កម្ពុជាបញ្ជូនជនជាតិវៀតណាម១៥២នាក់ទៅប្រទេសខ្លួនវិញ
2014.10.02
នៅឯខេត្តស្វាយរៀង អាជ្ញាធរកម្ពុជា បានបញ្ជូនជនជាតិវៀតណាម ចំនួន ១៥២នាក់ ទៅប្រទេសកំណើតវិញ តាមច្រកព្រំដែន នៅថ្ងៃទី១ តុលា។
ព័ត៌មានលើគេហទំព័ររបស់អគ្គស្នងការនគរបាលជាតិ ផ្សាយថា ជនជាតិវៀតណាមទាំង ១៥២នាក់ ដែលបញ្ជូនចេញនោះ គឺក្នុងចំណោម ២៤០គ្រួសារ ដែលអាជ្ញាធរធ្វើជំរឿន និងរកឃើញថា បានមកជួលផ្ទះស្នាក់នៅ និងធ្វើការក្នុងខេត្តស្វាយរៀង ដោយខុសច្បាប់ និងគ្មានឯកសារ។
អគ្គនាយករងនៃអគ្គនាយកដ្ឋានអន្តោប្រវេសន៍ក្រសួងមហាផ្ទៃ ឧត្តមសេនីយ៍ឯក ម៉ម ស៊្រីមវណ្ណា បានឲ្យដឹងថា ក្រុមការងារបានធ្វើជំរឿននៅក្នុងខេត្តស្វាយរៀង បានចំនួន ៧ស្រុក ក្នុងចំណោម ៨ស្រុកនៃខេត្តនេះ។ ក្រុមការងារនឹងធ្វើនៅទី៨ គឺក្រុងបាវិត។
មន្ត្រីសម្របសម្រួលអង្គការសិទ្ធិមនុស្សលីកាដូ (Licadho) លោក នុត ប៊ូពិនណារ័ត្ន មានប្រសាសន៍ថា ជនជាតិវៀតណាមទាំង ១៥២នាក់នោះ គឺបញ្ជូនចេញតាមច្រកព្រំដែនបាវិត៖ «គេធ្វើនៅក្រុងបាវិត ម្សិលមិញ។ ប៉ុន្តែ អ្នកដែលធ្វើនៅទូទាំងខេត្តស្វាយរៀង នេះ គឺគេស្រង់បាន ចំនួន តែអត់ទាន់បានគោលការណ៍បញ្ជូនទេ។ អ៊ីចឹងម្សិលមិញនេះ បញ្ជូនអ្នកនៅក្រុងបាវិត អ្នកដែលឆ្លងចូលមកអត់ច្បាប់ ហើយគេចនៅនៅក្រុងបាវិតហ្នឹង។ អ៊ីចឹងគេធ្វើស្ថិតិហើយ ហើយគេបញ្ជូនទៅម្សិលមិញ អ៊ីចឹងបានខាងខេត្តអត់ដឹង ដោយសារគេធ្វើហើយភ្លាមបញ្ជូនទៅភ្លាម ១៥០នាក់ហ្នឹង ឱ្យដើរឆ្លងទៅវិញ»។
គេហទំព័រអគ្គនាយកនៃអគ្គនាយកដ្ឋានអន្តោប្រវេសន៍នាយ លោក សុខ ផល ឲ្យដឹងថា ក្រសួងមហាផ្ទៃ បាននិរទេសជនបរទេសជាង ២០០នាក់ហើយ ក្នុងរយៈពេល ២ខែកន្លងមក។ អ្នកទាំងនោះ រួមមាន ជនជាតិស្បែកស ស្បែកខ្មៅ ជនជាតិវៀតណាម ថៃ និងចិន ជាដើម។ ការបញ្ជូននេះ គឺជាផ្នែកមួយនៃការបន្តធ្វើជំរឿនទូទាំងប្រទេសរបស់អាជ្ញាធរកម្ពុជា។
លោក សុខ ផល មានប្រសាសន៍កាលពីថ្ងៃទី៣០ ខែកញ្ញា ថា អាជ្ញាធរចាត់វិធានការតាម ៣របៀប ដែលមានទី១ ត្រួតពិនិត្យជនអន្តោប្រវេសន៍ដែលមានឯកសារហួសសុពលភាព។ ទី២ យើងស្ទង់មតិអ្នករស់នៅក្នុងប្រទេសកម្ពុជា ដែលមានឯកសារ ហើយទី៣ យើងចាត់វិធានការលើអ្នកដែលមិនមានឯកសារ ហើយបញ្ជូនត្រឡប់ទៅវិញ៕