សហជីពកម្មករស្នើឲ្យអាជ្ញាធរទប់ស្កាត់តម្លៃរថយន្តឈ្នួលឲ្យមានប្រសិទ្ធភាពអំឡុងភ្ជុំបិណ្ឌ
2014.09.16
សហជីពកម្មករ និងក្រុមអង្គការសង្គមស៊ីវិល ដែលឃ្លាំមើលដំណើរការនៃការអនុវត្តច្បាប់ ស្នើសុំឲ្យអាជ្ញាធររាជធានីភ្នំពេញ ចាត់វិធានការប្រកបដោយប្រសិទ្ធភាព លើគោលនយោបាយបញ្ចុះតម្លៃរថយន្តឈ្នួលក្នុងពិធីបុណ្យកាន់បិណ្ឌភ្ជុំបិណ្ឌ។
តាមការឲ្យដឹងពីអ្នកបើករថយន្តឈ្នួល និងក្រុមហ៊ុនផ្តល់សេវាដឹកជញ្ជូន ឲ្យដឹងថា ពួកគេនឹងដំឡើងថ្លៃសេវាដឹកអ្នកដំណើរ ចាប់ពីចុងសប្ដាហ៍នេះ រហូតដល់ក្រោយពិធីបុណ្យភ្ជុំបិណ្ឌរួច។
ដូចរាល់ឆ្នាំដែរ សម្រាប់ឆ្នាំនេះ សាលារាជធានីភ្នំពេញ ព្យាយាមទប់ស្កាត់កុំឲ្យម្ចាស់ក្រុមហ៊ុន និងម្ចាស់រថយន្តដែលធ្វើអាជីវកម្មដឹកជញ្ជូនទាំងអស់ កុំឲ្យដំឡើងថ្លៃឈ្នួលរថយន្តពីអ្នកដំណើរពីភ្នំពេញ ទៅកាន់បណ្ដាខេត្តនានា ក្នុងឱកាសបុណ្យភ្ជុំបិណ្ឌនេះ។ ក៏ប៉ុន្តែ វិធានការរបស់សាលារាជធានីភ្នំពេញ ហាក់នៅមិនទាន់មានប្រសិទ្ធភាព ខណៈដែលម្ចាស់ក្រុមហ៊ុន និងរថយន្តដឹកអ្នកដំណើរខ្លះ បានត្រៀមដំឡើងថ្លៃរួចជាស្រេច។
ប្រធានសម្ព័ន្ធសហជីពចលនាកម្មករ លោក ប៉ាវ ស៊ីណា កត់សម្គាល់ថា នៅពេលរដូវបុណ្យទានធំៗរបស់ជាតិមកដល់ ដូចជាបុណ្យចូលឆ្នាំនិងបុណ្យភ្ជុំបិណ្ឌ ម្ចាស់រថយន្តឈ្នួលនិងអាជីវករ តែងដំឡើងឈ្នួលរថយន្តនិងទំនិញផ្សេងៗ ដែលធ្វើឲ្យកម្មករនិយោជិតជួបការលំបាក ទាំងការធ្វើដំណើរនិងទិញសម្ភារៈ ដោយសារពុំមានថវិកាគ្រប់គ្រាន់។
លោក ប៉ាវ ស៊ីណា អំពាវនាវឲ្យសាលារាជធានីភ្នំពេញ ជួយទប់ស្កាត់បញ្ហានេះ និងដើម្បីបង្កលក្ខណៈងាយស្រួលឲ្យកម្មករអាចធ្វើដំណើរទៅស្រុកកំណើតបានគ្រប់ៗគ្នា៖ «កាលណាតែបងប្អូនតៃកុងឡានឈ្នួលទាំងអស់ ឬអាជីវករទាំងអស់ធ្វើការដំឡើងថ្លៃវាធ្វើឲ្យគាត់ (កម្មករ) កាន់តែជួបប្រទះនឹងការចំណាយ ដូច្នេះហើយបានជាខ្ញុំសូមអំពាវនាវដោយទឹកចិត្ត ក្នុងនាមជាពលរដ្ឋខ្មែរដូចគ្នា សូមឲ្យគាត់មេត្តាយល់ដល់បងប្អូនកម្មករខ្មែរដោយសារតែគាត់កំពុងតែខ្វះខាត»។
