តុលាការក្រុងភ្នំពេញចេញដីកាចាប់ខ្លួនលោក សម រង្ស៊ី
2015.11.13
អយ្យការអមសាលាដំបូងរាជធានីភ្នំពេញ បានចេញដីកាសម្រេចឲ្យចាប់ខ្លួនលោក សម រង្ស៊ី ទាក់ទងបទបរិហារកេរ្តិ៍ លោក ហោ ណាំហុង ជាសាធារណៈ និងញុះញង់ឲ្យមានការរើសអើងកាលពីឆ្នាំ២០០៨។ ប៉ុន្តែបក្សប្រឆាំង សង្គមស៊ីវិល និងអ្នកច្បាប់ចាត់ទុកដីការបស់តុលាការនៅពេលនេះថា ជារឿងនយោបាយសុទ្ធសាធ។
សំណុំរឿងចាស់កាលពី ៧ឆ្នាំមុន រវាងលោក សម រង្ស៊ី ប្រធានគណបក្សសង្គ្រោះជាតិ និងលោក ហោ ណាំហុង រដ្ឋមន្ត្រីក្រសួងការបរទេស ដែលបានផ្ទុះឡើងវិញនៅថ្ងៃទី១៣ ខែវិច្ឆិកា នេះ ធ្វើឲ្យមន្ត្រីជាន់ខ្ពស់គណបក្សសង្គ្រោះជាតិ លោក អេង ឆៃអ៊ាង ផ្ទុះសំណើចឡើងនៅពេលឃើញដីកាតាមចាប់ខ្លួនលោក សម រង្ស៊ី។
លោក អេង ឆៃអ៊ាង ហៅករណីនេះថា ជារឿងកំប្លែង ត្បិតអីលោក ហ៊ុន សែន រករឿងថ្មីមកបង្ក្រាបលោក សម រង្ស៊ី មិនបាន ទើបឆ្កឹះឆ្កៀលរឿងចាស់មកសើរើឡើងវិញ៖ «ខ្ញុំអស់សំណើចហ្នឹង ព្រោះការបញ្ជាឲ្យចាប់ខ្លួនដូចជារឿងកំប្លែង។ គេទៅសើរើសាលក្រមឆ្នាំ២០០៨ បើយើងយោងការលើកលែងទោសរបស់ព្រះមហាក្សត្រ ឆ្នាំ២០១៣ អ្នកដែលរៀបចំបែបបទលើកលែងទោស គឺនាយករដ្ឋមន្ត្រី អ៊ីចឹងត្រូវគ្របដណ្ដប់គ្រប់រឿងអស់ហើយ»។
ទោះបែបក្ដីនេះ ព័ត៌មាននៃការចាប់ខ្លួន សម រង្ស៊ី លោក អេង ឆៃអ៊ាង ឲ្យដឹងថា គណបក្សសង្គ្រោះជាតិ បានរៀបចំកិច្ចប្រជុំបន្ទាន់មួយនៅទីស្នាក់ការបក្ស ហើយលោកក៏មិនទាន់បង្ហើបឲ្យដឹងថា លោក សម រង្ស៊ី នឹងវិលមកប្រទេសកម្ពុជា វិញនៅថ្ងៃណាដែរ។
លោក សម រង្ស៊ី ត្រូវបានរដ្ឋមន្ត្រីក្រសួងការបរទេស លោក ហោ ណាំហុង ប្ដឹងពីបទបរិហារកេរ្តិ៍ជាសាធារណៈ និងញុះញង់ឲ្យមានការរើសអើង បន្ទាប់ពីលោក សម រង្ស៊ី ធ្វើអត្ថាធិប្បាយជាចំហប្រាប់ក្រុមអ្នកកាសែតកាលពីថ្ងៃទី១៧ ខែមេសា ឆ្នាំ២០០៨ នាសារមន្ទីរជើងឯក ទាក់ទងនឹងសាលាក្ដីខ្មែរក្រហម ដោយលោកបានស្នើឲ្យពន្លឿនការកាត់ទោសអតីតមេដឹកនាំខ្មែរក្រហមឲ្យបានឆាប់។
