រដ្ឋាភិបាលកម្ពុជាអះអាងថាកំពុងរកទីផ្សារនាំអង្ករចេញទៅតំបន់អឺរ៉ុប
2015.02.20
ប្រមុខរដ្ឋាភិបាលកម្ពុជា បានឆ្លុះបញ្ចាំងពីបញ្ហាប្រឈមមួយចំនួនក្នុងសង្វាក់ផលិតកម្មជួញដូរស្រូវអង្ករនាំចេញ ដែលនាំឲ្យទិន្នផលនេះធ្លាក់ចុះ ចំណែកបញ្ហាបច្ចេកទេសកែច្នៃនៅមានកម្រិតនៅឡើយ។
ទន្ទឹមគ្នានេះ ក្រុមអ្នកផលិតស្រូវសរីរាង្គដែលដាំដុះតាមបច្ចេកទេសធម្មជាតិ គ្មានប្រើសារធាតុគីមី ស្នើសុំឲ្យរដ្ឋាភិបាលជួយបង្រៀនទាំងបច្ចេកទេស និងផ្តល់ប្រាក់កម្ចី មិនយកការប្រាក់ខ្ពស់ ឬជួយទិញស្រូវពីកសិករក្នុងតម្លៃអាចទូទាត់ថ្លៃឈ្នួលធ្វើស្រែបាន។
តម្លៃស្រូវនៅប្រទេសកម្ពុជា តែងតែធ្លាក់ក្រោម ១ពាន់រៀលជារៀងរាល់រដូវប្រមូលផល។ បញ្ហាតម្លៃស្រូវ មិនទាន់អាចតម្រូវទៅតាមការចង់បានរបស់អ្នកផលិតនេះ ត្រូវប្រមុខរដ្ឋាភិបាលកម្ពុជា អះអាងថា កំពុងតែស្វែងរកទីផ្សារនៅតំបន់អឺរ៉ុប ដើម្បីឲ្យអង្ករក្នុងប្រទេសកម្ពុជា មានតម្លៃខ្ពស់ជាងបច្ចុប្បន្ន ខណៈតម្លៃជួញដូរអង្ករកម្ពុជា អាចត្រឹមប្រកួតប្រជែងតែនៅក្នុងតំបន់អាស៊ាន។
លោកនាយករដ្ឋមន្ត្រី ហ៊ុន សែន ថ្លែងថា ប្រទេសម៉ាឡេស៊ី អាចទិញអង្ករកម្ពុជា ឯប្រទេសហ្វីលីពីន កំពុងចាប់ផ្ដើមរកទិញ។ លោកថា ការប្រកួតប្រជែងគុណភាពនៃការផលិតស្រូវអង្ករនៅកម្ពុជា អាចប្រណាំងប្រជែងក្នុងតំបន់អាស៊ានបាន ប៉ុន្តែគុណភាពកែច្នៃរបស់ខ្មែរ បានចាញ់វៀតណាម និងថៃ៖ «ព្រោះពិភពលោកបច្ចុប្បន្ននេះ បើនិយាយពីនៅក្នុងក្របខ័ណ្ឌអាស៊ានរបស់យើង លទ្ធផលប្រហែលៗគ្នា ប្រណាំងប្រជែងគ្នាតែគ្នាឯង។ វៀតណាម ក៏មានផលិតផលប្រហាក់ប្រហែលយើង ហើយគុណភាពគេខ្ពស់ជាងយើងទៅទៀត ប្រដាប់កែច្នៃរបស់គេ។ ថៃ ក៏មានផលិតផលប្រហាក់ប្រហែលយើង ហើយគេខ្ពស់ជាងយើងទៅទៀត។ ឡាវ ក៏មានផលិតផលប្រហាក់ប្រហែលយើង មីយ៉ាន់ម៉ា។ មានតែម៉ាឡេស៊ី និងហ្វីលីពីន ទេដែលអាចទិញអង្ករពីយើងនៅក្នុងក្របខ័ណ្ឌអាស៊ាននេះ។ ម៉ាឡេស៊ី ទិញ ហើយយើងកំពុងពិភាក្សាជាមួយហ្វីលីពីន មួយទៀត។ ហើយប្រទេសកំពុងអភិវឌ្ឍន៍ទាំងឡាយទាំងនៅអាស៊ី ទាំងអាហ្វ្រិក ទាំងអាមេរិកឡាទីន គឺផលិតស្បៀងអីប្រហាក់ប្រហែលគ្នា ដល់សម្រុកចូលទីផ្សារប្រទេសអ្នកមាន ប្រទេសអ្នកមាននាំគ្នាបង្អាប់ថ្លៃ»។
