បទល្មើសគ្រឿងញៀនកំពុងកើនឡើងខ្លាំងនៅខេត្តកំពង់ឆ្នាំង
2015.07.11
និមិត្តរូបនៃខេត្តកំពង់ឆ្នាំង
របាយការណ៍របស់អាជ្ញាធរបង្ក្រាបបទល្មើសគ្រឿងញៀន បង្ហាញថា បទល្មើសប្រភេទនេះ កំពុងកើតមានច្រើននៅក្នុងមូលដ្ឋាននៃខេត្តកំពង់ឆ្នាំង។ បញ្ហានេះបានធ្វើឲ្យប្រជាពលរដ្ឋ និងមន្ត្រីអង្គការក្រៅរដ្ឋាភិបាលខ្លះ សម្ដែងក្ដីបារម្ភផង និងសាទរចំពោះសកម្មភាពចុះបង្ក្រាបបទល្មើសគ្រឿងញៀន របស់អាជ្ញាធរមានសមត្ថកិច្ចផង។
ស្នងការរងទទួលបន្ទុកបង្ក្រាបបទល្មើសសេដ្ឋកិច្ច និងគ្រឿងញៀន នៃស្នងការដ្ឋាននគរបាលខេត្តកំពង់ឆ្នាំង បានបង្ហាញរបាយការណ៍បទល្មើសគ្រឿងញៀនរបស់ខ្លួនរយៈពេល ៧ខែ ក្នុងឆ្នាំ២០១៥។ សមត្ថកិច្ចបង្ក្រាបបាន ៤៧ករណី ឃាត់ខ្លួនមនុស្សប្រុសស្រីចំនួន ១០៧នាក់ ជាមួយនឹងថ្នាំញៀនប្រភេទម៉ាគ្រាប់ ៧០គ្រាប់ ម៉ាទឹកកក ២៣០កញ្ចប់តូច អាវុធកែច្នៃចំនួន ៥ដើម និងវត្ថុតាងមួយចំនួនទៀត។
ករណីជួញដូរ និងប្រើប្រាស់គ្រឿងញៀននៅដើមឆ្នាំ២០១៥ បានកើនឡើង ២១ករណី បើប្រៀបធៀបរយៈពេលដូចគ្នាកាលពីឆ្នាំ២០១៤ ដែលកាលណោះឃាត់ខ្លួនមនុស្សបាន ១៤នាក់ និងវត្ថុតាងមួយចំនួន។
ប្រធានការិយាល័យកណ្ដាលប្រឆាំងបទល្មើសលោក ជុន ថារិទ្ធ បដិសេធមិនអត្ថាធិប្បាយបន្ថែមលើរបាយការណ៍បង្ក្រាបបទល្មើសគ្រឿងញៀននេះទេ នៅថ្ងៃទី១០ ខែកក្កដា ដោយលោកប្រាប់ថា រាល់បទសម្ភាសន៍ទាក់ទងនឹងគ្រឿងញៀនទាល់តែមានការអនុញ្ញាតពីអគ្គស្នងការនគរបាលជាតិជាមុន។ ប៉ុន្ដែលោកបង្ហើបថា កំពង់ឆ្នាំង មិនមែនជាទីតាំងផលិតគ្រឿងញៀនទេ ប៉ុន្តែវាបានរងឥទ្ធិពលពីប្រទេសជិតខាង តាមរយៈការនាំចូល និងចែកចាយរបស់ឧក្រិដ្ឋជននៅតាមក្រុងខ្លះនៃប្រទេសកម្ពុជា។
លោកថា អាជ្ញាធរមានសមត្ថកិច្ចបានខ្នះខ្នែងទប់ស្កាត់បញ្ហាគ្រឿងញៀន តាមរយៈវិធានការចុះត្រួតពិនិត្យផ្ទះសំណាក់ ឬបន្ទប់ជួល ដាក់កម្លាំងល្បាតតាមគោលដៅសំខាន់ៗ កំណត់មុខសញ្ញាបន្ដតាមដានលើជនដែលទើបចេញពីពន្ធនាគារទាក់ទងគ្រឿងញៀន និងវិធានការផ្សព្វផ្សាយតាមគ្រឹះស្ថានសិក្សា។
ទាក់ទងនឹងបញ្ហាគ្រឿងញៀននេះដែរ ប្រធានសមាគមសង្គ្រោះជនរងគ្រោះដោយគ្រឿងញៀនកម្ពុជា (DARAC) លោក មាស សុវណ្ណ ថ្លែងថា ករណីបង្ក្រាប និងឃាត់ខ្លួនអ្នកពាក់ព័ន្ធគ្រឿងញៀន បានកើនឡើងគ្រប់ទីកន្លែង ដែលតួលេខកើនឡើងនេះអាចបណ្ដាលមកពីករណីប្រើប្រាស់គ្រឿងញៀនក្នុងប្រទេសកើតមានច្រើនជាងមុន និងមួយទៀត មកពីសមត្ថកិច្ចសកម្មក្នុងការចុះបង្ក្រាបបទល្មើសជាងមុន។
លោកបញ្ជាក់ថា គ្រាន់តែរយៈពេល ៦ខែដើមឆ្នាំ២០១៥ មណ្ឌលរបស់លោកទទួលជនរងគ្រោះដោយគ្រឿងញៀនចំនួន ១៨១នាក់ ដែលរយៈពេលមួយឆ្នាំពេញកាលពីឆ្នាំ២០១៤ ខាងលោកទទួលបានតែជាង ៣០០នាក់។ ប៉ុន្ដែលោកសង្ឃឹមថា ចាប់ពីឆ្នាំ២០១៦ តទៅករណីគ្រឿងញៀនអាចនឹងថយចុះច្រើន បើអាជ្ញាធរមានសមត្ថកិច្ចនៅតែបន្តប្រឹងប្រែងបង្ក្រាបបទល្មើសដូចនៅដើមឆ្នាំ២០១៥ នេះ៖ «ខ្ញុំគិតថា បើសិនរួមគ្នាយ៉ាងសកម្មរបស់ក្រុមជំនាញទាំងអស់ គឺថ្នាក់ជាតិ ចុះដល់ថ្នាក់ក្រោមជាតិ ហើយរួមដៃជាមួយសហគមន៍ដូចជា មេភូមិ មេឃុំ និងចៅហ្វាយស្រុក ត្រូវសហការគ្នា ដើម្បីយើងកាត់បន្ថយ ជាពិសេសយុវវ័យនៅតាមសហគមន៍កុំបណ្ដែតបណ្ដោយឲ្យគាត់ធ្វើតាមចិត្ត»។
ក្រោយពីការប្រកាសវិធានការរួមគ្នារបស់ប្រទេសជាសមាជិកអាស៊ានកាលពីឆ្នាំ២០១២ ថា "អាស៊ានគ្មានគ្រឿងញៀន" ប្រទេសកម្ពុជា ដែលជាសមាជិកមួយដែរនោះ នៅមានភាពអសកម្មក្នុងការបង្ក្រាបបទល្មើសនៅឡើយ ប៉ុន្តែចាប់ពីដើមឆ្នាំ២០១៥ មក គេឃើញអាជ្ញាធរមានសមត្ថកិច្ចរបស់កម្ពុជា បានចេញបេសកកម្មបង្ក្រាបបទល្មើសគ្រឿងញៀនទ្រង់ទ្រាយធំដែលខ្លួនមិនធ្លាប់ធ្វើពីមុនមក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
