ក្រុមហ៊ុនរបស់ឧកញ៉ា គិត ម៉េង ស្នើស្ថាប័នរដ្ឋអនុវត្តការងារឲ្យមានការឯកភាពគ្នា
2016.01.23
សកម្មភាពក្រុមហ៊ុន រ៉ូយ៉ាល់ ហ្គ្រុប (Royal Group Koh Rong Development Company) សាងសង់ផែថ្មទូកដឹកភ្ញៀវទេសចរនាឆ្នេរអូរត្រេះ ស្ថិតនៅភូមិ៦ សង្កាត់៤ ក្រុងព្រះសីហនុ នៅថ្ងៃទី២១ ខែមករា ឆ្នាំ២០១៦។
RFA/Den Ayuthyea
ក្រុមហ៊ុនរ៉ូយ៉ាល់ ហ្គ្រុប (Royal Group) របស់ឧកញ៉ា គិត ម៉េង ស្នើទៅថ្នាក់ដឹកនាំក្រសួងស្ថាប័ន ពិចារណាថ្លឹងថ្លែង មុននឹងធ្វើសេចក្ដីជូនដំណឹងបន្ថែមណាមួយ ដែលបង្កើតការភ័ន្តច្រឡំក្នុងចំណោមអ្នកអនុវត្តច្បាប់។ សំណើរបស់ ក្រុមហ៊ុន រ៉ូយ៉ាល់ ពេលនេះបន្ទាប់ពីគណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រ កាលពីថ្ងៃទី២០ ខែមករា បញ្ជាឲ្យរុះរើផែ នៅតាមបណ្ដោយឆ្នេរខ្សាច់ អូត្រេះ ខេត្តព្រះសីហនុ ដែលក្រុមហ៊ុននេះ សង់ដើម្បីដឹកផ្ទេរសម្ភារៈ ទៅកោះរ៉ុង។
លិខិតរបស់ក្រុមហ៊ុន រ៉ូយ៉ាល់ ហ្គ្រុប អះអាងថា ការសាងសង់ផែនេះ ព្រោះក្រុមហ៊ុនទទួលបានការអនុញ្ញាត ពីអតីតអភិបាលខេត្តព្រះសីហនុ កាលពីថ្ងៃខែកក្កដា ឆ្នាំ២០១៥ កន្លងទៅ។
ទាក់ទងរឿងនេះដែរ គណៈកម្មាធិការជាតិ គ្រប់គ្រង និងអភិវឌ្ឍតំបន់ឆ្នេរសមុទ្រ បានចេញលិខិតអញ្ជើញលោក គិត ម៉េង ប្រធានក្រុមហ៊ុន រ៉ូយ៉ាល់ ហ្គ្រុប ចូលរួមប្រជុំពិភាក្សាជ្រើសរើសវិធានការ និងទីតាំងសមស្របសាងសង់ផែ នៅតំបន់ឆ្នេរសមុទ្រខេត្តព្រះសីហនុ នៅថ្ងៃទី២៨ ខែមករា ខាងមុខ។
ប្រធានអង្គការស្រាវជ្រាវជាតិកម្ពុជា ហៅកាត់ថា ស៊ី.អិន.រ៉ូ (CNRO) សាខាខេត្តព្រះសីហនុ លោក សុខ សុខុម និយាយថា លិខិតរបស់ក្រុមហ៊ុនរ៉ូយ៉ាល់ ហាក់ផ្គើននឹងបទបញ្ជារបស់រដ្ឋាភិបាលដែលឲ្យរុះរើផែនោះចោល។ លោកបន្តថា ផែរបស់លោកឧកញ៉ា គិត ម៉េង គឺល្មើសទៅច្បាប់រដ្ឋធម្មនុញ្ញ ច្បាប់ភូមិបាល ព្រោះសំណង់នេះសាងសង់លើដីសាធារណៈរបស់រដ្ឋ៖ «ក្នុងនាមខ្ញុំជាសង្គមស៊ីវិលចង់ឃើញអាជ្ញាធរខេត្តអនុវត្តវិធានការតាមផ្លូវច្បាប់ មិនឲ្យក្រុមហ៊ុនសាងសង់រំលោភបំពាន់ដីរដ្ឋ កាលណាសាងសង់ប៉ះពាល់ឆ្នេរបណ្ដាលឲ្យបាត់បង់ឆ្នេរ បាត់បង់ទេសចរណ៍»។
ទោះជាមានបម្រាមពីរដ្ឋាភិបាលទៅហើយ កាលពីថ្ងៃទី២១ ខែមករា មន្ត្រីសង្គមស៊ីវិល និងមន្ត្រីរាជការខេត្តព្រះសីហនុ ថ្លែងថា ក្រុមហ៊ុន រ៉ូយ៉ាល់ ហ្គ្រុប របស់លោកឧកញ៉ា គិត ម៉េង នៅបន្តសកម្មភាពសាងសង់ផែថ្មមានទីតាំងនៅភូមិ៦ សង្កាត់៤ ក្រុងព្រះសីហនុដដែល។
អភិបាលខេត្តព្រះសីហនុ លោក យន្ត មីន ផ្ដល់បទសម្ភាសន៍ដល់អ្នកយកព័ត៌មានវិទ្យុអាស៊ីសេរី នៅព្រឹកថ្ងៃទី២១ ខែមករា ថា អាជ្ញាធរត្រៀមប្រជុំមន្ត្រីជំនាញនៅតាមស្ថាប័នពាក់ព័ន្ធនានា ក្នុងខេត្តនេះ ដើម្បីចុះបញ្ឈប់សកម្មភាពសាងសង់ឲ្យស្របតាមលិខិតរបស់រាជរដ្ឋាភិបាល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
