ធនាគារ ANZ ផ្ដល់ប្រាក់២ម៉ឺនដុល្លារជួយលើកស្ទួយយុវជនក្រីក្រតាមរយៈការហាត់សិល្បៈ
2015.02.26
រយៈពេល ២០ឆ្នាំមកហើយ សមាគមហ្វារពន្លឺសិល្បៈ ដែលជាអង្គការមិនរកកម្រៃ បានកើតឡើងនៅខេត្តបាត់ដំបង ដើម្បីជួយកុមារ និងយុវជនក្រីក្រឲ្យមានឱកាសរៀនសូត្រ ព្រមទាំងមានជំនាញផ្នែកគំនូរ សិល្បៈ តូរ្យតន្ត្រី និងការសម្ដែងសៀក ជាដើម។
រហូតមកដល់បច្ចុប្បន្ន សមាគមហ្វារពន្លឺសិល្បៈ បានពង្រីកខ្លួនទៅជាសហគ្រាសសង្គមហ្វារមួយទៀតនៅក្នុងខេត្តសៀមរាប ដើម្បីជួយលើកស្ទួយការរស់នៅរបស់យុវជន និងកុមារក្រីក្រឲ្យកាន់ប្រសើរឡើង។ គម្រោងថ្មីនៅក្នុងខេត្តសៀមរាប កំពុងធ្វើឲ្យម្ចាស់ជំនួយខ្លះមានការចាប់អារម្មណ៍ និងគាំទ្រ។
ធនាគារ អេ.អិន.ហ្សិត រ៉ូយ៉ាល់ (ANZ Royal) នៅក្នុងប្រទេសកម្ពុជា បានប្រកាសផ្ដល់កញ្ចប់ទឹកប្រាក់ចំនួន ២ម៉ឺនដុល្លារអាមេរិក ទៅឲ្យសហគ្រាសសង្គមហ្វារ កាលពីថ្ងៃទី១៩ ខែកុម្ភៈ កន្លងទៅ។ ការផ្ដល់ថវិកានេះ គឺក្នុងគោលបំណងចូលរួមចំណែកបង្កើនការអប់រំទៅដល់យុវជន និងកុមារក្រីក្រខ្មែរឲ្យមាននិរន្តរភាព។
នាយកប្រតិបត្តិនៃសហគ្រាសសង្គមហ្វារ គឺលោក ហួត តារា។ លោកថ្លែងនៅក្នុងពិធីទទួលកញ្ចប់ប្រាក់ ២ម៉ឺនដុល្លារនោះថា សហគ្រាសសង្គមហ្វារ មានទស្សនវិស័យលើគំនិតច្នៃប្រឌិតសិល្បៈដែលគ្រប់គ្នាប្រដូចទៅនឹងទ្រព្យសម្បត្តិដ៏មានតម្លៃ សម្រាប់ការអភិវឌ្ឍសង្គម និងសេដ្ឋកិច្ចឲ្យមានការរីកចម្រើន និងរស់រវើក។ លោក ហួត តារា បញ្ជាក់ថា ថ្វីត្បិតតែជំនួយទឹកប្រាក់ ២ម៉ឺនដុល្លារ គឺជាចំនួនតិចតួច ប៉ុន្តែវាមានសារសំខាន់ក្នុងការជួយបង្កើតការងារឲ្យប្រជាពលរដ្ឋនៅក្នុងតំបន់ និងអាចជួយពង្រឹងអត្តសញ្ញាណវប្បធម៌ខ្មែរបាន។
លោក ហួត តារា ឲ្យដឹងថា លោកនឹងយកប្រាក់ ២ម៉ឺនដុល្លារនេះទៅបង្រៀនសិល្បៈសៀក ដល់យុវជន និងកុមារក្រីក្រ ព្រមទាំងអញ្ជើញកុមារកំព្រាពីតាមអង្គការផ្សេងៗនៅខេត្តសៀមរាប ឲ្យមកទស្សនាដោយឥតគិតថ្លៃ ដើម្បីធ្វើឲ្យពួកគេចាប់អារម្មណ៍ទៅលើការកែប្រែជីវិតរស់នៅ។ គម្រោងទឹកប្រាក់នេះ ក៏នឹងសហការដៃគូជាមួយសាលាបៃ (SALA