ព្រះសង្ឃនិងពលរដ្ឋស្នើអភិបាលខេត្តព្រះសីហនុពិនិត្យសកម្មភាពព្រះចៅអធិការវត្តលើ
2015.04.17
ព្រះចៅអធិការវត្តលើ ព្រះនាម គៀត ចន្ទធុច (រូបឆ្វេង) នៅថ្ងៃទទួលតំណែងជាព្រះមេគណខេត្តព្រះសីហនុ កាលពីថ្ងៃទី១៧ ខែមិថុនា ឆ្នាំ២០១៣។
ប្រជាពុទ្ធបរិស័ទចំណុះជើងវត្តជោតញាណ ហៅវត្តលើ និងព្រះសង្ឃមួយចំនួនគង់ក្នុងវត្តនេះ បានស្នើឲ្យអភិបាលខេត្តព្រះសីហនុ និងមន្ត្រីស្ថាប័នពាក់ព័ន្ធ ឲ្យចុះអង្កេតចំពោះសកម្មភាព របស់ព្រះចៅអធិការវត្តលើ ព្រះនាម គៀត ចន្ទធុច ដោយចោទព្រះចៅអធិការអង្គនេះ ថាបានប្រព្រឹត្តិ ឬធ្វើសកម្មភាពប្រាសចាកពីធម៌វិន័យព្រះសង្ឃ ឬព្រះពុទ្ធសាសនាធ្ងន់ធ្ងរ។
បញ្ហានេះថ្នាក់ដឹកនាំ និងស្នងការនគរបាលខេត្តព្រះសីហនុ បានដឹងឮរួចហើយៗ បានបញ្ជាក់ថា កំពុងតាមដានសកម្មភាពព្រះចៅអធិការអង្គនេះ និងឈានដល់មានវិធានការតាមផ្លូវច្បាប់ បើរកឃើញកំហុសឆ្គងដូចការចោទមែននោះ។
ព្រះសង្ឃគង់នៅវត្តជោតញាណ ហៅវត្តលើ និងប្រជាពលរដ្ឋចំណុះជើងវត្តនេះ ស្នើមិនបង្ហាញអត្តសញ្ញាណមួយចំនួន បានចោទព្រះចៅអធិការ គៀត ចន្ទធុច ថាបានឆាន់គ្រឿងស្រវឹង ឬនៅពេលស្រវឹងស្រាម្ដងៗ តែងបានប្រើថេរៈដីកា(សម្ដី)ប្រមាថ មិនសមរម្យទៅលើព្រះសង្ឃក្រោមឱវាទ និងមានពេលខ្លះបានយកកាំភ្លើងខ្លីមកគំរាមព្រះសង្ឃមួយចំនួនគង់ក្នុងវត្តនេះថែមទៀត។
ព្រះសង្ឃ និងប្រជាពលរដ្ឋចំណុះជើងវត្តលើមួយចំនួន បានឲ្យវិទ្យុអាស៊ីសេរី ដឹងថា នៅមុនប៉ុន្មានថ្ងៃ នៃពិធីបុណ្យចូលឆ្នាំថ្មីចូលមកដល់ ចៅអធិការ ព្រះនាម គៀត ចន្ទធុច បានឆាន់ស្រាស្រវឹង និងបានចាក់ធុងបាសក្នុងសំឡេងខ្លាំងៗ ព្រមទាំងបានបណ្ដេញព្រះសង្ឃ ខ្លះចេញពីវត្តនេះថែមទៀត។
ផ្ដើមពីបញ្ហានេះ ព្រះសង្ឃ និងប្រជាពលរដ្ឋ បរិស័ទវត្តលើ ដែលដឹងឮរឿងនេះ បានសំណូមពរដល់លោក ឈិត សុខុន អភិបាលខេត្តព្រះសីហនុ និងសមត្ថកិច្ចស្ថាប័នពាក់ព័ន្ធជួយអង្កេតចំពោះសកម្មភាព របស់ព្រះចៅអធិការវត្តលើឲ្យបានត្រឹមត្រូវ និងឈានដល់មានវិធានការតាមផ្លូវច្បាប់ ព្រោះសកម្មភាព របស់ព្រះចៅអធិការ គៀត ចន្ទធុច ធ្លាប់បានប្រព្រឹត្តិល្មើសពីវិន័យព្រះពុទ្ធសាសនាជាច្រើនលើកច្រើនសារកន្លងមកហើយ។
ទាក់ទិនបញ្ហានេះ លោក ឈិត សុខុន អភិបាលខេត្តព្រះសីហនុ មានប្រសាសន៍ថា រូបលោក និងសមត្ថកិច្ចខេត្តនេះ កំពុងអង្កេតទៅលើសកម្មភាព របស់ព្រះចៅអធិការវត្តលើ ព្រះនាម គៀត ចន្ទធុច ដែលព្រះសង្ឃ និងប្រជាពុទ្ធបរិស័ទចំណុះជើងវត្តនេះ បានចោទថា ឆាន់ស្រា ឬប៊ីយែរ និងមានអាវុធខ្លីប្រើប្រាស់នេះហើយ។ ប៉ុន្តែមិនទាន់រកឃើញកំហុសឆ្គងដូចការចោទនៅឡើយទេ។
