មន្ត្រីបក្សប្រឆាំងនៅកំពង់ធំប្ដឹងអាជ្ញាធរឲ្យលុបឈ្មោះជនបរទេសក្នុងបញ្ជីបោះឆ្នោត
2017.01.06
មន្ត្រីគណបក្សសង្គ្រោះជាតិ នៅខេត្តកំពង់ធំ បានដាក់ពាក្យប្ដឹងតវ៉ាទៅអាជ្ញាធរមូលដ្ឋានមួយចំនួន ខណៈពួកគេពិនិត្យឃើញក្នុងបញ្ជីឈ្មោះបោះឆ្នោត ថាមានឈ្មោះជនបរទេសចំនួន ៥នាក់។ ការដាក់ពាក្យប្ដឹងនេះ ដើម្បីស្នើឲ្យអាជ្ញាធរលុបឈ្មោះជនបរទេសទាំងនោះ និងស៊ើបអង្កេតថា តើពួកគេចូលសញ្ជាតិខ្មែរដោយស្របច្បាប់ ឬយ៉ាងណា?
ជំហានដំបូងក្នុងពេលបិទបញ្ជីឈ្មោះបោះឆ្នោតនៅខេត្តកំពង់ធំ មន្ត្រីគណបក្សប្រឆាំងរកឃើញមានភាពមិនប្រក្រតីមួយចំនួនកើតមានឡើង។
ករណីទាំងនោះ គឺមានឈ្មោះជនបរទេសចំនួន ៥នាក់នៅក្នុងបញ្ជីចុះឈ្មោះបោះឆ្នោត ក្នុងនោះរួមមាន ជនជាតិវៀតណាម ៤នាក់ និងម៉ាឡេស៊ី ម្នាក់។ ក្រៅពីនេះ ពួកគេមើលឃើញថា មិនសូវមានពលរដ្ឋច្រើនទេ ដែលនាំគ្នាទៅពិនិត្យបញ្ជីឈ្មោះរបស់ខ្លួន ដោយសារខ្វះខាតការផ្សព្វផ្សាយរបស់អាជ្ញាធរ ព្រមទាំងគណៈកម្មការជាតិរៀបចំការបោះឆ្នោត (គ.ជ.ប)។
សមាជិកគណៈកម្មាធិការប្រតិបត្តិនៃគណបក្សសង្គ្រោះជាតិ ខេត្តកំពង់ធំ លោក សុខ ប៉េងសេង មានប្រសាសន៍ថា ខាងលោកបានដាក់ពាក្យប្ដឹងទៅអាជ្ញាធរមូលដ្ឋាននៅថ្ងៃទី៥ និងថ្ងៃទី៦ មករា ដើម្បីឲ្យអាជ្ញាធរឃុំមួយចំនួនរួមមានឃុំស្រឡៅ ស្រុកបារាយណ៍ ឃុំដងកាំបិត ឃុំទំរីង ស្រុកសណ្ដាន់ និងឃុំកំពង់ស្វាយ ស្រុកកំពង់ស្វាយ លុបឈ្មោះជនបរទេសចេញពីបញ្ជីឈ្មោះបោះឆ្នោត។ លោកបន្ថែមថា ប្រសិនបើនៅដំណាក់កាលអាជ្ញាធរមូលដ្ឋានមិនអាចដោះស្រាយបាន ខាងលោកនឹងបញ្ជូនពាក្យបណ្ដឹងទៅគណៈកម្មាធិការជាតិរៀបចំការបោះឆ្នោត បន្តទៀត៖ «នេះជាការបិទបញ្ជីឈ្មោះដំបូង គឺយើងដាក់ពាក្យបណ្ដឹងទៅក្រុមប្រឹក្សាឃុំ-សង្កាត់ ដើម្បីសុំលុបឈ្មោះជនបរទេសនេះ»។
ខេត្តកំពង់ធំ មានពលរដ្ឋគ្រប់អាយុចុះឈ្មោះបោះឆ្នោតជាង ៤៤ម៉ឺននាក់ ហើយពលរដ្ឋដែលបានមកចុះឈ្មោះបោះឆ្នោត គឺមានចំនួនជាង ៣៤ម៉ឺននាក់ ស្មើ ៧៦ភាគរយ។
