បុរសឈ្មោះ ទាវ ធូ អាយុ៤៣ឆ្នាំ ប្រជាពលរដ្ឋនៅភូមិកំពង់ក្តី ឃុំរំលេច មានប្រសាសន៍ប្រាប់វិទ្យុអាស៊ីសេរី នៅព្រឹកថ្ងៃទី១៦ មីនា ថា នាយរងប៉ុស្តិ៍នគរបាលរដ្ឋបាលឃុំរំលេច គឺលោក សេង សិរី បានបញ្ឈប់គោយន្តគាត់រួចទាមទារយកឧសមួយបាច់ធំពីគាត់តែគាត់មិនព្រមឲ្យ ស្រាប់តែប៉ូលិសរូបនេះបានយកកាំភ្លើងអាកា៤៧ មកភ្ជង់គាត់និងវាយដំមកលើរូបគាត់ដោយកាំភ្លើងនោះទៀតផង។គាត់បន្តថា មុខនិងកណ្ដៀតក្អមគាត់បានរងរបួសក្នុងការវាយដំយ៉ាងកម្រោលនេះ។
លោក ទាវ ធូ ឲ្យដឹងដូច្នេះ ៖ «គេយកកាំភ្លើងមកភ្ជង់ខ្ញុំ ខ្ញុំយកដៃផាត់ចេញ ហើយគេលើកកាំភ្លើងយកមកបុកមួយទំហឹង ដល់ខ្ញុំគេចផុតទៅវាត្រូវក្ដារនិងអាវដាច់។ បន្តមកទៀតគេកាន់កាណុងដៃពីរ គេលើករកសំពងក្បាលខ្ញុំ ហើយខ្ញុំយកដៃរង ដល់ហើយគេប្រមាថខ្ញុំថា អ្ហែងចង់ងាប់អី?»។
ប្រភពបានឲ្យដឹងថា កាលពីវេលាម៉ោងប្រមាណ៨យប់នៃថ្ងៃទី១៣ មីនា បុរសឈ្មោះ ទាវ ធូ ប្រជាពលរដ្ឋនៅភូមិកំពង់ក្តី ឃុំរំលេច បានបើកគោយន្តដឹកឧសមកពីឃុំតាលោ យកទៅប្រើប្រាស់។ មកដល់ចំណុចប៉ុស្តិ៍នគរបាលឃុំរំលេច ក៏ជួបលោក សេង សិរី នាយរងប៉ុស្តិ៍ចេញមកសុំឧសមួយបាច់ តែឈ្មោះ ទាវ ធូ មិនព្រមឲ្យ រួចក៏កើតមានបញ្ហាជម្លោះនេះឡើង។
វិទ្យុអាស៊ីសេរីមិនអាចទាក់ទងសុំការបំភ្លឺពីនាយរងនគរបាលប៉ុស្តិ៍ គឺលោក សេង សិរី បានទេ នៅល្ងាចថ្ងៃទី១៦ មីនា នេះ ដោយលោកត្រូវបានថ្នាក់លើហៅទៅធ្វើការបំភ្លឺ។
នាយប៉ុស្តិ៍នគរបាលរដ្ឋបាលឃុំរំលេច គឺលោក រង សុវណ្ណរឿន បានពន្យល់ចំពោះបញ្ហានេះថា ៖ «សហការជាមួយប្រជាការពារក្នុងការយាមកាមពេលយប់ ដល់អ៊ីចឹងទៅមានគោយន្តមួយគ្រឿងមកពីទិសខាងត្បូងមក ប្រជាការពារគាត់កាក់ ប៉ុន្តែគោយន្តអត់ឈប់ទេ ហើយឲ្យប៉ូលិសយើងកាក់ ហើយប៉ូលិសយើងកាក់ហ្នឹងក៏អត់ឈប់ទៀត ប៉ូលិសរងខ្ញុំហ្នឹងគាត់យល់ថា ឃាត់មិនឈប់ ជេរគាត់ទៀត ខឹងផងអីផង គាត់ក៏តាមទៅកាក់ទៀត។ ត្រួតពិនិត្យមើលទៅវាអត់មានអីទេ ក៏ឲ្យគាត់ទៅផ្ទះទៅ។ ដឹងស្រាប់ហើយប៉ូលិសយើងក្នុងការចេញល្បាត ស្ពាយកាំភ្លើងស្ពាយអីដើរ អ៊ីចឹងទៅគាត់ចោទប្រកាន់ថា ប៉ូលិសហ្នឹងយកអាវុធទៅគំរាមគាត់»។
អធិការនគរបាលស្រុកបាកាន គឺលោក ប៉ែន ទុង មានប្រសាសន៍ថា តាមការស្រាវជ្រាវរបស់លោកបង្ហាញថា ភាគីទាំងសង្ខាងសុទ្ធតែមានកំហុសរៀងៗខ្លួន។ លោកបន្តថា ដោយខឹងនឹងការតិះដៀល កម្លាំងមានសមត្ថកិច្ចពីសំណាក់លោក ទាវ ធូ នាយរងប៉ុស្តិ៍នគរបាលរដ្ឋបាលឃុំរំលេច មិនអាចទប់ចិត្តបានទើបកើតមានការប្រទូស្តរាយគ្នាឡើង។
លោក ប៉ែន ទុង មានប្រសាសន៍ដូច្នេះ ៖ «តាមពិតទៅអ្នកគោយន្តហ្នឹងជេរប៉ូលិសយើងសព្វបែបសព្វយ៉ាងរឿងកាក់ហ្នឹង អ៊ីចឹងទៅវាអាចអាកប្បកិរិយានៅក្នុងពេលហ្នឹង ទាំងគោយន្តទាំងប៉ូលិស វាអាចមានអាកប្បកិរិយាមួយ ខ្ញុំមិនកាន់ជើងប៉ូលិសអីទេ គ្រាន់តែថា វាអាចមានអាកប្បកិរិយាមួយជ្រុលជ្រួសទាំងអស់គ្នា ទាំងអ្នកគោយន្តទាំងប៉ូលិសហ្នឹង វាអាចមានពាក្យសម្ដីធំតូចអ៊ីចឹងទៅ។ តាមពិតវាមិនដល់ថ្នាក់យកអាវុធទៅគំរាមកំហែងទេ»។
មន្ត្រីផ្នែកអង្កេតអង្គការការពារសិទ្ធិមនុស្សលីកាដូ គឺលោក សឺន សែនករុណា មានប្រសាសន៍ថា តាមការស៊ើបអង្កេតបញ្ជាក់ថា នាយរងនគរបាលប៉ុស្តិ៍រំលេច បានប្រើអំពើហិង្សាមកលើប្រជាពលរដ្ឋមែន។ លោកសំណូមពរឲ្យថ្នាក់លើធ្វើការស៊ើបអង្កេតបញ្ហានេះឲ្យបានសុក្រឹតនិងល្អិតល្អន់ ចៀសវាងការបាត់បង់ជំនឿរបស់ប្រជាពលរដ្ឋចំពោះកម្លាំងមានសមត្ថកិច្ច៕