អាជ្ញាធរភ្នំពេញមិនឲ្យរថយន្តធុនធំដឹកទំនិញនិងរ៉ឺម៉កម៉ូតូធ្វើចរាចរណ៍ក្នុងថ្ងៃបុណ្យអុំទូក
2014.11.02
អាជ្ញាធររាជធានីភ្នំពេញ ហាមម្ចាស់រថយន្តធុនធំ រថយន្តដឹកទំនិញ រថយន្តដឹកអ្នកដំណើរ និងរ៉ឺម៉កម៉ូតូ មិនឲ្យបើកបរចូលក្នុងរាជធានីភ្នំពេញ ក្នុងពិធីបុណ្យអុំទូកចាប់ពីថ្ងៃទី៥ដល់ទី ៧ វិច្ឆិកា។ វិធានការនេះ ធ្វើឡើងដើម្បីកាត់បន្ថយនូវការកកស្ទះចរាចរណ៍ក្នុងក្រុងរយៈ ពេល៣ថ្ងៃនាពិធីបុណ្យអុំទូកខាងមុខនេះ។
សេចក្ដីជូនដំណឹងរបស់សាលារាជធានីភ្នំពេញ ចុះថ្ងៃទី៣១ តុលា ឲ្យដឹងថា រថយន្តធុនធំ រថយន្តដឹកទំនិញ រថយន្តឈ្នួលដឹកអ្នកដំណើរ ព្រមទាំងរ៉ឺម៉កម៉ូតូ នឹងមិនត្រូវបានអនុញ្ញាត ឲ្យចរាចរចូលរាជធានីភ្នំពេញ ចាប់ពីម៉ោង១០ព្រឹករហូតដល់ម៉ោង១០យប់ឡើយ នៅក្នុង ព្រះរាជពិធីបុណ្យអុំទូក បណ្ដែតប្រទីប សំពះព្រះខែ និងអកអំបុកខាងមុខ។ ប៉ុន្តែរថយន្តទាំងអស់នោះ អាចធ្វើចរាចរចូលក្នុងក្រុងបានចាប់ពីម៉ោង១០យប់រហូតដល់ម៉ោង ១០ព្រឹក។
ក្រៅពីកំណត់ពេលវេលាជាក់លាក់សម្រាប់ការធ្វើចរាចរណ៍ របស់ម្ចាស់រថយន្តចូលក្នុងក្រុង សាលារាជធានីភ្នំពេញ ក៏ណែនាំម្ចាស់រថយន្តអំពីផ្លូវវាងសម្រាប់ការធ្វើចរាចរនៅតាម ផ្លូវជាតិសំខាន់ៗមួយចំនួន ដែលរួមមានផ្លូវជាតិលេខ១ លេខ២ លេខ៣ លេខ៤ លេខ៥ និង លេខ៦ ព្រមទាំងផ្លូវមួយចំនួនទៀត។ លើសពីនេះ ពួកគេក៏ត្រូវបានណែនាំពី ចំណតដែលត្រូវចូលចតផងដែរ។
អ្នកនាំពាក្យសាលារាជធានីភ្នំពេញ លោក ឡុង ឌីម៉ង់ ឲ្យដឹងបន្ថែមថា ក្រៅពីបញ្ចៀសការ កកស្ទះចរាចរណ៍ក្នុងថ្ងៃពិធីបុណ្យ វិធានការនេះ ក៏រួមចំណែកធ្វើឲ្យមានសណ្ដាប់ធ្នាប់ល្អ ព្រមទាំងពង្រឹងសន្តិសុខសុវត្ថិភាពសម្រាប់ប្រជាពលរដ្ឋចូលរួម៖ «មនុស្សច្រើនអ៊ីចឹង ប្រសិនបើមានការអ្វីកើតឡើងតែបន្តិច គឺអាចធ្វើមនុស្សផ្អើល អ៊ីចឹងឆ្នាំនេះយើងធ្វើច្រើនណាស់ តាំងពីការពង្រាយប្រជាពលរដ្ឋ មិនឲ្យមនុស្សនៅមួយ កន្លែងនោះទេ មនុស្សភាគច្រើនទៅដោយសារមានការប្រគំតន្ត្រី (Concert) មានការលក់ស្តង់លក់អីទៅ ពេលយប់ឡើងយើងធ្វើនៅកោះពេជ្រខ្លះទៅ យើងធ្វើនៅវត្តបទុម ហើយនៅតាម បណ្ដោយផ្លូវស៊ីសុវត្ថិ មិនឲ្យមានការលក់ដូរច្រើនទេ យើងឲ្យមាននៅម្ដុំវត្តភ្នំ នៅទីលានប្រជាធិបតេយ្យ យើងឲ្យធ្វើនៅត្រើយខាងកើតជ្រោយចង្វារជាដើម ហើយបើយើងបន្ថែមយានយន្តមកគ្រប់គ្នាទៀត វាធ្វើឲ្យមានការកកស្ទះអ៊ីចឹងយើងពង្វាងចរាចរណ៍»។
