លោក ហ៊ុន សែន ស្នើអាមេរិកបន្តគាំទ្រកម្ពុជាផ្នែកពាណិជ្ជកម្មនិងអប់រំបន្ថែមទៀត
2015.11.22
ខណៈ លោក ហ៊ុន សែន ចូលរួមកិច្ចប្រជុំកំពូលអាស៊ាននៅប្រទេសម៉ាឡេស៊ី នាយករដ្ឋមន្ត្រីកម្ពុជា អំពាវនាវដល់សហរដ្ឋអាមេរិក ឲ្យបន្តកិច្ចសហប្រតិបត្តិការអភិវឌ្ឍជាមួយអាស៊ាន ពិសេសជាមួយកម្ពុជា ថែមទៀត។ ក្រៅពីនេះទៀត ប្រមុខរដ្ឋាភិបាលកម្ពុជា ស្នើឲ្យមានកិច្ចសហការផ្នែកពាណិជ្ជកម្ម និងអប់រំជាមួយសហរដ្ឋអាមេរិក ឲ្យកាន់តែច្រើនថែមទៀត។
លោក ហ៊ុន សែន ស្នើដល់សហរដ្ឋអាមេរិក ឲ្យបន្តគាំទ្រដល់ការបណ្ដុះបណ្ដាលធនធានមនុស្សនៅកម្ពុជា តាមរយៈការផ្ដល់អាហារូបករណ៍បន្ថែមទៀតដល់សិស្ស និងនិស្សិតខ្មែរ។
លោកអំពាវនាវដល់សហរដ្ឋអាមេរិក បែបនេះ នៅក្នុងកិច្ចប្រជុំកំពូលអាស៊ាន កាលពីថ្ងៃទី២១ វិច្ឆិកា ដោយលោកជំរុញឲ្យសហរដ្ឋអាមេរិក បន្តភាពជាដៃគូក្នុងវិស័យពាណិជ្ជកម្ម ហើយលោកក៏ស្នើសហរដ្ឋអាមេរិក ផ្ដល់ប្រព័ន្ធអនុគ្រោះទូទៅ ឬហៅកាត់ថា អី.អេស.ភី (GSP) លើមុខទំនិញចំនួនយ៉ាងតិច ៩៧ភាគរយនៃមុខទំនិញសរុប ដោយរួចពន្ធ និងមិនជាប់កូតាដល់ប្រទេសអភិវឌ្ឍន៍តិចតួចនៅក្នុងតំបន់អាស៊ាន។
ប្រមុខរដ្ឋាភិបាលកម្ពុជា គូសបញ្ជាក់ថា ភាពរឹងមាំនៃកិច្ចសហប្រតិបត្តិការរវាងអាស៊ាន និងសហរដ្ឋអាមេរិក នឹងនាំមកនូវស្ថានភាពឈ្នះឈ្នះ ដែលនឹងជំរុញការវិនិយោគមកកាន់អាស៊ានឲ្យកាន់តែច្រើនថែមទៀត ពិសេសមកបណ្ដាប្រទេសសមាជិកអាស៊ាន ដែលមានការអភិវឌ្ឍតិចតួច។ លោក អះអាងថា នៅពេលអាស៊ានមានការវិនិយោគកាន់តែច្រើន វានឹងចូលរួមចំណែកដល់ការអភិវឌ្ឍសេដ្ឋកិច្ច និងកាត់បន្ថយគម្លាតអភិវឌ្ឍន៍ក្នុងតំបន់។
លោក ហ៊ុន សែន សង្កត់ធ្ងន់ថា សហរដ្ឋអាមេរិក ជាប្រទេសដៃគូសន្ទនាដ៏សំខាន់មួយរបស់អាស៊ាន ដែលបានចូលរួមចំណែកក្នុងការធានាសន្តិភាព ស្ថិរភាព និងការអភិវឌ្ឍក្នុងតំបន់។
ជាលទ្ធផល ប្រមុខរដ្ឋនៃអាស៊ាន និងសហរដ្ឋអាមេរិក បានអនុម័តនូវភាពជាដៃគូយុទ្ធសាស្ត្រអាស៊ាន-សហរដ្ឋអាមេរិក និងផែនការសកម្មភាពថ្មីអាស៊ាន-សហរដ្ឋអាមេរិក រយៈពេល ៤ឆ្នាំ (ឆ្នាំ២០១៦-២០២០)។
សាស្ត្រាចារ្យផ្នែកវិទ្យាសាស្ត្រនយោបាយ លោក រស់ រ៉ាវុធ ជំរុញឲ្យរដ្ឋាភិបាលកម្ពុជា ពិសេសអាស៊ាន មានទំនាក់ទំនង និងកិច្ចសហប្រតិបត្តិការជាមួយសហរដ្ឋអាមេរិក បន្ថែមទៀត ដើម្បីភាពរីកចម្រើន និងស្ថិរភាព។ លោកបន្តថា សហរដ្ឋអាមេរិក ជាដៃគូល្អមួយសម្រាប់កម្ពុជា ដោយសារសហរដ្ឋអាមេរិក មានគុណសម្បត្តិចំនួន៣៖ «សហរដ្ឋអាមេរិក ទីមួយ គឺមានលំនឹងផ្នែកសេដ្ឋកិច្ច។ ទីពីរ លំនឹងផ្នែកយោធា។ ទីបី ដែលជាចំណុចសំខាន់នោះ គឺសហរដ្ឋអាមេរិក មានមិត្តច្រើន ហើយប្រទេសដែលជាមិត្តរបស់សហរដ្ឋអាមេរិក ភាគច្រើនជាប្រទេសដែលមានសេដ្ឋកិច្ចជឿនលឿន។ សហរដ្ឋអាមេរិក ជាប្រទេសមួយដែលមានសារសំខាន់សម្រាប់កម្ពុជា ប៉ុន្តែទន្ទឹមនឹងនោះ យើងគួរតែរក្សា និងការពង្រឹងការបង្កើត និងអនុវត្តច្បាប់ឲ្យបានល្អ ដើម្បីសហការជាមួយសហរដ្ឋអាមេរិក បានល្អ»។
នៅក្នុងឆ្នាំ២០១៤ សហរដ្ឋអាមេរិក បានផ្ដល់ជំនួយជាង ៧៤.៥លានដុល្លារដល់កម្ពុជា លើកម្មវិធីសុខភាព អប់រំ អភិបាលកិច្ច និងសេដ្ឋកិច្ច។
ពីទីក្រុងកូឡាឡាំពួរ ប្រទេសម៉ាឡេស៊ី លោក ហ៊ុន សែន ក៏ស្វែងរកការគាំទ្ររបស់សហរដ្ឋអាមេរិក ដើម្បីដោះស្រាយបញ្ហាបម្រែបម្រួលអាកាសធាតុ ស្របពេលដែលលោកអះអាងថា ឆ្នាំ២០១៥ នេះ ប្រទេសជាច្រើននៅតំបន់អាស៊ី-ប៉ាស៊ីហ្វិក កំពុងជួបប្រទះបញ្ហាខ្វះខាតទឹកសម្រាប់ការដាំដុះ។ ក្រៅពីនេះទៀត នាយករដ្ឋមន្ត្រីកម្ពុជា ក៏បានស្វែងរកការគាំទ្រពីសហគមន៍អន្តរជាតិ ដើម្បីប្រយុទ្ធប្រឆាំង និងដោះស្រាយបញ្ហាភេរវកម្មអន្តរជាតិផងដែរ៕