បាតុករព្រមានធ្វើបាតុកម្មទាមទារឲ្យវៀតណាមសុំទោសជាថ្មី
2014.07.27
ពលរដ្ឋនិងព្រះសង្ឃតវ៉ាទាមទារឲ្យស្ថានទូតវៀតណាម សុំទោសរឿងបំភ្លៃប្រវិត្តសាស្ត្រខ្មែរកម្ពុជាក្រោម នៅក្បែរស្ថានទូតវៀតណាម កាលពីថ្ងៃទី៨ កក្កដា ឆ្នាំ២០១៤។
អស់រយៈពេលជិត ១សប្ដាហ៍ទៅហើយដែលក្រុមបាតុករតវ៉ាចំពោះការបំភ្លៃប្រវត្តិសាស្ត្ររបស់មន្ត្រីស្ថានទូតវៀតណាម បានផ្អាកបាតុកម្មតាមសំណើរបស់សាលារាជធានីភ្នំពេញ។
តំណាងក្រុមបាតុករបញ្ជាក់ថា ពួកគេរង់ចាំមើលចំណាត់ការរបស់ក្រសួងការបរទេសកម្ពុជា ជាមុនសិន បើសិនជាមិនមានចម្លើយតបជាវិជ្ជមានទេនោះ បាតុកម្មនឹងផ្ទុះឡើងជាថ្មី និងអាចមានទ្រង់ទ្រាយធំជាងមុនទៀតផង។
មកដល់ពេលនេះ ក្រសួងការបរទេសនិងសហប្រតិបត្តិការអន្តរជាតិកម្ពុជា ដែលបានទទួលញត្តិពីបាតុករតាំងពីថ្ងៃទី២៣ ខែកក្កដា មិនបានឆ្លើយតបទាល់តែសោះថា ក្រសួងនឹងមានចំណាត់ការយ៉ាងដូចម្ដេចចំពោះបញ្ហានេះឡើយ។
មន្ត្រីអ្នកនាំពាក្យសាលារាជធានីភ្នំពេញ លោក ឡុង ឌីម៉ង់ ប្រាប់ថា សាលាក្រុងបានទទួលញត្តិពីក្រុមបាតុករតាំងពីថ្ងៃទី២២ ខែកក្កដា និងបានដាក់ជូនទៅក្រសួងការបរទេសនៅមួយថ្ងៃបន្ទាប់ ហើយចំណាត់ការយ៉ាងណាយ៉ាងណីនោះ ជាដែនសមត្ថកិច្ចរបស់ក្រសួងការបរទេសខ្លួនឯង។
ចំណែកឯតំណាងក្រុមបាតុករ លោក ម៉ៅ ពិសេស បញ្ជាក់ថា បាតុករទាំងអស់កំពុងរង់ចាំមើលថា តើក្រសួងការបរទេសនឹងមានចំណាត់ការបែបណាចំពោះបញ្ហានេះនោះ។ លោកបន្តថា ពលរដ្ឋកម្ពុជា នឹងសាទរចំណាត់ការរបស់ក្រសួងការបរទេស បើសិនណាជាក្រសួងអនុវត្តតួនាទីរបស់ខ្លួនបានល្អក្នុងនាមអ្នកទទួលខុសត្រូវចំពោះប្រយោជន៍ជាតិនៅលើឆាកអន្តរជាតិ។ ផ្ទុយមកវិញ ពលរដ្ឋនឹងមិនសប្បាយចិត្តឡើយបើសិនណាជាក្រសួងការបរទេស មិនអើពើចំពោះបញ្ហានេះនោះ៖ «សំឡេង»។
ទាក់ទងនឹងបញ្ហានេះ មន្ត្រីអ្នកនាំពាក្យក្រសួងការបរទេស លោក កុយ គួង នៅល្ងាចថ្ងៃទី២៦ ខែកក្កដា ឆ្នាំ២០១៤ មិនមានយោបល់បែបណាឡើយ ដោយលោកប្រាប់ថា លោកជាប់ភារកិច្ចរវល់។
បាតុកម្មទាមទារឲ្យមន្ត្រីស្ថានទូតវៀតណាម សូមអភ័យទោសជាសាធារណៈចំពោះសម្ដីបំភ្លៃប្រវត្តិសាស្ត្រដែលមន្ត្រីអ្នកនាំពាក្យស្ថានទូតវៀតណាម និយាយថា ទឹកដីកម្ពុជាក្រោមជាទឹកដីរបស់វៀតណាម ជាយូរយារណាស់មកហើយនោះ បានធ្វើអស់ចំនួន ២លើករួចមកហើយ។ បាតុកម្មលើកទី១ ធ្វើឡើងនៅថ្ងៃទី៨ ខែកក្កដា ប៉ុន្តែត្រូវបានអាជ្ញាធរបំបែក។
