អ្នកភូមិនៅស្រុកស្អាងចោទក្រុមហ៊ុនបូមខ្សាច់ថាធ្វើឲ្យបាក់ដីចម្ការពួកគាត់

អ្នកភូមិចំនួនពីរភូមិ ស្ថិតនៅឃុំកោះអន្លង់ចិន ស្រុកស្អាង ខេត្តកណ្ដាល អះអាងថា ក្រុមហ៊ុនចំនួនពីរ កំពុងបូមខ្សាច់ធ្វើឲ្យបាក់ដីចម្ការរបស់ពួកគាត់។

ដោយ វិជ័យ អានន្ទ
2012-09-04

h090412cp-a1.mp3

អ្នកភូមិឈ្មោះ លោក ម៉ាក ម៉េងគា ឲ្យដឹងនៅថ្ងៃទី៤ កញ្ញា ឆ្នាំ២០១២ ថា ក្រុមហ៊ុនបូមខ្សាច់ចំនួនពីរ គឺក្រុមហ៊ុនច័ន្ទ ឫទ្ធិស័ក្ដិ និងក្រុមហ៊ុនគួច ប៊ុនលាភ។ ក្នុងបណ្ដាក្រុមហ៊ុនទាំងពីរនោះ ក្រុមហ៊ុនច័ន្ទ ឫទ្ធិស័ក្ដិ កំពុងបូមខ្សាច់នៅភូមិកណ្ដាលកោះអន្លង់ចិន។ ចំណែកឯក្រុមហ៊ុនគួច ប៊ុនលាភ កំពុងបូមនៅក្បាលកោះអន្លង់ចិន។

លោក ម៉ាក ម៉េងគា បានចោទថា ការបូមខ្សាច់របស់ក្រុមហ៊ុនទាំងពីរនេះ កំពុងធ្វើឲ្យដីចម្ការរបស់អ្នកភូមិបាក់ធ្លាក់ចូលក្នុងទន្លេ ដោយសារក្រុមហ៊ុនទាំងនោះបូមខ្សាច់មិនគោរពតាមគោលការណ៍របស់ក្រសួងបានកំណត់ ព្រោះក្រុមហ៊ុននេះតែងលួចចូលបូមក្បែរៗច្រាំងទន្លេ នៅពេលយប់ ដែលធ្វើឲ្យដីច្រាំងបាក់ធ្លាក់។

ទាក់ទងនឹងបញ្ហានេះដែរ លោកលើកឡើងបន្តថា ដីចម្ការរបស់អ្នកភូមិដែលប៉ះពាល់ខ្លាំងជាងគេ គឺភូមិក្បាលកោះ។ ចាប់តាំងពីក្រុមហ៊ុនចុះមកបូមខ្សាច់នោះ កោះចំនួនពីរ គឺកោះរាំង និងក្បាលកោះស្នេហ៍ ដែលជាតំបន់ទេសចរណ៍ តែងមានភ្ញៀវទេសចរចូលទស្សនានោះ បានបាក់ធ្លាក់ចូលទន្លេបាត់អស់ហើយ៖ «ហើយនៅភូមិក្បាលកោះហ្នឹង ទទួលឥទ្ធិពលខ្លាំងជាងគេ ដោយសារវាស្រួច ហើយតំបន់ដែលមានកោះស្នេហ៍ពីមុនហ្នឹង ក្រុមហ៊ុនបានបូមអស់រយៈពេល៥ឆ្នាំហើយ ហើយកោះហ្នឹងលែងមានទៀត ហើយបាក់កោះមួយទៀតដែលនៅក្បែរហ្នឹង ហើយបាក់រហូតដល់នៅក្បែរលំនៅឋានរបស់ប្រជាពលរដ្ឋ ហើយរហូតដល់គាត់ភ័យខ្លាចពីកន្លែងហ្នឹង គាត់រើទៅកន្លែងផ្សេង»។

ទោះយ៉ាងណា មេឃុំទើបជាប់ឆ្នោតអាណត្តិថ្មី នៃឃុំកោះអន្លង់ចិន លោក ហ៊ន់ ឲ្យដឹងថា លោករាយការណ៍ពីបញ្ហាបូមខ្សាច់របស់ក្រុមហ៊ុនទាំងពីរនោះ ដល់ថ្នាក់លើហើយ ប៉ុន្តែលោកមិនដឹងថា គេនឹងចាត់វិធានការលើបញ្ហានេះពេលណានោះទេ។ ម្យ៉ាងទៀត លោកមិនអាចដោះស្រាយបញ្ហានេះបាននោះទេ ដោយហេតុថា ក្រុមហ៊ុនបូមខ្សាច់ទាំងនោះមានអាជ្ញាប័ណ្ណ ដូច្នេះអាជ្ញាធរមូលដ្ឋានមិនអាចចាត់ចែងលើរឿងនេះបានទេ។

មួយវិញទៀត ទាក់ទងនឹងការលើកឡើងរបស់អ្នកភូមិថា មានបាក់ដីធ្លាក់ចូលទន្លេនោះ លោកហាក់មិនទាន់ឃើញករណីនោះកើតឡើងឡើយ។ ដូច្នេះ វាគឺជាការព្រួយបារម្ភរបស់អ្នកភូមិ ខណៈពេលដែលពួកគេឃើញកប៉ាល់បូមខ្សាច់នោះ ចូលមកបូមខ្សាច់កៀកច្រាំងពេក។

អ្នកភូមិបញ្ជាក់ថា ក្រុមហ៊ុនគួច ប៊ុនលាភ ចូលមកបូមខ្សាច់នៅភូមិក្បាលកោះអន្លង់ចិន អស់រយៈពេល៥ឆ្នាំមកហើយ។ រីឯក្រុមហ៊ុនច័ន្ទ ឫទ្ធិស័ក្ដិ ចូលមកបូមខ្សាច់ភូមិកណ្ដាលកោះ អស់រយៈពេល២ឆ្នាំមកហើយ។ អ្នកភូមិបញ្ជាក់បន្ថែមថា ក្រុមហ៊ុនទាំងពីរនេះ បូមខ្សាច់មិនគោរពការកំណត់របស់ក្រសួងនោះឡើយ ដោយហេតុថា ក្រុមហ៊ុនតែងបញ្ជាកប៉ាល់របស់ខ្លួនចូលមកបូមកៀកច្រាំង ដែលនាំឲ្យដីច្រាំងបាក់ធ្លាក់ចូលទន្លេ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។