កម្ពុជាកំពុងសហការជាមួយឥណ្ឌូនេស៊ីនាំពលករខ្មែរ៥៨នាក់ធ្វើការលើទូកនេសាទថៃមកកម្ពុជា
2015.04.09
មន្ត្រីអ្នកនាំពាក្យក្រសួងការបរទេសកម្ពុជា លោក កុយ គួង ផ្ដល់បទសម្ភាសន៍ដល់អ្នកកាសែត នៅក្រសួងការបរទេសកម្ពុជា បន្ទាប់ពីជំនួបរវាងរដ្ឋមន្ត្រីក្រសួងការបរទេសកម្ពុជា លោក ហោ ណាំហុង ជាមួយឯកអគ្គរាជទូតថៃ ប្រចាំកម្ពុជា នៅថ្ងៃទី១៥ ខែមីនា ឆ្នាំ២០១១។
ក្រសួងការបរទេសកម្ពុជា កំពុងសហការជាមួយអាជ្ញាធរឥណ្ឌូនេស៊ី ដើម្បីនាំយកពលករខ្មែរធ្វើការលើទូកនេសាទថៃ ខុសច្បាប់ត្រឡប់មកកម្ពុជា វិញ។ កិច្ចសហការនេះ គឺបន្ទាប់ពីអាជ្ញាធរឥណ្ឌូនេស៊ី បានរកឃើញពលករបរទេសជាង ៣០០នាក់នៅលើកោះមួយក្នុងខេត្តម៉ូលុកស៍ (Moluccas) នៃប្រទេសឥណ្ឌូនេស៊ី ហើយក្នុងនោះក៏មានពលករខ្មែរចំនួន ៥៨នាក់ផងដែរ។
អ្នកនាំពាក្យក្រសួងការបរទេសកម្ពុជា លោក កុយ គួង ឲ្យដឹងនៅថ្ងៃទី៩ មេសា ថា មន្ត្រីស្ថានទូតកម្ពុជា ប្រចាំប្រទេសឥណ្ឌូនេស៊ី បានធ្វើដំណើរទៅកាន់កោះមួយក្នុងខេត្តម៉ូលុកស៍ ប្រទេសឥណ្ឌូនេស៊ី ដើម្បីទៅជួបពលករខ្មែរចំនួន ៥៨នាក់ ដែលអាជ្ញាធរឥណ្ឌូនេស៊ី បានអះអាងថា ពួកគេជាជនជាតិខ្មែរ។ លោក កុយ គួង បញ្ជាក់ថា ការចុះពិនិត្យនោះ គឺដើម្បីបញ្ជាក់ឲ្យច្បាស់ថា តើពួកគេជាពលករខ្មែរឬក៏យ៉ាងណា?
លោក កុយ គួង អះអាងថា ប្រសិនបើរកឃើញថា ពួកគេជាពលរដ្ឋខ្មែរពិតប្រាកដមែន មន្ត្រីស្ថានទូតខ្មែរនៅទីនោះ នឹងសហការជាមួយអាជ្ញាធរពាក់ព័ន្ធរបស់ឥណ្ឌូនេស៊ី ព្រមទាំងជាមួយអង្គការអន្តរជាតិផ្សេងៗ ដើម្បីបញ្ជូនពួកគេត្រឡប់មកប្រទេសកម្ពុជា វិញឲ្យបានឆាប់រហ័សបំផុត៖ «បើតាមព័ត៌មានគេផ្តល់ឲ្យមានពលកររាប់រយនាក់ ក្នុងនោះមានពលករខ្មែរ ៥៨នាក់ ត្រូវបានគេជួញដូរខុសច្បាប់នៅតំបន់នោះ ហើយត្រូវបានអាជ្ញាធរឥណ្ឌូនេស៊ី ឃាត់ទុកទាំងអស់ ហើយគេបានរាយការណ៍មកយើង។ ជារួមខាងឥណ្ឌូនេស៊ី គេចាត់ទុកពួកគាត់ជាជនរងគ្រោះ។ គេនឹងយកចិត្តទុកដាក់ ហើយមានអង្គការអន្តរជាតិ ក៏គេខិតខំជួយយកចិត្តទុកដាក់ពួកគាត់ដែរ»។
យ៉ាងណាក៏ដោយ លោក កុយ គួង បញ្ជាក់ថា រហូតមកទល់ពេលនេះ លោកពុំទាន់ទទួលបានព័ត៌មានអំពីលទ្ធផលនៃការចុះត្រួតពិនិត្យនេះនៅឡើយទេ ដោយលោកថា លោកពុំទាន់អាចទាក់ទងមន្ត្រីខ្មែរដែលកំពុងចុះពិនិត្យនោះបាន ព្រោះតែតំបន់ដែលពលករខ្មែរកំពុងឋិតនៅនោះ ទូរស័ព្ទពុំសូវមានសេវា។
