យោធាព្រំដែនបង្កើនការប្រុងប្រយ័ត្នបន្ទាប់ពីអ្នកស្រី យីងឡាក់ ឆ្លាក់ពីតំណែង
2014.05.10
ក្រុមប៉ូលិស និងឆ្មាំការពារប្រាសាទព្រះវិហារ កំពុងឆ្លុះកែវយឹត ដើម្បីមើលសកម្មភាពទាហានថៃ ដែលនៅទល់មុខគ្នាជាប់បន្ទាត់ព្រំដែន កាលពីថ្ងៃទី១៩ ខែមេសា ឆ្នាំ២០១៣។
ក្រោយពេលដែល តុលាការធម្មនុញ្ញរបស់ប្រទេសថៃ សម្រេចដកហូតតំណែងនាយករដ្ឋមន្ត្រីពីលោកស្រី យីងឡាក់ ស៊ីនណាវ៉ាត្រ (Yingluck Shinawatra) ប្រមុខរដ្ឋាភិបាលកម្ពុជាចាប់ផ្ដើមព្រួយបារម្ភទៅលើបញ្ហាជម្លោះព្រំដែនកម្ពុជា ថៃ ដែលអាចនឹងបន្តឡើងវិញ។
ការព្រួយបារម្ភនេះ បន្ទាប់ពីការប្រឈមមុខដាក់គ្នា ផ្នែកយោធាក្នុងរឿងជម្លោះព្រំដែនបានស្ងប់ស្ងាត់ រយៈពេលជាង៣ឆ្នាំមកហើយ។ តើស្ថានការណ៍ទូទៅ នៅតាមតំបន់ជម្លោះព្រំដែនយ៉ាងណា ក្នុងពេលបច្ចុប្បន្ន?
កងការពារព្រំដែនខ្មែរមួយចំនួននៅជិតប្រាសាទព្រះវិហារ ឱ្យដឹងថា៖ ពួកគេកំពុងរៀបចំខ្លួនដើម្បីបង្កើនការប្រុងប្រយ័ត្នផ្នែកយោធាឡើងវិញ។ ការប្រុងប្រយ័ត្ននៅតាមបន្ទាត់ព្រំដែនខ្មែរ ដែលជាតំបន់ជម្លោះជាមួយប្រទេសថៃនេះ គឺបន្ទាប់ពីតុលាការធម្មនុញ្ញនៃប្រទេសថៃ បានសំរេចដកហូតដំណែងនាយករដ្ឋមន្ត្រីពីលោកស្រី យីងឡាក់ ស៊ីនណាវ៉ាត្រ។
យោធាខ្មែរម្នាក់ក្នុងចំណោមយោធាមួយចំនួនទៀត ដែលកំពុងប្រចាំការពារព្រំដែននៅជិតតំបន់ប្រាសាទព្រះវិហារនៃស្រុកជាំក្សាន្ត។ គាត់មានប្រសាសន៍កាលពីរសៀលថ្ងៃសៅរ៍ទី១០ ខែឧសភា ថា កងទ័ពខ្មែរមួយចំនួននៅតាមព្រំដែនចាប់ផ្ដើមប្រុងប្រយ័ត្នឡើងវិញ ក៏ប៉ុន្តែស្ថានភាពយោធានៅតាមព្រំដែនមិនមានអ្វីខុសធម្មតាទេ៖ «មិនមានអ្វីទេអត់អ្វីទេ ប៉ុន្តែយើងគ្រាន់តែត្រៀមៗ ប្រយ័ត្នទៅ ពីព្រោះ យីងឡាក់ បានចុះចេញហើយ គឺយើងខ្លាចក្រែងមានការប្រយុទ្ធគ្នា»។
ចំណែកមេបញ្ជាការកងការពារព្រំដែននៅតំបន់ប្រាសាទព្រះវិហារ ក៏អះអាងប្រហាក់ប្រហែលគ្នាដែរថា ស្ថានភាពយោធា ខ្មែរ-ថៃ នៅតាមតំបន់ជម្លោះព្រំដែន គឺស្ថិតក្នុងការទាក់ទងគ្នាល្អនៅឡើយ។
លោកឧត្ដមសេនីយ៍ ខេង សុមេធ ជាអគ្គស្នងការរងនគរបាលជាតិ ទទួលបន្ទុកព្រំដែនទិសប្រាសាទព្រះវិហារមានប្រសាសន៍ថា រហូតមកដល់ពេលនេះស្ថានភាពទាហាន ខ្មែរ-ថៃ តាមតំបន់ទល់មុខគ្នាមិនមានអ្វីគួរឱ្យព្រួយបារម្ភឡើយ៖ «អត់មានអីផង ស្ងប់ស្ងាត់ ទំនាក់ទំនងគ្នាធម្មតា។ មិនដែលមានអ្វីផង ពួកខ្ញុំទំនាក់ទំនងគ្នាធម្មតា គេក៏មករកយើងហើយយើងក៏ទៅគេ»។
ការប្រឈមមុខផ្នែកយោធាដាក់គ្នារវាង ខ្មែរ-ថៃ ក្នុងរឿងជម្លោះព្រំដែននៅខេត្តឧត្តរមានជ័យ និងនៅជិតប្រាសាទព្រះវិហារ ខេត្តព្រះវិហារបានស្ងប់ស្ងាត់រយៈពេលជាង៣ឆ្នាំហើយ ចាប់តាំងពីលោកស្រី យីងឡាក់ ស៊ីនណាវ៉ាត្រ ដែលជាប្អូនស្រីរបស់លោក ថាក់ ស៊ីន បានឡើងកាន់ដំណែងជានាយករដ្ឋមន្ត្រីថៃ។ ក៏ប៉ុន្តែកាលពីដើមសប្ដាហ៍នេះតុលាការធម្មនុញ្ញបានសម្រេចដកហូតតំណែង នាយករដ្ឋមន្ត្រីពីលោកស្រី យីងឡាក់។
បញ្ហានេះធ្វើឱ្យប្រមុខរដ្ឋាភិបាលកម្ពុជា សំដែងការព្រួយបារម្ភជុំវិញរឿងបញ្ហាជម្លោះព្រំដែនជាមួយប្រទេសថៃឡើងវិញ។
អង្គភាពព័ត៌មាន និងប្រតិកម្មរហ័សរបស់ទីស្ដីការគណរដ្ឋមន្ត្រី បានចេញសេចក្តីប្រកាសពត៌មានមួយឱ្យដឹងថា ក្នុងសម័យប្រជុំពេញអង្គនៃគណៈរដ្ឋមន្ត្រី កាលពីថ្ងៃទី៩ ខែឧសភា លោកនាយករដ្ឋមន្ត្រី ហ៊ុន សែន ណែនាំដល់កងកម្លាំងប្រដាប់អាវុធ និងអាជ្ញាធរដែនដីនៅតាមបណ្ដោយព្រំដែន កម្ពុជា-ថៃ ឱ្យរក្សាភាពស្ងប់ស្ងាត់ និងរក្សាទំនាក់ទំនងល្អជាមួយកងទ័ព ក៏ដូចជាអាជ្ញាធរដែនដី នៃព្រះរាជាណាចក្រថៃ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
