អាជ្ញាធរខេត្តរតនគិរីសង្គ្រោះគ្រួសារជនជាតិដើមភាគតិចចារ៉ាយជាប់ចោទចេះអាបធ្មប់
2015.04.23
អាជ្ញាធរស្រុកបរកែវ ខេត្តរតនគិរី បានសង្គ្រោះបុរសជនជាតិដើមភាគតិចមួយគ្រួសារដែលអ្នកភូមិគំរាមសម្លាប់ដោយចោទថា បុរសនោះចេះអំពើអាបធ្មប់។ បច្ចុប្បន្ន បុរសអ្នកភូមិនោះត្រូវអាជ្ញាធរបញ្ជូនឲ្យមករស់នៅទីមានសុវត្ថិភាពបន្ទាប់បុរសនោះភ័យខ្លាចរត់ទៅលាក់ខ្លួនក្នុងព្រៃ។ មន្ត្រីសិទ្ធិមនុស្សអំពាវនាវសុំឲ្យមានការគាំពារផ្នែកសិទ្ធិមនុស្សចំពោះសកម្មភាពកាត់ទោសក្រៅច្បាប់តាមជំនឿជនជាតិដើមភាគតិចនេះ។
អធិការប៉ូលិសស្រុកបរកែវ លោក ម៉ៅ សាន់ មានប្រសាសន៍នៅថ្ងៃទី២៣ ខែមេសា ថា អាជ្ញាធរស្រុកកំពុងស្វែងរកលទ្ធភាពឲ្យក្រុមគ្រួសាររងគ្រោះ លោក រចំ ពិន អាចវិលត្រឡប់ទៅរស់នៅជាមួយអ្នកភូមិបានដូចដើមវិញ បន្ទាប់ពីត្រូវបានសង្គ្រោះ៖ «ទស្សនៈរបស់គាត់ខ្ញុំសួរហើយ ទោះជាសម្របសម្រួលបែបណាក៏គាត់អត់ហ៊ានទៅនៅដែរ។ បញ្ហាអំពើអាបធ្មប់នៅស្រុកយើងវាសឹងអស់ហើយ ប៉ុន្តែក្នុងច្បាប់អត់មានភស្តុតាង កាប់សម្លាប់មនុស្សថាវាមានមែន»។
ចំណែកអភិបាលខេត្តរតនគិរី លោក ថោង សាវុន បានផ្ដល់អង្ករពីរបាវ ត្រីខពីរយូរ និងប្រាក់ ៤០ម៉ឺនរៀលដល់គ្រួសារជនជាតិដើមភាគតិចចារ៉ាយ ដែលរងគ្រោះពីការប៉ុនប៉ងសម្លាប់ក្រៅច្បាប់ពីសំណាក់អ្នកភូមិជាមួយគ្នាក្រោមហេតុផលថាបុរសនោះជាធ្មប់ធ្វើឲ្យអ្នកភូមិឈឺស្លាប់។
ការឧបត្ថម្ភនេះធ្វើឡើងបន្ទាប់ពីបុរសជនជាតិដើមគឺលោក រចំ ពិន អាយុ ៤៨ឆ្នាំ រួមជាមួយប្រពន្ធនិងកូនប្រុសស្រី ៨នាក់ រស់នៅក្នុងបន្ទុក កាលពីដើមខែមេសា បាននាំគ្នារត់ទៅលាក់ខ្លួនក្នុងព្រៃដើម្បីចៀសផុតពីការគំរាមសម្លាប់ និងបណ្ដេញចេញពីភូមិពីសំណាក់សាច់ញាតិអ្នកភូមិ និងអាជ្ញាធរភូមិផងដែរ។
លោក រចំ ពិន រស់នៅភូមិជ្រុង ឃុំកក់ ត្រូវបានអ្នកភូមិសង្ស័យថា មានប្រទាលសម្លាប់មនុស្ស ឬប្រទាលស៊ីមនុស្ស ហើយប្រើប្រាស់ប្រទាលនោះធ្វើឲ្យអ្នកភូមិប្រមាណ ១០នាក់ដែលលោកមិនពេញចិត្តស្លាប់តាមរយៈអំពើធ្មប់។