BAI) ដើម្បីបង្រៀនសិល្បករសៀក និងយុវជនទាំងឡាយ ឲ្យចេះពីរបៀបសន្សំប្រាក់នៅពេលដែលគាត់មានការងារធ្វើ និងខ្លះទៀតយកទៅរៀបចំការសម្ដែងមហោស្រពសៀកអន្តរជាតិ ដែលនឹងប្រព្រឹត្តទៅនៅខែឧសភា ខាងមុខ៖ «ដើម្បីឲ្យគាត់យល់ថា សិល្បករហ្វារពន្លឺសិល្បៈដែលសម្ដែងថ្ងៃនេះ គឺធ្លាប់ជាកុមារដែលធ្លាប់ឆ្លងកាត់ការពិបាកពីមុនមក គាត់ធ្លាប់ជាអ្នករើសសំរាមតាមផ្លូវក៏មាន គាត់ធ្លាប់ជាកុមារកំព្រា ប៉ុន្តែថ្ងៃនេះគាត់ជាសិល្បករដែលមានការទុកចិត្តខ្លួនឯងខ្លាំង»។
លោក ហួត តារា ឲ្យដឹងថា ក្នុង១ឆ្នាំៗសមាគមហ្វារពន្លឺសិល្បៈ បានចំណាយប្រាក់ប្រមាណ ១លានដុល្លារកន្លះ ដើម្បីទ្រទ្រង់គម្រោងបណ្ដុះបណ្ដាលជំនាញសិល្បៈសៀក តូរ្យតន្ត្រី ការសិក្សារៀនសូត្រ និងជំនាញគំនូរ ទៅដល់យុវជន និងកុមារមកពីគ្រួសារក្រីក្រ។
តំណាងធនាគារ អេ.អិន.ហ្សិត លោក នុកឃី ហ្គ្រេនធ៍ (Knuckey Grant) មានប្រសាសន៍ថា ជំនួយទឹកប្រាក់ ២ម៉ឺនដុល្លារនេះ មិនមែនធំដុំទេ ក៏ប៉ុន្តែវាគឺជាទឹកចិត្តដែលធនាគារ អេ.អិន.ហ្សិត ចូលរួមយកចិត្តទុកដាក់ទៅលើការអប់រំយុវជន និងកុមារក្រីក្រខ្មែរ៖ «សម្រាប់ធនាគារ អេ.អិន.ហ្សិត បានផ្ដោតការយកចិត្តទុកដាក់ទៅលើមូលដ្ឋានគ្រឹះនៃការអប់រំ ដែលមិនត្រឹមតែនៅក្នុងប្រទេសកម្ពុជា ប៉ុណ្ណោះទេ គឺនៅក្នុងពិភពលោកទាំងមូល។ ខ្ញុំយល់ថា ការអប់រំចំណេះដឹង និងផ្នែកសិល្បៈប្រពៃណីក្នុងប្រទេសកម្ពុជា គឺជាកត្តាដ៏សំខាន់។ ដូច្នេះហើយបានជាយើងសម្លឹងមើលទៅសហគ្រាសសង្គមហ្វារ ជុំវិញគម្រោងនេះ»។
អង្គការក្រៅរដ្ឋាភិបាលមួយឈ្មោះសាលាបៃ (Sala Bai) ដែលកំពុងជួយបង្ហាត់បង្រៀនយុវជនក្រីក្រខ្មែរឲ្យចេះជំនាញចុងភៅ ជំនាញសណ្ឋាគារ និងគ្រប់គ្រង នៅក្នុងខេត្តសៀមរាប ក៏ទទួលស្គាល់ថា ការជួយលើកស្ទួយយុវជន និងកុមារក្រីក្រខ្មែរ ឲ្យមានការងារធ្វើក្នុងសង្គម គឺជាគោលបំណងដ៏សំខាន់បំផុត។
