មជ្ឈមណ្ឌលកសិកម្មធម្មជាតិបង្កើតទីផ្សារបន្លែសរីរាង្គ២បន្ថែមនៅភ្នំពេញ
2016.03.17
មជ្ឈមណ្ឌលកសិកម្មធម្មជាតិ (EAC) ព្រួយបារម្ភថា ការហូរចូលផលិតផលកសិកម្ម និងចំណីអាហារពីក្រៅប្រទេស ជាការគំរាមកំហែងថ្មីសម្រាប់វិស័យកសិកម្ម និងសុវត្ថិភាពចំណីអាហារនៅប្រទេសកម្ពុជា។ ដោយមើលឃើញពីបញ្ហានេះ មជ្ឈមណ្ឌលនេះបានបង្កើតទីផ្សារបន្លែសរីរាង្គចំនួន២បន្ថែមនៅភ្នំពេញ ដោយរំពឹងថា ផ្សារនេះអាចជួយផ្គត់ផ្គង់ចំណីអាហារប្រកបដោយសុវត្ថិភាពដល់អ្នកបរិភោគ។
មន្ត្រីមជ្ឈមណ្ឌលកសិកម្មធម្មជាតិ អះអាងថា ទីផ្សារបន្លែសរីរាង្គចំនួន២នេះ ដែលជាជំនួយឧបត្ថម្ភពីអង្គការ ជី.អាយ.ហ្សិត (GIZ) នៃប្រទេសអាល្លឺម៉ង់ គឺជាចំណែកមួយឈានទៅកាត់បន្ថយការនាំចូលទំនិញដែលមានសារធាតុគីមី ចាប់ពី ៣០០ ទៅ ៥០០គីឡូក្រាមក្នុង១ថ្ងៃ។ ការលើកឡើងរបស់មន្ត្រីមជ្ឈមណ្ឌលកសិកម្មធម្មជាតិ ធ្វើឡើងនៅក្នុងវិធីបើកសម្ពោធជាផ្លូវការមជ្ឈមណ្ឌល Eco-Agri Center និងសហករណ៍សរីរាង្គខ្មែរ ដែលរៀបចំឡើងនៅថ្ងៃទី១៧ ខែមីនា។
ប្រធានមជ្ឈមណ្ឌលកសិកម្មធម្មជាតិ លោក អៀង សុធារ៉ា មានប្រសាសន៍ថា កម្ពុជាត្រូវការនាំចូលបន្លែមកពីប្រទេសជិតខាងបន្ថែមប្រមាណ ២០០តោនទៅ ៤០០តោនក្នុងមួយថ្ងៃៗ ដែលមានតម្លៃជាទឹកប្រាក់ប្រមាណជាង ២០០លានដុល្លារអាមេរិក ក្នុងមួយឆ្នាំៗ។ លោកថា នេះជាគ្រោះថ្នាក់ដល់សុខភាព និងសេដ្ឋកិច្ចខ្លាំង ព្រោះផលិតកសិកម្មទាំងនោះភាគច្រើនមានផ្ទុកថ្នាំពុល ជីគីមី និងថ្នាំកសិកម្មផ្សេងៗ។ ហេតុនេះ ផ្សារនេះ មានសារសំខាន់ មិនត្រឹមតែជួយកាត់បន្ថយលំហូរផលិតពីបរទេស វាក៏ជាមជ្ឈមណ្ឌលផ្ដល់បច្ចេកទេសកសិកម្មដល់ពលរដ្ឋផងដែរ៖ «កាលណាយើងហូបបន្លែមានជាតិគីមី ហេតុនេះយើងត្រូវចំណាយលុយទៅលើបញ្ហាសុខភាពក៏ច្រើនដែរ ប៉ុន្តែបើយើងបរិភោគផលិតគីមីកាន់តែតិច ការចំណាយទៅសុខភាពក៏តិចដែរ។ ហេតុនេះដោយមើលឃើញពីសារសំខាន់របស់ផលិតផលសរីរាង្គ ទើបយើងបង្កើតលើបញ្ហានេះ»។