ពិធីបុណ្យភ្ជុំបិណ្ឌនៅឆ្នាំនេះធ្វើឡើងចំថ្ងៃទី២២ ដល់ថ្ងៃទី២៤ កញ្ញា។ កម្មករនិយោជិតទាំងអស់នឹងត្រូវឲ្យឈប់សម្រាករយៈពេល ៣ថ្ងៃ។ ក្នុងសេចក្ដីជូនដំណឹងរបស់ក្រសួងការងារ កំណត់ឲ្យខាងរោងចក្រសហគ្រាស ត្រូវបើកប្រាស់ឈ្នួលឲ្យកម្មករឲ្យបានមុនបុណ្យភ្ជុំបិណ្ឌ។ តែបើគ្មានលទ្ធភាពអាចឲ្យខ្ចីប្រាក់មុនយ៉ាងតិច ៥០ភាគរយ។
លោក ប៉ាវ ស៊ីណា គិតថា ប្រាក់ខែតិចតួចនោះ កម្មករត្រូវចំណាយច្រើនហួសហេតុទៅលើថ្លៃធ្វើដំណើរ នៅពេលដែលសេវាដឹកជញ្ជូនត្រូវដំឡើងខ្ពស់។
អ្នកនាំពាក្យសាលារាជធានីភ្នំពេញ លោក ឡុង ឌីម៉ង់ បញ្ជាក់ថា ខាងអាជ្ញាធរខណ្ឌទាំងអស់បានព្យាយាមទប់ស្កាត់ការដំឡើងថ្លៃនេះ តាមរយៈការអប់រំផ្សព្វផ្សាយដល់បណ្ដាក្រុមហ៊ុនរថយន្តក្រុងទាំងអស់ និងរថយន្តឈ្នួលតាមបេនឡាននានា កុំឲ្យផ្ទុកអ្នកដំណើរលើសចំណុះ កុំឲ្យខុសបទដ្ឋានបច្ចេកទេស និងកុំឲ្យដំឡើងថ្លៃឈ្នួលរថយន្ត។
យ៉ាងណាលោកបញ្ជាក់ថា ទាំងរដ្ឋាភិបាលនិងសាលារាជធានីភ្នំពេញ មិនមានសិទ្ធិទប់ស្កាត់ ឬលូកដៃកំណត់តម្លៃអាជីវកម្មនានាក្នុងរបបទីផ្សារសេរីបានឡើយ៖ «អ្វីដែលខ្ញុំចង់ជម្រាបជូន គឺយើងជាថ្នាក់រដ្ឋបាលក្រោមជាតិ ដូច្នេះយើងមិនអាចមានសិទ្ធិទៅលូកដៃ ហើយខ្ញុំជឿថា រដ្ឋាភិបាលក៏ដូចគ្នាដែរ យើងគ្មានគោលនយោបាយណាទៅលូកដៃកំណត់តម្លៃរបស់ការប្រកបអាជីវកម្មនានាក្នុងរបបទីផ្សារសេរីបានទេ។ អ៊ីចឹងអ្វីដែលយើងអាចធ្វើបាន គឺយើងព្យាយាមទប់ស្កាត់ខាងក្រុមហ៊ុនទាំងអស់ហ្នឹងកុំឲ្យឡើងថ្លៃ»។
ក្រុមអង្គការសង្គមស៊ីវិលដែលឃ្លាំមើលយន្តការនៃការគ្រប់គ្រងលើមធ្យោបាយធ្វើដំណើរផ្លូវគោកបានហៅការលើកឡើងរបស់មន្ត្រីសាលារាជធានីភ្នំពេញ នៅពេលនេះ ថាគឺជាផ្នែកមួយហាក់មិនមានការទទួលខុសត្រូវ។
បញ្ហានោះគឺនៅត្រង់ថា តើមានមូលហេតុអ្វីបានជារថយន្តឈ្នួលនៅតែបន្តឡើងថ្លៃក្នុងថ្ងៃបុណ្យភ្ជុំបិណ្ឌ ដែលប្រឆាំងនឹងគោលការណ៍ណែនាំរបស់អាជ្ញាធរ?
