"មន្ត្រីរាជការ-កងកម្លាំងប្រដាប់អាវុធនឹងត្រូវបានដំឡើងប្រាក់ខែចាប់ពីខែមេសា"
2015.01.12
រដ្ឋាភិបាល មានគម្រោងដំឡើងប្រាក់បៀវត្សដល់មន្ត្រីរាជការ ប៉ូលិស និងទាហានសម្រាប់ឆ្នាំ២០១៥។ ប្រធានសមាគមគ្រូបង្រៀនកម្ពុជាឯករាជ្យ ស្វាគមន៍ចំពោះឆន្ទៈរដ្ឋាភិបាលដែលបានដំឡើងប្រាក់ខែបន្ថែមដល់ពួកគាត់។ ប៉ុន្តែប្រាក់បៀវត្សទាំងនោះនៅតិចតួច មិនទាន់គ្រប់តម្រូវការចាយវាយប្រចាំថ្ងៃ ខណៈទំនិញនៅទីផ្សារចេះតែកើនឡើងខ្ពស់។
តាមគម្រោងដែលកំណត់ដោយរដ្ឋាភិបាល ទាំងមន្ត្រីរាជការ គ្រូបង្រៀន ប៉ូលិស និងទាហាននឹងត្រូវដំឡើងប្រាក់បៀវត្សបន្ថែមចាប់ពីខែមេសា ឆ្នាំ២០១៥ ខាងមុខតទៅ។
លោកនាយករដ្ឋមន្ត្រី ហ៊ុន សែន ថ្លែងបែបនេះនៅក្នុងពិធីសម្ពោធទំនប់វារីអគ្គិសនីឫស្សីជ្រំក្រោម នៅខេត្តកោះកុង។
លោក ហ៊ុន សែន បញ្ជាក់ថា មន្ត្រីរាជការដែលទទួលបានប្រាក់ទាបបំផុតគឺឡើងជាង ៣០ភាគរយ ឬមានន័យថា ឡើងពីជាង ៤២ម៉ឺនរៀលក្នុងមួយខែ ទៅ ៥៥ម៉ឺនរៀលក្នុងមួយខែ។
គ្រូបង្រៀនទទួលប្រាក់ខែទាបបំផុត ៥៥ម៉ឺនរៀលក្នុងមួយខែ នឹងត្រូវដំឡើងដល់ ៦៥ម៉ឺនរៀលក្នុងមួយខែ។ ចំពោះគ្រូពេទ្យឡើងពី ៥៥ម៉ឺនរៀលក្នុងមួយខែ ទៅដល់ ៦៥ម៉ឺនរៀលក្នុងមួយខែ។ ដោយឡែកនគរបាលជាតិថ្នាក់ពលបាលត្រី ឡើងពីជាង ៤៧ម៉ឺនរៀលក្នុងមួយខែ (គិតទាំងរបបអង្ករ) ទៅ៦៤ម៉ឺនរៀលក្នុងមួយខែ។ រីឯយោធិនថ្នាក់ពលទោដំឡើងពីជាង ៣៥ម៉ឺនរៀលក្នុងមួយខែ ទៅជាង ៥៣ម៉ឺនរៀលក្នុងមួយខែដោយមិនគិតរបបអង្ករ។
លោក ហ៊ុន សែន៖ «ខែ៤ (មេសា) គឺត្រូវឡើងប្រាក់បៀវត្ស ហើយខែ ៤ នោះ គឺត្រូវបើកប្រាក់បៀវត្សឲ្យបានមុនចូលឆ្នាំ សាច់ប្រាក់មិនជាបញ្ហាសម្រាប់យើងទេ»។
ទាក់ទងនឹងការដំឡើងប្រាក់បៀវត្សបន្ថែមដល់មន្ត្រីរាជការ ប៉ូលិស ទាហាននេះ ប្រធានសមាគមគ្រូបង្រៀនកម្ពុជាឯករាជ្យ លោក រ៉ុង ឈុន ស្វាគមន៍ចំពោះគោនយោបាយដំឡើងប្រាក់បៀវត្សនេះ តែលោកគិតថា ការដំឡើងនោះ នៅតិចតួចពេកដែលមិនទាន់ឆ្លើយតបនូវតម្លៃទំនិញនៅលើទីផ្សារសព្វថ្ងៃ។ តាមគំនិតលោក រដ្ឋាភិបាលត្រូវដំឡើងប្រាក់បៀវត្សឲ្យមន្ត្រីរាជការ ប៉ូលិស ទាហាន ឲ្យបានទាបបំផុត ១លានរៀល៖ «ការដំឡើងនឹងនៅតែប្រឈមបញ្ហាជីវភាពរបស់មន្ត្រីរាជការ គ្រូបង្រៀន ប៉ូលិស ទាហាន ប្រាក់នោះវាមិនសមស្របតម្លៃទំនិញ»។
លោក រ៉ុង ឈុន បញ្ជាក់ថា ការធ្វើកំណែទម្រង់ទាំងក្នុងស្ថាប័នស៊ីវិល និងទាហានទៅបាន លុះណាតែមន្ត្រីរាជការ ប៉ូលិស ទាហានទាំងអស់ ទទួលបានប្រាក់ខែសមរម្យ។ ប្រាក់ខែសមរម្យ គឺជាគន្លឹះដែលនាំឲ្យមានអភិបាលកិច្ចល្អប្រកបដោយប្រសិទ្ធភាព។
មន្ត្រីជាន់ខ្ពស់រដ្ឋាភិបាលធ្លាប់អះអាងថា មិនអាចដំឡើងប្រាក់បៀវត្សដល់មន្ត្រីរាជការ ប៉ូលិស ទាហាន ច្រើនយ៉ាងគំហុកបានទេ ប៉ុន្តែត្រូវដំឡើងជារៀងរាល់ឆ្នាំ។
ការប្រកាសដំឡើងប្រាក់បៀវត្សនេះ គឺស្របពេលដែលរដ្ឋាភិបាលចេញអនុក្រឹត្យមួយកាលពីថ្ងៃទី៣១ ធ្នូ ឆ្នាំ២០១៤ កំណត់ប្រាក់ឧបត្ថម្ភប្រចាំខែចំពោះសមាជិកក្រុមប្រឹក្សាឃុំសង្កាត់ និងមន្ត្រីភូមិ។ ប្រធានក្រុមប្រឹក្សានិងជាមេឃុំ ចៅសង្កាត់ ទទួលបាន ៤០ម៉ឺនរៀលក្នុងមួយខែ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ
អត្ថបទពេញនិយម
នយោបាយ
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- មន្ត្រីរដ្ឋាភិបាលអះអាងថា ការជីកព្រែកហ្វូណនជាសិទ្ធិអធិបតេយ្យរបស់កម្ពុជា គ្មានការចាំបាច់បំភ្លឺគ្រប់រឿងដល់វៀតណាមទេ
- លោក ហ៊ុន ម៉ាណែត ថ្លែងការពារគម្រោងព្រែកជីកហ្វូណនតេជោ ក្រោយពេលវៀតណាមរិះគន់
- តើកម្ពុជាអាចជម្នះសាងសង់ព្រែកជីកហ្វូណនតេជោបានដែរឬទេ?
- លោក ហ៊ុន សែន បដិសេធការចោទរបស់វៀតណាម ដែលថា ព្រែកជីកហ្វូណនសម្រាប់សម្រួលវត្តមានយោធាចិន