ពលរដ្ឋ៖ ឈ្មួញឈើប្រើកាំភ្លើងប៉ូលិសបាញ់ស្លាប់ក្មេងម្នាក់
ប្រជាពលរដ្ឋដែលសុំមិនចេញឈ្មោះ បាននិយាយឲ្យដឹងថា អ្នកបាញ់នោះជាអ្នករកស៊ីអារឈើ ហើយបានបាញ់ទៅលើក្មេងឲ្យស្លាប់ក្នុងពេលដេញបាញ់ស្វានៅក្នុងព្រៃក្បែររោងអារឈើ។
មន្ត្រីប៉ូលិសខេត្តព្រះវិហារ បានបញ្ជាក់ថា មានការបាញ់សម្លាប់ក្មេងនៅស្រុកសង្គមថ្មី ពិតមែន។ ប៉ុន្តែបដិសេធមិនផ្ដល់ព័ត៌មានលំអិតទេ។
លោក ឡោ ចាន់ អ្នកសម្របសម្រួលអង្គការការពារសិទ្ធិមនុស្សឈ្មោះ អាដហុក នៅខេត្តព្រះវិហារ មានប្រសាសន៍ថា ការបាញ់មនុស្សឲ្យស្លាប់នេះ ទោះបីមានចេតនា ឬមិនមានចេតនាក៏ដោយ ក៏ត្រូវមានទោសដែរ គឺមានទោសទាំងអ្នកបាញ់ និងម្ចាស់កាំភ្លើងដែលគេយកទៅបាញ់ឲ្យមនុស្សគ្រោះថ្នាក់។
លោក ឡោ ចាន់៖ «ករណីបាញ់ឲ្យក្មេងប្រុសស្លាប់នេះ គឺជនប្រព្រឹត្តត្រូវតែមានទោស ទោះបីជនប្រព្រឹត្តមានចេតនាក្ដី អចេតនាក្ដី។ ទោសនោះទាក់ទងជាមួយក្រមព្រហ្មទណ្ឌ មាត្រា ២០៧ គឺជនប្រព្រឹត្តត្រូវតែមានទោសពីបទមនុស្សឃាតដោយអចេតនា។ បទមនុស្សឃាតដោយអចេតនានេះ ត្រូវផ្ដន្ទាទោសជាប់ពន្ធនាគារពី ១ឆ្នាំ ទៅ ៣ឆ្នាំ»។
ប្រភពពីអង្គការការពារសិទ្ធិមនុស្សអាដហុក នៅខេត្តព្រះវិហារ បានឲ្យដឹងថា ក្មេងដែលគេបាញ់ស្លាប់នោះ ឈ្មោះ ជន់ ភី មានអាយុ ១៤ឆ្នាំ ជាប្រជាពលរដ្ឋរស់នៅភូមិខ្នារ ឃុំរអាង ស្រុកសង្គមថ្មី។ចំណែកអ្នកបាញ់ឈ្មោះ គួន ឃឿត មានអាយុ ៣២ឆ្នាំ។ បច្ចុប្បន្នតុលាការខេត្តបានសម្រេចឃុំខ្លួនជនដៃដល់ដែលបានបាញ់សម្លាប់ក្មេងនោះហើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
