ជម្លោះ​រវាង​សហជីព​ស៊ីខាវឌូ​និង​សហជីព​មោទនភាព​កម្មករ​ខ្មែរ

សហជីព​ចំនួន​២ គឺ​សម្ព័ន្ធ​សហជីព​ប្រជាធិបតេយ្យ​កម្មករ​កាត់​ដេរ​កម្ពុជា ស៊ីខាវឌូ (C-CAWDU) និង​សហជីព​មោទនភាព​កម្មករ​ខ្មែរ បាន​រួម​គ្នា​ធ្វើ​ការ​តវ៉ា ដើម្បី​ជួយ​ទាម​ទារ​សិទ្ធិ និង​ផល​ប្រយោជន៍​ឲ្យ​កម្មករ​កាត់​ដេរ​រោងចក្រ​អ៊ីហ្គាមិន (E Garment) នៅ​ខេត្ត​កណ្ដាល។ ប៉ុន្តែ​សហជីព​ទាំង​ពីរ​នោះ​បាន​បង្ក​ជម្លោះ​វាយ​តប់​គ្នា ក្រោយ​ពេល​បញ្ចប់​សកម្មភាព​តវ៉ា។
ដោយ អ៊ុក សាវបូរី
2013-02-23
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល

សម្ព័ន្ធ​សហជីព​ប្រជាធិបតេយ្យ​កម្មករ​កាត់​ដេរ​កម្ពុជា និង​សហជីព​មោទនភាព​កម្មករ​ខ្មែរ ដែល​ការពារ​សិទ្ធិ​ឲ្យ​កម្មករ​រោងចក្រ​កាត់​ដេរ​អ៊ីហ្គាមិន បាន​ដាក់​ពាក្យ​ប្ដឹង​គ្នា​ទៅ​វិញ​ទៅ​មក​រឿង​បង្ក​របួស​ស្នាម​ទៅ​អាជ្ញាធរ​ឃុំ​ស្វាយរលំ ស្រុក​ស្អាង ខេត្ត​កណ្ដាល នៅ​ថ្ងៃ​ទី២២ ខែ​កុម្ភៈ។

ការ​ដាក់​ពាក្យ​ប្ដឹង​គ្នា​នេះ បន្ទាប់​ពី​សហជីព​ទាំង​២​បាន​អះអាង​រៀងៗ​ខ្លួន​ថា សហជីព​ម្ខាង​ចោទ​ថា​ចោរ​ប្លន់ ឯ​ម្ខាង​ទៀត​ថា​ជេរ​គេ ទើប​មាន​ជម្លោះ​វាយ​តប់ កាល​ពី​ល្ងាច​ម៉ោង​ជិត​៥ ថ្ងៃ​ទី២១ ខែ​កុម្ភៈ។

តំណាង​សហជីព​ស៊ីខាវឌូ លោក ចាន់ ពៅ ថ្លែង​ថា នៅ​ល្ងាច​ថ្ងៃ​ទី២១ ខែ​កុម្ភៈ ក្រោយ​ពី​កម្មករ​កាត់​ដេរ​រោងចក្រ​អ៊ីហ្គាមិន បញ្ចប់​ការ​តវ៉ា ដែល​ពួក​គាត់​អ្នក​ឃ្លាំ​មើល និង​គាំទ្រ​ការ​តវ៉ា​នោះ គាត់​បាន​ជិះ​ម៉ូតូ​ត្រឡប់​មក​ការិយាល័យ​សហជីព​នៅ​ភ្នំពេញ​វិញ ស្រាប់​តែ​ធ្វើ​ដំណើរ​មក​ដល់​ភូមិ​លេខ​១ ឃុំ​ស្វាយរលំ ស្រុក​ស្អាង ខេត្ត​កណ្ដាល ក្រុម​សហជីព​មោទនភាព​កម្មករ​ខ្មែរ បាន​លើក​គ្នា​ប្រមាណ ២០​នាក់ ជិះ​ម៉ូតូ ១០​គ្រឿង ស្ទាក់​វាយ​ពួក​គាត់ បង្ក​ឲ្យ​មាន​របួស​ធ្ងន់ និង​ស្រាល ៧​នាក់។