ពាក់ព័ន្ធនឹងកង្វះបច្ចេកទេសកែច្នៃដែលនាំឲ្យគុណភាពស្រូវអង្ករកម្ពុជា មិនទាន់អាចឈានទៅរកភាពជោគជ័យ ក្នុងការជួញដូរស្រូវនៅលើទីផ្សារពិភពលោក ត្រូវប្រធានក្រុមប្រឹក្សាសហគមន៍កសិកម្មខេត្តព្រះវិហារ លោក ធួន សាន ស្នើសុំឲ្យតម្លៃលក់ស្រូវធម្មជាតិនៅក្នុងខេត្តនោះមានតម្លៃខ្ពស់ ព្រោះស្រូវផលិតនៅសហគមន៍នោះមិនប្រើជីគីមី គឺដោយសារដីមានគុណភាពល្អរួចទៅហើយ៖ «សូមឲ្យសហព័ន្ធទាំងអស់ឲ្យជួយរកទីផ្សារឲ្យមានតម្លាភាព នៅស្រូវកសិករផលិតនៅក្នុងសហគមន៍នៅទូទាំងប្រទេស ព្រោះសព្វឆ្នាំតាមខ្ញុំពិនិត្យមើលទៅ ស្រូវអត់មានចុះថោកដូចឆ្នាំនេះទេ ស្រូវលក់ទាបបំផុត ១.២០០រៀល តែដល់ឆ្នាំនេះមានធ្លាក់ដល់ ១.០០០ (រៀល) ទាប នៃស្រូវផ្ការំដួល»។
ទោះជាមានការយកចិត្តទុកដាក់ពីប្រមុខដឹកនាំរដ្ឋាភិបាល ចង់បង្កើនតម្លៃស្រូវនៅកម្ពុជា ដើម្បីបង្កើនទីផ្សារនាំចេញបានច្រើនទៅលើពិភពលោកក៏ដោយ ក៏កង្វះបច្ចេកទេសកែច្នៃស្រូវ គឺជាក្តីកង្វល់របស់កសិករផលិតស្រូវសរីរាង្គនៅភូមិពញ្ញាអង្គរ ឃុំវត្តអង្គខាងជើង ស្រុកបន្ទាយមាស ខេត្តកំពត។
លោក បិញ ឈិន ប្រធានសហគមន៍អភិវឌ្ឍន៍កសិកម្មពញ្ញាអង្គរចម្រើនជ័យ ថ្លែងថា កង្វល់របស់កសិករ គឺការលក់ស្រូវនៅរដូវប្រមូលផលមានតម្លៃទាប រួមមានដូចជា ស្រូវចំណី ស្រូវមិនបានជាប់ចំណាត់ថ្នាក់ ដែលធ្វើឲ្យតម្លៃជួញដូរធ្លាក់ក្រោម ១ពាន់រៀល។ បញ្ហាតម្លៃលក់ស្រូវនេះ កសិករបានស្នើសុំឲ្យរដ្ឋាភិបាល ជួយចុះទិញស្រូវ ពិសេសសហព័ន្ធស្រូវអង្ករកម្ពុជា ក្រុមម៉ាស៊ីនស្រូវកម្ពុជា ជាដើម ដែលរដ្ឋាភិបាលឲ្យខ្ចីទុនក្នុងរបរជួញដូរស្រូវនោះ គួរជួយទិញស្រូវពីកសិករឲ្យមានតម្លៃខ្ពស់ជាងឈ្មួញដែលកំពុងបន្ថោកតម្លៃ ដើម្បីជួយលើកទឹកចិត្តអ្នកផលិតស្រូវផង និងជួយទប់ស្កាត់ការធ្វើចំណាកស្រុកផង។ ពួកគេលើកឡើងថា កសិករខកចិត្តនៅពេលដែលធ្វើស្រែពេញមួយរដូវ ហើយយកស្រូវទៅលក់វិញ មិនអាចទូទាត់ថ្លៃឈ្នួលពលកម្ម ឬថ្លៃជួលធ្វើស្រែបាននោះ៖ «រាល់ថ្ងៃនេះអត់ទាន់មានការកំណត់ទេ សហព័ន្ធអត់ទាន់មានការទំនាក់ទំនងដាក់កំណត់ថាឥឡូវ យើងភូមិមួយផលិតផលមួយ ឧទាហរណ៍ឥឡូវ យើងធ្វើពូជអីនៅក្នុងសហគមន៍។ សហគមន៍ណា យើងធ្វើពូជអី សហគមន៍ណាធ្វើអីអ៊ីចឹង អត់ទាន់មានកំណត់ទេ។ សព្វថ្ងៃចំពោះការប្រឈមរបស់កសិករប្រឈមខ្លាំង គឺប៉ះពាល់នឹងការបម្រែបម្រួលអាកាសធាតុ ប៉ះពាល់បញ្ហាទឹកភ្លៀងវាធ្លាក់ដោយអត់ទៀងទាត់។ ជួនណាដើមរដូវ ត្រូវកសិករបង្កបង្កើនផល