លោក សម រង្ស៊ី ថ្លែងនៅពេលនោះថា មានអតីតទីប្រឹក្សា ប៉ុល ពត ជាទេសរដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុនៃប្រទេសកម្ពុជា និងមានអតីតមេគុកបឹងត្របែក របស់របបខ្មែរក្រហម ហើយបច្ចុប្បន្នជាឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេសកម្ពុជា ប៉ុន្តែលោក សម រង្ស៊ី មិនបាននិយាយចំៗឈ្មោះនោះទេ។
នាយកប្រតិបត្តិក្រុមអ្នកច្បាប់ការពារសិទ្ធិកម្ពុជា លោកមេធាវី ហុង គឹមសួន និយាយថា បើគិតតាមផ្លូវច្បាប់ តុលាការអាចចេញដីកាចាប់ខ្លួនលោក សម រង្ស៊ី បាន ព្រោះសាលាដំបូងរាជធានីភ្នំពេញ អនុវត្តតាមអំណាចសាលក្រមរបស់សាលាឧទ្ធរណ៍ និងសាលដីកាស្ថាពរ។ ប៉ុន្តែលោកថា ការចាប់ខ្លួនលោក សម រង្ស៊ី អាចធ្វើទៅបាន លុះត្រាដកអភ័យឯកសិទ្ធិជាមុនសិន៖ «ការចាប់ខ្លួន លោក សម រង្ស៊ី មុននឹងចាប់ខ្លួនគេមើលថា តើបុគ្គលឈ្មោះ សម រង្ស៊ី ជាពលរដ្ឋសាមញ្ញ ឬជាតំណាងរាស្ត្រ»។
ទាក់ទងរឿងនេះដែរ អ្នកនាំពាក្យក្រសួងមហាផ្ទៃ លោកនាយឧត្ដមសេនីយ៍ ខៀវ សុភ័គ ឲ្យដឹងថា សមត្ថកិច្ចនឹងអនុវត្តការងារតាមដីការបស់តុលាការ។ រឿងផ្សេងពីនេះ លោកមិនទាន់ធ្វើអត្ថាធិប្បាយឡើយ។
យ៉ាងណាក៏ដោយចុះ មន្ត្រីជាន់ខ្ពស់នៃអង្គការសិទ្ធិមនុស្សលីកាដូ (LICADHO) លោក អំ សំអាត សង្កេតឃើញថា វប្បធម៌សន្ទនារបស់គណបក្សទាំងពីរប្រេះស្រាំខ្លាំង ទើបមានការបញ្ជាឲ្យចាប់ខ្លួនក្នុងពេលដែលលោក សម រង្ស៊ី មានអភ័យឯកសិទ្ធិ ហើយរឿងនេះកើតឡើងតាំងពីឆ្នាំ២០០៨ ប៉ុន្តែលោក សម រង្ស៊ី អាចឈរបោះឆ្នោតជាតំណាងរាស្ត្រកាលពីឆ្នាំ២០១៣ ខណៈដែលច្បាប់បោះឆ្នោតមិនអនុញ្ញាតឲ្យទណ្ឌិតបោះឆ្នោតបាន៖ «ឃើញអ៊ីចឹងថា គឺជារឿងនយោបាយ ព្រោះរឿងនេះយូរហើយ ម្ដេចអត់ដំណើរការ នៅពេលប្រតិកម្មនាយករដ្ឋមន្ត្រី ទើបមានចេញដីកាតាមចាប់»។