ពួក​គាត់​បាន​ដឹក​អ្នក​របួស​ទៅ​មន្ទីរពេទ្យ​បាយ័ន តែ​ពេទ្យ​មិន​ទទួល គាត់​ដឹក​បញ្ជូន​ទៅ​មន្ទីរពេទ្យ​កាល់ម៉ែត្រ​ទៀត។ លោក ចាន់ ពៅ បន្ត​ថា បញ្ហា​នេះ​លោក​បាន​ដាក់​ពាក្យ​ប្ដឹង​ទៅ​អាជ្ញាធរ​ឃុំ​ស្វាយរលំ និង​ប៉ូលិស​ខេត្ត​កណ្ដាល ឲ្យ​ជួយ​ដោះស្រាយ៖ «ហើយ​ពួក​វា​វ៉ៃ​ពួក​ខ្ញុំ ប្រដាប់​ទៅ​ដោយ​អាវុធ​មាន​បំពង់​ទីប ដំបង​ដំ​ដោយ​ដែកគោល និង​ឥដ្ឋតាន់​មួយ​កំណាត់ៗ​ហ្នឹង គេ​កាន់​មក​សម្រាប់​វ៉ៃ​យើង​ដូច​ស្នាប់​ដៃ​អីចឹង បាន​យើង​របួស​ធ្ងន់ធ្ងរ​ហ្នឹង»

លោក ប៊ុត ប៊ុនឈាន អាយុ ៣០​ឆ្នាំ បញ្ចប់​មហាវិទ្យាល័យ​ច្បាប់ និង​ជា​សមាជិក​សហជីព​ស៊ីខាវឌូ ថ្លែង​ថា គាត់​បាន​រង​របួស​ជា​ទម្ងន់ និង​មិត្ត​រួម​ការងារ ៣​នាក់​ទៀត របួស​ធ្ងន់​ដែរ សរុប​អ្នក​រង​របួស​ធ្ងន់ និង​ស្រាល ៧​នាក់។ លោក​អំពាវនាវ​សុំ​ឲ្យ​អាជ្ញាធរ​ខេត្ត​កណ្ដាល និង​រដ្ឋាភិបាល​ទប់ស្កាត់​អំពើ​ឆ្មក់​វាយ​មនុស្ស​កណ្ដាល​ផ្លូវ​នេះ និង​សូម​ឲ្យ​មាន​ការ​ដោះស្រាយ​បណ្ដឹង​ពួក​គាត់​ឲ្យ​មាន​យុត្តិធម៌​ស្រប​តាម​ច្បាប់៖ «ខ្ញុំ​ត្រូវ​ទាម​ទារ​ក្នុង​សិទ្ធិ​សេរីភាព​ជាមួយ​ថៅកែ ហើយ​ក្នុង​នាម​សហជីព គេ​ហ្នឹង គឺ​គេ​ការពារ​ប្រយោជន៍​ឲ្យ​ថៅកែ អីចឹង​គេ​អត់​ពេញ​ចិត្ត​នូវ​អ្វី​ដែល​យើង​ទាម​ទារ​ឲ្យ​កម្មករ​ទេ។ បើ​គេ​ជា​សហជីព​ដែល​ហៅ​ថា​សហជីព​ការពារ​កម្មករ​នោះ គេ​នឹង​ចូល​រួម​ក៏​ដូច​ជា​ជួយ​ជំរុញ​ឲ្យ​ការ​អនុវត្ត​ហ្នឹង​មាន​ភាព​ល្អ​ប្រសើរ ប៉ុន្តែ​នេះ​មិន​មែន​អីចឹង​ទេ គឺ​គេ​ការពារ​ឲ្យ​ថៅកែ គេ​មិន​ចង់​ឲ្យ​យើង​ទាម​ទារ»

អនុប្រធាន​សហជីព​មោទនភាព​កម្មករ​ខ្មែរ លោក រុំ វាសនា បាន​បដិសេធ​ថា មិន​បាន​បង្ក​ការ​វាយ​ដំ​ទៅ​សមាជិក​សហជីព​ស៊ីខាវឌូ ទេ។ លោក​ថា ក្រុម​គាត់​បញ្ចប់​ការ​តវ៉ា​ក៏​ត្រឡប់​ទៅ​ផ្ទះ​ដែរ។ ប៉ុន្តែ​ខាង​សហជីព​ស៊ីខាវឌូ ជេរ​កម្មករ​ដែល​កំពុង​ទទួល​ទាន​អាហារ​នៅ​តាម​ផ្លូវ។ ក្រោយ​មក ក៏​មាន​ការ​ដេញ​វាយ​គ្នា ហើយ​មាន​ឮ​ពាក្យ​ស្រែក​ថា មាន​ចោរ​ប្លន់​ទៀត។ គាត់​ឮ​ដូច្នេះ ក៏​ឈប់​ម៉ូតូ​ជួយ​មើល ស្រាប់​តែ​ខាង​សហជីព​ស៊ីខាវឌូ នោះ ស្ទុះ​មក​បង្ក​ជម្លោះ​ជាមួយ​គាត់ ទើប​មាន​ការ​វាយ​បក​ការពារ​ខ្លួន តែ​មិន​បង្ក​ឲ្យ​មនុស្ស​របួស​ធ្ងន់​ទេ ព្រោះ​ក្រុម​ស៊ីខាវឌូ រត់​ចូល​ផ្ទះ​ប្រជាជន​ភូមិ​លេខ​១ ឲ្យ​គេ​ជួយ។