ទាក់ទិនករណីនេះ លោក រចំ ពិន បដិសេធថា លោកមិនចេះអំពើធ្មប់ ហើយក៏មិនបានធ្វើឲ្យអ្នកភូមិស្លាប់ដូចការចោទនោះឡើយ។ លោកសំដែងការភ័យខ្លាចគេសម្លាប់នៅពេលសួរថា តើលោកអាចវិលទៅរស់នៅក្នុងភូមិវិញទេ ប្រសិនអាជ្ញាធរសម្របសម្រួលឲ្យអ្នកភូមិស្រុះស្រួលទទួលឲ្យលោកទៅរស់នៅវិញ៖ «ខ្ញុំអត់ហ៊ានទៅភូមិទេ អ្នកភូមិ ប្រធានភូមិ គេអត់ឲ្យខ្ញុំជាន់ដីភូមិជ្រុង ទេ យូរទៅៗខ្ញុំខ្លាចគេធ្វើបាបខ្ញុំ យប់ព្រលប់។ ខ្ញុំឆ្ងល់ដែរគេចោទខ្ញុំ ខ្ញុំអត់សម្លាប់គេ អត់ស៊ីគេ ខ្ញុំអត់ធ្វើអំពើគេទេ»។
អាជ្ញាធរស្រុកបរកែវ នៅថ្ងៃទី២៣ ខែមេសា បានធ្វើដំណើរទៅកាន់ភូមិជ្រុង ដើម្បីស្វែងរកដំណោះស្រាយបញ្ចប់រឿងរ៉ាវចោទប្រកាន់ និងគំរាមសម្លាប់ក្រៅច្បាប់នេះ។ ក៏ប៉ុន្តែអភិបាលស្រុកបរកែវ លោក ហេង ប៊ុននី បដិសេធមិនអធិប្បាយពីលទ្ធផលនៃការសម្របសម្រួលនេះទេ ដោយសារលោកជាប់រវល់។
ទោះជាយ៉ាងនេះក៏ដោយ មន្ត្រីសម្របសម្រួលសមាគមការពារសិទ្ធិមនុស្សអាដហុក ខេត្តរតនគិរី លោក ឆាយ ធី ចាត់ទុកការគំរាមសម្លាប់ និងការបណ្ដេញអ្នកភូមិតាមរយៈជំនឿអាបធ្មប់គឺជាទង្វើរំលោភច្បាប់ និងសិទ្ធិមនុស្ស។ លោកអំពាវនាវឲ្យអាជ្ញាធរពាក់ព័ន្ធស្វែងរកដំណោះស្រាយការពារពលរដ្ឋកុំឲ្យមានការភ័យខ្លាចពីការគំរាមសម្លាប់ក្រៅច្បាប់នេះ៖ «យ៉ាងហោចណាស់ក៏យើងផ្លាស់ប្ដូរភូមិ ដើម្បីចៀសទំនាស់ ជាការភ័យខ្លាចរបស់ជនរងគ្រោះដែលគេចាត់ទុកថា គាត់ចេះធ្មប់»។
កាលពីថ្ងៃទី២១ ខែមេសា សមត្ថកិច្ចប៉ូលិសបានចាប់ខ្លួនមនុស្សបួននាក់នៅភូមិបី ឃុំត្រពាំងក្រហម ស្រុកកូនមុំ ខេត្តរតនគិរី បញ្ជូនទៅតុលាការពីបទប៉ុនប៉ងធ្វើមនុស្សឃាតក្នុងជំនឿអាបធ្មប់បណ្ដាលឲ្យមនុស្សវ័យចំណាស់ពីរនាក់ប្តីប្រពន្ធមានរបួស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
អត្ថបទពេញនិយម
ព័ត៌មានថ្មីៗ
- លោក ហ៊ុន សែន បដិសេធការចោទរបស់វៀតណាម ដែលថា ព្រែកជីកហ្វូណនសម្រាប់សម្រួលវត្តមានយោធាចិន
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ
- ក្រុមគ្រួសារលោក ហ៊ុន សែន បង្កើតកម្មវិធីរាំច្រៀងសប្បាយនៅលើគំនរទុក្ខពលរដ្ឋ
- ក្រុមអតិថិជនបុរីពិភពថ្មីដាក់ពាក្យប្ដឹង ទៅស្នងការករណីតៃកុងឡានបុរីបើកបុកពួកគាត់
- លោក ហ៊ុន ម៉ាណែត ថ្លែងការពារគម្រោងព្រែកជីកហ្វូណនតេជោ ក្រោយពេលវៀតណាមរិះគន់