អត់ភ្លៀង ជិតចង់ផុតរដូវបានភ្លៀង គឺភ្លៀងនោះកសិករគាត់ធ្វើស្រែ វាចង់ហួសរដូវ។ អាស្រូវបើថាសហព័ន្ធទិញស្រូវត្រូវខ្លាំង គឺស្រូវផ្ការំដួល ផ្កាម្លិះ ដូចជាឆ្នាំនេះ ទឹកភ្លៀងដល់ខែ១០ បានៗស្ទូង កសិករចង់ហួសរដូវហើយ។ ដល់ខែ១១ ច្រូត ហើយដើមខែ១១ ត្រូវច្រូតហើយអាស្រូវផ្ការំដួល ផ្កាម្លិះ នេះ»។
ដើម្បីជួយលើកទឹកចិត្ត និងជួយដល់កសិករអ្នកផលិតស្រូវនោះ រដ្ឋមន្ត្រីក្រសួងពាណិជ្ជកម្ម លោក ស៊ុន ចាន់ថុល ថ្លែងថា រដ្ឋាភិបាលគ្រោងខ្ចីប្រាក់ ៣០០លានដុល្លារពីធនាគារចិន ដើម្បីសង់ឃ្លាំងស្តុកស្រូវ និងឡសម្ងួតស្រូវ ៤០កន្លែងនៅក្នុងប្រទេសកម្ពុជា សម្រាប់ជំរុញការនាំអង្ករចេញ៖ «អាចមានការលំបាកបន្តិចដើម្បីឲ្យបាន ១លានតោន ដោយសារឆ្នាំមុននេះយើងលក់បានតែ ៣៨៧ពាន់ទេ ឆ្នាំ២០១៣ លក់បាន ៣៧៨ពាន់តោន។ ដូច្នេះមានការកើនឡើងតែ ២% ទេ។ អ៊ីចឹងពីកើនពី ៣៨៧ពាន់ ទៅ ១លានតោន ប្រហែលជាអាចមានការលំបាកបន្តិច នេះយើងត្រូវតែហ៊ាននិយាយ។ តែទោះជាយ៉ាងណាក៏ដោយ ក៏យើងខ្ញុំក្រសួងពាណិជ្ជកម្ម ក៏ដូចជាសហព័ន្ធស្រូវអង្ករកម្ពុជា នឹងខិតខំប្រឹងប្រែងរកកូតាថែមទៀតពីប្រទេសចិន។ ពីដើមយើងចុះកុងត្រាតែ ១០ម៉ឺនតោនក្នុង ១ឆ្នាំ ឥឡូវយើងកំពុងទាមទារស្នើសុំឲ្យគេផ្តល់កូតាឲ្យបានខ្ពស់ជាងហ្នឹងបន្តិចទៀត ខែក្រោយនេះយើងខ្ញុំនឹងទៅទស្សនកិច្ចនៅប្រទេសរុស្ស៊ី ដើម្បីពិភាក្សាចរចាលក់កសិផលទៅរុស្សី ថែមទៀត។ ដូច្នេះអាចមានឃើញការកើនឡើងថែមទៀតលើការនាំចេញកសិផលរបស់យើងទៅប្រទេសផ្សេងៗមួយចំនួនទៀត»។
នៅក្នុងមហាសន្និបាតប្រចាំឆ្នាំលើកទី១ របស់សហព័ន្ធស្រូវអង្ករកម្ពុជា ប្រធានសហព័ន្ធ លោក សុខ ពុទ្ធីវុធ ថ្លែងថា សហព័ន្ធស្រូវអង្ករកម្ពុជា ខំធ្វើយ៉ាងណាដើម្បីឲ្យអង្ករកម្ពុជា បង្កើននូវភាពប្រកួតប្រជែងកាន់តែខ្លាំង និងធានាគុណភាពខ្ពស់ក្នុងទីផ្សារអន្តរជាតិ។ ដើម្បីសម្រេចគោលដៅនេះ សហព័ន្ធស្រូវអង្ករកម្ពុជា សហការជាមួយរដ្ឋាភិបាល និងដៃគូអភិវឌ្ឍន៍ ជំរុញឲ្យកសិករដាំដុះពូជស្រូវមួយដែលមានគុណភាពខ្ពស់ ឆ្លើយតបទៅនឹងតម្រូវការរបស់ទីផ្សារ ស្របពេលដែលអង្ករក្រអូបប្រទេសកម្ពុជា ទទួលបានជ័យលាភីលេខ១ ចំនួន ៣ឆ្នាំជាប់គ្នា តាំងពីឆ្នាំ២០១២ មក។ នៅឆ្នាំ២០១៤ កម្ពុជា ទើបនាំអង្ករចេញបានជាង ៣៨ម៉ឺនតោនប៉ុណ្ណោះ គឺកើនឡើងតែ ២% បើធៀបនឹងឆ្នាំ២០១៣ កន្លងមក៕