លោក រុំ វាសនា៖ «រត់​ទៅ​សួរ​ថា មាន​ប្លន់​កន្លែង​ណា អ្ហែង​ចេះ​តែ​បង្ខូច​អីចឹង។ ហើយ​ដល់​អីចឹង​ទៅ វា​រត់​ចូល​ទៅ​ក្នុង​ផ្ទះ​គេ វា​ទាញ​ស្នប់​មក​រក​វ៉ៃ​កូន​ចៅ​ខ្ញុំ​ហ្នឹង កូន​ចៅ​ខ្ញុំ​ក៏​បាន​ការពារ​ខ្លួន​ដែរ វា​ទៅ​ទាញ​អា​ដំបង​ជន្ទល់​ផ្ទះ​ប្រវែង​ណា​ណី ចេញ​រាង​ក្រឡាៗ​មក​ការពារ​ខ្លួន​ហ្នឹង ហើយ​អត់​មាន​បាន​ទៅ​ប្រតាយប្រតប់​វ៉ៃ​គ្នា​ឯ​ណា»

ប្រធាន​សហជីព​មោទនភាព​កម្មករ​ខ្មែរ លោក ហុង សម្បត្តិ ថ្លែង​ថា សហជីព​នេះ​បាន​ដាក់​ពាក្យ​ប្ដឹង​សហជីព​ស៊ីខាវឌូ ថា​មាន​រំលោភ​សិទ្ធិ​ពួក​គាត់ ដើម្បី​ឲ្យ​អាជ្ញាធរ​ឃុំ​ស្វាយរលំ ជួយ​ដោះស្រាយ។

វិទ្យុ​អាស៊ីសេរី មិន​អាច​ទំនាក់​ទំនង​អាជ្ញាធរ​ឃុំ​ស្វាយរលំ ស្រុក​ស្អាង ជម្រាប​សួរ​ព័ត៌មាន​ចោទ​ដាក់​គ្នា​នៃ​សហជីព​ទាំង​២​នោះ​បាន​ទេ នៅ​ថ្ងៃ​សុក្រ ទី២២ ខែ​កុម្ភៈ។

បុគ្គលិក​រោងចក្រ​កាត់​ដេរ​អ៊ីហ្គាមិន សុំ​មិន​បញ្ចេញ​ឈ្មោះ ថ្លែង​ថា កម្មករ​បាន​ធ្វើ​កូដកម្ម​ទាម​ទារ​ផល​ប្រយោជន៍ ១៤​ចំណុច និង​សុំ​ដំឡើង​ប្រាក់​ខែ​គោល​ពី​ជាង ៦០​ដុល្លារ ទៅ​ជិត ១០០​ដុល្លារ តាំង​ពី​ថ្ងៃ​ទី២៤ ខែ​មករា មក​ដល់​ពេល​នេះ។ លោក​ថា ទោះ​ជា​មាន​សហជីព​ឈ្លោះ​គ្នា​យ៉ាង​ណា ក៏​កម្មករ ៩៥% ក្នុង​ចំណោម​កម្មករ​ជិត ៤ពាន់​នាក់ បាន​ចូល​ធ្វើ​ការ​ជា​ធម្មតា៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (2)
  • បោះពុម្ព
  • ចែករំលែក
  • អ៊ីម៉ែល

អ្នក​អាន​អនាមិក

ស៊ីខៅឌូបានជួយដល់កម្មករ ច្រើនណាស់ចុះហេតុអ្វី បានជាសហជីពស៊ីខៅឌូ ដ៏ដូចជាមន្ត្រីសហជីពតែងតែរងគ្រោះបែបនេះ ចាំមើលតើដំណោះស្រាយយុត្តិធម៌បែបណា?

Feb 25, 2013 10:50 PM

Sokha

ពី P.P

សហជីព ស៊ីខៅឌូ ដើធ្វើកូដកម្មធ្វើឲ្យកម្មករបាត់ខែ អត់លុយចាយ ប្រធានសហជីព ស៊ី ខៅឌូ លោក អាត់ ធន់ ជិៈឡានទំនើម

Feb 23, 2013 03:40 AM