មន្ត្រីជាន់ខ្ពស់ស្ថានទូតវៀតណាម បានបញ្ចេញប្រតិកម្មជាខ្លាំងនៅពេលមានបាតុកម្មលើកទី១នេះ ដោយស្នើឲ្យរដ្ឋាភិបាលចាត់វិធានការផ្លូវច្បាប់ចំពោះពលរដ្ឋកម្ពុជា ខ្លួនឯង និងថែមទាំងចាត់ទុកបាតុករជាក្រុមអនាធិបតេយ្យទៀតផង។
ចំពោះបាតុកម្មលើកទី២ ធ្វើឡើងនៅថ្ងៃទី២១ និងទី២២ ខែកក្កដា វិញ។ ហើយបាតុកម្មនេះ ស្ថិតក្រោមការបើកភ្លើងខៀវពីសំណាក់រាជរដ្ឋាភិបាលកម្ពុជា ដោយអនុញ្ញាតឲ្យពលរដ្ឋ និងព្រះសង្ឃរាប់ពាន់នាក់និងអង្គ ដើរនិងនិមន្តដង្ហែក្បួនដាក់ញត្តិនៅគ្រប់ស្ថានទូតមហាអំណាចទាំងប្រាំ និងទូតសហភាពអឺរ៉ុប ហើយឈានទៅស្រែករិះគន់នៅមុខស្ថានទូតវៀតណាមទៀតផង។ មន្ត្រីស្ថានទូតវៀតណាម មិនបានបញ្ចេញប្រតិកម្មបែបណាឡើយ គ្រាន់តែប្រាប់ថា ឲ្យយកញត្តិនោះទៅដាក់នៅខណ្ឌចំការមន ប៉ុណ្ណោះ។
តំណាងក្រុមបាតុករបញ្ជាក់ថា បាតុកម្មទាំងពីរលើកធ្វើឲ្យសាធារណជនទូទៅយល់ច្បាស់ថា ពលរដ្ឋខ្មែររាប់ពាន់នាក់មិនភ្លេចឡើយចំពោះទឹកដីកម្ពុជាក្រោម។ ម្យ៉ាងទៀត ក៏អាចគាស់កកាយប្រវត្តិសាស្ត្រឲ្យយុវជនជំនាន់ក្រោយបានដឹង និងបង្ហាញទៅភាគីវៀតណាមថា កម្ពុជាសព្វថ្ងៃមិនងាយស្រួលមើលស្រាលដូចមុនៗទេ។
បាតុកម្មប្រឆាំងនឹងសម្ដីរបស់មន្ត្រីវៀតណាមនេះ មិនមែនធ្វើឡើងតែនៅរាជធានីភ្នំពេញ នោះឡើយ។ បាតុកម្មនេះ បានធ្វើនៅមុខស្ថានទូតវៀតណាម នៅសហរដ្ឋអាមេរិក កាលពីថ្ងៃទី២៥ ខែកក្កដា។ ក្រុមបាតុករប្ដេជ្ញាចិត្តថា នឹងធ្វើបាតុកម្មបន្តទៀតនៅដើមខែសីហា បើសិនជាវៀតណាម មិនព្រមសុំទោស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
អត្ថបទពេញនិយម
នយោបាយ
- លោក ហ៊ុន សែន បដិសេធការចោទរបស់វៀតណាម ដែលថា ព្រែកជីកហ្វូណនសម្រាប់សម្រួលវត្តមានយោធាចិន
- លោក ហ៊ុន ម៉ាណែត ថ្លែងការពារគម្រោងព្រែកជីកហ្វូណនតេជោ ក្រោយពេលវៀតណាមរិះគន់
- លោក ហ៊ុន សែន ស្នើជួបមេដឹកនាំរដ្ឋប្រហារយោធាភូមាភ្លាមៗក្រោយឡើងតំណែងជាប្រធានព្រឹទ្ធសភា
- ពលរដ្ឋខ្មែរនៅក្រៅប្រទេសចង់ឃើញលោក ហ៊ុន ម៉ាណែត បង្រួបបង្រួមជាតិឡើងវិញក្នុងឱកាសចូលឆ្នាំខ្មែរ
- សមត្ថកិច្ចចាប់មន្ត្រីបក្សភ្លើងទៀនខេត្តកំពង់ចាមបីនាក់ទៀតរឿងក្លែងឯកសារ ខណៈមួយចំនួនរត់គេចខ្លួន