នៅរយៈពេលចុងក្រោយនេះ កម្ដៅនយោបាយបានឡើងកម្ដៅខ្លាំង ក្រោយពីមានអំពើហិង្សាលើតំណាងរាស្ត្រគណបក្សប្រឆាំង ការដកតំណែងលោក កឹម សុខា ចេញពីអនុប្រធានរដ្ឋសភា ហើយនៅចុងក្រោយនេះ លោក ហ៊ុន សែន បានហៅលោក សម រង្ស៊ី ថា ជាកូនជនក្បត់ជាតិ និងព្រមានប្រើវិធានការផ្លូវច្បាប់លើលោក សម រង្ស៊ី។ ដោយឡែក លោក សម រង្ស៊ី បានផ្ញើសារទៅលោក ហ៊ុន សែន វិញថា បើថ្ងៃណាមួយលោក ហ៊ុន សែន ត្រូវគេចោទប្រកាន់ពីរឿងអ្វីមួយនៅចំពោះមុខតុលាការ លោកនឹងចេញមុខមុនគេការពារកូនរបស់លោក ហ៊ុន សែន ដោយយល់ថា រឿងរបស់ឪពុកមិនជាប់ពាក់ព័ន្ធនឹងកូនឡើយ។
ជាងនេះទៀត ប្រធានគណបក្សប្រឆាំងរូបនេះថា គណបក្សកាន់អំណាចព្យាយាមគ្រប់រូបភាពដើម្បីមិនឲ្យមានការបោះឆ្នោតនៅឆ្នាំ២០១៨ ខាងមុខ។
ចំណែកប្រធានអង្គការវេទិកាអនាគត លោក អ៊ូ វីរៈ យល់ថា ដីកានេះគឺមិនចង់ឲ្យលោក សម រង្ស៊ី ចូលស្រុកក្នុងពេលដែលប្រធានបក្សប្រឆាំងរូបនេះកំពុងនៅក្រៅស្រុក ព្រោះគណបក្សប្រជាជនកម្ពុជា ដឹងថា បើមានការចាប់ខ្លួនលោក សម រង្ស៊ី នឹងមិនហ៊ានចូលស្រុកនោះឡើយ។ លោក អ៊ូ វីរៈ ទស្សន៍ទាយថា លោក សម រង្ស៊ី មិនហ៊ានចូលស្រុកទេ បើគ្មានការចរចាជាមួយលោក ហ៊ុន សែន ជាមុន៖ «ភាព រឹតបន្តឹងនេះ មិនត្រឹមតែចេញដីកាចាប់ខ្លួនលោក សម រង្ស៊ី ទេ អាចមានទៅលើអនុប្រធានបក្សលោក កឹម សុខា តំណាងរាស្ត្រផ្សេងទៀត អ្នកឯករាជ្យ ឬអ្នកសារព័ត៌មាន»។
ជារឿយៗ មុនពេលបោះឆ្នោត តែងតែកើតព្រឹត្តិការណ៍រហូតមានការបញ្ជាឲ្យចាប់ខ្លួនលោក សម រង្ស៊ី។ កាលពីឆ្នាំ២០០៩ លោក សម រង្ស៊ី បានគេចចេញពីប្រទេសកម្ពុជា ទាក់ទងរឿងដកតម្រុយបង្គោលព្រំដែនកម្ពុជា-វៀតណាម នៅខេត្តស្វាយរៀង។ ប៉ុន្តែឆ្នាំ២០១៣ ក្រោមការសម្របសម្រួលនយោបាយរវាងលោក សម រង្ស៊ី និងលោក ហ៊ុន សែន ប្រធានបក្សប្រឆាំង លោក សម រង្ស៊ី ត្រូវព្រះមហាក្សត្រព្រះរាជទានការលើកលែងទោស ហើយលោកអាចឈរឈ្មោះបោះឆ្នោតបាន។
សូមស្ដាប់សេចក្ដីរាយការណ៍ព័ត៌មាននេះ និងសម្រង់មតិពលរដ្ឋ ដោយលោក ប្រាជ្ញ ចេវ និងអ្នកស្រី អ៊ុំ រង្សី៖