ប្រធានក្រុមប្រឹក្សាស្រុកមួយរូបរងការចោទថាបង្កកប្រាក់ខែមន្ត្រីបក្សជំទាស់ដោយសាររឿងនយោបាយ
2017.11.14
សមាជិកក្រុមប្រឹក្សាស្រុកសៀមបូក ខែត្រស្ទឹងត្រែង មកពីគណបក្ស សម រង្ស៊ី ចោទប្រធានក្រុមប្រឹក្សាស្រុកនេះថា បង្កកប្រាក់ខែក្រោមហេតុផលនយោបាយ។ ការចោទប្រកាន់នេះ ក្រោយពីប្រធានក្រុមប្រឹក្សាស្រុកសៀមបូក លោក កែវ ប៊ុនរឿន មិនបានបើកប្រាក់ខែឲ្យសមាជិកក្រុមប្រឹក្សាស្រុកម្នាក់កាលពីខែតុលា ឆ្នាំ២០១៧ ដោយសំអាងថា សមាជិកក្រុមប្រឹក្សាឃុំរូបនោះមិនបានចូលរួមប្រជុំ។
សមាជិកក្រុមប្រឹក្សាស្រុកមកពីគណបក្ស សម រង្ស៊ី នៅថ្ងៃទី១៣ ខែវិច្ឆិកា អំពាវនាវឲ្យក្រសួងមហាផ្ទៃ អន្តរាគមន៍ទាក់ទិននឹងការបង្កកប្រាក់ខែរបស់លោកដោយគ្មានមូលដ្ឋាន ផ្ទុយពីគោលការណ៍ណែនាំរបស់ប្រមុខរដ្ឋាភិបាល និងច្បាប់ស្ដីពីបក្សនយោបាយ។
ក្រុមប្រឹក្សាស្រុកសៀមបូកមកពីគណបក្ស សម រង្ស៊ី លោក ឃីវ ប៊ុនថន ចោទប្រធានក្រុមប្រឹក្សាស្រុកសៀមបូក លោក កែវ ប៊ុនរឿន ថា មានចេតនាបង្កកប្រាក់ខែលោកក្រោមហេតុផលមិនបានបំពេញតួនាទីជាក្រុមប្រឹក្សាឃុំ ដោយខកខានមិនបានមកប្រជុំតាមការអញ្ជើញកន្លងមក។ លោកចាត់ទុកថា ការមិនបើកប្រាក់ជាច្រើនខែមកនេះ គឺជាចេតនារើសអើងបក្សនយោបាយច្រើនជាងការអនុវត្តច្បាប់៖ «គេមកកាត់ប្រាក់ខែខ្ញុំអ៊ីចឹង បើថាប្រជុំប្រចាំខែបើគេហៅខ្ញុំទៅតើ! គេអត់ហៅធ្វើការ»។
ឆ្លើយតបការចោទប្រកាន់នេះ ប្រធានក្រុមប្រឹក្សាស្រុកសៀមបូក លោក កែវ ប៊ុនរឿន ឆ្លើយតបថា សមាជិកក្រុមប្រឹក្សាស្រុករូបនោះបានដាក់ពាក្យស្នើសុំឈប់ ហើយកន្លងមកលោកបានបើកប្រាក់ខែឲ្យដោយសារតែសមាជិកក្រុមប្រឹក្សារូបនោះចូលរួមប្រជុំ និងធ្វើកិច្ចការងារ។ តែក្រោយពីគាត់មិនបានមកបម្រើការងារ យោងតាមបទបញ្ជាផ្ទៃក្នុងរបស់ក្រុមប្រឹក្សាស្រុកត្រូវផ្អាកប្រាក់មួយរយៈសិន លុះណាមានសេចក្ដីសម្រេចពីក្រសួងមហាផ្ទៃ ផ្លាស់ប្ដូរសមាសភាពថ្មីជាមុនសិន ទើបអាចប្រើកប្រាក់ខែបាន៖ «ដោយសារគាត់មិនមកចូលរួមប្រជុំក្នុងរយៈពេល ២ ទៅ ៣ខែ អ៊ីចឹងប្រាក់ហ្នឹងយើងត្រូវផ្អាកមួយរយៈ»។
