អាជ្ញាធររាជធានីភ្នំពេញនិងខេត្តកណ្ដាលសហការបង្ក្រាបបទល្មើសបូមខ្សាច់
2015.01.18
កាណូតបូមខ្សាច់នៅពេលយប់ ក្នុងទឹកដីរាជធានីភ្នំពេញ និងខេត្តកណ្ដាល នៅបន្តសកម្មភាពបូមជាដដែល បើទោះបីជាអាជ្ញាធរពាក់ព័ន្ធធ្វើយុទ្ធនាការបង្ក្រាបជាបន្តបន្ទាប់ក៏ដោយ។ ប្រជាពលរដ្ឋលើកឡើងថា កិច្ចសហការបង្ក្រាបបទល្មើសបូមខ្សាច់រវាងសាលារាជធានីភ្នំពេញ និងសាលាខេត្តកណ្ដាល នៅមិនទាន់រឹតបន្តឹងខ្លាំងក្លាឲ្យមានប្រសិទ្ធភាពនៅឡើយទេ។
អាជ្ញាធររាជធានីភ្នំពេញ និងអាជ្ញាធរខេត្តកណ្ដាល នឹងរឹតបន្តឹងការសហការដើម្បីបង្ក្រាបបទល្មើសបូមខ្សាច់ ខណៈកាណូតបូមខ្សាច់ច្រើនគ្រឿងនៅបន្តលួចបូមនៅពេលយប់ក្នុងទឹកដីរាជធានីភ្នំពេញ និងខេត្តកណ្ដាល។
ចៅសង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ លោក លីវ វណ្ណថេង ថ្លែងនៅថ្ងៃទី១៧ ខែមករា ឆ្នាំ២០១៥ ថា ស្ទើររាល់យប់កាណូតធំៗ បានលួចចូលបូមខ្សាច់ក្នុងទឹកដីសង្កាត់ព្រែកថ្មី។ អាជ្ញាធរសង្កាត់ និងខណ្ឌបានចុះទូតដើម្បីចាប់ ត្រូវពួកនោះបើកកាណូតបូមខ្សាច់ចូលក្នុងទឹកដីនៃក្រុងតាខ្មៅ ខេត្តកណ្ដាល ដែលនៅទល់មុខសង្កាត់ព្រែកថ្មីនេះ ទើបមិនអាចចាប់កាណូតល្មើសបានភ្លាមៗ៖ «វាមានតែពួកក្រុមលួចឆ្មក់ ហើយយើងបានបង្ក្រាបជារឿយៗ រហូតដែរ។ ជាក់ស្ដែង ព្រឹកមិញយើងគ្រាន់តែទទួលបានព័ត៌មាន យើងបញ្ចេញអូប័រទៅចាប់ វាអែបទៅខាងខេត្តកណ្ដាល បាត់ទៅ។ វានៅបន្តមានបៅស្រុកតាខ្មៅ តែម្ដង ហើយមួយកង់ទៀតនៅខាងស្រុកស្អាង ហើយឥឡូវខ្ញុំបានបង្ក្រាបជាក់ស្ដែងហើយ បទល្មើសជាក់ស្ដែង គ្រាន់តែយើងបានចេះអូប័រទៅវាចូលខាង ហើយឥឡូវវាអត់ហ៊ានចេញទេ»។
ការដេញបង្ក្រាបបទល្មើសបូមខ្សាច់នេះបានធ្វើឡើងក្រោយពីរដ្ឋមន្ត្រីក្រសួងរ៉ែនិងថាមពល កាលពីថ្ងៃ៣០ ខែធ្នូ ឆ្នាំ២០១៤ ជូនដំណឹងទៅសាលារាជធានីភ្នំពេញ អភិបាលខេត្តកណ្ដាល និងអភិបាលខេត្តព្រៃវែង មិនឲ្យមានការបូមខ្សាច់ក្នុងទឹកដីរាជធានីភ្នំពេញ និងខេត្តទាំងពីរនោះនៅក្នុងភូមិសាស្ត្រដែលបានកំណត់ព្រំដែននៅទន្លេមេគង្គក្រោម ទន្លេមេគង្គលើ និងទន្លេបាសាក់។
ពាក់ព័ន្ធកាណូតបូមខ្សាច់ បើកកាណូតចូលទឹកដីខេត្តកណ្ដាល ដើម្បីគេចពីការតាមចាប់កាណូតរបស់អាជ្ញាធររាជធានីភ្នំពេញ ត្រូវអភិបាលខេត្តកណ្ដាល លោក ម៉ៅ ភារុណ ថ្លែងថា ពិតជាមានកាណូតលួចបូមខ្សាច់ក្នុងទឹកដីខេត្តកណ្ដាល នៅពេលយប់ បានកើតឡើងញឹកញាប់មែន។ លោកថា ករណីនេះដោយសារទឹកដីរាជធានីភ្នំពេញ និងខេត្តកណ្ដាល នៅក្នុងទន្លេតែមួយ។ លោកថា នឹងពង្រឹងការសហការបង្ក្រាបបទល្មើសបូមខ្សាច់របស់អាជ្ញាធរទាំង២ រាជធានីភ្នំពេញ និងខេត្តកណ្ដាល ដើម្បីចាប់កាណូតល្មើសបូមខ្សាច់ឲ្យទាន់ហេតុការណ៍ទោះបីសកម្មភាពបង្កនៅពេលយប់ក៏ដោយ៖ «កើតរឿងអត់ច្បាប់ ដល់អ៊ីចឹងវាធ្វើតែនៅក្នុងពេលយប់ ចន្លោះប្រហោង ពួកនឹងឆ្លៀត អាហ្នឹងខ្ញុំទទួលស្គាល់បញ្ហាហ្នឹង ហើយខ្ញុំបានចាត់វិធានការហើយ។ អ្វីដែលវាអត់មាន ច្បាប់គឺត្រូវតែបញ្ចប់អត់មានអនុញ្ញាតឲ្យធ្វើអាជីវកម្ម រួមទាំងនៅទន្លេមេគង្គលើ មេគង្គក្រោម ទន្លេបាសាក់ ទន្លេសាប អាហ្នឹងគឺនៅក្នុងភូមិសាស្ត្រខេត្តកណ្ដាល អ្នកដែលអត់មានច្បាប់ គឺមិនអនុញ្ញាតបន្តទៀតទេ»។
បញ្ហាបង្ក្រាបបទល្មើសបូមខ្សាច់នេះដែរ អ្នកនាំពាក្យសាលារាជធានីភ្នំពេញ លោក ឡុង ឌីម៉ង់ ថ្លែងថា សាលារាជធានីភ្នំពេញ នឹងប្រឹងប្រែងសហការបង្ក្រាបបទល្មើសបូមខ្សាច់ជាមួយអាជ្ញាធរខេត្តកណ្ដាល ព្រោះក្នុងភូមិសាស្ត្រទឹកដីរាជធានីភ្នំពេញ ទាំងមូល ក្រសួងរ៉ែនិងថាមពល ប្រកាសមិនឲ្យមានការបូមខ្សាច់ទេ៖ «ព្រោះអីតាមខ្ញុំដឹង គឺទាំងអាជ្ញាធររាជធានីភ្នំពេញ និងខេត្តកណ្ដាល បានសហការគ្នាហើយថា មិនឲ្យមានទេ ដូច្នេះទោះបីគេចចេញពីភ្នំពេញ ទៅតាខ្មៅ ក៏យើងមិនឲ្យដែរ ពីព្រោះនៅក្នុងខេត្តកណ្ដាល ក៏មិនអនុញ្ញាតដែរ»។
ប្រជាពលរដ្ឋនៅក្នុងស្រុកល្វាឯម ស្រុកកោះធំ ស្រុកស្អាង ក្នុងខេត្តកណ្ដាល អះអាងដូចគ្នាថា កាណូតច្រើនគ្រឿងបើកមកពីប្រទេសវៀតណាម ចតក្នុងទឹកទន្លេមេគង្គ នៅពេលថ្ងៃ ប៉ុន្តែនៅពេលយប់ បានធ្វើសកម្មភាពលួចបូមខ្សាច់។ ពួកគាត់បន្តថា បើសិនអាជ្ញាធរខេត្តកណ្ដាល និងរាជធានីភ្នំពេញ មានចេតនារឹតបន្តឹងករណីលួចបូមខ្សាច់មែន គួរចាប់កាណូតសំចតនៅក្នុងទន្លេ អូសយកទៅទុក ទើបមិនមានសកម្មភាពលួចបូមខ្សាច់នៅពេលយប់បន្តទៀត។
កាលពីថ្ងៃ៥ ខែមករា ឆ្នាំ២០១៥ គណៈកម្មការគ្រប់គ្រងធនធានខ្សាច់ បានឃាត់ទុកកាណូតបូមខ្សាច់ចំនួន ១៩គ្រឿង ចតបូមយកខ្សាច់គគ្រឹកគគ្រេង មុខព្រះបរមរាជវាំង និងនៅជ្រោយចង្វារ ក្នុងទឹកដីរាជធានីភ្នំពេញ ក្រោយពីលោក ស៊ុយ សែម រដ្ឋមន្ត្រីក្រសួងរ៉ែនិងថាមពល ផ្ញើលិខិតរំលឹកទៅអាជ្ញាធររាជធានីភ្នំពេញ ខេត្តកណ្ដាល និងខេត្តព្រៃវែង ឲ្យទប់ស្កាត់បទល្មើសបូមខ្សាច់ និងអាជីវកម្មខ្សាច់ ហើយសូមឲ្យចាប់ផ្ដន្ទាទោសជនល្មើសតាមមាត្រា៣៥ នៃច្បាប់ស្តីពីការគ្រប់គ្រង និងការធ្វើ
អាជីវកម្មធនធានរ៉ែ ព្រោះអតីតក្រសួងឧស្សាហកម្មរ៉ែនិងថាមពល បានប្រកាសនិរាករណ៍រាល់អាជ្ញាប័ណ្ណបូមខ្សាច់ទាំងអស់ក្នុងតំបន់ទន្លេបាសាក់ ទន្លេមេគង្គក្រោម និងទន្លេមេគង្គលើ ហាមធ្វើអាជីវកម្មខ្សាច់ក្នុងទន្លេទាំង៣នោះ តាំងពីឆ្នាំ២០១១ មកម្ល៉េះ៕