ធនាគារពិភពលោកបង្ហាញរបាយការណ៍កែលំអបរិយាកាសវិនិយោគបរទេសនៅកម្ពុជា
2014.10.29
ក្រុមស្ថាប័នផ្ដល់ជំនួយអភិវឌ្ឍន៍កម្ពុជា បានបញ្ចេញរបាយការណ៍កែលំអបរិយាកាសបង្កើតអាជីវកម្ម និងការទាក់ទាញអ្នកវិនិយោគបរទេសនៅប្រទេសកម្ពុជា។ របាយការណ៍នោះ បានបង្ហាញថា មានបញ្ហាប្រឈមជាច្រើនសម្រាប់ការបង្កើតក្រុមហ៊ុន ក្នុងនោះរួមមានតម្លៃ និងការផ្គត់ផ្គង់អគ្គិសនី ការបែងចែកធនធានហិរញ្ញវត្ថុ និងការកសាងពលកម្មជំនាញ។
ប៉ុន្តែ ក្រុមហ៊ុនដែលចុះបញ្ជីប្រកបអាជីវកម្មនៅកម្ពុជា បានអះអាងបន្ថែមថា ការបង់កម្រៃក្រៅផ្លូវការ គឺជាឧបសគ្គចម្បងសម្រាប់ក្រុមហ៊ុនរបស់គេ។
របាយការណ៍វាយតម្លៃអំពីបរិយាកាសវិនិយោគប្រចាំឆ្នាំ២០១៤ របស់ធនាគារពិភពលោក (Wold Bank) និងធនាគារអភិវឌ្ឍន៍អាស៊ី (ADB) បានស្នើសុំឲ្យប្រទេសកម្ពុជា បង្កើតឱកាសធុរកិច្ចថ្មីរបស់ខ្លួន តាមរយៈការផ្គត់ផ្គង់ដោយភាពជឿជាក់នៃថាមពលអគ្គិសនី ការកែទម្រង់រចនាសម្ព័ន្ធចំណាយធនធានហិរញ្ញវត្ថុដែលមានលក្ខណៈផ្លូវការ និងការកសាងពលកម្មជំនាញ។ បញ្ហាទាំងអស់នេះ បានបង្កផលលំបាកធ្ងន់ធ្ងរដល់ប្រទេសកម្ពុជា ក្នុងការទាក់ទាញការវិនិយោគថ្មី។
ប្រធានធនាគារពិភពលោក ប្រចាំកម្ពុជា លោក អាឡាសាន សូ (Alassane sow) មានប្រសាសន៍ថា កម្ពុជា មានសេដ្ឋកិច្ចរីកចម្រើនលូតលាស់យ៉ាងខ្លាំង ក្នុងការបង្កើតឲ្យផលិតផលថ្មីៗជាច្រើន និងបានទាក់ទាញអ្នកវិនិយោគិនបន្ថែម។ លោកបញ្ជាក់ថា របាយការណ៍នេះនឹងជួយជំរុញឲ្យមានកិច្ចពិភាក្សាជាសាធារណៈមួយ ដែលឈានទៅរកការកសាងបរិយាកាសធុរកិច្ចមួយ ដែលមានលក្ខណៈល្អប្រសើរ សម្រាប់ការអភិវឌ្ឍវិស័យឯកជន ឬការបង្កើតអាជីវកម្មថ្មីបន្ថែមទៀត។ របាយការណ៍ថ្មីនេះ បានគាំទ្រដល់យុទ្ធសាស្ត្រចតុកោណ ៥ឆ្នាំរបស់រដ្ឋាភិបាលកម្ពុជា និងបង្កលក្ខណៈងាយស្រួលដល់ក្រុមហ៊ុននានា ក្នុងការបង្កើតអាជីវកម្ម និងបង្កើនប្រភេទសកម្មភាពអាជីវកម្មរបស់ខ្លួន។
អ្នករៀបចំរបាយការណ៍ និងជាអ្នកសេដ្ឋកិច្ចថ្នាក់ខ្ពស់ផ្នែកពាណិជ្ជកម្មនៃធនាគារពិភពលោក ប្រចាំកម្ពុជា លោក ជូលៀន ក្លឺក (Julian Clarke) មានប្រសាសន៍ថា ប្រាក់ខែទាប និងការមិនបង់ពន្ធនាំទំនិញចូលទៅសហភាពអឺរ៉ុប ជាកត្តាទាក់ទាញអ្នកវិនិយោគផ្ទាល់ពីបរទេស ប៉ុន្តែរដ្ឋាភិបាលកម្ពុជា វិញ ត្រូវដោះស្រាយបញ្ហាធ្ងន់ធ្ងរដែលរារាំងដល់ក្រុមហ៊ុនទាំងអស់។
