ក្រុមហ៊ុនចិនសម្រេចបើកទ្វារទឹកទំនប់ដង្ហតនៅបាត់ដំបងឲ្យពលរដ្ឋប្រើទឹកឡើងវិញ
2014.07.15
ប្រជាពលរដ្ឋនៅក្នុងស្រុកសង្កែ ខេត្តបាត់ដំបង ឲ្យដឹងថា នៅពេលនេះ ក្រុមហ៊ុនចិន សម្រេចបើកទ្វារទឹកទំនប់ដង្ហត ដើម្បីឲ្យពលរដ្ឋនៅផ្នែកខាងក្រោមប្រព័ន្ធធារាសាស្ត្រ បានប្រើប្រាស់ទឹកស្រោចស្រពស្រូវប្រាំងឡើងវិញហើយ។
ការសម្រេចបង្ហូរទឹកចេញពីទំនប់នៅពេលនេះ គឺនៅបន្ទាប់ពីប្រព័ន្ធធារាសាស្ត្រដង្ហត នេះ បានបិទទ្វារមិនដំណើរការអស់ជាច្រើនខែ រហូតធ្វើឲ្យស្រូវប្រាំងត្រូវខូចខាត។ ទំនប់នោះឋិតនៅឃុំកំពង់ព្រៀង ស្រុកសង្កែ ខេត្តបាត់ដំបង។
ពលរដ្ឋនិយាយថា ស្រូវប្រាំងជិត ១ពាន់ហិកតារ ដែលស្ថិតក្រោមខ្សែទឹកនៃប្រឡាយមេដង្ហត បានងាប់ដើម និងសន្ទូងត្រូវខូចខាតជាបន្តបន្ទាប់ ដោយពុំមានទឹកប្រើប្រាស់ និងសង្គ្រោះ ខណៈសំណងដ៏ធំផ្នែកខាងលើនៃដងស្ទឹងសង្កែ ជាជំនួយឥតសំណងរបស់ចិន ផ្ដល់ឲ្យកម្ពុជា មិនបើកឲ្យដំណើរការក្រោយពីសាងសង់រួច។
រស់នៅឃុំកំពង់ព្រៀង ស្រុកសង្កែ ខេត្តបាត់ដំបង លោក រី ផា ឲ្យដឹងនៅថ្ងៃទី១៤ កក្កដា ថា ឥឡូវចិន បានបើកបង្ហូរទឹកចេញពីទំនប់នេះហើយ ដើម្បីឲ្យប្រជាពលរដ្ឋដែលកំពុងប្រឈម និងពុំមានទឹកសង្គ្រោះស្រូវប្រាំង អាចបានបន្តដាំដុះឡើងវិញ។ លោកបន្តថា ប៉ុន្តែទឹកដែលចិន បានបង្ហូរនៅពេលនេះ គឺមានតិចតួចណាស់ និងស្ទើរតែមិនអាចជួយសង្គ្រោះស្រូវប្រាំងបានផង៖ «ទឹកវាទើបបានមកដល់ ឥតទាន់បានប្រើ ចាំមើលយប់នេះមួយយប់ទៀតមើល។ ខ្លាចវារីងមិនដឹងចាំមើលយប់នេះមួយយប់ទៀត។ ថ្ងៃមុនអ៊ីចឹងឯង តែបានមួយយប់ថ្ងៃមួយវាបិទវិញ»។
ការសម្រេចបើកទឹកឡើងវិញនៅពេលនេះ គឺបន្ទាប់ពីប្រជាពលរដ្ឋជិត ២០០នាក់ កាលពីថ្ងៃទី១០ កក្កដា តវ៉ាសូមឲ្យភាគីចិន បង្ហូរទឹកចូលប្រឡាយមេ ដើម្បីបានស្រោចស្រពដំណាំស្រូវរបស់ពួកគាត់។ កន្លងមក ក្រុមហ៊ុនចិន សម្រេចបិទមិនបង្ហូរទឹក ដោយសារចិន ចោទប្រកាន់ពលរដ្ឋថា បានជីកកាត់ផ្ដាច់ប្រឡាយមេអស់ជាច្រើនម៉ែត្រ។ ប៉ុន្តែបញ្ហានេះ ត្រូវបានប្រធានមន្ទីរធនធានទឹក និងឧតុនិយម ខេត្តបាត់ដំបង ច្រានចោល ដោយលោករកឃើញថា មានកាត់ផ្តាច់មែន តែតិចតួចប៉ុណ្ណោះ។
ប្រព័ន្ធធារាសាស្ត្រដង្ហត ដែលស្ថិតនៅខ្សែទឹកផ្នែកខាងលើនៃស្ទឹងសង្កែ ក្នុងឃុំកន្ទឺ២ ស្រុកបាណន់ នេះ ចាប់សាងសង់តាំងពីឆ្នាំ២០០៩ ក្រោមជំនួយឥតសំណងរបស់ប្រទេសចិន។ បើទោះជាបែបនេះក៏ដោយចុះ រហូតមកដល់ពេលនេះពុំមានរបាយការណ៍ណាមួយ បញ្ជាក់ពីទំហំនៃទំនប់នេះឲ្យបានពិតប្រាកដនៅឡើយទេ។ ទាំងមន្ត្រីរដ្ឋាភិបាលទទួលបន្ទុកលើផ្នែកនេះ ក៏បានអះអាងដែរថា ទំនប់នេះមានទំហំធំ និងជ្រៅជាងគេនៅប្រទេសកម្ពុជា បើប្រៀបធៀបនឹងប្រព័ន្ធធារាសាស្ត្រដទៃទៀត។