ទោះយ៉ាងណា លោក ឡុង ឌីម៉ង់ មិនទាន់អាចបញ្ជាក់បានថា តើអាជ្ញាធរនឹងចាត់វិធានការ បែបណា ចំពោះម្ចាស់រថយន្តដែលហ៊ានបំពានលើការណែនាំរបស់អាជ្ញាធរឡើយ។ លោក ឡុង ឌីម៉ង់ អះអាងថា ប្រាកដណាស់នឹងមានមន្ត្រីទទួលខុសត្រូវនៅតាមតំបន់នីមួយៗ។ លោកថាក្នុងករណីដែលមានការឆកល្វែង ក្នុងពេលអនុវត្ត មន្ត្រីដែលទទួលខុសត្រូវ ក្នុងតំបន់នោះ នឹងត្រូវទទួលខុសត្រូវចំពោះមុខគណៈកម្មការរៀបចំបុណ្យជាតិ ឬគណៈបញ្ជាការសន្តិសុខ។
ពិធីបុណ្យអុំទូកឆ្នាំនេះ នឹងត្រូវបានរៀបចំឡើងផ្លូវការជាថ្មី បន្ទាប់ពីត្រូវបានផ្អាករយៈពេល ៣ឆ្នាំជាប់គ្នា ដោយសារកម្ពុជាកើតមានបញ្ហាជាបន្តបន្ទាប់ ក្នុងនោះក៏មានករណីមនុស្ស ជាន់គ្នាស្លាប់ប្រមាណ៣រយនាក់លើស្ពាននាគឆ្លងទៅកោះពេជ្រជាដើម។
ប្រធានមជ្ឈមណ្ឌលវប្បធម៌ជាតិនិងសីលធម៌សង្គម លោក ប៉ូ សំណាង មានប្រសាសន៍ថា លោកគាំទ្រចំពោះវិធានការរបស់អាជ្ញាធរពេលនេះ។ ទោះយ៉ាងណា លោកថា ដើម្បីឲ្យការ អនុវត្តសេចក្ដីណែនាំនេះមានប្រសិទ្ធភាព សមត្ថកិច្ចដែលចុះអនុវត្តផ្ទាល់ត្រូវបោះបង់ចោល នូវវប្បធម៌យល់ញាតិ ដែលធ្វើឲ្យឃ្លាតច្បាប់ និងវប្បធម៌ត្រីងៀតឆ្លៀតពងជាដើម ដែលនេះ លោកសំដៅដល់ការប្រព្រឹត្តអំពើពុករលួយរបស់សមត្ថកិច្ច ជាមួយម្ចាស់យានយន្ត៖ «បើសិនណាលោកចង់អនុវត្តច្បាប់ ឲ្យមានប្រសិទ្ធភាព លោកកុំយោគយល់ តំបន់ណាចេញបញ្ជាទៅហើយសុំលោកធ្វើចុះ ប្រសិនណាមានអ្នកឆ្លៀត គឺពេលហ្នឹង អ្នកហ្នឹងក្បត់នឹងប្រជាជនហើយ ក្បត់ប្រជាជន ក្បត់បទបញ្ជារបស់អាជ្ញាធរមានសមត្ថកិច្ច ហើយយើងគួរមានវិធានការទៅ បើគាត់ហ៊ានធ្វើអ៊ីចឹងសុំអាជ្ញាធរដាក់ទណ្ឌកម្មគាត់ទៅ»។
ទាក់ទងនឹងពិធីបុណ្យអុំទូកនេះដែរ អគ្គនាយកទូរទស្សន៍ជាតិកម្ពុជា និងជាសមាជិកគណៈ កម្មការរៀបចំបុណ្យជាតិ លោក កឹម គុណវឌ្ឍន៍ បានសរសេរក្នុងទំព័រហ្វេសប៊ុក (Facebook) របស់លោកអំពាវនាវពលរដ្ឋចូលរួម កុំឲ្យមានការភ្ញាក់ផ្អើលនៅពេលឃើញកងកម្លាំងនគរបាល ប្រដាប់ដោយអាវុធ នៅតាមទីបរិវេណនានានៅក្នុងក្រុង។ លោកបញ្ជាក់ថាសមត្ថកិច្ច ទាំងអស់នេះជាអ្នកការពារពលរដ្ឋឲ្យមានសុវត្ថិភាព នៅក្នុងពិធីបុណ្យអុំទូករយៈពេល ៣ថ្ងៃខាងមុខនេះ៕