ទាក់ទងបញ្ហានេះ ប្រធានលេខាធិការដ្ឋាននៃគណៈកម្មការរៀបចំការបោះឆ្នោតខេត្តកំពង់ធំ លោក ប្រែង សាវុធ មានប្រសាសន៍នៅថ្ងៃទី៦ មករា ថា ជុំវិញពាក្យបណ្ដឹងរបស់មន្ត្រីគណបក្សប្រឆាំង គឺខាងលោកនៅមិនទាន់ទទួលបានទេ ព្រោះជាដំណាក់កាលប្ដឹងតវ៉ានៅថ្នាក់មូលដ្ឋាន ឬថ្នាក់ក្រុមប្រឹក្សាឃុំ-សង្កាត់។ លោកបញ្ជាក់ថា ប្រសិនការដោះស្រាយបណ្ដឹងនៅថ្នាក់មូលដ្ឋានមិនអាចទៅរួច គឺគេនឹងបញ្ជូនពាក្យបណ្ដឹងនោះទៅ គ.ជ.ប តែម្តង។
ដោយឡែកដំណើរការពិនិត្យបញ្ជីឈ្មោះបោះឆ្នោតវិញ គឺមានលក្ខណៈល្អប្រសើរជាងពេលមុនៗ ហើយខាងលោកក៏បានជំរុញការផ្សព្វផ្សាយឲ្យពលរដ្ឋ នាំគ្នាទៅពិនិត្យបញ្ជីឈ្មោះរបស់ខ្លួនឲ្យបានកាន់តែច្រើនដែរ៖ «និយាយមែនទៅ យើងគ្រាន់តែណែនាំពីគោលការណ៍ដាក់ពាក្យបណ្ដឹង។ ណែនាំពីគោលការណ៍ដោះស្រាយពាក្យបណ្ដឹងមកជូនក្រុមប្រឹក្សាឃុំ-សង្កាត់។ ហើយសព្វថ្ងៃហ្នឹងខិតខំធ្វើយ៉ាងណាផ្សព្វផ្សាយឲ្យពលរដ្ឋមកមើលឲ្យបានច្រើន»។
ទោះបីជាបែបនេះក្តី មន្ត្រីតស៊ូមតិជាន់ខ្ពស់នៃអង្គការខុមហ្វ្រែល (COMFREL) លោក កន សាវាង្ស អះអាងថា នេះជាដំណាក់កាលពិនិត្យបញ្ជីឈ្មោះបោះឆ្នោតដំបូង ទាំងប្រជាពលរដ្ឋ ឬមន្ត្រីគណបក្សនយោបាយ អាចប្ដឹងតវ៉ាទៅអាជ្ញាធរមូលដ្ឋាន ឬទៅ គ.ជ.ប បាន ប្រសិនបើពួកគាត់រកឃើញភាពមិនប្រក្រតីកើតមានឡើង។ បន្ថែមពីនេះ ក្រុមប្រឹក្សាឃុំ ឬសង្កាត់ អាចដោះស្រាយបណ្ដឹងទាំងនោះបាន ឬអាចបញ្ជូនពាក្យបណ្ដឹងទាំងនោះទៅ គ.ជ.ប បន្តទៀត ប្រសិនបើពួកគេមិនអាចដោះស្រាយចេញ៖ «បាទ! គាត់អាចលុបបាន ឬមិនលុបបាន ព្រោះនេះជាបណ្ដឹងដូចគ្នា គាត់មានសិទ្ធិក្នុងការមើលហ្នឹង លើកលែងតែគាត់ថាទេ មិនច្បាស់ទេ អាហ្នឹងគាត់ត្រូវរុញបន្តទៀត»។
លោក កន សាវាង្ស មើលឃើញថា ក្នុងចំណោមខេត្ត ក្រុង និងរាជធានីទាំង២៥ គឺមានតំបន់មួយចំនួន ពលរដ្ឋមិនសូវបានទៅពិនិត្យបញ្ជីឈ្មោះនោះឡើយ ដោយសារការផ្សព្វផ្សាយរបស់ គ.ជ.ប នៅមានកម្រិត។ លោកបញ្ជាក់ថា ដំណាក់កាលពិនិត្យបញ្ជីឈ្មោះបោះឆ្នោតដំបូង គឺរឿងសំខាន់សម្រាប់ប្រជាពលរដ្ឋ ដើម្បីឲ្យប្រាកដថា ពួកគាត់មានឈ្មោះក្នុងបញ្ជី ឬអត់ ហើយឈ្មោះនោះត្រឹមត្រូវ ឬយ៉ាងណា? លោកថា គ.ជ.ប ត្រូវបង្កើនការផ្សព្វផ្សាយបន្ថែមទៀត ពិសេសនៅតាមមូលដ្ឋានតែម្តង ដើម្បីជំរុញពលរដ្ឋឲ្យទៅពិនិត្យបញ្ជីឈ្មោះកាន់តែច្រើន៕