ឆ្លើយតបបញ្ហានេះ ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍និងសន្តិភាព លោក យង់ គីមអេង អះអាងថា មានមូលហេតុ ៤យ៉ាង ដែលម្ចាស់ក្រុមហ៊ុនរថយន្តក្រុង និងម្ចាស់រថយន្តឈ្នួលអាចបំពានលើគោលការណ៍ណែនាំរបស់សាលារាជធានីភ្នំពេញ នេះបាន។ ទី១ ដោយសារតែអាជ្ញាធរគ្មានការគ្រប់គ្រងច្បាស់លាស់។ ទី២ នៅក្នុងគោលការណ៍វិនិយោគលើវិស័យដឹកជញ្ជូន រាជរដ្ឋាភិបាលពុំមានសិទ្ធិលូកដៃក្នុងការកំណត់តម្លៃឡើងចុះបាន។ ទី៣ ម្ចាស់ក្រុមហ៊ុនរថយន្តដឹកអ្នកដំណើរច្រើនតែជាអ្នកមានបណ្ដាស័ក្ដិខ្ពស់ក្នុងជួររដ្ឋាភិបាល ឬមានមន្ត្រីខ្នងក្រាស់នៅពីក្រោយនៃការវិនិយោគនោះ និងទី៤ អាជ្ញាធរពុំមានឆន្ទៈប្រើច្បាប់ដើម្បីចាត់វិធានការប្រឆាំងនឹងការឡើងថ្លៃនេះ ជាជាងគ្រាន់តែចេញសេចក្ដីអំពាវនាវ ឬវិធានការអត់ប្រសិទ្ធភាពដើម្បីឲ្យតែល្អមើល និងបិទបាំងការពិតងាយនឹងប្រព្រឹត្តអំពើពុករលួយ។
លោក យង់ គីមអេង៖ «គឺតម្លៃនឹងឡើងនៅពេលណាបុណ្យទាន អ៊ីចឹងអាជ្ញាធរត្រូវតែដាក់កម្រិតពេលបុណ្យទាន ប្រសិនបើក្រុមហ៊ុនឡានក្រុងណាឡើងថ្លៃ គឺអាជ្ញាធរអាចបញ្ចប់វិញ្ញាបនបត្ររបស់ក្រុមហ៊ុននោះ»។
ជុំវិញការដំឡើងថ្លៃឈ្នួលរថយន្តនេះ អ្នករត់ឡានឈ្នួលពីភ្នំពេញ ទៅក្រចេះម្នាក់ គឺលោក ណាត ឲ្យដឹងថា ប្រសិនបើលោកមិនដំឡើងថ្លៃទេនោះ គឺលោកមិនអាចរកប្រាក់ចំណេញបានឡើយ ដោយសារតែពេលនោះ ខាងបេនឡានបានដំឡើងថ្លៃបេន ២០ដុល្លារ ហើយមានកុងត្រូលប៉ូលិស ដាក់ជាហូរហែតាមផ្លូវស្អេកស្កះយកលុយថែមទៀត។ លោកប្រាប់ថា តម្លៃធម្មតាភ្នំពេញ ទៅក្រចេះ ម្នាក់ ២ម៉ឺនរៀល តែតម្លៃនេះអាចនឹងឡើងថ្លៃ ២ម៉ឺន ៥ពាន់រៀល ដល់ ៣ម៉ឺនរៀល ចាប់ពីចុងសប្ដាហ៍នេះ រហូតដល់ចុងសប្ដាហ៍ក្រោយ។
តំណាងក្រុមហ៊ុនភ្នំពេញ សុរិយា និងជាប្រធានសមាគមរថយន្តក្រុង លោក ឆឹម ចំណាន ប្រាប់ថា ខាងសមាគមរថយន្តក្រុងមិនបានប្រជុំជជែកពិភាក្សាពីការកំណត់ថ្លៃឈ្នួលរថយន្តក្នុងពិធីបុណ្យភ្ជុំបិណ្ឌទេ។
លោកបន្តថា ក្រុមហ៊ុនខ្លះអាចដំឡើងថ្លៃតាមតែអាចធ្វើទៅរួចតែត្រូវស្ថិតក្នុងកម្រិតសមរម្យ។ លោកបញ្ជាក់ថា ក្រុមហ៊ុនរបស់លោកក៏ត្រៀមដំឡើងថ្លៃសេវាដឹកអ្នកដំណើរចន្លោះពី ៥ពាន់ ទៅ ១ម៉ឺនរៀលបន្ថែមលើតម្លៃធម្មតាទៅតាមផ្លូវជិតឬផ្លូវឆ្ងាយ៖ «បងប្អូនគាត់ទៅតាមបណ្ដាខេត្តច្រើន ប្រសិនជាត្រឡប់មកវិញអត់មានមនុស្សមក គឺមានការឡើងថ្លៃខ្លះហើយ»។
យ៉ាងណាកន្លងមក ក្នុងពិធីបុណ្យភ្ជុំបិណ្ឌកាលពីឆ្នាំមុន ពិសេសបុណ្យចូលឆ្នាំខ្មែរកន្លងមក មានសេចក្ដីរាយការណ៍ពីពលរដ្ឋអ្នកដំណើរខ្លះ ថាក្រុមហ៊ុនរថយន្តក្រុងមួយចំនួនបានដំឡើងថ្លៃទ្វេដងសម្រាប់មនុស្សម្នាក់។ ការឡើងថ្លៃឈ្នួលនោះ ហាក់ធ្វើផ្គើនចំពោះសេចក្ដីណែនាំ ឬគោលការណ៍របស់សាលារាជធានីភ្នំពេញ ស្ដីពីការទប់ស្កាត់មិនឲ្យយកថ្លៃខ្ពស់ក្នុងថ្ងៃបុណ្យនោះឡើយ៕