ប្រធានផ្នែកទំនាក់ទំនងរបស់អង្គការ សាលាបៃ កញ្ញា មេយែល បាប៊ីយែរ (Mayelle Barbier) ដែលជាដៃគូជាមួយសហគ្រាសសង្គមហ្វារ មានប្រសាសន៍ថា សាលាបៃ នឹងជួយរៀបចំឲ្យមានសិក្ខាសាលាស្ដីអំពីការចាត់ចែង និងទុកដាក់លុយកាក់ទៅដល់យុវជនក្រីក្រទាំងឡាយ ដែលមានការធ្វើឲ្យចេះសន្សំលុយកាក់។ ការឲ្យយុវជនក្រីក្រចេះសន្សំទុកលុយកាក់ គឺជាការប្រសើរណាស់ ដើម្បីឲ្យគេមានលទ្ធភាពកាន់តែច្រើនឡើងៗជួយដល់ក្រុមគ្រួសារ និងខ្លួនឯង។
សហគ្រាសសង្គមហ្វារ គឺជាផ្នែកមួយនៃសមាគមហ្វារពន្លឺសិល្បៈ ដែលបង្កើតឡើងតាំងពីអំឡុងឆ្នាំ១៩៩៦ នៅក្នុងខេត្តបាត់ដំបង ដើម្បីជួយបង្រៀនកុមារក្រីក្រទាំងអក្សរសាស្ត្រជាតិ ការសម្ដែងសៀក តូរ្យតន្ត្រី និងគូរគំនូរ ជាដើម។
បច្ចុប្បន្ន នៅក្នុងសមាគមហ្វារពន្លឺសិល្បៈ ខេត្តបាត់ដំបង គឺមានយុវជន និងកុមារក្រីក្រប្រមាណជាង ១.២០០នាក់ បានចូលទៅរៀនអក្សរ និងជំនាញជាច្រើនទៀតក្នុង១ថ្ងៃៗ។ សមាគមនេះ បានផ្លាស់ប្ដូរខ្សែជីវិតកុមារក្រីក្រជាច្រើន ឲ្យប្រែក្លាយទៅជាអ្នកមានជំនាញ និងអាជីពប្រសើរឡើង។
កញ្ញា ពិន ភូណាំ ដែលបច្ចុប្បន្នបានក្លាយទៅជាអ្នកចេះសម្ដែងសៀកយ៉ាងស្ទាត់ជំនាញ ឲ្យដឹងថា កាលពីកុមារភាព គឺនាងរស់នៅក្នុងគ្រួសារក្រីក្រមួយ ដែលឪពុកចូលចិត្តសេពគ្រឿងស្រវឹង និងឧស្សាហ៍ឈ្លោះប្រកែកគ្នាជាមួយម្ដាយ។ កាលពីអាយុ ៧ឆ្នាំ រូបនាង និងប្អូនស្រី តែងនាំគ្នាដើររើសអេតចាយយកទៅលក់បានប្រាក់យកមកផ្គត់ផ្គង់គ្រួសារ និងរៀនសូត្រ។ ប៉ុន្តែ ជីវិតរបស់នាងបានផ្លាស់ប្ដូរទាំងស្រុង បន្ទាប់ពីបានចូលរៀន និងហាត់សម្ដែងសៀកនៅក្នុងសមាគមហ្វារពន្លឺសិល្បៈ មក៖ «សាលាហ្វារជាកន្លែងមួយដែលអប់រំយើងទាំងផ្លូវកាយ ផ្លូវចិត្ត និងជីវិតរស់នៅ។ តាមរយៈហ្វារ តាមរយៈការរៀនសូត្ររបស់ខ្ញុំ ជាពិសេសគឺជំនាញសិល្បៈដែលធ្វើឲ្យខ្ញុំផ្លាស់ប្ដូរពីក្មេងរើសអេតចាយតាមផ្លូវ ក្លាយទៅជាអ្នកសម្ដែង»។
នាយកប្រតិបត្តិសហគ្រាសសង្គមហ្វារ បង្ហាញទស្សនៈយល់ឃើញថា បច្ចុប្បន្នក្រុមសិល្បៈសៀកដែលតែងសម្ដែងដោយមានបង្កប់សារ ធ្វើឲ្យអ្នកទស្សនាអាចសើចសប្បាយ អាចយំ និងឲ្យចងចាំគន្លឹះខ្លះៗផងនោះ មិនមែនត្រឹមតែជាការបង្កើតការងារ ដើម្បីជួយដល់យុវជនឲ្យទទួលបានកម្រៃប៉ុណ្ណោះទេ ក៏ប៉ុន្តែវាក៏ជាឧបករណ៍សំខាន់សម្រាប់ការផ្លាស់ប្ដូរសង្គម និងការអប់រំផងដែរ៕