លោក ឈិត សុខុន សង្កត់ធ្ងន់ថា បើពិតជារកឃើញកំហុសឆ្គងដូចការចោទប្រកាន់ពិតមែន ព្រះសង្ឃនាម គៀត ចន្ទធុច នឹងត្រូវប្រឈមមុខច្បាប់។
ចំណែក លោក ជួន ណារិន ស្នងការនគរបាលខេត្តព្រះសីហនុ ដែលទើបចូលកាន់តំណែងថ្មី បញ្ជាក់ថា ក្រោយពេលទទួលបានដំណឹងបញ្ហាកើតមាននៅវត្តលើ រូបលោកបានបញ្ជាឲ្យមន្ត្រីក្រោមឱវាទចុះអង្កេត និងតាមដានសកម្មភាព របស់ ព្រះចៅអធិការ គៀត ចន្ទធុច ប៉ុន្តែរកមិនឃើញកំហុសឆ្គងដូចការចោទទេ។ យ៉ាងណាលោកថា បើរកឃើញកំហុសឆ្គងដូចការចោទមែននោះ កម្លាំងសមត្ថកិច្ចលោក នឹងចាត់វិធានការតាមផ្លូវច្បាប់។
ទាក់ទិនការចោទនេះវិទ្យុអាស៊ីសេរី បានព្យាយាមសុំការបំភ្លឺ ពីព្រះចៅអធិការវត្តលើ ព្រះនាម គៀត ចន្ទធុច ដោយផ្ទាល់ដល់ទីអារាម និងតាមទូរស័ព្ទ ប៉ុន្តែមិនអាចទាក់ទងបានទេ។
ប្រជាពុទ្ធបរិស័ទចំណុះជើងវត្តលើ បានឲ្យដឹងថា នៅថ្ងៃដំបូង និងថ្ងៃទី២ នៃពិធីបុណ្យចូលឆ្នាំថ្មីឆ្នាំនេះ មិនសូវឃើញមានមនុស្សយកចង្ហាន់ទៅប្រគេនព្រះសង្ឃ ច្រើនកុះករដូចបណ្ដាឆ្នាំមុនៗទេ។
ហើយការធ្លាក់ចុះចំនួនមនុស្សទៅធ្វើបុណ្យនៅវត្ត ពលរដ្ឋមានចម្ងល់ថា មិនដឹងជាបណ្ដាលមកពីមូលហេតុអ្វីទេ ឬមួយអាចជាថ្ងៃដំបូង នៃពិធីបុណ្យចូលឆ្នាំ ទើបមិនសូវមានមនុស្សទៅធ្វើបុណ្យនៅវត្តលើ។
ទោះយ៉ាងណា មន្ត្រីរាជការបម្រើការងារនៅតាមមន្ទីរ ឬស្ថាប័នមួយចំនួន នាខេត្តព្រះសីហនុ ក៏បានស្នើដល់ស្ថាប័នពាក់ព័ន្ធ ឲ្យចុះអង្កេតទៅលើសកម្មភាពរបស់ ព្រះសង្ឃ គៀត ចន្ធធុច ដូចប្រជាពលរដ្ឋលើកឡើងដែរ ដើម្បីកុំឲ្យប៉ះពាល់ដល់វិស័យព្រះពុទ្ធសាសនាធ្ងន់ធ្ងរនាថ្ងៃអនាគត។
មន្ត្រីរាជការមួយចំនួន បានអះអាងថា កន្លងមកព្រះចៅអធិការវត្តលើ ព្រះនាម គៀត ចន្ទធុច ពិតជាបានប្រព្រឹត្តិខុសធម៌វិន័យព្រះពុទ្ធសាសនា ឬមានឆាន់ស្រាជាប្រចាំថ្ងៃពិតមែន។ ហើយថា សកម្មភាពមិនប្រក្រតី របស់ព្រះសង្ឃអង្គនេះ មិនឃើញមានសមត្ថកិច្ចពាក់ព័ន្ធមានវិធានការតាមផ្លូវច្បាប់ទេ ព្រោះទំនងជាសមត្ថកិច្ចស្ថាប័នពាក់ព័ន្ធ មិនហ៊ានអនុវត្តច្បាប់ ឬយល់ថា ព្រះសង្ឃ គៀត ចន្ទធុច មានខ្សែស្រឡាយអ្នកធំ កាងការពារ ឬមានសាច់ញាតិកំពុងបម្រើការងារក្នុងជួរថ្នាក់ដឹកនាំខេត្តព្រះសីហនុសព្វថ្ងៃនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
