល់ពេល គ.ជ.ប មានរយៈពេល ៥ថ្ងៃ»។
មន្ត្រីកម្មវិធីជាន់ខ្ពស់នៃគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា ហៅកាត់ថាខុមហ្វ្រែល (COMFREL) លោក កន សាវាង្ស យល់ថា ប្រសិនបើចៅសង្កាត់ ឬមេឃុំរវល់ អាចផ្ទេរសិទ្ធិអំណាចឲ្យក្រុមប្រឹក្សាសង្កាត់ណាមួយបាន តាមឋានានុក្រម ហើយមេឃុំ ឬចៅសង្កាត់ត្រូវតែទទួលខុសត្រូវកិច្ចការទាំងនេះ មិនត្រូវបិទទ្វារពុំធ្វើការដោយយកលេះថាជាប់រវល់នោះទេ។
លោកបារម្ភថា ពលរដ្ឋនឹងប្រឈមការបាត់សិទ្ធិបោះឆ្នោត ប្រសិនជាឈ្មោះក្នុងបញ្ជីបោះឆ្នោតរបស់គាត់មានភាពមិនប្រក្រតី ដោយពុំមានការដោះស្រាយពីអាជ្ញាធរមូលដ្ឋាន៖ «មិនអាចប្រើពាក្យខ្ញុំរវល់បានទេ ព្រោះពុំមែនមានតែមេឃុំចៅសង្កាត់អាចដោះស្រាយ និងទទួលបានណា គឺមានអ្នកផ្សេងទៀត ហើយបើយើងបិទទ្វារចោលអត់ធ្វើការចឹង ចុះប្រជាពលរដ្ឋខុសឈ្មោះចង់ប្ដឹងកែសម្រួល ប្ដឹងជំទាស់ ឬប្ដឹងតវ៉ាឈ្មោះគាត់ខុស តើគាត់ធ្វើម៉េចទៅ»។
តួលេខរបស់លេខាធិការដ្ឋានរៀបចំការបោះឆ្នោតខែត្រស្ទឹងត្រែង ឲ្យដឹងថា ប្រជាពលរដ្ឋដែលបានចុះឈ្មោះបោះឆ្នោតរយៈពេល ៣ខែកាលពីឆ្នាំ២០១៦ បានជិត ៨ម៉ឺននាក់ ស្មើនឹង ៨៩% ក្នុងចំណោមពលរដ្ឋជាង ៨ម៉ឺននាក់ (៨០.០៥៣នាក់) ដែលគ្រប់អាយុចុះឈ្មោះបោះឆ្នោត៕