ពលរដ្ឋមួយគ្រួសារនៅកំពង់ឆ្នាំងបារម្ភពីការតាមសម្លាប់ក្នុងរឿងគំនុំ
2016.12.15
ផែនទីខេត្តកំពង់ឆ្នាំង។
Photo: RFA
ពលរដ្ឋមួយគ្រួសាររស់នៅឃុំច្រេស ស្រុកកំពង់ត្រឡាច ខេត្តកំពង់ឆ្នាំង បារម្ភពីសុវត្ថិភាពផ្ទាល់ខ្លួន ក្រោយគ្រួសារជនជាតិចាម មួយគ្រួសារគំរាមសម្លាប់ និងបង្កបញ្ហាជាបន្តបន្ទាប់។ ប៉ុន្តែគ្រួសារជនជាតិចាម បានប្ដឹងចោទគ្រួសារខ្មែរថា បានប្រើហិង្សាបង្ករបួសស្នាមលើខ្លួនកាលពីថ្ងៃទី១៣ ខែធ្នូ ហើយនគរបាលយុត្តិធម៌កំពុងស៊ើបអង្កេតបន្ថែមជុំវិញករណីនេះ។
គំនុំរឿងរកស៊ីរត់ឡានដឹកកម្មកររោងចក្រ និងបង្កើតកំពង់ចម្លងក្បែរគ្នារវាងគ្រួសារជនជាតិចាម និងខ្មែរ បានក្លាយជាការវាយតប់គ្នា ហើយប្ដឹងគ្នាទៅតុលាការ និងសមត្ថកិច្ចពាក់ព័ន្ធ។
សមាជិកគ្រួសារខ្មែរម្នាក់រស់នៅភូមិដកស្និត ឃុំច្រេស លោក ផុន សារ៉ាត់ ឲ្យដឹងនៅថ្ងៃទី១៥ ខែធ្នូ ថា កូនប្រុសរបស់លោក លី អូស្មាន់ ឈ្មោះ លី រ៉ាហ្វាត់ ធ្លាប់ប្រើកាំភ្លើងខ្លីបាញ់ប្អូនប្រុសលោកឈ្មោះ ផុន សារិន កាលពីម៉ោងជិត ៧ព្រឹក ថ្ងៃទី២០ ខែសីហា ឆ្នាំ២០១៦ ប៉ុន្តែបាញ់ចំបញ្ឆិតដៃអាវ ហើយរឿងរ៉ាវនេះបានប្ដឹងដល់តុលាការ ហើយមិនទាន់រកឃើញយុត្តិធម៌។ លុះមកដល់ថ្ងៃទី១៣ ខែធ្នូ គ្រួសារលោក អូស្មាន់ និងកម្មករ បានបង្ករឿងដោយបើកសាឡាងបុកពីក្រោយសាឡាងលោក ទើបមានរឿងឈ្លោះប្រកែកគ្នា និងឈានដល់ការប្រើដំបងវាយគ្នាទៅវិញទៅមកបណ្ដាលឲ្យរបួសទាំងសងខាង។
លោក ផុន សារ៉ាត់ បន្ថែមថា ក្រៅពីរឿងរ៉ាវនេះ កូនប្រុសច្បងរបស់លោក លី អូស្មាន់ ឈ្មោះ លី ខ្លឹង ធ្លាប់បើកឡានកៀរឡានលោកដែលកំពុងដឹកកម្មករចំនួនបីលើក បន្ទាប់ពីគ្រួសារលោក លី អូស្មាន់ ចោលសម្ដីថា នឹងសម្លាប់សមាជិកគ្រួសារលោកឲ្យបានពីរ ឬបីនាក់ មុននឹងគេឡើងចុះប្ដឹងផ្ដល់គ្នានៅតុលាការ។ ការព្យាបាទទាំងនេះបានធ្វើឲ្យលោកបារម្ភពីសុវត្ថិភាពផ្ទាល់ខ្លួន និងកម្មករ៖ «គ្រួសារខ្ញុំត្រូវគេតាមសម្លាប់មួយគ្រួសារ ខ្ញុំក៏ពិបាកក្នុងការរស់នៅ ហើយមានប៉ះពាល់ដល់អ្នករោងចក្រ។ ក្នុងចំណោមអ្នករោងចក្រនៅក្នុងឡានខ្ញុំវាមាន ២០០នាក់ជាងហើយ បើនៅខាងគេណោះមានជាង ១០០នាក់ អ៊ីចឹងខ្លាចពេលប៉ះពៀរគ្នាទៅខ្លាចមានគ្រោះថ្នាក់ដល់កម្មកររោងចក្រ និងគ្រួសារខ្ញុំ។ ខ្ញុំអំពាវនាវឲ្យក្រសួងគ្រប់ជាន់ថ្នាក់ហ្នឹងជួយដោះស្រាយឲ្យបានលឿនបន្តិចទៅ»។
អាស៊ីសេរី មិនអាចរកប្រភពទាក់ទងគ្រួសារលោក លី អូស្មាន់ ដើម្បីសុំការបំភ្លឺជុំវិញការចោទប្រកាន់នេះបានទេ នៅថ្ងៃទី១៥ ខែធ្នូ។ ប៉ុន្តែស្នងការនគរបាលខេត្តកំពង់ឆ្នាំង លោក ឡុច សុវណ្ណារ៉ា បញ្ជាក់ថា បច្ចុប្បន្នគ្រួសារលោក អូស្មាន់ បានប្ដឹងភាគីម្ខាងទៀតថា បានប្រើហិង្សាបង្ករបួសស្នាមបណ្ដាលឲ្យបាត់បង់ទ្រព្យសម្បត្តិមួយចំនួន ហើយសមត្ថកិច្ចកំពុងចុះស្រាវជ្រាវរឿងនេះបន្ថែម៖ «នេះកំពុងទៅស្រាវជ្រាវ ដោយសារមានបណ្ដឹងហើយយើងត្រូវធ្វើការស្រាវជ្រាវបន្ថែមទៀត ដើម្បីឲ្យគ្រប់ទៅតាមបច្ចេកទេស អ៊ីចឹងអត់ទាន់ដឹងថា យ៉ាងម៉េចនៅឡើយទេ ព្រោះទទួលពាក្យបណ្ដឹងភាគីម្ខាង តែភាគីម្ខាងទៀតមិនទាន់មកដល់។ រឿងអស់នេះ ខាងប៉ូលិសយើងគ្រាន់ថា អ្នករៀបចំឯកសារ និងរបាយការណ៍អី ហើយសម្របសម្រួលគាត់ បើគាត់ព្រមព្រៀងគ្នាក៏ចប់ទៅ បើគាត់មិនព្រមបញ្ជូនទៅតុលាការ»។
អធិការនគរបាលស្រុកកំពង់ត្រឡាច លោក ម៉ាត់ លី ថាគ្រួសារទាំងពីរនេះមានរឿងនឹងគ្នាជាច្រើនឆ្នាំមកហើយ តែពួកគេមិនសូវគោរព ឬយកចិត្តទុកដាក់ចំពោះការសម្របសម្រួលរបស់សមត្ថកិច្ចទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
