អាជ្ញាធរដាក់ឱសានវាទរុះរើសំណង់ខុសបច្ចេកទេសនៅរតនគិរី
sr.mp3
ផ្ទះប្រជាពលរដ្ឋ និងសំណង់ខុសលក្ខណៈបច្ចេកទេសចំនួនជាង ៣០០ខ្នង នៅក្នុងសង្កាត់ឡាបានសៀក ក្រុងបានលុង ខេត្តរតនគិរី នឹងត្រូវធ្វើការរុះរើកែលំអផ្នែកខ្លះដែលបង្កផលប៉ះពាល់សណ្ដាប់ធ្នាប់របៀបរៀបរយ និងសោភ័ណភាពទីក្រុង។
អភិបាលក្រុងបានលុង លោក លី វិន នៅថ្ងៃពុធ ទី២០ ខែមិថុនា ឆ្នាំ២០១២ មានប្រសាសន៍បញ្ជាក់ថា ផ្ទះល្វែងនិងអាគារដែលតសំយាប ឬបិទបាំងធ្វើជាបន្ទប់លយចូលមកលើដីចំណីផ្លូវ ឬសំណង់ដែលមានខឿនចិញ្ចើមផ្លូវខុសទៅនឹងគោលការណ៍សំណង់ ត្រូវឲ្យរុះរើ និងរៀបចំកែលំអឡើងវិញចាប់ពីថ្ងៃទី២០ ខែមិថុនា នេះតទៅ។
លោកបន្តថា ទីក្រុងបានលុង នឹងដាក់បញ្ចូលទៅជាទីក្រុងស្អាតមួយនៃប្រទេសកម្ពុជា ឲ្យបានសំរេចនាឆ្នាំ២០១៥ ខាងមុខនេះ៖ «យើងចង់កាត់តម្រង់ជួរឲ្យស្អាត មិនមែនយើងដាច់ខាតទេ ដាក់ថ្ងៃឱសានវាទ ២០ថ្ងៃ លើកទីមួយ។ លើកទីពីរ យើងដាក់ ៧ថ្ងៃ ទៅយើងនឹងចុះបាញ់ថ្នាំឲ្យគាត់»។
អាជ្ញាធរខេត្តរតនគិរី បានផ្សព្វផ្សាយប្រកាសជូនដំណឹងដល់ប្រជាពលរដ្ឋនៅក្រុងបានលុង ដោយដាក់ឱសានវាទរយៈពេល ២០ថ្ងៃ ចាប់ពីថ្ងៃជូនដំណឹងឲ្យប្រជាពលរដ្ឋមានសំណង់ខុសលក្ខណៈបច្ចេកទេស ត្រូវរុះរើចេញ បើមិនដូច្នេះទេ ក្រុមសមត្ថកិច្ចនឹងធ្វើការរុះរើ។
ចៅសង្កាត់ឡាបានសៀក លោក ញៀន តៃស៊ី មានប្រសាសន៍បញ្ជាក់ថា នៅក្នុងសង្កាត់ឡាបានសៀក មានសំណង់លើដីសាធារណៈរបស់រដ្ឋជាង ២០០គ្រួសារបន្ថែមទៀត ដែលបង្កផលប៉ះពាល់ដល់សណ្ដាប់ធ្នាប់ និងរបៀបរៀបរយក្នុងទីក្រុងបានលុង។
លោកបន្តថា ករណីនេះក្រុមអាជ្ញាធរក៏នឹងចាត់វិធានការរៀបចំសំណង់ខុសច្បាប់ទាំងនោះដូចគ្នា ដើម្បីអនុវត្តតាមគោលការណ៍ណែនាំរបស់អាជ្ញាធរខេត្ត៖ «លើកមុនចៅហ្វាយក្រុងៗដាក់ទៅអត់មានប្រសិទ្ធភាព។ កាលណាយើងជូនដំណឹងរួចហើយ បុគ្គលណារឹងរូស កាលណារុះរើត្រូវចេញសោហ៊ុយឲ្យអ្នករុះរើហ្នឹងហើយ។ សំណូមពរទាល់តែបងប្អូនយើងទាំងអស់ហ្នឹង ធ្វើម៉េចចូលរួមចំណែកឲ្យការងារសណ្ដាប់ធ្នាប់ហ្នឹងឲ្យបានស្អាត»។
ប្រជាពលរដ្ឋរស់នៅភូមិមួយ សង្កាត់ឡាបានសៀក លោក ឈ ហ៊ួគ្រុយ សំដែងការគាំទ្រគំរោងការរៀបចំសណ្ដាប់ធ្នាប់ និងកែលំអសោភ័ណភាពក្រុងបានលុងនេះ។ លោកសំណូមពរឲ្យអាជ្ញាធរខេត្តអនុវត្តវិធានការនេះប្រកបដោយតម្លាភាព និងស្មើភាពគ្នាដោយកុំមានរើសអើង៖ «បើវាយុត្តិធម៌ទាំងអស់គ្នា ខ្ញុំគាំទ្រ ផ្ទះគេក៏រុះផ្ទះយើងក៏រុះស្មើភាពគ្នា។ បើផ្ទះយើងរុះផ្ទះគេនៅ អត់គាំទ្រដែរ»។
ចំណែកអ្នកឃ្លាំមើលបញ្ហាសិទ្ធិមនុស្សនៃសមាគមអាដហុក (ADHOC) ខេត្តរតនគិរី លោក ប៉ែន ប៊ុណ្ណារ៍ ថ្លែងថា មន្ត្រីអាជ្ញាធរនៅមូលដ្ឋានមួយចំនួនសុទ្ធតែមានលំនៅឋានខុសលក្ខណៈបច្ចេកទេស ប៉ះពាល់សណ្ដាប់ធ្នាប់សាធារណៈ ហេតុនេះលោកយល់ថា មន្ត្រីទាំងនោះគួរធ្វើជាគំរូដល់ប្រជាពលរដ្ឋ ដើម្បីរួមចំណែកប្រែក្លាយក្រុងបានលុង ទៅជាទីក្រុងស្អាត។
លោក ប៉ែន ប៊ុណ្ណារ៍៖ «ជាការរៀបចំមួយត្រូវតែធ្វើ យើងទាមទារថា ត្រូវតែមានជានិរន្តតទៅ ដើម្បីជាទម្លាប់មួយឲ្យប្រជាពលរដ្ឋយើងទទួលយកសណ្ដាប់ធ្នាប់អ៊ីចឹងរហូតទៅ ហើយបើសិនលើកលែងផ្ទះអ្នកនេះ អ្នកនោះ អាហ្នឹងវាបរាជ័យដូចកន្លងមក។ វប្បធម៌ហ្នឹងត្រូវតែបំបាត់ចោល»។
នៅថ្ងៃទី២៩ ខែមិថុនា ឆ្នាំ២០១២ ខាងមុខនេះ អាជ្ញាធរក្រុងបានលុង នឹងចូលរួមចុះហត្ថលេខាជាមួយស្ថាប័នពាក់ព័ន្ធថ្នាក់ជាតិ ដាក់បញ្ចូលក្រុងបានលុង ប្រឡងប្រណាំងជាទីក្រុងស្អាត គ្មានសំរាមថង់ប្លាស្ទិក គ្មានសំយាបផ្ទះ ឬសង់ផ្ទះលើដីចំណីផ្លូវ មានចិញ្ចើមថ្នល់រាបស្មើគ្នាមានរបៀបរៀបរយ និងជាទីក្រុងសម្បូរទៅដោយសួនច្បារ និងរុក្ខជាតិពណ៌បៃតង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