បណ្ដាញសារព័ត៌មានបរទេស អាស៊ី ញូវ (Asia News) រាយការណ៍ពីខេត្តម៉ូលុកស៍ ប្រទេសឥណ្ឌូនេស៊ី កាលពីថ្ងៃទី៨ មេសា ថា ពលករខ្មែរចំនួន ៥៨នាក់ ព្រមទាំងពលករបរទេសជាង ២៥០នាក់ផ្សេងទៀត ត្រូវបានអាជ្ញាធរប្រទេសឥណ្ឌូនេស៊ី រកឃើញកាលពីពេលថ្មីៗនេះនៅលើកោះ បែនជីណា (Benjina) ក្នុងខេត្តម៉ូលុកស៍។ ពួកគេត្រូវបានគេចាក់សោឲ្យឋិតនៅក្នុងទ្រុង ហើយខ្លះទៀតបានព្យាយាមលាក់ខ្លួនក្នុងព្រៃលើកោះ ដើម្បីគេចពីការធ្វើបាបពីសំណាក់ម្ចាស់ទូកនេសាទ។ អាស៊ី ញូវ (Asia News) រាយការណ៍ថា ពលករទាំងអស់នោះត្រូវបានគេធ្វើបាប រំលោភបំពាន និងបង្ខំឲ្យធ្វើការដូចទាសករ។
កាលពីថ្ងៃទី៥ ខែមេសា ពលករខ្មែររងគ្រោះដោយសារការរំលោភសិទ្ធិការងារនៅលើទូកនេសាទថៃ ចំនួន ១៩នាក់ ក៏ត្រូវស្ថានទូតកម្ពុជា ប្រចាំប្រទេសឥណ្ឌូនេស៊ី បញ្ជូនមកកម្ពុជា វិញ។
ក្រសួងការបរទេសកម្ពុជា ឲ្យដឹងថា ពលកររងគ្រោះទាំងនោះត្រូវបានមេខ្យល់នាំយកទៅធ្វើការដោយខុសច្បាប់លើទូកនេសាទថៃ។ ពួកគេត្រូវបានស្ថានទូតកម្ពុជា ប្រចាំប្រទេសឥណ្ឌូនេស៊ី និងអាជ្ញាធរឥណ្ឌូនេស៊ី សហការជួយសង្គ្រោះនៅពេលទូកនេសាទថៃ ចូលនេសាទខុសច្បាប់លើដែនទឹករបស់ប្រទេសឥណ្ឌូនេស៊ី។
សម្រាប់ពលករខ្មែរ ៥៨នាក់នៅពេលនេះ លោក កុយ គួង សន្និដ្ឋានថា ពួកគេអាចចាញ់បោកមេខ្យល់នាំយកទៅធ្វើការនៅប្រទេសថៃ ព្រោះលោកថាកន្លងមក ធ្លាប់មានមេខ្យល់បោកប្រាស់ពលករថា នាំពួកគេទៅធ្វើការជាងសំណង់ ឬធ្វើការក្នុងចម្ការដាំដុះនៅប្រទេសថៃ ប៉ុន្តែពេលទៅដល់ទីនោះ ពួកគេត្រូវបានមេខ្យល់ប្រើល្បិចនាំយកទៅធ្វើការនៅលើទូកនេសាទថៃ ទៅវិញ។ យ៉ាងណាក៏ដោយ លោកថា អាជ្ញាធរនឹងសាកសួរពលករ ដើម្បីស្វែងរកមុខមេខ្យល់ដែលបានបោកបញ្ឆោតពួកគេ នៅពេលពលករទាំងនោះវិលមកដល់ប្រទេសកម្ពុជា វិញ។
របាយការណ៍ក្រសួងមហាផ្ទៃ បង្ហាញថា ក្នុងឆ្នាំ២០១៤ ជនរងគ្រោះដោយសារការជួញដូរភេទ ជួញដូរមនុស្ស និងជួញដូរពលកម្មមានទាំងអស់ ៤១២នាក់ ក្នុងនោះសមត្ថកិច្ចបានបង្ក្រាបចំនួន ៩៥ករណី ហើយចាប់បានជនប្រព្រឹត្តិការជួញដូរចំនួន ១២៧នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