អគ្គនាយកក្រុមប្រឹក្សាអភិវឌ្ឍន៍កម្ពុជា លោក សុក ចិន្ដាសុភា មានប្រសាសន៍ថា ការរកឃើញរបស់ក្រុមស្ថាប័នអភិវឌ្ឍន៍ទាំងនេះ គឺជាការចូលរួមចំណែកក្នុងការដោះស្រាយប្រឈមនានា ដើម្បីលើកកម្ពស់បរិយាកាសវិនិយោគនៅកម្ពុជា និងបង្កើតជាប្រភពកំណើនថ្មីសម្រាប់ជំរុញ និងអភិវឌ្ឍសេដ្ឋកិច្ចកម្ពុជា។ បច្ចុប្បន្ន ប្រទេសកម្ពុជា បានទាក់ទាញអ្នកវិនិយោគពីប្រទេសជប៉ុន ជាច្រើនមកវិនិយោគនៅក្នុងតំបន់សេដ្ឋកិច្ចពិសេសនៅកម្ពុជា។ ទោះជាយ៉ាងណាក៏ដោយ លោកសង្ឃឹមថា ប្រទេសកម្ពុជា នឹងក្លាយជាទីតាំងវិនិយោគប្រកបដោយសក្ដានុពលនៅក្នុងតំបន់។
លោក សុក ចិន្ដាសុភា៖ «ប្រភពកំណើនសេដ្ឋកិច្ច គឺបានមកពីការធ្វើពិពិធកម្ម តាមរយៈការបង្កើតសកម្មភាពអាជីវកម្មថ្មី និងការរកប្រភពកំណើនថ្មីនៃការទាក់ទាញអ្នកវិនិយោគបរទេស។ បច្ចុប្បន្ន អ្នកវិនិយោគបរទេសជប៉ុន បានចូលមកយ៉ាងច្រើននៅកម្ពុជា។ ទោះជាយ៉ាងណាក៏ដោយ កម្ពុជា មិនត្រឹមតែទាក់ទាញអ្នកវិនិយោគបរទេសជប៉ុន ប៉ុណ្ណោះទេ តែត្រូវទាក់ទាញអ្នកវិនិយោគដទៃទៀតដែលកំពុងប្រតិបត្តិការរកស៊ីនៅក្នុងប្រទេសជិតខាងកម្ពុជា»។
ទោះជាយ៉ាងណា របាយការណ៍រួមគ្នារវាងធនាគារពិភពលោក និងធនាគារអភិវឌ្ឍន៍អាស៊ី បានផ្ដល់យោបល់ថា ការស្វែងរកប្រភពថាមពលពីប្រទេសជិតខាង អាចជំរុញឲ្យតម្លៃអគ្គិសនីចុះថោក រួមទាំងការអនុវត្តយុទ្ធសាស្ត្រប្រឆាំងអំពើពុករលួយប្រកបដោយប្រសិទ្ធភាព គឺជាការលើកទឹកចិត្តដល់ក្រុមអ្នកវិនិយោគបរទេសមកកម្ពុជា។
នាយកធនាគារអភិវឌ្ឍន៍អាស៊ី ប្រចាំប្រទេសកម្ពុជា លោក អេរិក ស៊ីដវិក (Eric Sidgwick) មានប្រសាសន៍ថា របាយការណ៍ថ្មីនេះ គឺជាការចូលរួមចំណែកដ៏សំខាន់មួយដល់អ្នកតាក់តែងច្បាប់ និងរៀបចំគោលនយោបាយ ដើម្បីធ្វើឲ្យកម្ពុជា ក្លាយជាគោលដៅវិនិយោគមួយប្រកបដោយសក្ដានុពល។ ការអនុវត្តគោលនយោបាយប្រកបដោយប្រសិទ្ធភាព គឺជាឥទ្ធិពលដែលអាចឈានដល់ការសម្រេចនូវយុទ្ធសាស្ត្រចតុកោណដំណាក់កាលទីបីរបស់រដ្ឋាភិបាលកម្ពុជា ក្នុងការបង្កើតភាពចម្រុះនៃប្រភពកំណើនសេដ្ឋកិច្ច ការកាត់បន្ថយភាពក្រីក្រ និងចំនួនអ្នកងាយរងគ្រោះ៕