ចំណែកអភិបាលខេត្តបាត់ដំបង លោក ច័ន្ទ សុផល វិញបដិសេធក្នុងការអត្ថាធិប្បាយដោយនិយាយយ៉ាងខ្លីមុនដាក់ទូរស័ព្ទចុះថា លោកជាប់រវល់មិនអាចផ្ដល់បទសម្ភាសន៍បានទេ។
ពាក់ព័ន្ធបញ្ហានេះ អភិបាលស្រុកសង្កែ លោក សួន សាវ៉េត អះអាងថា នៅពេលនេះ ចិន បានបើកទឹកបង្ហូរចេញពីប្រព័ន្ធធារាសាស្ត្រនេះដាក់ឲ្យពលរដ្ឋបានប្រើប្រាស់ហើយ។ ហេតុនេះ លោកមានជំនឿថា ផលដំណាំស្រូវប្រាំងរបស់ពលរដ្ឋអាចមានសង្ឃឹមឡើងវិញ៖ «បើករួចហើយតាមខ្ញុំសួរឃុំម្សិលមិញ ថាគេបើកឲ្យហើយ។ ថ្ងៃហ្នឹងវាខុសដែរ និយាយរឿងទៅសំណូមពរសុំឲ្យចិន បើកទឹក។ ប្រជាជនគាត់មិនអាចរង់ចាំយូរ។ ចិន តែថាបើកឲ្យៗមិនចេះឃើញបើក ប្រជាជនបើកខ្លួនតែម្ដង។ រឿងនោះវាប៉ុណ្ណឹងទេ»។
ភ្ជាប់នឹងបញ្ហានេះ ប្រជាពលរដ្ឋចាត់ទុកថា ពួកគាត់ទំនងជាមិនអាចទទួលបានទឹកនេះប្រើប្រាស់គ្រប់គ្រាន់ឡើយ។ ជាទម្លាប់ ចិន តែងបើកហើយបិទវិញជាញឹកញាប់ ដោយពុំបានផ្ដល់ដំណឹងឲ្យពលរដ្ឋរស់នៅក្រោមខ្សែទឹកនៃប្រឡាយមេបានដឹងម្ដងណានោះទេ។
ជាងនេះទៀត លោកពុំមានជំនឿសោះឡើយថា ទឹកដែលបានបង្ហូរចេញនៅពេលនេះ អាចប្រើប្រាស់បានយូរថ្ងៃនោះទៀតផង ព្រោះថាក្នុងឆ្នាំនេះ ទឹកដែលបានបង្ហូរចេញម្ដងៗនេះ គឺមិនគ្រប់គ្រាន់ទាល់តែសោះចំពោះតម្រូវការរបស់ពលរដ្ឋ។
វិទ្យុអាស៊ីសេរី ពុំអាចសុំការបំភ្លឺជុំវិញបញ្ហានេះពីភាគីចិន បានទេនៅថ្ងៃទី១៤ កក្កដា។
បញ្ហានេះ ត្រូវបានប្រធានមន្ទីរធនធានទឹក និងឧតុនិយមខេត្តបាត់ដំបង លោក ឡុង ផល្គុន ឲ្យដឹងថា វាពិតជាពិបាកណាស់ក្នុងការសម្របសម្រួលកិច្ចការនេះ បើទោះជានៅពេលនេះ អង្គភាពជំនាញរបស់លោកបានទទួលលិខិតផ្ទេរសិទ្ធិគ្រប់គ្រងវិញក្ដី តែធាតុពិតអ្វីៗគឺស្ថិតនៅលើចិន កាន់កាប់នៅឡើយ។ បើទោះជាបែបណា អាជ្ញាធរខេត្តចាត់ទុកថា វាគឺជាកិច្ចសហប្រតិបត្តិការដ៏ល្អ និងជាលទ្ធផលដែលកម្ពុជា ទទួលបានប្រព័ន្ធធារាសាស្ត្រដ៏ធំមួយនេះនៅក្នុងតំបន់៖ «ជាលិខិតយើងទទួលបាន ប៉ុន្តែការគ្រប់គ្រងជាក់ស្ដែង គឺចិន គាត់នៅគ្រប់គ្រងរបស់គាត់នៅឡើយទេ។ អ៊ីចឹងទៅបានបងប្អូនប្រជាពលរដ្ឋគាត់ចេះតែលើកគ្នាមក។ យើងចេះតែសម្របសម្រួល សូមឲ្យគាត់បើកទឹកធ្វើយ៉ាងម៉េចឲ្យប្រជាជន ជាជាងទម្លាក់ចោលទន្លេសាប វាអត់ប្រយោជន៍»។
រហូតមកដល់ពេលនេះ មានប្រជាពលរដ្ឋមួយចំនួនដែលបានដាក់ទុនលើស្រូវប្រាំង ត្រូវខាតបង់អស់រាប់ពាន់ដុល្លារ ព្រោះពុំមានទឹកប្រើប្រាស់។ ក្នុងចំណោមនោះ ពួកគេបានសម្រេចឈប់ធ្វើស្រែប្រាំង ដោយសារខាតបង់ច្រើនហួសហេតុ និងដកសម្ភារៈប្រើប្រាស់វិញ៕