អនុប្រធានប្រតិបត្តិគណបក្សសង្គ្រោះជាតិ ខែត្រស្ទឹងត្រែង លោក សាត ស៊ិន អះអាងថា នៅពេលដែលសមាជិកក្រុមប្រឹក្សាណាដាក់លិខិតលាលែង ហើយក្រសួងមហាផ្ទៃ មិនទាន់ធ្វើសេចក្ដីសម្រេចចិត្តផ្លាស់ប្ដូរក្រុមប្រឹក្សា នោះមានន័យថា ក្រុមប្រឹក្សាដែលស្នើសុំលាលែងនៅតែមានសុពលភាព ហើយប្រធានក្រុមប្រឹក្សាត្រូវតែកោះប្រជុំរាល់ពេលប្រជុំសាមញ្ញ។ លោកបញ្ជាក់ថា ការបង្កកប្រាក់ខែរបស់សមាជិកក្រុមប្រឹក្សាស្រុក គឺជាទង្វើខុសនីតិវិធី ព្រោះការឡើងកាន់តំណែងរបស់សមាជិកក្រុមប្រឹក្សាស្រុក គឺឡើងតាមប្រព័ន្ធសមាមាត្រដោយបោះឆ្នោត។ ដូច្នេះ ការបង្កកប្រាក់ខែអាចធ្វើបាន លុះត្រាតែមានលិខិតស្នើសុំពីគណបក្សនយោបាយទៅក្រសួងមហាផ្ទៃ ដើម្បីធ្វើការផ្លាស់ប្ដូរសមាសភាពក្រុមប្រឹក្សាឃុំជាមុនសិន។
លោក សាត ស៊ិន៖ «គាត់ប្រាប់ខ្ញុំរង់ចាំតែលិខិតអញ្ជើញគាត់នឹងទៅ ព្រោះហេតុអីបានគាត់ទៅ? ព្រោះអ្នកដែលទទួលតំណែងពីគាត់អត់ចង់ផុតសុពលភាព អ៊ីចឹងគាត់នៅមានសិទ្ធិ ហើយបើឆ្លើយថា គាត់មិនទៅធ្វើការទេ អាហ្នឹងឲ្យគាត់ទៅធ្វើការជាមួយពីណា បើប្រធានក្រុមប្រឹក្សាមិនកោះអញ្ជើញគាត់មកធ្វើការ»។
មន្ត្រីអង្កេតជាន់ខ្ពស់នៃអង្គការខុមហ្វ្រែល (COMFREL) លោក យឿង សុធារ៉ា យល់ថា រឿងចូលប្រជុំ និងមិនចូលប្រជុំរបស់សមាជិកក្រុមប្រឹក្សាស្រុក គឺពាក់ព័ន្ធរឿងវិន័យរដ្ឋបាល បើមានចែកក្នុងច្បាប់ណាមួយដែលកំណត់ថា ការមិនចូលប្រជុំត្រូវបង្កកប្រាក់ខែទើបអាចធ្វើទៅបាន៖ «ខ្ញុំគិតថា ពាក់ព័ន្ធហិរញ្ញវត្ថុរឿងប្រាក់ខែនេះ ប្រធានក្រុមប្រឹក្សាស្រុកហ្នឹងមិនអាចដាក់ទោសពិន័យលើសមាជិករបស់ខ្លួនតាមតែអំពើចិត្តទេ»។
មន្ត្រីគណបក្សសង្គ្រោះជាតិ អះអាងថា ការបង្កកប្រាក់ខែគឺជាចេតនាលេសនយោបាយដោយគណបក្សកាន់អំណាចមិនចង់ឲ្យមានវត្តមានគណបក្សជំទាស់នៅមូលដ្ឋាន៕