ទន្ទឹមគ្នានេះដែរ ឯកអគ្គរដ្ឋទូតអាល្លឺម៉ង់ ប្រចាំកម្ពុជា លោក អោអាឃីម បារ៉ូន ហ្វន់ ម៉ាសាល់ (Joachim Baron von Marschall) យល់ថា មិនថាបន្លែ ឬផលិតផលក្លែងក្លាយ គឺបញ្ហាចម្បងដែលទាមទារឲ្យដោះស្រាយជាបន្ទាន់ ព្រោះវាមានហានិភ័យខ្ពស់ដល់សុខភាព និងសុវត្ថិភាពសង្គម ហេតុនេះ ការជួយជ្រោមជ្រែងរបស់អង្គការ GIZ នៃប្រទេសអាល្លឺម៉ង់នេះ នឹងជួយលើកទឹកចិត្តដល់ក្រុមកសិករផលិតបន្លែសរីរាង្គឲ្យបង្កើនការផលិតកាន់តែច្រើន។ ប៉ុន្តែលោកមិនបានបញ្ជាក់ច្បាស់លាស់ពីជំនួយឧបត្ថម្ភទីផ្សារសរីរាង្គនេះចំនួនប៉ុន្មានឡើយ។
ថ្លែងក្នុងពិធីសម្ពោធផ្សារបន្លែសរីរាង្គនេះដែរ ប្រធានគណៈកម្មាធិការប្រយុទ្ធប្រឆាំងផលិតផលក្លែងក្លាយនៃក្រសួងមហាផ្ទៃ លោក មៀច សុផាន់ណា មានប្រសាសន៍ថា ការលើកកម្ពស់សុខភាពប្រជាពលរដ្ឋ គឺជាទិសដៅសំខាន់មួយរបស់គណៈកម្មាធិការប្រយុទ្ធប្រឆាំងផលិតក្លែងក្លាយ។ លោករំពឹងថា ផ្សារសរីរាង្គទាំងពីរនេះ នឹងជួយផ្សព្វផ្សាយបង្កើនការយល់ដឹងរបស់ប្រជាពលរដ្ឋក្នុងការជៀសវាងប្រើប្រាស់ផលិតផលក្លែងក្លាយនៅកម្ពុជា៖ «បើកម្មវិធីបានជោគជ័យ ហើយបានផ្សព្វផ្សាយទៅកាន់ពលរដ្ឋទូទាំងប្រទេស វាចំណេញច្រើនណាស់ ឲ្យកសិករបង្កើនការផលិតច្រើន យើងអាចមានផលិតផលក្នុងស្រុក ហើយយើងមានស្លាកសញ្ញាសម្គាល់ផលិតផលរបស់យើងទៀត។ វានឹងអាចឲ្យយើងកាត់បន្ថយបន្លែនាំចូលបានច្រើន»។
មជ្ឈមណ្ឌលកសិកម្មធម្មជាតិ បង្កើតបានផ្សារសហករណ៍សរីរាង្គខ្មែរចំនួនបីកន្លែងរួចមកហើយនៅភ្នំពេញ។ ផ្សារផលិតផលកសិកម្មសរីរាង្គចំនួន២ ដែលទើបបង្កើតបន្ថែមទៀតនេះ និងជួយលើកកម្ពស់ជីវភាពគ្រួសារកសិករនៅក្នុងខេត្តចំនួនពីរ គឺខេត្តព្រះសីហនុ និងខេត្តកោះកុង។ ជាងនេះទៀត មជ្ឈមណ្ឌលកសិកម្មធម្មជាតិ ក៏មានមហិច្ឆតាបង្កើតផ្សារនេះឲ្យបានទូទាំងប្រទេសកម្ពុជា និងជំរុញការផលិតក្នុងស្រុកសំដៅនាំចេញទៅកាន់ទីផ្សារអន្តរជាតិផងដែរ៕